svargataḥ sukhakarī divaukasāṃ śailarājatanayā'tivallabhā । ḍhuṇḍhibhairavavidāritavighnā viśvanāthanagarī garīyasī ॥ 1 ॥ yatra dehapatanena dehināṃ muktireva bhavatīti niścitam । pūrvapuṇya nicayena labhyate viśvanāthanagarī garīyasī ॥ 2 ॥ sarvadā'maragaṇaiścavanditā yā gajendramukhavāritavighnā । kālabhairavakṛtaikaśāsanā viśvanāthanagarī garīyasī ॥ 3 ॥ yatra tīrthamamalā maṇikarṇikā yā sadāśiva sukhapradāyinī । yā śivena racitā nijāyudhaiḥ viśvanāthanagarī garīyasī ॥ 4 ॥ sarvatīrthakṛtamajjanapuṇyairjanmajanmasukṛtaiḥ khalu labhyā । prāpyate bhava bhavārtināśini viśvanāthanagarī garīyasī ॥ 5 ॥ yatra muktirakhilaistu jantubhirlabhyate maraṇamātrataḥ sadā । nākhilāmaragaṇaiścavanditā viśvanāthanagarī garīyasī ॥ 6 ॥ yatra śakranagarī tanīyasī yatra dhātṛnagarī kanīyasī । yatra keśavapurī laghīyasī viśvanāthanagarī garīyasī ॥ 7 ॥ yatra devataṭinī prathīyasī yatra viśvajananī paṭīyasī । yatra bhairavakṛtirbalīyasī viśvanāthanagarī garīyasī ॥ 8 ॥ viśvanāthanagarīstavaṃ śubhaṃ yaḥ paṭhet prayatamānasaḥ sadā । putradāragṛhalābhamavyayaṃ muktimārgamanaghaṃ labhetsadā ॥ 9 ॥