शारदा प्रार्थना

नमस्ते शारदे देवि काश्मीरपुरवासिनि ।

त्वामहं प्रार्थये नित्यं विद्यादानं च देहि मे ॥ 1 ॥

या श्रद्धा धारणा मेधा वाग्देवी विधिवल्लभा ।

भक्तजिह्वाग्रसदना शमादिगुणदायिनी ॥ 2 ॥

नमामि यामिनीं नाथलेखालङ्कृतकुन्तलाम् ।

भवानीं भवसन्तापनिर्वापणसुधानदीम् ॥ 3 ॥

भद्रकाल्यै नमो नित्यं सरस्वत्यै नमो नमः ।

वेदवेदाङ्गवेदान्तविद्यास्थानेभ्य एव च ॥ 4 ॥

ब्रह्मस्वरूपा परमा ज्योतिरूपा सनातनी ।

सर्वविद्याधिदेवी या तस्यै वाण्यै नमो नमः ॥ 5 ॥

यया विना जगत् सर्वं शश्वज्जीवन्मृतं भवेत् ।

ज्ञानाधिदेवी या तस्यै सरस्वत्यै नमो नमः ॥ 6 ॥

यया विना जगत् सर्वं मूकमुन्मत्तवत् सदा ।

या देवी वागधिष्ठात्री तस्यै वाण्यै नमो नमः ॥ 7 ॥

इति श्री शारदा प्रार्थना ॥

Recite with devotion and pure heart

Regular practice brings spiritual benefits