నటరాజాష్టకం

కుంజరచర్మకృతాంబరమంబురుహాసనమాధవగేయగుణం

శంకరమంతకమానహరం స్మరదాహకలోచనమేణధరం ।

సాంజలియోగిపతంజలిసన్నుతమిందుకలాధరమబ్జముఖం

మంజులశింజితరంజితకుంచితవామపదం భజ నృత్యపతిం ॥ 1 ॥

పింగలతుంగజటావలిభాసురగంగమమంగలనాశకరం

పుంగవవాహముమాంగధరం రిపుభంగకరం సురలోకనతం ।

భృంగవినీలగలం గణనాథసుతం భజ మానస పాపహరం

మంగలదం వరరంగపతిం భవసంగహరం ధనరాజసఖం ॥ 2 ॥

పాణినిసూత్రవినిర్మితికారణపాణిలసడ్డమరూత్థరవం

మాధవనాదితమర్దలనిర్గతనాదలయోద్ధృతవామపదం ।

సర్వజగత్ప్రలయప్రభువహ్నివిరాజితపాణిముమాలసితం

పన్నగభూషణమున్నతసన్నుతమానమ మానస సాంబశివం ॥ 3 ॥

చండగుణాన్వితమండలఖండనపండితమిందుకలాకలితం

దండధరాంతకదండకరం వరతాండవమండితహేమసభం ।

అండకరాండజవాహసఖం నమ పాండవమధ్యమమోదకరం

కుండలశోభితగండతలం మునివృందనుతం సకలాండధరం ॥ 4 ॥

వ్యాఘ్రపదానతముగ్రతరాసురవిగ్రహమర్దిపదాంబురుహం

శక్రముఖామరవర్గమనోహరనృత్యకరం శ్రుతినుత్యగుణం ।

వ్యగ్రతరంగితదేవధునీధృతగర్వహరాయతకేశచయం

భార్గవరావణపూజితమీశముమారమణం భజ శూలధరం ॥ 5 ॥

ఆసురశక్తివినాశకరం బహుభాసురకాయమనంగరిపుం

భూసురసేవితపాదసరోరుహమీశ్వరమక్షరముక్షధృతం ।

భాస్కరశీతకరాక్షమనాతురమాశ్వరవిందపదం భజ తం

నశ్వరసంసృతిమోహవినాశమహస్కరదంతనిపాతకరం ॥ 6 ॥

భూతికరం సితభూతిధరం గతనీతిహరం వరగీతినుతం

భక్తియుతోత్తమముక్తికరం సమశక్తియుతం శుభభుక్తికరం ।

భద్రకరోత్తమనామయుతం శ్రుతిసామనుతం నమ సోమధరం

స్తుత్యగుణం భజ నిత్యమగాధభవాంబుధితారకనృత్యపతిం ॥ 7 ॥

శూలధరం భవజాలహరం నిటిలాగ్నిధరం జటిలం ధవలం

నీలగలోజ్జ్వలమంగలసద్గిరిరాజసుతామృదుపాణితలం ।

శైలకులాధిపమౌలినతం ఛలహీనముపైమి కపాలధరం

కాలవిషాశమనంతమిలానుతమద్భుతలాస్యకరం గిరిశం ॥ 8 ॥

చిత్తహరాతులనృత్తపతిప్రియవృత్తకృతోత్తమగీతిమిమాం

ప్రాతరుమాపతిసన్నిధిగో యది గాయతి భక్తియుతో మనసి ।

సర్వసుఖం భువి తస్య భవత్యమరాధిపదుర్లభమత్యధికం

నాస్తి పునర్జనిరేతి చ ధామ స శాంభవముత్తమమోదకరం ॥ 9 ॥

ఇతి శ్రీ నటరాజాష్టకం ।

Recite with devotion and pure heart

Regular practice brings spiritual benefits