मुरारिकायकालिमाललामवारिधारिणी तृणीकृतत्रिविष्टपा त्रिलोकशोकहारिणी । मनोऽनुकूलकूलकुंजपुंजधूतदुर्मदा धुनोतु मे मनोमलं कलिंदनंदिनी सदा ॥ 1 ॥ मलापहारिवारिपूरभूरिमंडितामृता भृशं प्रपातकप्रवंचनातिपंडितानिशम् । सुनंदनंदनांगसंगरागरंजिता हिता धुनोतु मे मनोमलं कलिंदनंदिनी सदा ॥ 2 ॥ लसत्तरंगसंगधूतभूतजातपातका नवीनमाधुरीधुरीणभक्तिजातचातका । तटांतवासदासहंससंसृता हि कामदा धुनोतु मे मनोमलं कलिंदनंदिनी सदा ॥ 3 ॥ विहाररासखेदभेदधीरतीरमारुता गता गिरामगोचरे यदीयनीरचारुता । प्रवाहसाहचर्यपूतमेदिनीनदीनदा धुनोतु मे मनोमलं कलिंदनंदिनी सदा ॥ 4 ॥ तरंगसंगसैकतांचितांतरा सदासिता शरन्निशाकरांशुमंजुमंजरीसभाजिता । भवार्चनाय चारुणांबुनाधुना विशारदा धुनोतु मे मनोमलं कलिंदनंदिनी सदा ॥ 5 ॥ जलांतकेलिकारिचारुराधिकांगरागिणी स्वभर्तुरन्यदुर्लभांगसंगतांशभागिनी । स्वदत्तसुप्तसप्तसिंधुभेदनातिकोविदा धुनोतु मे मनोमलं कलिंदनंदिनी सदा ॥ 6 ॥ जलच्युताच्युतांगरागलंपटालिशालिनी विलोलराधिकाकचांतचंपकालिमालिनी । सदावगाहनावतीर्णभर्तृभृत्यनारदा धुनोतु मे मनोमलं कलिंदनंदिनी सदा ॥ 7 ॥ सदैव नंदनंदकेलिशालिकुंजमंजुला तटोत्थफुल्लमल्लिकाकदंबरेणुसूज्ज्वला । जलावगाहिनां नृणां भवाब्धिसिंधुपारदा धुनोतु मे मनोमलं कलिंदनंदिनी सदा ॥ 8 ॥ इति श्री यमुना आष्टकम्