മഹിമ്നഃ പാരം തേ പരമവിദുഷോ യദ്യസദൃശീ സ്തുതിർബ്രഹ്മാദീനാമപി തദവസന്നാസ്ത്വയി ഗിരഃ । അഥാഽവാച്യഃ സർവഃ സ്വമതിപരിണാമാവധി ഗൃണൻ മമാപ്യേഷ സ്തോത്രേ ഹര നിരപവാദഃ പരികരഃ ॥ 1 ॥ അതീതഃ പന്ഥാനം തവ ച മഹിമാ വാങ്മനസയോഃ അതദ്വ്യാവൃത്ത്യാ യം ചകിതമഭിധത്തേ ശ്രുതിരപി । സ കസ്യ സ്തോതവ്യഃ കതിവിധഗുണഃ കസ്യ വിഷയഃ പദേ ത്വർവാചീനേ പതതി ന മനഃ കസ്യ ന വചഃ ॥ 2 ॥ മധുസ്ഫീതാ വാചഃ പരമമമൃതം നിർമിതവതഃ തവ ബ്രഹ്മൻ​ കിം വാഗപി സുരഗുരോർവിസ്മയപദം । മമ ത്വേതാം വാണീം ഗുണകഥനപുണ്യേന ഭവതഃ പുനാമീത്യർഥേഽസ്മിൻ പുരമഥന ബുദ്ധിർവ്യവസിതാ ॥ 3 ॥ തവൈശ്വര്യം യത്തജ്ജഗദുദയരക്ഷാപ്രലയകൃത് ത്രയീവസ്തു വ്യസ്തം തിസ്രുഷു ഗുണഭിന്നാസു തനുഷു । അഭവ്യാനാമസ്മിൻ വരദ രമണീയാമരമണീം വിഹന്തും വ്യാക്രോശീം വിദധത ഇഹൈകേ ജഡധിയഃ ॥ 4 ॥ കിമീഹഃ കിങ്കായഃ സ ഖലു കിമുപായസ്ത്രിഭുവനം കിമാധാരോ ധാതാ സൃജതി കിമുപാദാന ഇതി ച । അതർക്യൈശ്വര്യേ ത്വയ്യനവസര ദുഃസ്ഥോ ഹതധിയഃ കുതർകോഽയം കാംശ്ചിത് മുഖരയതി മോഹായ ജഗതഃ ॥ 5 ॥ അജന്മാനോ ലോകാഃ കിമവയവവന്തോഽപി ജഗതാം അധിഷ്ഠാതാരം കിം ഭവവിധിരനാദൃത്യ ഭവതി । അനീശോ വാ കുര്യാദ് ഭുവനജനനേ കഃ പരികരോ യതോ മന്ദാസ്ത്വാം പ്രത്യമരവര സംശേരത ഇമേ ॥ 6 ॥ ത്രയീ സാംഖ്യം യോഗഃ പശുപതിമതം വൈഷ്ണവമിതി പ്രഭിന്നേ പ്രസ്ഥാനേ പരമിദമദഃ പഥ്യമിതി ച । രുചീനാം വൈചിത്ര്യാദൃജുകുടില നാനാപഥജുഷാം നൃണാമേകോ ഗമ്യസ്ത്വമസി പയസാമർണവ ഇവ ॥ 7 ॥ മഹോക്ഷഃ ഖട്വാംഗം പരശുരജിനം ഭസ്മ ഫണിനഃ കപാലം ചേതീയത്തവ വരദ തന്ത്രോപകരണം । സുരാസ്താം താമൃദ്ധിം ദധതി തു ഭവദ്ഭൂപ്രണിഹിതാം ന ഹി സ്വാത്മാരാമം വിഷയമൃഗതൃഷ്ണാ ഭ്രമയതി ॥ 8 ॥ ധ്രുവം കശ്ചിത് സർവം സകലമപരസ്ത്വധ്രുവമിദം പരോ ധ്രൗവ്യാഽധ്രൗവ്യേ ജഗതി ഗദതി വ്യസ്തവിഷയേ । സമസ്തേഽപ്യേതസ്മിൻ പുരമഥന തൈർവിസ്മിത ഇവ സ്തുവൻ​ ജിഹ്രേമി ത്വാം ന ഖലു നനു ധൃഷ്ടാ മുഖരതാ ॥ 9 ॥ തവൈശ്വര്യം യത്നാദ് യദുപരി വിരിഞ്ചിർഹരിരധഃ പരിച്ഛേതും യാതാവനലമനലസ്കന്ധവപുഷഃ । തതോ ഭക്തിശ്രദ്ധാ-ഭരഗുരു-ഗൃണദ്ഭ്യാം ഗിരിശ യത് സ്വയം തസ്ഥേ താഭ്യാം തവ കിമനുവൃത്തിർന ഫലതി ॥ 10 ॥ അയത്നാദാസാദ്യ ത്രിഭുവനമവൈരവ്യതികരം ദശാസ്യോ യദ്ബാഹൂനഭൃത രണകണ്ഡൂ-പരവശാൻ । ശിരഃപദ്മശ്രേണീ-രചിതചരണാംഭോരുഹ-ബലേഃ സ്ഥിരായാസ്ത്വദ്ഭക്തേസ്ത്രിപുരഹര വിസ്ഫൂർജിതമിദം ॥ 11 ॥ അമുഷ്യ ത്വത്സേവാ-സമധിഗതസാരം ഭുജവനം ബലാത് കൈലാസേഽപി ത്വദധിവസതൗ വിക്രമയതഃ । അലഭ്യാ പാതാലേഽപ്യലസചലിതാംഗുഷ്ഠശിരസി പ്രതിഷ്ഠാ ത്വയ്യാസീദ് ധ്രുവമുപചിതോ മുഹ്യതി ഖലഃ ॥ 12 ॥ യദൃദ്ധിം സുത്രാമ്ണോ വരദ പരമോച്ചൈരപി സതീം അധശ്ചക്രേ ബാണഃ പരിജനവിധേയത്രിഭുവനഃ । ന തച്ചിത്രം തസ്മിൻ വരിവസിതരി ത്വച്ചരണയോഃ ന കസ്യാപ്യുന്നത്യൈ ഭവതി ശിരസസ്ത്വയ്യവനതിഃ ॥ 13 ॥ അകാണ്ഡ-ബ്രഹ്മാണ്ഡ-ക്ഷയചകിത-ദേവാസുരകൃപാ വിധേയസ്യാഽഽസീദ്​ യസ്ത്രിനയന വിഷം സംഹൃതവതഃ । സ കല്മാഷഃ കണ്ഠേ തവ ന കുരുതേ ന ശ്രിയമഹോ വികാരോഽപി ശ്ലാഘ്യോ ഭുവന-ഭയ- ഭംഗ- വ്യസനിനഃ ॥ 14 ॥ അസിദ്ധാർഥാ നൈവ ക്വചിദപി സദേവാസുരനരേ നിവർതന്തേ നിത്യം ജഗതി ജയിനോ യസ്യ വിശിഖാഃ । സ പശ്യന്നീശ ത്വാമിതരസുരസാധാരണമഭൂത് സ്മരഃ സ്മർതവ്യാത്മാ ന ഹി വശിഷു പഥ്യഃ പരിഭവഃ ॥ 15 ॥ മഹീ പാദാഘാതാദ് വ്രജതി സഹസാ സംശയപദം പദം വിഷ്ണോർഭ്രാമ്യദ് ഭുജ-പരിഘ-രുഗ്ണ-ഗ്രഹ- ഗണം । മുഹുർദ്യൗർദൗസ്ഥ്യം യാത്യനിഭൃത-ജടാ-താഡിത-തടാ ജഗദ്രക്ഷായൈ ത്വം നടസി നനു വാമൈവ വിഭുതാ ॥ 