ಕೃಪಾಸಮುದ್ರಂ ಸುಮುಖಂ ತ್ರಿನೇತ್ರಂ ಜಟಾಧರಂ ಪಾರ್ವತೀವಾಮಭಾಗಂ । ಸದಾಶಿವಂ ರುದ್ರಮನಂತರೂಪಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 1 ॥ ವಾಚಾಮತೀತಂ ಫಣಿಭೂಷಣಾಂಗಂ ಗಣೇಶತಾತಂ ಧನದಸ್ಯ ಮಿತ್ರಂ । ಕಂದರ್ಪನಾಶಂ ಕಮಲೋತ್ಪಲಾಕ್ಷಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 2 ॥ ರಮೇಶವಂದ್ಯಂ ರಜತಾದ್ರಿನಾಥಂ ಶ್ರೀವಾಮದೇವಂ ಭವದುಃಖನಾಶಂ । ರಕ್ಷಾಕರಂ ರಾಕ್ಷಸಪೀಡಿತಾನಾಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 3 ॥ ದೇವಾದಿದೇವಂ ಜಗದೇಕನಾಥಂ ದೇವೇಶವಂದ್ಯಂ ಶಶಿಖಂಡಚೂಡಂ । ಗೌರೀಸಮೇತಂ ಕೃತವಿಘ್ನದಕ್ಷಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 4 ॥ ವೇದಾಂತವೇದ್ಯಂ ಸುರವೈರಿವಿಘ್ನಂ ಶುಭಪ್ರದಂ ಭಕ್ತಿಮದಂತರಾಣಾಂ । ಕಾಲಾಂತಕಂ ಶ್ರೀಕರುಣಾಕಟಾಕ್ಷಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 5 ॥ ಹೇಮಾದ್ರಿಚಾಪಂ ತ್ರಿಗುಣಾತ್ಮಭಾವಂ ಗುಹಾತ್ಮಜಂ ವ್ಯಾಘ್ರಪುರೀಶಮಾದ್ಯಂ । ಶ್ಮಶಾನವಾಸಂ ವೃಷವಾಹನಸ್ಥಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 6 ॥ ಆದ್ಯಂತಶೂನ್ಯಂ ತ್ರಿಪುರಾರಿಮೀಶಂ ನಂದೀಶಮುಖ್ಯಸ್ತುತವೈಭವಾಢ್ಯಂ । ಸಮಸ್ತದೇವೈಃ ಪರಿಪೂಜಿತಾಂಘ್ರಿಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 7 ॥ ತಮೇವ ಭಾಂತಂ ಹ್ಯನುಭಾತಿಸರ್ವ- -ಮನೇಕರೂಪಂ ಪರಮಾರ್ಥಮೇಕಂ । ಪಿನಾಕಪಾಣಿಂ ಭವನಾಶಹೇತುಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 8 ॥ ವಿಶ್ವೇಶ್ವರಂ ನಿತ್ಯಮನಂತಮಾದ್ಯಂ ತ್ರಿಲೋಚನಂ ಚಂದ್ರಕಲಾವತಂಸಂ । ಪತಿಂ ಪಶೂನಾಂ ಹೃದಿ ಸನ್ನಿವಿಷ್ಟಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 9 ॥ ವಿಶ್ವಾಧಿಕಂ ವಿಷ್ಣುಮುಖೈರುಪಾಸ್ಯಂ ತ್ರಿಲೋಚನಂ ಪಂಚಮುಖಂ ಪ್ರಸನ್ನಂ । ಉಮಾಪತಿಂ ಪಾಪಹರಂ ಪ್ರಶಾಂತಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 10 ॥ ಕರ್ಪೂರಗಾತ್ರಂ ಕಮನೀಯನೇತ್ರಂ ಕಂಸಾರಿಮಿತ್ರಂ ಕಮಲೇಂದುವಕ್ತ್ರಂ । ಕಂದರ್ಪಗಾತ್ರಂ ಕಮಲೇಶಮಿತ್ರಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 11 ॥ ವಿಶಾಲನೇತ್ರಂ ಪರಿಪೂರ್ಣಗಾತ್ರಂ ಗೌರೀಕಲತ್ರಂ ಹರಿದಂಬರೇಶಂ । ಕುಬೇರಮಿತ್ರಂ ಜಗತಃ ಪವಿತ್ರಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 12 ॥ ಕಲ್ಯಾಣಮೂರ್ತಿಂ ಕನಕಾದ್ರಿಚಾಪಂ ಕಾಂತಾಸಮಾಕ್ರಾಂತನಿಜಾರ್ಧದೇಹಂ । ಕಪರ್ದಿನಂ ಕಾಮರಿಪುಂ ಪುರಾರಿಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 13 ॥ ಕಲ್ಪಾಂತಕಾಲಾಹಿತಚಂಡನೃತ್ತಂ ಸಮಸ್ತವೇದಾಂತವಚೋನಿಗೂಢಂ । ಅಯುಗ್ಮನೇತ್ರಂ ಗಿರಿಜಾಸಹಾಯಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 14 ॥ ದಿಗಂಬರಂ ಶಂಖಸಿತಾಲ್ಪಹಾಸಂ ಕಪಾಲಿನಂ ಶೂಲಿನಮಪ್ರಯೇಂ । ನಾಗಾತ್ಮಜಾವಕ್ತ್ರಪಯೋಜಸೂರ್ಯಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 15 ॥ ಸದಾಶಿವಂ ಸತ್ಪುರುಷೈರನೇಕೈಃ ಸದಾರ್ಚಿತಂ ಸಾಮಶಿರಃ ಸುಗೀತಂ । ವೈಯ್ಯಾಘ್ರಚರ್ಮಾಂಬರಮುಗ್ರಮೀಶಂ ಚಿದಂಬರೇಶಂ ಹೃದಿ ಭಾವಯಾಮಿ ॥ 16 ॥ ಚಿದಂಬರಸ್ಯ ಸ್ತವನಂ ಪಠೇದ್ಯಃ ಪ್ರದೋಷಕಾಲೇಷು ಪುಮಾನ್ ಸ ಧನ್ಯಃ । ಭೋಗಾನಶೇಷಾನನುಭೂಯ ಭೂಯಃ ಸಾಯುಜ್ಯಮಪ್ಯೇತಿ ಚಿದಂಬರಸ್ಯ ॥ 17 ॥ ಇತಿ ಶ್ರೀ ಚಿದಂಬರೇಶ್ವರ ಸ್ತೋತ್ರಂ ಸಂಪೂರ್ಣಂ ।