नृसिंह सप्तकम्

अद्वैतवास्तवमतेः प्रणमज्जनानां

सम्पादनाय धृतमानवसिंहरूपम् ।

प्रह्लादपोषणरतं प्रणतैकवश्यं

देवं मुदा कमपि नौमि कृपासमुद्रम् ॥ 1 ॥

नतजनवचनऋतत्व-

प्रकाशकालस्य दैर्घ्यमसहिष्णुः ।

आविर्बभूव तरसा

यः स्तम्भान्नौमि तं महाविष्णुम् ॥ 2 ॥

वक्षोविदारणं य-

-श्चक्रे हार्दं तमो हन्तुम् ।

शत्रोरपि करुणाब्धिं

नरहरिवपुषं नमामि तं विष्णुम् ॥ 3 ॥

रिपुहृदयस्थितराजस-

-गुणमेवासृङ्मिषेण करजाग्रैः ।

धत्ते यस्तं वन्दे

प्रह्लादपूर्वभाग्यनिचयमहम् ॥ 4 ॥

प्रह्लादं प्रणमज्जन-

-पङ्क्तेः कुर्वन्ति दिविषदो ह्यन्ये ।

प्रह्लादप्रह्लादं

चित्रं कुरुते नमामि यस्तमहम् ॥ 5 ॥

शरदिन्दुकुन्दधवलं

करजप्रविदारितासुराधीशम् ।

चरणाम्बुजरतवाक्यं

तरसैव ऋतं प्रकुर्वदहमीडे ॥ 6 ॥

मुखेन रौद्रो वपुषा च सौम्यः

सन्कञ्चनार्थं प्रकटीकरोषि ।

भयस्य कर्ता भयहृत्त्वमेवे-

-त्याख्याप्रसिद्धिर्यदसंशयाभूत् ॥ 7 ॥

इति श्री नृसिंह सप्तकम् ।

Recite with devotion and pure heart

Regular practice brings spiritual benefits