കാമാസികാഷ്ടകം

ശ്രുതീനാമുത്തരം ഭാഗം വേഗവത്യാശ്ച ദക്ഷിണം ।

കാമാദധിവസൻ ജീയാത് കശ്ചിദദ്ഭുത കേസരീ ॥ 1 ॥

തപനേന്ദ്വഗ്നിനയനഃ താപാനപചിനോതു നഃ ।

താപനീയരഹസ്യാനാം സാരഃ കാമാസികാ ഹരിഃ ॥ 2 ॥

ആകണ്ഠമാദിപുരുഷം

കണ്ഠീരവമുപരി കുണ്ഠിതാരാതിം ।

വേഗോപകണ്ഠസംഗാത്

വിമുക്തവൈകുണ്ഠബഹുമതിമുപാസേ ॥ 3 ॥

ബന്ധുമഖിലസ്യ ജന്തോഃ

ബന്ധുരപര്യങ്കബന്ധരമണീയം ।

വിഷമവിലോചനമീഡേ

വേഗവതീപുലിനകേലിനരസിംഹം ॥ 4 ॥

സ്വസ്ഥാനേഷു മരുദ്ഗണാൻ നിയമയൻ സ്വാധീനസർവേന്ദ്രിയഃ

പര്യങ്കസ്ഥിരധാരണാ പ്രകടിതപ്രത്യങ്മുഖാവസ്ഥിതിഃ ।

പ്രായേണ പ്രണിപേദുഷഃ പ്രഭുരസൗ യോഗം നിജം ശിക്ഷയൻ

കാമാനാതനുതാദശേഷജഗതാം കാമാസികാ കേസരീ ॥ 5 ॥

വികസ്വരനഖസ്വരുക്ഷതഹിരണ്യവക്ഷഃസ്ഥലീ-

-നിരർഗലവിനിർഗലദ്രുധിരസിന്ധുസന്ധ്യായിതാഃ ।

അവന്തു മദനാസികാമനുജപഞ്ചവക്ത്രസ്യ മാം

അഹമ്പ്രഥമികാമിഥഃ പ്രകടിതാഹവാ ബാഹവഃ ॥ 6 ॥

സടാപടലഭീഷണേ സരഭസാട്ടഹാസോദ്ഭടേ

സ്ഫുരത് ക്രുധിപരിസ്ഫുട ഭ്രുകുടികേഽപി വക്ത്രേ കൃതേ ।

കൃപാകപടകേസരിൻ ദനുജഡിംഭദത്തസ്തനാ

സരോജസദൃശാ ദൃശാ വ്യതിവിഷജ്യ തേ വ്യജ്യതേ ॥ 7 ॥

ത്വയി രക്ഷതി രക്ഷകൈഃ കിമന്യൈ-

-സ്ത്വയി ചാരക്ഷതി രക്ഷകൈഃ കിമന്യൈഃ ।

ഇതി നിശ്ചിതധീഃ ശ്രയാമി നിത്യം

നൃഹരേ വേഗവതീതടാശ്രയം ത്വാം ॥ 8 ॥

ഇത്ഥം സ്തുതഃ സകൃദിഹാഷ്ടഭിരേഷ പദ്യൈഃ

ശ്രീവേങ്കടേശരചിതൈസ്ത്രിദശേന്ദ്രവന്ദ്യഃ ।

ദുർദാന്തഘോരദുരിതദ്വിരദേന്ദ്രഭേദീ

കാമാസികാനരഹരിർവിതനോതു കാമാൻ ॥ 9 ॥

ഇതി ശ്രീ കാമാസികാഷ്ടകം ।

Recite with devotion and pure heart

Regular practice brings spiritual benefits