ശ്രീമത്പയോനിധിനികേതനചക്രപാണേ ഭോഗീന്ദ്രഭോഗമണിരാജിതപുണ്യമൂർതേ । യോഗീശ ശാശ്വത ശരണ്യ ഭവാബ്ധിപോത ലക്ഷ്മീനൃസിംഹ മമ ദേഹി കരാവലംബം ॥ 1 ॥ ബ്രഹ്മേന്ദ്രരുദ്രമരുദർകകിരീടകോടി- -സംഘട്ടിതാംഘ്രികമലാമലകാന്തികാന്ത । ലക്ഷ്മീലസത്കുചസരോരുഹരാജഹംസ ലക്ഷ്മീനൃസിംഹ മമ ദേഹി കരാവലംബം ॥ 2 ॥ സംസാരദാവദഹനാകരഭീകരോരു- -ജ്വാലാവലീഭിരതിദഗ്ധതനൂരുഹസ്യ । ത്വത്പാദപദ്മസരസീരുഹമാഗതസ്യ ലക്ഷ്മീനൃസിംഹ മമ ദേഹി കരാവലംബം ॥ 3 ॥ സംസാരജാലപതിതസ്യ ജഗന്നിവാസ സർവേന്ദ്രിയാർഥബഡിശാഗ്രഝഷോപമസ്യ । പ്രോത്കമ്പിതപ്രചുരതാലുകമസ്തകസ്യ ലക്ഷ്മീനൃസിംഹ മമ ദേഹി കരാവലംബം ॥ 4 ॥ സംസാരകൂപമതിഘോരമഗാധമൂലം സമ്പ്രാപ്യ ദുഃഖശതസർപസമാകുലസ്യ । ദീനസ്യ ദേവ കൃപയാ പദമാഗതസ്യ ലക്ഷ്മീനൃസിംഹ മമ ദേഹി കരാവലംബം ॥ 5 ॥ സംസാരഭീകരകരീന്ദ്രകരാഭിഘാത- -നിഷ്പീഡ്യമാനവപുഷഃ സകലാർതിനാശ । പ്രാണപ്രയാണഭവഭീതിസമാകുലസ്യ ലക്ഷ്മീനൃസിംഹ മമ ദേഹി കരാവലംബം ॥ 6 ॥ സംസാരസർപവിഷദഗ്ധമഹോഗ്രതീവ്ര- -ദംഷ്ട്രാഗ്രകോടിപരിദഷ്ടവിനഷ്ടമൂർതേഃ । നാഗാരിവാഹന സുധാബ്ധിനിവാസ ശൗരേ ലക്ഷ്മീനൃസിംഹ മമ ദേഹി കരാവലംബം ॥ 7 ॥ സംസാരവൃക്ഷമഘബീജമനന്തകർമ- -ശാഖായുതം കരണപത്രമനംഗപുഷ്പം । ആരുഹ്യ ദുഃഖഫലിതം പതതോ ദയാലോ [ചകിതം] ലക്ഷ്മീനൃസിംഹ മമ ദേഹി കരാവലംബം ॥ 8 ॥ സംസാരസാഗരവിശാലകരാലകാല- -നക്രഗ്രഹഗ്രസിതനിഗ്രഹവിഗ്രഹസ്യ । വ്യഗ്രസ്യ രാഗനിചയോർമിനിപീഡിതസ്യ ലക്ഷ്മീനൃസിംഹ മമ ദേഹി കരാവലംബം ॥ 9 ॥ സംസാരസാഗരനിമജ്ജനമുഹ്യമാനം ദീനം വിലോകയ വിഭോ കരുണാനിധേ മാം । പ്രഹ്ലാദഖേദപരിഹാരപരാവതാര ലക്ഷ്മീനൃസിംഹ മമ ദേഹി കരാവലംബം ॥ 10 ॥ സംസാരഘോരഗഹനേ ചരതോ മുരാരേ മാരോഗ്രഭീകരമൃഗപ്രചുരാർദിതസ്യ । ആർതസ്യ മത്സരനിദാഘസുദുഃഖിതസ്യ ലക്ഷ്മീനൃസിംഹ മമ ദേഹി കരാവലംബം ॥ 11 ॥ ബദ്ധ്വാ ഗലേ യമഭടാ ബഹുതർജയന്തഃ കർഷന്തി യത്ര ഭവപാശശതൈര്യുതം മാം । ഏകാകിനം പരവശം ചകിതം ദയാലോ ലക്ഷ്മീനൃസിംഹ മമ ദേഹി കരാവലംബം ॥ 12 ॥ ലക്ഷ്മീപതേ കമലനാഭ സുരേശ വിഷ്ണോ യജ്ഞേശ യജ്ഞ മധുസൂദന വിശ്വരൂപ । ബ്രഹ്മണ്യ കേശവ ജനാർദന വാസുദേവ ലക്ഷ്മീനൃസിംഹ മമ ദേഹി കരാവലംബം ॥ 13 ॥ ഏകേന ചക്രമപരേണ കരേണ ശംഖ- -മന്യേന സിന്ധുതനയാമവലംബ്യ തിഷ്ഠൻ । വാമേതരേണ വരദാഭയപദ്മചിഹ്നം ലക്ഷ്മീനൃസിംഹ മമ ദേഹി കരാവലംബം ॥ 14 ॥ അന്ധസ്യ മേ ഹൃതവിവേകമഹാധനസ്യ ചോരൈർമഹാബലിഭിരിന്ദ്രിയനാമധേയൈഃ । മോഹാന്ധകാരകുഹരേ വിനിപാതിതസ്യ ലക്ഷ്മീനൃസിംഹ മമ ദേഹി കരാവലംബം ॥ 15 ॥ പ്രഹ്ലാദനാരദപരാശരപുണ്ഡരീക- -വ്യാസാദിഭാഗവതപുംഗവഹൃന്നിവാസ । ഭക്താനുരക്തപരിപാലനപാരിജാത ലക്ഷ്മീനൃസിംഹ മമ ദേഹി കരാവലംബം ॥ 16 ॥ ലക്ഷ്മീനൃസിംഹചരണാബ്ജമധുവ്രതേന സ്തോത്രം കൃതം ശുഭകരം ഭുവി ശങ്കരേണ । യേ തത്പഠന്തി മനുജാ ഹരിഭക്തിയുക്താ- -സ്തേ യാന്തി തത്പദസരോജമഖണ്ഡരൂപം ॥ 17 ॥ ഇതി ശ്രീമത്പരമഹംസപരിവ്രാജകാചാര്യ ശ്രീമച്ഛങ്കരാചാര്യ വിരചിതം ശ്രീലക്ഷ്മീനൃസിംഹ കരാവലംബ സ്തോത്രം । — അധികശ്ലോകാഃ — സംസാരയോഗ സകലേപ്സിതനിത്യകർമ സമ്പ്രാപ്യദുഃഖ സകലേന്ദ്രിയമൃത്യുനാശ । സങ്കല്പ സിന്ധുതനയാകുച കുങ്കുമാങ്ക ലക്ഷ്മീനൃസിംഹ മമ ദേഹി കരാവലംബം ॥ 18 ॥ ആദ്യന്തശൂന്യമജമവ്യയമപ്രമേയം ആദിത്യരുദ്രനിഗമാദിനുതപ്രഭാവം । അംഭോധിജാസ്യ മധുലോലുപ മത്തഭൃംഗ ലക്ഷ്മീനൃസിംഹ മമ ദേഹി കരാവലംബം ॥ 19 ॥ വാരാഹ രാമ നരസിംഹ രമാദികാന്താ ക്രീഡാവിലോല വിധിശൂലി സുരപ്രവന്ദ്യ । ഹംസാത്മകം പരമഹംസ വിഹാരലീലം ലക്ഷ്മീനൃസിംഹ മമ ദേഹി കരാവലംബം ॥ 20 ॥ മാതാ നൃസിംഹശ്ച പിതാ നൃസിംഹഃ ഭ്രാതാ നൃസിംഹശ്ച സഖാ നൃസിംഹഃ । വിദ്യാ നൃസിംഹോ ദ്രവിണം നൃസിംഹഃ ലക്ഷ്മീനൃസിംഹ മമ ദേഹി കരാവലംബം ॥ 21 ॥ പ്രഹ്ലാദ മാനസ സരോജ വിഹാരഭൃംഗ ഗംഗാതരംഗ ധവലാംഗ രമാസ്ഥിതാങ്ക । ശൃംഗാര സുന്ദര കിരീട ലസദ്വരാംഗ ലക്ഷ്മീനൃസിംഹ മമ ദേഹി കരാവലംബം ॥ 22 ॥ ശ്രീശങ്കരാര്യ രചിതം സതതം മനുഷ്യഃ സ്തോത്രം പഠേദിഹതു സത്വഗുണപ്രസന്നം । സദ്യോവിമുക്ത കലുഷോ മുനിവര്യ ഗണ്യോ ലക്ഷ്മീ പദമുപൈതി സനിർമലാത്മാ ॥ 23 ॥ യന്മായയോർജിതഃ വപുഃ പ്രചുര പ്രവാഹ മഗ്നാർഥ മത്രനിവഹോരു കരാവലംബം । ലക്ഷ്മീനൃസിംഹ ചരണാബ്ജ മധുവ്രതേന സ്തോത്രം കൃതം ശുഭകരം ഭുവി ശങ്കരേണ ॥ 24 ॥ ശ്രീമന്നൃസിംഹ വിഭവേ ഗരുഡധ്വജായ താപത്രയോപശമനായ ഭവൗഷധായ । തൃഷ്ണാദി വൃശ്ചിക ജലാഗ്നി ഭുജംഗ രോഗ ക്ലേശാപഹായ ഹരയേ ഗുരവേ നമസ്തേ ॥ 25 ॥ ഇതി ശ്രീലക്ഷ്മീനൃസിംഹ കരാവലംബ സ്തോത്രം ।