asya śrī śivakavaca stotra mahāmantrasya । ṛṣabha-yogīśvara ṛṣiḥ । anuṣṭup chandaḥ । śrī-sāmbasadāśivo devatā । oṃ bījam । namaḥ śaktiḥ । śivāyeti kīlakam । sāmbasadāśivaprītyarthe jape viniyogaḥ ॥ karanyāsaḥ – oṃ sadāśivāya aṅguṣṭhābhyāṃ namaḥ । naṃ gaṅgādharāya tarjanībhyāṃ namaḥ । maṃ mṛtyuñjayāya madhyamābhyāṃ namaḥ । śiṃ śūlapāṇaye anāmikābhyāṃ namaḥ । vāṃ pinākapāṇaye kaniṣṭhikābhyāṃ namaḥ । yaṃ umāpataye karatalakarapṛṣṭhābhyāṃ namaḥ । hṛdayādi aṅganyāsaḥ – oṃ sadāśivāya hṛdayāya namaḥ । naṃ gaṅgādharāya śirase svāhā । maṃ mṛtyuñjayāya śikhāyai vaṣaṭ । śiṃ śūlapāṇaye kavacāya hum । vāṃ pinākapāṇaye netratrayāya vauṣaṭ । yaṃ umāpataye astrāya phaṭ । bhūrbhuvassuvaromiti digbandhaḥ ॥ dhyānam – vajradaṃṣṭraṃ trinayanaṃ kālakaṇṭha marindamam । sahasrakara-matyugraṃ vande śambhuṃ umāpatim ॥ rudrākṣa-kaṅkaṇa-lasatkara-daṇḍayugmaḥ pālāntarā-lasita-bhasmadhṛta-tripuṇḍraḥ । pañcākṣaraṃ paripaṭhan varamantrarājaṃ dhyāyan sadā paśupatiṃ śaraṇaṃ vrajethāḥ ॥ ataḥ paraṃ sarvapurāṇa-guhyaṃ niḥśeṣa-pāpaughaharaṃ pavitram । jayapradaṃ sarva-vipatpramocanaṃ vakṣyāmi śaivaṃ kavacaṃ hitāya te ॥ pañcapūjā – laṃ pṛthivyātmane gandhaṃ samarpayāmi । haṃ ākāśātmane puṣpaiḥ pūjayāmi । yaṃ vāyvātmane dhūpaṃ āghrāpayāmi । raṃ agnyātmane dīpaṃ darśayāmi । vaṃ amṛtātmane amṛtaṃ mahā-naivedyaṃ nivedayāmi । saṃ sarvātmane sarvopacāra-pūjāṃ samarpayāmi ॥ mantraḥ ॥ ṛṣabha uvāca – namaskṛtya mahādevaṃ viśva-vyāpina-mīśvaram । vakṣye śivamayaṃ varma sarvarakṣākaraṃ nṛṇām ॥ 1 ॥ śucau deśe samāsīno yathāvatkalpitāsanaḥ । jitendriyo jitaprāṇa-ścintayecchivamavyayam ॥ 2 ॥ hṛtpuṇḍarīkāntarasanniviṣṭaṃ svatejasā vyāpta-nabho'vakāśam । atīndriyaṃ sūkṣmamanantamādyaṃ dhyāyetparānandamayaṃ maheśam ॥ 3 ॥ dhyānāvadhūtākhilakarmabandha- -ściraṃ cidānandanimagnacetāḥ । ṣaḍakṣaranyāsasamāhitātmā śaivena kuryātkavacena rakṣām ॥ 4 ॥ māṃ pātu devo'khiladevatātmā saṃsārakūpe patitaṃ gabhīre । tannāma divyaṃ varamantramūlaṃ dhunotu me sarvamaghaṃ hṛdistham ॥ 5 ॥ sarvatra māṃ rakṣatu viśvamūrti- -rjyoti-rmayānandaghanaścidātmā । aṇoraṇīyānuruśaktirekaḥ sa īśvaraḥ pātu bhayādaśeṣāt ॥ 6 ॥ yo bhūsvarūpeṇa bibharti viśvaṃ pāyātsa bhūmergiriśo'ṣṭamūrtiḥ । yo'pāṃ svarūpeṇa nṛṇāṃ karoti sañjīvanaṃ so'vatu māṃ jalebhyaḥ ॥ 7 ॥ kalpāvasāne bhuvanāni dagdhvā sarvāṇi yo nṛtyati bhūrilīlaḥ । sa kālarudro'vatu māṃ davāgne- -rvātyādibhīte-rakhilācca tāpāt ॥ 8 ॥ pradīpta-vidyutkanakāvabhāso vidyāvarābhīti-kuṭhārapāṇiḥ । caturmukhastatpuruṣastrinetraḥ prācyāṃ sthito rakṣatu māmajasram ॥ 9 ॥ kuṭhāra kheṭāṅkuśapāśaśūla kapālapāśākṣa guṇāndadhānaḥ । caturmukho nīla-rucistrinetraḥ pāyādaghoro diśi dakṣiṇasyām ॥ 10 ॥ kundendu-śaṅkha-sphaṭikāvabhāso vedākṣamālā-varadābhayāṅkaḥ । tryakṣaścaturvaktra uruprabhāvaḥ sadyo'dhijāto'vatu māṃ pratīcyām ॥ 11 ॥ varākṣa-mālābhayaṭaṅka-hastaḥ saroja-kiñjalkasamānavarṇaḥ । trilocana-ścārucaturmukho māṃ pāyādudīcyāṃ diśi vāmadevaḥ ॥ 12 ॥ vedābhayeṣṭāṅkuśaṭaṅkapāśa- -kapālaḍhakkākṣara-śūlapāṇiḥ । sitadyutiḥ pañcamukho'vatānmā- -mīśāna ūrdhvaṃ paramaprakāśaḥ ॥ 13 ॥ mūrdhānamavyānmama candramauliḥ phālaṃ mamāvyādatha phālanetraḥ । netre mamāvyādbhaganetrahārī nāsāṃ sadā rakṣatu viśvanāthaḥ ॥ 14 ॥ pāyācchrutī me śrutigītakīrtiḥ kapolamavyātsatataṃ kapālī । vaktraṃ sadā rakṣatu pañcavaktro jihvāṃ sadā rakṣatu vedajihvaḥ ॥ 15 ॥ kaṇṭhaṃ girīśo'vatu nīlakaṇṭhaḥ pāṇidvayaṃ pātu pinākapāṇiḥ । dormūlamavyānmama dharmabāhuḥ vakṣaḥsthalaṃ dakṣamakhāntako'vyāt ॥ 16 ॥ mamodaraṃ pātu girīndradhanvā madhyaṃ mamāvyānmadanāntakārī । herambatāto mama pātu nābhiṃ pāyātkaṭiṃ dhūrjaṭirīśvaro me ॥ 17 ॥ ūrudvayaṃ pātu kuberamitro jānudvayaṃ me jagadīśvaro'vyāt । jaṅghāyugaṃ puṅgavaketuravyā- -tpādau mamāvyātsuravandyapādaḥ ॥ 18 ॥ maheśvaraḥ pātu dinādiyāme māṃ madhyayāme'vatu vāmadevaḥ । trilocanaḥ pātu tṛtīyayāme vṛṣadhvajaḥ pātu dināntyayāme ॥ 19 ॥ pāyānniśādau śaśiśekharo māṃ gaṅgādharo rakṣatu māṃ niśīthe । gaurīpatiḥ pātu niśāvasāne mṛtyuñjayo rakṣatu sarvakālam ॥ 20 ॥ antaḥsthitaṃ rakṣatu śaṅkaro māṃ sthāṇuḥ sadā pātu bahiḥsthitaṃ mām । tadantare pātu patiḥ paśūnāṃ sadāśivo rakṣatu māṃ samantāt ॥ 21 ॥ tiṣṭhanta-mavyādbhuvanaikanāthaḥ pāyādvrajantaṃ pramathādhināthaḥ । vedāntavedyo'vatu māṃ niṣaṇṇaṃ māmavyayaḥ pātu śivaḥ śayānam ॥ 22 ॥ mārgeṣu māṃ rakṣatu nīlakaṇṭhaḥ śailādi-durgeṣu puratrayāriḥ । araṇyavāsādi-mahāpravāse pāyānmṛgavyādha udāraśaktiḥ ॥ 23 ॥ kalpānta-kālogra-paṭuprakopaḥ sphuṭāṭṭa-hāsoccalitāṇḍa-kośaḥ । ghorāri-senārṇavadurnivāra- -mahābhayādrakṣatu vīrabhadraḥ ॥ 24 ॥ pattyaśvamātaṅga-rathāvarūdhinī- -sahasra-lakṣāyuta-koṭibhīṣaṇam । akṣauhiṇīnāṃ śatamātatāyināṃ chindyānmṛḍo ghorakuṭhāradhārayā ॥ 25 ॥ nihantu dasyūnpralayānalārci- -rjvalattriśūlaṃ tripurāntakasya । śārdūla-siṃharkṣavṛkādi-hiṃsrān santrāsayatvīśa-dhanuḥ pinākaḥ ॥ 26 ॥ dussvapna duśśakuna durgati daurmanasya durbhikṣa durvyasana dussaha duryaśāṃsi । utpāta-tāpa-viṣabhīti-masadgrahārtiṃ vyādhīṃśca nāśayatu me jagatāmadhīśaḥ ॥ 27 ॥ oṃ namo bhagavate sadāśivāya sakala-tattvātmakāya sarva-mantra-svarūpāya sarva-yantrādhiṣṭhitāya sarva-tantra-svarūpāya sarva-tattva-vidūrāya brahma-rudrāvatāriṇe-nīlakaṇṭhāya pārvatī-manoharapriyāya soma-sūryāgni-locanāya bhasmoddhūlita-vigrahāya mahāmaṇi-mukuṭa-dhāraṇāya māṇikya-bhūṣaṇāya sṛṣṭisthiti-pralayakāla-raudrāvatārāya dakṣādhvara-dhvaṃsakāya mahākāla-bhedanāya mūladhāraika-nilayāya tatvātītāya gaṅgādharāya sarva-devādi-devāya ṣaḍāśrayāya vedānta-sārāya trivarga-sādhanāya anantakoṭi-brahmāṇḍa-nāyakāya ananta-vāsuki-takṣaka-karkoṭaka-śaṅkha-kulika-padma-mahāpadmeti-aṣṭa-mahā-nāga-kulabhūṣaṇāya praṇavasvarūpāya cidākāśāya ākāśa-dik-svarūpāya graha-nakṣatra-māline sakalāya kalaṅka-rahitāya sakala-lokaika-kartre sakala-lokaika-bhartre sakala-lokaika-saṃhartre sakala-lokaika-gurave sakala-lokaika-sākṣiṇe sakala-nigamaguhyāya sakala-vedānta-pāragāya sakala-lokaika-varapradāya sakala-lokaika-śaṅkarāya sakala-duritārti-bhañjanāya sakala-jagadabhayaṅkarāya śaśāṅka-śekharāya śāśvata-nijāvāsāya nirākārāya nirābhāsāya nirāmayāya nirmalāya nirlobhāya nirmadāya niścintāya nirahaṅkārāya niraṅkuśāya niṣkalaṅkāya nirguṇāya niṣkāmāya nirūpaplavāya niravadhyāya nirantarāya nirupadravāya niravadyāya nirantarāya niṣkāraṇāya nirātaṅkāya niṣprapañcāya nissaṅgāya nirdvandvāya nirādhārāya nīrāgāya niśkrodhāya nirlobhāya niṣpāpāya nirvikalpāya nirbhedāya niṣkriyāya nistulāya niśśaṃśayāya nirañjanāya nirupama-vibhavāya