ಕದಂಬಕಾನನಪ್ರಿಯಂ ಚಿದಂಬಯಾ ವಿಹಾರಿಣಂ ಮದೇಭಕುಂಭಗುಂಫಿತಸ್ವಡಿಂಭಲಾಲನೋತ್ಸುಕಂ । ಸದಂಭಕಾಮಖಂಡನಂ ಸದಂಬುವಾಹಿನೀಧರಂ ಹೃದಂಬುಜೇ ಜಗದ್ಗುರುಂ ಚಿದಂಬರಂ ವಿಭಾವಯೇ ॥ 1 ॥ ಸಮಸ್ತಭಕ್ತಪೋಷಣಸ್ವಹಸ್ತಬದ್ಧಕಂಕಣಂ ಪ್ರಶಸ್ತಕೀರ್ತಿವೈಭವಂ ನಿರಸ್ತಸಜ್ಜನಾಪದಂ । ಕರಸ್ಥಮುಕ್ತಿಸಾಧನಂ ಶಿರಃಸ್ಥಚಂದ್ರಮಂಡನಂ ಹೃದಂಬುಜೇ ಜಗದ್ಗುರುಂ ಚಿದಂಬರಂ ವಿಭಾವಯೇ ॥ 2 ॥ ಜಟಾಕಿರೀಟಮಂಡಿತಂ ನಿಟಾಲಲೋಚನಾನ್ವಿತಂ ಪಟೀಕೃತಾಷ್ಟದಿಕ್ತಟಂ ಪಟೀರಪಂಕಲೇಪನಂ । ನಟೌಘಪೂರ್ವಭಾವಿನಂ ಕುಠಾರಪಾಶಧಾರಿಣಂ ಹೃದಂಬುಜೇ ಜಗದ್ಗುರುಂ ಚಿದಂಬರಂ ವಿಭಾವಯೇ ॥ 3 ॥ ಕುರಂಗಶಾಬಶೋಭಿತಂ ಚಿರಂ ಗಜಾನನಾರ್ಚಿತಂ ಪುರಾಂಗನಾವಿಚಾರದಂ ವರಾಂಗರಾಗರಂಜಿತಂ । ಖರಾಂಗಜಾತನಾಶಕಂ ತುರಂಗಮೀಕೃತಾಗಮಂ ಹೃದಂಬುಜೇ ಜಗದ್ಗುರುಂ ಚಿದಂಬರಂ ವಿಭಾವಯೇ ॥ 4 ॥ ಅಮಂದಭಾಗ್ಯಭಾಜನಂ ಸುಮಂದಹಾಸಸನ್ಮುಖಂ ಸುಮಂದಮಂದಗಾಮಿನೀಗಿರೀಂದ್ರಕನ್ಯಕಾಧವಂ । ಶಮಂ ದಮಂ ದಯಾಲುತಾಮಮಂದಯಂತಮಾತ್ಮನೋ ಹೃದಂಬುಜೇ ಜಗದ್ಗುರುಂ ಚಿದಂಬರಂ ವಿಭಾವಯೇ ॥ 5 ॥ ಕರೀಂದ್ರಚರ್ಮವಾಸಸಂ ಗಿರೀಂದ್ರಚಾಪಧಾರಿಣಂ ಸುರೇಂದ್ರಮುಖ್ಯಪೂಜಿತಂ ಖಗೇಂದ್ರವಾಹನಪ್ರಿಯಂ । ಅಹೀಂದ್ರಭೂಷಣೋಜ್ಜ್ವಲಂ ನಗೇಂದ್ರಜಾವಿಲಾಸಿನಂ ಹೃದಂಬುಜೇ ಜಗದ್ಗುರುಂ ಚಿದಂಬರಂ ವಿಭಾವಯೇ ॥ 6 ॥ ಮಲಾಪಹಾರಿಣೀತಟೇ ಸದಾ ವಿಲಾಸಕಾರಿಣಂ ಬಲಾರಿಶಾಪಭಂಜನಂ ಲಲಾಮರೂಪಲೋಚನಂ । ಲಸತ್ಫಣೀಂದ್ರಹಾರಿಣಂ ಜ್ವಲತ್ತ್ರಿಶೂಲಧಾರಿಣಂ ಹೃದಂಬುಜೇ ಜಗದ್ಗುರುಂ ಚಿದಂಬರಂ ವಿಭಾವಯೇ ॥ 7 ॥ ಶಶಾಂಕಭಾನುವೀತಿಹೋತ್ರರಾಜಿತತ್ರಿಲೋಚನಂ ವಿಶಾಲವಕ್ಷಸಂ ಸುದೀರ್ಘಬಾಹುದಂಡಮಂಡಿತಂ । ದಿಗಂಬರೋಲ್ಲಸದ್ವಪುರ್ಧರಂ ಧರಾರಥಾನ್ವಿತಂ ಹೃದಂಬುಜೇ ಜಗದ್ಗುರುಂ ಚಿದಂಬರಂ ವಿಭಾವಯೇ ॥ 8 ॥ ಸದಂತರಂಗಸಜ್ಜನೌಘಪಾಪಸಂಘನಾಶನೇ ಮದಾಂಧಯುಕ್ತದುರ್ಜನಾಲಿಶಿಕ್ಷಣೇ ವಿಚಕ್ಷಣಃ । ಚಿದಂಬರಾಖ್ಯಸದ್ಗುರುಸ್ವರೂಪಮೇತ್ಯ ಭೂತಲೇ ಸದಾಶಿವೋ ವಿರಾಜತೇ ಸದಾ ಮುದಾನ್ವಿತೋ ಹರಃ ॥ 9 ॥ ಚಿದಂಬರಾಖ್ಯಸದ್ಗುರೋರಿದಂ ಸದಾ ವಿಲಾಸಿನಂ ಮುದಾ ಲಿಖಂತಿ ಯೇ ಸಕೃತ್ ಸದೋಪಮಾನಮಷ್ಟಕಂ । ಸದಾ ವಸೇತ್ತದಾಲಯೇ ಹರಿಪ್ರಿಯಾ ತದಾನನೇ ವಿಧಿಪ್ರಿಯಾ ಚ ನಿಶ್ಚಲಾ ಜಗದ್ಗುರೋರನುಗ್ರಹಾತ್ ॥ 10 ॥ ಇತಿ ಶ್ರೀ ಚಿದಂಬರ ಪಂಚಚಾಮರ ಸ್ತೋತ್ರಂ ।