భద్రకాళీ స్తుతిః

బ్రహ్మవిష్ణు ఊచతుః ।

నమామి త్వాం విశ్వకర్త్రీం పరేశీం

నిత్యామాద్యాం సత్యవిజ్ఞానరూపాం ।

వాచాతీతాం నిర్గుణాం చాతిసూక్ష్మాం

జ్ఞానాతీతాం శుద్ధవిజ్ఞానగమ్యాం ॥ 1 ॥

పూర్ణాం శుద్ధాం విశ్వరూపాం సురూపాం

దేవీం వంద్యాం విశ్వవంద్యామపి త్వాం ।

సర్వాంతఃస్థాముత్తమస్థానసంస్థా-

-మీడే కాలీం విశ్వసంపాలయిత్రీం ॥ 2 ॥

మాయాతీతాం మాయినీం వాపి మాయాం

భీమాం శ్యామాం భీమనేత్రాం సురేశీం ।

విద్యాం సిద్ధాం సర్వభూతాశయస్థా-

-మీడే కాలీం విశ్వసంహారకర్త్రీం ॥ 3 ॥

నో తే రూపం వేత్తి శీలం న ధామ

నో వా ధ్యానం నాపి మంత్రం మహేశి ।

సత్తారూపే త్వాం ప్రపద్యే శరణ్యే

విశ్వారాధ్యే సర్వలోకైకహేతుం ॥ 4 ॥

ద్యౌస్తే శీర్షం నాభిదేశో నభశ్చ

చక్షూంషి తే చంద్రసూర్యానలాస్తే ।

ఉన్మేషాస్తే సుప్రబోధో దివా చ

రాత్రిర్మాతశ్చక్షుషోస్తే నిమేషం ॥ 5 ॥

వాక్యం దేవా భూమిరేషా నితంబం

పాదౌ గుల్ఫం జానుజంఘస్త్వధస్తే ।

ప్రీతిర్ధర్మోఽధర్మకార్యం హి కోపః

సృష్టిర్బోధః సంహృతిస్తే తు నిద్రా ॥ 6 ॥

అగ్నిర్జిహ్వా బ్రాహ్మణాస్తే ముఖాబ్జం

సంధ్యే ద్వే తే భ్రూయుగం విశ్వమూర్తిః ।

శ్వాసో వాయుర్బాహవో లోకపాలాః

క్రీడా సృష్టిః సంస్థితిః సంహృతిస్తే ॥ 7 ॥

ఏవంభూతాం దేవి విశ్వాత్మికాం త్వాం

కాలీం వందే బ్రహ్మవిద్యాస్వరూపాం ।

మాతః పూర్ణే బ్రహ్మవిజ్ఞానగమ్యే

దుర్గేఽపారే సారరూపే ప్రసీద ॥ 8 ॥

ఇతి శ్రీ మహాభాగవతే మహాపురాణే బ్రహ్మవిష్ణుకృతా శ్రీ భద్రకాలీ స్తుతిః ।

Recite with devotion and pure heart

Regular practice brings spiritual benefits