16 ॥ വിയദ്വ്യാപീ താരാ-ഗണ-ഗുണിത-ഫേനോദ്ഗമ-രുചിഃ പ്രവാഹോ വാരാം യഃ പൃഷതലഘുദൃഷ്ടഃ ശിരസി തേ । ജഗദ്ദ്വീപാകാരം ജലധിവലയം തേന കൃതമിതി അനേനൈവോന്നേയം ധൃതമഹിമ ദിവ്യം തവ വപുഃ ॥ 17 ॥ രഥഃ ക്ഷോണീ യന്താ ശതധൃതിരഗേന്ദ്രോ ധനുരഥോ രഥാംഗേ ചന്ദ്രാർകൗ രഥ-ചരണ-പാണിഃ ശര ഇതി । ദിധക്ഷോസ്തേ കോഽയം ത്രിപുരതൃണമാഡംബര-വിധിഃ വിധേയൈഃ ക്രീഡന്ത്യോ ന ഖലു പരതന്ത്രാഃ പ്രഭുധിയഃ ॥ 18 ॥ ഹരിസ്തേ സാഹസ്രം കമല ബലിമാധായ പദയോഃ യദേകോനേ തസ്മിൻ​ നിജമുദഹരന്നേത്രകമലം । ഗതോ ഭക്ത്യുദ്രേകഃ പരിണതിമസൗ ചക്രവപുഷഃ ത്രയാണാം രക്ഷായൈ ത്രിപുരഹര ജാഗർതി ജഗതാം ॥ 19 ॥ ക്രതൗ സുപ്തേ ജാഗ്രത്​ ത്വമസി ഫലയോഗേ ക്രതുമതാം ക്വ കർമ പ്രധ്വസ്തം ഫലതി പുരുഷാരാധനമൃതേ । അതസ്ത്വാം സമ്പ്രേക്ഷ്യ ക്രതുഷു ഫലദാന-പ്രതിഭുവം ശ്രുതൗ ശ്രദ്ധാം ബധ്വാ ദൃഢപരികരഃ കർമസു ജനഃ ॥ 20 ॥ ക്രിയാദക്ഷോ ദക്ഷഃ ക്രതുപതിരധീശസ്തനുഭൃതാം ഋഷീണാമാർത്വിജ്യം ശരണദ സദസ്യാഃ സുര-ഗണാഃ । ക്രതുഭ്രംശസ്ത്വത്തഃ ക്രതുഫല-വിധാന-വ്യസനിനഃ ധ്രുവം കർതുഃ ശ്രദ്ധാ-വിധുരമഭിചാരായ ഹി മഖാഃ ॥ 21 ॥ പ്രജാനാഥം നാഥ പ്രസഭമഭികം സ്വാം ദുഹിതരം ഗതം രോഹിദ്​ ഭൂതാം രിരമയിഷുമൃഷ്യസ്യ വപുഷാ । ധനുഷ്പാണേര്യാതം ദിവമപി സപത്രാകൃതമമും ത്രസന്തം തേഽദ്യാപി ത്യജതി ന മൃഗവ്യാധരഭസഃ ॥ 22 ॥ സ്വലാവണ്യാശംസാ ധൃതധനുഷമഹ്നായ തൃണവത് പുരഃ പ്ലുഷ്ടം ദൃഷ്ട്വാ പുരമഥന പുഷ്പായുധമപി । യദി സ്ത്രൈണം ദേവീ യമനിരത-ദേഹാർധ-ഘടനാത് അവൈതി ത്വാമദ്ധാ ബത വരദ മുഗ്ധാ യുവതയഃ ॥ 23 ॥ ശ്മശാനേഷ്വാക്രീഡാ സ്മരഹര പിശാചാഃ സഹചരാഃ ചിതാ-ഭസ്മാലേപഃ സ്രഗപി നൃകരോടീ-പരികരഃ । അമംഗല്യം ശീലം തവ ഭവതു നാമൈവമഖിലം തഥാപി സ്മർതൄണാം വരദ പരമം മംഗലമസി ॥ 