നടരാജാഷ്ടകം

കുഞ്ജരചർമകൃതാംബരമംബുരുഹാസനമാധവഗേയഗുണം

ശങ്കരമന്തകമാനഹരം സ്മരദാഹകലോചനമേണധരം ।

സാഞ്ജലിയോഗിപതഞ്ജലിസന്നുതമിന്ദുകലാധരമബ്ജമുഖം

മഞ്ജുലശിഞ്ജിതരഞ്ജിതകുഞ്ചിതവാമപദം ഭജ നൃത്യപതിം ॥ 1 ॥

പിംഗലതുംഗജടാവലിഭാസുരഗംഗമമംഗലനാശകരം

പുംഗവവാഹമുമാംഗധരം രിപുഭംഗകരം സുരലോകനതം ।

ഭൃംഗവിനീലഗലം ഗണനാഥസുതം ഭജ മാനസ പാപഹരം

മംഗലദം വരരംഗപതിം ഭവസംഗഹരം ധനരാജസഖം ॥ 2 ॥

പാണിനിസൂത്രവിനിർമിതികാരണപാണിലസഡ്ഡമരൂത്ഥരവം

മാധവനാദിതമർദലനിർഗതനാദലയോദ്ധൃതവാമപദം ।

സർവജഗത്പ്രലയപ്രഭുവഹ്നിവിരാജിതപാണിമുമാലസിതം

പന്നഗഭൂഷണമുന്നതസന്നുതമാനമ മാനസ സാംബശിവം ॥ 3 ॥

ചണ്ഡഗുണാന്വിതമണ്ഡലഖണ്ഡനപണ്ഡിതമിന്ദുകലാകലിതം

ദണ്ഡധരാന്തകദണ്ഡകരം വരതാണ്ഡവമണ്ഡിതഹേമസഭം ।

അണ്ഡകരാണ്ഡജവാഹസഖം നമ പാണ്ഡവമധ്യമമോദകരം

കുണ്ഡലശോഭിതഗണ്ഡതലം മുനിവൃന്ദനുതം സകലാണ്ഡധരം ॥ 4 ॥

വ്യാഘ്രപദാനതമുഗ്രതരാസുരവിഗ്രഹമർദിപദാംബുരുഹം

ശക്രമുഖാമരവർഗമനോഹരനൃത്യകരം ശ്രുതിനുത്യഗുണം ।

വ്യഗ്രതരംഗിതദേവധുനീധൃതഗർവഹരായതകേശചയം

ഭാർഗവരാവണപൂജിതമീശമുമാരമണം ഭജ ശൂലധരം ॥ 5 ॥

ആസുരശക്തിവിനാശകരം ബഹുഭാസുരകായമനംഗരിപും

ഭൂസുരസേവിതപാദസരോരുഹമീശ്വരമക്ഷരമുക്ഷധൃതം ।

ഭാസ്കരശീതകരാക്ഷമനാതുരമാശ്വരവിന്ദപദം ഭജ തം

നശ്വരസംസൃതിമോഹവിനാശമഹസ്കരദന്തനിപാതകരം ॥ 6 ॥

ഭൂതികരം സിതഭൂതിധരം ഗതനീതിഹരം വരഗീതിനുതം

ഭക്തിയുതോത്തമമുക്തികരം സമശക്തിയുതം ശുഭഭുക്തികരം ।

ഭദ്രകരോത്തമനാമയുതം ശ്രുതിസാമനുതം നമ സോമധരം

സ്തുത്യഗുണം ഭജ നിത്യമഗാധഭവാംബുധിതാരകനൃത്യപതിം ॥ 7 ॥

ശൂലധരം ഭവജാലഹരം നിടിലാഗ്നിധരം ജടിലം ധവലം

നീലഗലോജ്ജ്വലമംഗലസദ്ഗിരിരാജസുതാമൃദുപാണിതലം ।

ശൈലകുലാധിപമൗലിനതം ഛലഹീനമുപൈമി കപാലധരം

കാലവിഷാശമനന്തമിലാനുതമദ്ഭുതലാസ്യകരം ഗിരിശം ॥ 8 ॥

ചിത്തഹരാതുലനൃത്തപതിപ്രിയവൃത്തകൃതോത്തമഗീതിമിമാം

പ്രാതരുമാപതിസന്നിധിഗോ യദി ഗായതി ഭക്തിയുതോ മനസി ।

സർവസുഖം ഭുവി തസ്യ ഭവത്യമരാധിപദുർലഭമത്യധികം

നാസ്തി പുനർജനിരേതി ച ധാമ സ ശാംഭവമുത്തമമോദകരം ॥ 9 ॥

ഇതി ശ്രീ നടരാജാഷ്ടകം ।

Recite with devotion and pure heart

Regular practice brings spiritual benefits