nitya-śuddha-buddha-mukta-paripūrṇa-saccidānandādvayāya parama-śānta-svarūpāya parama-śānta-prakāśāya tejorūpāya tejomayāya tejo'dhipataye jaya jaya rudra mahārudra mahā-raudra bhadrāvatāra mahā-bhairava kāla-bhairava kalpānta-bhairava kapāla-mālādhara khaṭvāṅga-carma-khaḍga-dhara pāśāṅkuśa-ḍamarūśūla-cāpa-bāṇa-gadā-śakti-bhindi- pāla-tomara-musala-bhuśuṇḍī-mudgara-pāśa-parigha-śataghnī-cakrādyāyudha-bhīṣaṇākāra sahasra-mukha daṃṣṭrākarāla-vadana vikaṭāṭṭahāsa visphātita-brahmāṇḍa-maṇḍala-nāgendrakuṇḍala nāgendrahāra nāgendravalaya nāgendracarmadhara nāgendraniketana mṛtyuñjaya tryambaka tripurāntaka viśvarūpa virūpākṣa viśveśvara vṛṣabhavāhana viṣavibhūṣaṇa viśvatomukha sarvatomukha māṃ rakṣa rakṣa jvala jvala prajvala prajvala mahāmṛtyubhayaṃ śamaya śamaya apamṛtyubhayaṃ nāśaya nāśaya rogabhayaṃ utsādaya utsādaya viṣasarpabhayaṃ śamaya śamaya corān māraya māraya mama śatrūn uccāṭaya uccāṭaya triśūlena vidāraya vidāraya kuṭhāreṇa bhindhi bhindhi khaḍgena chinddi chinddi khaṭvāṅgena vipodhaya vipodhaya mama pāpaṃ śodhaya śodhaya musalena niṣpeṣaya niṣpeṣaya bāṇaiḥ santāḍaya santāḍaya yakṣa rakṣāṃsi bhīṣaya bhīṣaya aśeṣa bhūtān vidrāvaya vidrāvaya kūṣmāṇḍa-bhūta-betāla-mārīgaṇa-brahmarākṣasa-gaṇān santrāsaya santrāsaya mama abhayaṃ kuru kuru naraka-mahābhayān māṃ uddhara uddhara vitrastaṃ māṃ āśvāsaya āśvāsaya amṛta-kaṭākṣa-vīkṣaṇena māṃ ālokaya ālokaya sañjīvaya sañjīvaya kṣuttṛṣṇārtaṃ māṃ āpyāyaya āpyāyaya duḥkhāturaṃ māṃ ānandaya ānandaya śivakavacena māṃ ācchādaya ācchādaya hara hara hara hara mṛtyuñjaya tryambaka sadāśiva paramaśiva namaste namaste namaste namaḥ ॥ hṛdayādi nyāsaḥ – oṃ sadāśivāya hṛdayāya namaḥ । naṃ gaṅgādharāya śirase svāhā । maṃ mṛtyuñjayāya śikhāyai vaṣaṭ । śiṃ śūlapāṇaye kavacāya hum । vāṃ pinākapāṇaye netratrayāya vauṣaṭ । yaṃ umāpataye astrāya phaṭ । bhūrbhuvassuvaromiti digvimokaḥ ॥ dhyānam – vajradaṃṣṭraṃ trinayanaṃ kālakaṇṭha marindamam । sahasrakara-matyugraṃ vande śambhuṃ umāpatim ॥ rudrākṣa-kaṅkaṇa-lasatkara-daṇḍayugmaḥ pālāntarā-lasita-bhasmadhṛta-tripuṇḍraḥ । pañcākṣaraṃ paripaṭhan varamantrarājaṃ dhyāyan sadā paśupatiṃ śaraṇaṃ vrajethāḥ ॥ ataḥ paraṃ sarvapurāṇa-guhyaṃ niḥśeṣa-pāpaughaharaṃ pavitram । jayapradaṃ sarva-vipatpramocanaṃ vakṣyāmi śaivaṃ kavacaṃ hitāya te ॥ pañcapūjā – laṃ pṛthivyātmane gandhaṃ samarpayāmi । haṃ ākāśātmane puṣpaiḥ pūjayāmi । yaṃ vāyvātmane dhūpaṃ āghrāpayāmi । raṃ agnyātmane dīpaṃ darśayāmi । vaṃ amṛtātmane amṛtaṃ mahā-naivedyaṃ nivedayāmi । saṃ sarvātmane sarvopacāra-pūjāṃ samarpayāmi ॥ phalaśrutiḥ ॥ ṛṣabha uvāca – ityetatkavacaṃ śaivaṃ varadaṃ vyāhṛtaṃ mayā । sarva-bādhā-praśamanaṃ rahasyaṃ sarvadehinām ॥ 1 ॥ yaḥ sadā dhārayenmartyaḥ śaivaṃ kavacamuttamam । na tasya jāyate kvāpi bhayaṃ śambhoranugrahāt ॥ 2 ॥ kṣīṇāyu-rmṛtyumāpanno mahārogahato'pi vā । sadyaḥ sukhamavāpnoti dīrghamāyuśca vindati ॥ 3 ॥ sarvadāridryaśamanaṃ saumāṅgalya-vivardhanam । yo dhatte kavacaṃ śaivaṃ sa devairapi pūjyate ॥ 4 ॥ mahāpātaka-saṅghātairmucyate copapātakaiḥ । dehānte śivamāpnoti śiva-varmānubhāvataḥ ॥ 5 ॥ tvamapi śraddhayā vatsa śaivaṃ kavacamuttamam । dhārayasva mayā dattaṃ sadyaḥ śreyo hyavāpsyasi ॥ 6 ॥ sūta uvāca – ityuktvā ṛṣabho yogī tasmai pārthiva-sūnave । dadau śaṅkhaṃ mahārāvaṃ khaḍgaṃ cāriniṣūdanam ॥ 7 ॥ punaśca bhasma sammantrya tadaṅgaṃ sarvato'spṛśat । gajānāṃ ṣaṭsahasrasya dviguṇaṃ ca balaṃ dadau ॥ 8 ॥ bhasmaprabhāvātsamprāpya balaiśvaryadhṛtismṛtiḥ । sa rājaputraḥ śuśubhe śaradarka iva śriyā ॥ 9 ॥ tamāha prāñjaliṃ bhūyaḥ sa yogī rājanandanam । eṣa khaḍgo mayā dattastapomantrānubhāvataḥ ॥ 10 ॥ śitadhāramimaṃ khaḍgaṃ yasmai darśayasi sphuṭam । sa sadyo mriyate śatruḥ sākṣānmṛtyurapi svayam ॥ 11 ॥ asya śaṅkhasya nihrādaṃ ye śṛṇvanti tavāhitāḥ । te mūrchitāḥ patiṣyanti nyastaśastrā vicetanāḥ ॥ 12 ॥ khaḍgaśaṅkhāvimau divyau parasainyavināśinau । ātmasainyasvapakṣāṇāṃ śauryatejovivardhanau ॥ 13 ॥ etayośca prabhāvena śaivena kavacena ca । dviṣaṭsahasranāgānāṃ balena mahatāpi ca ॥ 14 ॥ bhasmadhāraṇasāmarthyācchatrusainyaṃ vijeṣyasi । prāpya siṃhāsanaṃ paitryaṃ goptāsi pṛthivīmimām ॥ 15 ॥ iti bhadrāyuṣaṃ samyaganuśāsya samātṛkam । tābhyāṃ sampūjitaḥ so'tha yogī svairagatiryayau ॥ 16 ॥ iti śrī skāndapurāṇe tṛtīye brahmottarakhaṇḍe śivakavacakathanaṃ nāma dvādaśo'dhyāyaḥ ॥