24 ॥ മനഃ പ്രത്യക്ചിത്തേ സവിധമവിധായാത്ത-മരുതഃ പ്രഹൃഷ്യദ്രോമാണഃ പ്രമദ-സലിലോത്സംഗതി-ദൃശഃ । യദാലോക്യാഹ്ലാദം ഹ്രദ ഇവ നിമജ്യാമൃതമയേ ദധത്യന്തസ്തത്ത്വം കിമപി യമിനസ്തത് കില ഭവാൻ ॥ 25 ॥ ത്വമർകസ്ത്വം സോമസ്ത്വമസി പവനസ്ത്വം ഹുതവഹഃ ത്വമാപസ്ത്വം വ്യോമ ത്വമു ധരണിരാത്മാ ത്വമിതി ച । പരിച്ഛിന്നാമേവം ത്വയി പരിണതാ ബിഭ്രതി ഗിരം ന വിദ്മസ്തത്തത്ത്വം വയമിഹ തു യത് ത്വം ന ഭവസി ॥ 26 ॥ ത്രയീം തിസ്രോ വൃത്തീസ്ത്രിഭുവനമഥോ ത്രീനപി സുരാൻ അകാരാദ്യൈർവർണൈസ്ത്രിഭിരഭിദധത് തീർണവികൃതി । തുരീയം തേ ധാമ ധ്വനിഭിരവരുന്ധാനമണുഭിഃ സമസ്തം വ്യസ്തം ത്വാം ശരണദ ഗൃണാത്യോമിതി പദം ॥ 27 ॥ ഭവഃ ശർവോ രുദ്രഃ പശുപതിരഥോഗ്രഃ സഹമഹാൻ തഥാ ഭീമേശാനാവിതി യദഭിധാനാഷ്ടകമിദം । അമുഷ്മിൻ പ്രത്യേകം പ്രവിചരതി ദേവ ശ്രുതിരപി പ്രിയായാസ്മൈധാമ്നേ പ്രണിഹിത-നമസ്യോഽസ്മി ഭവതേ ॥ 28 ॥ നമോ നേദിഷ്ഠായ പ്രിയദവ ദവിഷ്ഠായ ച നമഃ നമഃ ക്ഷോദിഷ്ഠായ സ്മരഹര മഹിഷ്ഠായ ച നമഃ । നമോ വർഷിഷ്ഠായ ത്രിനയന യവിഷ്ഠായ ച നമഃ നമഃ സർവസ്മൈ തേ തദിദമതിസർവായ ച നമഃ ॥ 29 ॥ ബഹുല-രജസേ വിശ്വോത്പത്തൗ ഭവായ നമോ നമഃ പ്രബല-തമസേ തത് സംഹാരേ ഹരായ നമോ നമഃ । ജന-സുഖകൃതേ സത്ത്വോദ്രിക്തൗ മൃഡായ നമോ നമഃ പ്രമഹസി പദേ നിസ്ത്രൈഗുണ്യേ ശിവായ നമോ നമഃ ॥ 30 ॥ കൃശ-പരിണതി-ചേതഃ ക്ലേശവശ്യം ക്വ ചേദം ക്വ ച തവ ഗുണ-സീമോല്ലംഘിനീ ശശ്വദൃദ്ധിഃ । ഇതി ചകിതമമന്ദീകൃത്യ മാം ഭക്തിരാധാദ് വരദ ചരണയോസ്തേ വാക്യ-പുഷ്പോപഹാരം ॥ 31 ॥ അസിത-ഗിരി-സമം സ്യാത് കജ്ജലം സിന്ധു-പാത്രേ സുര-തരുവര-ശാഖാ ലേഖനീ പത്രമുർവീ । ലിഖതി യദി ഗൃഹീത്വാ ശാരദാ സർവകാലം തദപി തവ ഗുണാനാമീശ പാരം ന യാതി ॥ 