യമുനാ ആഷ്ടകം

മുരാരികായകാലിമാലലാമവാരിധാരിണീ

തൃണീകൃതത്രിവിഷ്ടപാ ത്രിലോകശോകഹാരിണീ ।

മനോഽനുകൂലകൂലകുഞ്ജപുഞ്ജധൂതദുർമദാ

ധുനോതു മേ മനോമലം കലിന്ദനന്ദിനീ സദാ ॥ 1 ॥

മലാപഹാരിവാരിപൂരഭൂരിമണ്ഡിതാമൃതാ

ഭൃശം പ്രപാതകപ്രവഞ്ചനാതിപണ്ഡിതാനിശം ।

സുനന്ദനന്ദനാംഗസംഗരാഗരഞ്ജിതാ ഹിതാ

ധുനോതു മേ മനോമലം കലിന്ദനന്ദിനീ സദാ ॥ 2 ॥

ലസത്തരംഗസംഗധൂതഭൂതജാതപാതകാ

നവീനമാധുരീധുരീണഭക്തിജാതചാതകാ ।

തടാന്തവാസദാസഹംസസംസൃതാ ഹി കാമദാ

ധുനോതു മേ മനോമലം കലിന്ദനന്ദിനീ സദാ ॥ 3 ॥

വിഹാരരാസഖേദഭേദധീരതീരമാരുതാ

ഗതാ ഗിരാമഗോചരേ യദീയനീരചാരുതാ ।

പ്രവാഹസാഹചര്യപൂതമേദിനീനദീനദാ

ധുനോതു മേ മനോമലം കലിന്ദനന്ദിനീ സദാ ॥ 4 ॥

തരംഗസംഗസൈകതാഞ്ചിതാന്തരാ സദാസിതാ

ശരന്നിശാകരാംശുമഞ്ജുമഞ്ജരീസഭാജിതാ ।

ഭവാർചനായ ചാരുണാംബുനാധുനാ വിശാരദാ

ധുനോതു മേ മനോമലം കലിന്ദനന്ദിനീ സദാ ॥ 5 ॥

ജലാന്തകേലികാരിചാരുരാധികാംഗരാഗിണീ

സ്വഭർതുരന്യദുർലഭാംഗസംഗതാംശഭാഗിനീ ।

സ്വദത്തസുപ്തസപ്തസിന്ധുഭേദനാതികോവിദാ

ധുനോതു മേ മനോമലം കലിന്ദനന്ദിനീ സദാ ॥ 6 ॥

ജലച്യുതാച്യുതാംഗരാഗലമ്പടാലിശാലിനീ

വിലോലരാധികാകചാന്തചമ്പകാലിമാലിനീ ।

സദാവഗാഹനാവതീർണഭർതൃഭൃത്യനാരദാ

ധുനോതു മേ മനോമലം കലിന്ദനന്ദിനീ സദാ ॥ 7 ॥

സദൈവ നന്ദനന്ദകേലിശാലികുഞ്ജമഞ്ജുലാ

തടോത്ഥഫുല്ലമല്ലികാകദംബരേണുസൂജ്ജ്വലാ ।

ജലാവഗാഹിനാം നൃണാം ഭവാബ്ധിസിന്ധുപാരദാ

ധുനോതു മേ മനോമലം കലിന്ദനന്ദിനീ സദാ ॥ 8 ॥

ഇതി ശ്രീ യമുനാ ആഷ്ടകം

Recite with devotion and pure heart

Regular practice brings spiritual benefits