ನೃಸಿಂಹ ಸಪ್ತಕಂ

ಅದ್ವೈತವಾಸ್ತವಮತೇಃ ಪ್ರಣಮಜ್ಜನಾನಾಂ

ಸಂಪಾದನಾಯ ಧೃತಮಾನವಸಿಂಹರೂಪಂ ।

ಪ್ರಹ್ಲಾದಪೋಷಣರತಂ ಪ್ರಣತೈಕವಶ್ಯಂ

ದೇವಂ ಮುದಾ ಕಮಪಿ ನೌಮಿ ಕೃಪಾಸಮುದ್ರಂ ॥ 1 ॥

ನತಜನವಚನಋತತ್ವ-

ಪ್ರಕಾಶಕಾಲಸ್ಯ ದೈರ್ಘ್ಯಮಸಹಿಷ್ಣುಃ ।

ಆವಿರ್ಬಭೂವ ತರಸಾ

ಯಃ ಸ್ತಂಭಾನ್ನೌಮಿ ತಂ ಮಹಾವಿಷ್ಣುಂ ॥ 2 ॥

ವಕ್ಷೋವಿದಾರಣಂ ಯ-

-ಶ್ಚಕ್ರೇ ಹಾರ್ದಂ ತಮೋ ಹಂತುಂ ।

ಶತ್ರೋರಪಿ ಕರುಣಾಬ್ಧಿಂ

ನರಹರಿವಪುಷಂ ನಮಾಮಿ ತಂ ವಿಷ್ಣುಂ ॥ 3 ॥

ರಿಪುಹೃದಯಸ್ಥಿತರಾಜಸ-

-ಗುಣಮೇವಾಸೃಙ್ಮಿಷೇಣ ಕರಜಾಗ್ರೈಃ ।

ಧತ್ತೇ ಯಸ್ತಂ ವಂದೇ

ಪ್ರಹ್ಲಾದಪೂರ್ವಭಾಗ್ಯನಿಚಯಮಹಂ ॥ 4 ॥

ಪ್ರಹ್ಲಾದಂ ಪ್ರಣಮಜ್ಜನ-

-ಪಂಕ್ತೇಃ ಕುರ್ವಂತಿ ದಿವಿಷದೋ ಹ್ಯನ್ಯೇ ।

ಪ್ರಹ್ಲಾದಪ್ರಹ್ಲಾದಂ

ಚಿತ್ರಂ ಕುರುತೇ ನಮಾಮಿ ಯಸ್ತಮಹಂ ॥ 5 ॥

ಶರದಿಂದುಕುಂದಧವಲಂ

ಕರಜಪ್ರವಿದಾರಿತಾಸುರಾಧೀಶಂ ।

ಚರಣಾಂಬುಜರತವಾಕ್ಯಂ

ತರಸೈವ ಋತಂ ಪ್ರಕುರ್ವದಹಮೀಡೇ ॥ 6 ॥

ಮುಖೇನ ರೌದ್ರೋ ವಪುಷಾ ಚ ಸೌಮ್ಯಃ

ಸನ್ಕಂಚನಾರ್ಥಂ ಪ್ರಕಟೀಕರೋಷಿ ।

ಭಯಸ್ಯ ಕರ್ತಾ ಭಯಹೃತ್ತ್ವಮೇವೇ-

-ತ್ಯಾಖ್ಯಾಪ್ರಸಿದ್ಧಿರ್ಯದಸಂಶಯಾಭೂತ್ ॥ 7 ॥

ಇತಿ ಶ್ರೀ ನೃಸಿಂಹ ಸಪ್ತಕಂ ।

Recite with devotion and pure heart

Regular practice brings spiritual benefits