32 ॥ അസുര-സുര-മുനീന്ദ്രൈരർചിതസ്യേന്ദു-മൗലേഃ ഗ്രഥിത-ഗുണമഹിമ്നോ നിർഗുണസ്യേശ്വരസ്യ । സകല-ഗണ-വരിഷ്ഠഃ പുഷ്പദന്താഭിധാനഃ രുചിരമലഘുവൃത്തൈഃ സ്തോത്രമേതച്ചകാര ॥ 33 ॥ അഹരഹരനവദ്യം ധൂർജടേഃ സ്തോത്രമേതത് പഠതി പരമഭക്ത്യാ ശുദ്ധ-ചിത്തഃ പുമാൻ യഃ । സ ഭവതി ശിവലോകേ രുദ്രതുല്യസ്തഥാഽത്ര പ്രചുരതര-ധനായുഃ പുത്രവാൻ കീർതിമാംശ്ച ॥ 34 ॥ മഹേശാന്നാപരോ ദേവോ മഹിമ്നോ നാപരാ സ്തുതിഃ । അഘോരാന്നാപരോ മന്ത്രോ നാസ്തി തത്ത്വം ഗുരോഃ പരം ॥ 35 ॥ ദീക്ഷാ ദാനം തപസ്തീർഥം ജ്ഞാനം യാഗാദികാഃ ക്രിയാഃ । മഹിമ്നസ്തവ പാഠസ്യ കലാം നാർഹന്തി ഷോഡശീം ॥ 36 ॥ കുസുമദശന-നാമാ സർവ-ഗന്ധർവ-രാജഃ ശശിധരവര-മൗലേർദേവദേവസ്യ ദാസഃ । സ ഖലു നിജ-മഹിമ്നോ ഭ്രഷ്ട ഏവാസ്യ രോഷാത് സ്തവനമിദമകാർഷീദ് ദിവ്യ-ദിവ്യം മഹിമ്നഃ ॥ 37 ॥ സുരഗുരുമഭിപൂജ്യ സ്വർഗ-മോക്ഷൈക-ഹേതും പഠതി യദി മനുഷ്യഃ പ്രാഞ്ജലിർനാന്യ-ചേതാഃ । വ്രജതി ശിവ-സമീപം കിന്നരൈഃ സ്തൂയമാനഃ സ്തവനമിദമമോഘം പുഷ്പദന്തപ്രണീതം ॥ 38 ॥ ആസമാപ്തമിദം സ്തോത്രം പുണ്യം ഗന്ധർവ-ഭാഷിതം । അനൗപമ്യം മനോഹാരി സർവമീശ്വരവർണനം ॥ 39 ॥ ഇത്യേഷാ വാങ്മയീ പൂജാ ശ്രീമച്ഛങ്കര-പാദയോഃ । അർപിതാ തേന ദേവേശഃ പ്രീയതാം മേ സദാശിവഃ ॥ 40 ॥ തവ തത്ത്വം ന ജാനാമി കീദൃശോഽസി മഹേശ്വര । യാദൃശോഽസി മഹാദേവ താദൃശായ നമോ നമഃ ॥ 41 ॥ ഏകകാലം ദ്വികാലം വാ ത്രികാലം യഃ പഠേന്നരഃ । സർവപാപ-വിനിർമുക്തഃ ശിവ ലോകേ മഹീയതേ ॥ 42 ॥ ശ്രീ പുഷ്പദന്ത-മുഖ-പങ്കജ-നിർഗതേന സ്തോത്രേണ കിൽബിഷ-ഹരേണ ഹര-പ്രിയേണ । കണ്ഠസ്ഥിതേന പഠിതേന സമാഹിതേന സുപ്രീണിതോ ഭവതി ഭൂതപതിർമഹേശഃ ॥ 43 ॥ ॥ ഇതി ശ്രീ പുഷ്പദന്ത വിരചിതം ശിവമഹിമ്നഃ സ്തോത്രം സമാപ്തം ॥