amalā viśvavandyā sā kamalākaramālinī । vimalābhranibhā vo'vyāt kamalā yā sarasvatī ॥ 1 ॥ vārṇasaṃsthāṅgarūpā yā svarṇaratnavibhūṣitā । nirṇayā bhārati śvetavarṇā vo'vyāt sarasvatī ॥ 2 ॥ varadābhayarudrākṣavarapustakadhāriṇī । sarasā sā sarojasthā sārā vo'vyāt sarāsvatī ॥ 3 ॥ sundarī sumukhī padmamandirā madhurā ca sā । kundabhāsā sadā vo'vyādvanditā yā sarasvatī ॥ 4 ॥ rudrākṣalipitā kumbhamudrādhṛtakarāmbujā । bhadrārthadāyinī sāvyādbhadrābjākṣī sarasvatī ॥ 5 ॥ raktakauśeyaratnāḍhyā vyaktabhāṣaṇabhūṣaṇā । bhaktahṛtpadmasaṃsthā sā śaktā vo'vyāt sarasvatī ॥ 6 ॥ caturmukhasya jāyā yā caturvedasvarūpiṇī । caturbhujā ca sā vo'vyāccaturvargā sarasvatī ॥ 7 ॥ sarvalokaprapūjyā yā parvacandranibhānanā । sarvajihvāgrasaṃsthā sā sadā vo'vyāt sarasvatī ॥ 8 ॥ sarasvatyaṣṭakaṃ nityaṃ sakṛt prātarjapennaraḥ । ajñairvimucyate so'yaṃ prājñairiṣṭaśca labhyate ॥ 9 ॥ iti śrī sarasvatyaṣṭakam ॥