ದರ್ಶನಾದಭ್ರಸದಸಿ ಜನನಾತ್ಕಮಲಾಲಯೇ । ಕಾಶ್ಯಾಂ ತು ಮರಣಾನ್ಮುಕ್ತಿಃ ಸ್ಮರಣಾದರುಣಾಚಲೇ ॥ 1 ॥ ಕರುಣಾಪೂರಿತಾಪಾಂಗಂ ಶರಣಾಗತವತ್ಸಲಮ್ । ತರುಣೇಂದುಜಟಾಮೌಲಿಂ ಸ್ಮರಣಾದರುಣಾಚಲಮ್ ॥ 2 ॥ ಸಮಸ್ತಜಗದಾಧಾರಂ ಸಚ್ಚಿದಾನಂದವಿಗ್ರಹಮ್ । ಸಹಸ್ರರಥಸೋಪೇತಂ ಸ್ಮರಣಾದರುಣಾಚಲಮ್ ॥ 3 ॥ ಕಾಂಚನಪ್ರತಿಮಾಭಾಸಂ ವಾಂಛಿತಾರ್ಥಫಲಪ್ರದಮ್ । ಮಾಂ ಚ ರಕ್ಷ ಸುರಾಧ್ಯಕ್ಷಂ ಸ್ಮರಣಾದರುಣಾಚಲಮ್ ॥ 4 ॥ ಬದ್ಧಚಂದ್ರಜಟಾಜೂಟಮರ್ಧನಾರೀಕಲೇಬರಮ್ । ವರ್ಧಮಾನದಯಾಂಭೋಧಿಂ ಸ್ಮರಣಾದರುಣಾಚಲಮ್ ॥ 5 ॥ ಕಾಂಚನಪ್ರತಿಮಾಭಾಸಂ ಸೂರ್ಯಕೋಟಿಸಮಪ್ರಭಮ್ । ಬದ್ಧವ್ಯಾಘ್ರಪುರೀಧ್ಯಾನಂ ಸ್ಮರಣಾದರುಣಾಚಲಮ್ ॥ 6 ॥ ಶಿಕ್ಷಯಾಖಿಲದೇವಾರಿ ಭಕ್ಷಿತಕ್ಷ್ವೇಲಕಂಧರಮ್ । ರಕ್ಷಯಾಖಿಲಭಕ್ತಾನಾಂ ಸ್ಮರಣಾದರುಣಾಚಲಮ್ ॥ 7 ॥ ಅಷ್ಟಭೂತಿಸಮಾಯುಕ್ತಮಿಷ್ಟಕಾಮಫಲಪ್ರದಮ್ । ಶಿಷ್ಟಭಕ್ತಿಸಮಾಯುಕ್ತಾನ್ ಸ್ಮರಣಾದರುಣಾಚಲಮ್ ॥ 8 ॥ ವಿನಾಯಕಸುರಾಧ್ಯಕ್ಷಂ ವಿಷ್ಣುಬ್ರಹ್ಮೇಂದ್ರಸೇವಿತಮ್ । ವಿಮಲಾರುಣಪಾದಾಬ್ಜಂ ಸ್ಮರಣಾದರುಣಾಚಲಮ್ ॥ 9 ॥ ಮಂದಾರಮಲ್ಲಿಕಾಜಾತಿಕುಂದಚಂಪಕಪಂಕಜೈಃ । ಇಂದ್ರಾದಿಪೂಜಿತಾಂ ದೇವೀಂ ಸ್ಮರಣಾದರುಣಾಚಲಮ್ ॥ 10 ॥ ಸಂಪತ್ಕರಂ ಪಾರ್ವತೀಶಂ ಸೂರ್ಯಚಂದ್ರಾಗ್ನಿಲೋಚನಮ್ । ಮಂದಸ್ಮಿತಮುಖಾಂಭೋಜಂ ಸ್ಮರಣಾದರುಣಾಚಲಮ್ ॥ 11 ॥ ಇತಿ ಶ್ರೀಅರುಣಾಚಲಾಷ್ಟಕಮ್ ॥