ഭദ്രകാലീ സ്തുതിഃ

ബ്രഹ്മവിഷ്ണു ഊചതുഃ ।

നമാമി ത്വാം വിശ്വകർത്രീം പരേശീം

നിത്യാമാദ്യാം സത്യവിജ്ഞാനരൂപാം ।

വാചാതീതാം നിർഗുണാം ചാതിസൂക്ഷ്മാം

ജ്ഞാനാതീതാം ശുദ്ധവിജ്ഞാനഗമ്യാം ॥ 1 ॥

പൂർണാം ശുദ്ധാം വിശ്വരൂപാം സുരൂപാം

ദേവീം വന്ദ്യാം വിശ്വവന്ദ്യാമപി ത്വാം ।

സർവാന്തഃസ്ഥാമുത്തമസ്ഥാനസംസ്ഥാ-

-മീഡേ കാലീം വിശ്വസമ്പാലയിത്രീം ॥ 2 ॥

മായാതീതാം മായിനീം വാപി മായാം

ഭീമാം ശ്യാമാം ഭീമനേത്രാം സുരേശീം ।

വിദ്യാം സിദ്ധാം സർവഭൂതാശയസ്ഥാ-

-മീഡേ കാലീം വിശ്വസംഹാരകർത്രീം ॥ 3 ॥

നോ തേ രൂപം വേത്തി ശീലം ന ധാമ

നോ വാ ധ്യാനം നാപി മന്ത്രം മഹേശി ।

സത്താരൂപേ ത്വാം പ്രപദ്യേ ശരണ്യേ

വിശ്വാരാധ്യേ സർവലോകൈകഹേതും ॥ 4 ॥

ദ്യൗസ്തേ ശീർഷം നാഭിദേശോ നഭശ്ച

ചക്ഷൂംഷി തേ ചന്ദ്രസൂര്യാനലാസ്തേ ।

ഉന്മേഷാസ്തേ സുപ്രബോധോ ദിവാ ച

രാത്രിർമാതശ്ചക്ഷുഷോസ്തേ നിമേഷം ॥ 5 ॥

വാക്യം ദേവാ ഭൂമിരേഷാ നിതംബം

പാദൗ ഗുൽഫം ജാനുജംഘസ്ത്വധസ്തേ ।

പ്രീതിർധർമോഽധർമകാര്യം ഹി കോപഃ

സൃഷ്ടിർബോധഃ സംഹൃതിസ്തേ തു നിദ്രാ ॥ 6 ॥

അഗ്നിർജിഹ്വാ ബ്രാഹ്മണാസ്തേ മുഖാബ്ജം

സന്ധ്യേ ദ്വേ തേ ഭ്രൂയുഗം വിശ്വമൂർതിഃ ।

ശ്വാസോ വായുർബാഹവോ ലോകപാലാഃ

ക്രീഡാ സൃഷ്ടിഃ സംസ്ഥിതിഃ സംഹൃതിസ്തേ ॥ 7 ॥

ഏവംഭൂതാം ദേവി വിശ്വാത്മികാം ത്വാം

കാലീം വന്ദേ ബ്രഹ്മവിദ്യാസ്വരൂപാം ।

മാതഃ പൂർണേ ബ്രഹ്മവിജ്ഞാനഗമ്യേ

ദുർഗേഽപാരേ സാരരൂപേ പ്രസീദ ॥ 8 ॥

ഇതി ശ്രീ മഹാഭാഗവതേ മഹാപുരാണേ ബ്രഹ്മവിഷ്ണുകൃതാ ശ്രീ ഭദ്രകാലീ സ്തുതിഃ ।

Recite with devotion and pure heart

Regular practice brings spiritual benefits