ఘోరే సంసారవహ్నౌ ప్రలయముపగతే యా హి కృత్వా శ్మశానే నృత్యత్యన్యూనశక్తిర్జగదిదమఖిలం ముండమాలాభిరామా । భిద్యద్బ్రహ్మాండభాండం పటుతరనినదైరట్టహాసైరుదారైః సాస్మాకం వైరివర్గం శమయతు తరసా భద్రదా భద్రకాలీ ॥ 1 ॥ మగ్నే లోకేఽమ్బురాశౌ నలినభవనుతా విష్ణునా కారయిత్వా చక్రోత్కృత్తోరుకంఠం మధుమపి భయదం కైటభం చాతిభీమం । పద్మోత్పత్తేః ప్రభూతం భయముత రిపుతోయాహరత్సానుకంపా సాస్మాకం వైరివర్గం శమయతు తరసా భద్రదా భద్రకాలీ ॥ 2 ॥ విశ్వత్రాణం విధాతుం మహిషమథ రాణే యాఽసురం భీమరూపం శూలేనాహత్య వక్షస్యమరపతినుతా పాతయంతీ చ భూమౌ । తస్యాసృగ్వాహినీభిర్జలనిధిమఖిలం శోణితాభం చ చక్రే సాస్మాకం వైరివర్గం శమయతు తరసా భద్రదా భద్రకాలీ ॥ 3 ॥ యా దేవీ చండముండౌ త్రిభువననలినీవారణౌ దేవశత్రూ దృష్ట్వా యుద్ధోత్సవే తౌ ద్రుతతరమభియాతాసినా కృత్తకంఠౌ । కృత్వా తద్రక్తపానోద్భవమదముదితా సాట్టహాసాతిభీమా సాస్మాకం వైరివర్గం శమయతు తరసా భద్రదా భద్రకాలీ ॥ 4 ॥ సద్యస్తం రక్తబీజం సమరభువి నతా ఘోరరూపానసంఖ్యాన్ రాక్తోద్భూతైరసంఖ్యైర్గజతురగరథైః సార్థమన్యాంశ్చ దైత్యాన్ । వక్త్రే నిక్షిప్య దృష్ట్వా గురుతరదశనైరాపపౌ శోణితౌఘం సాస్మాకం వైరివర్గం శమయతు తరసా భద్రదా భద్రకాలీ ॥ 5 ॥ స్థానాద్భ్రష్టైశ్చ దేవైస్తుహినగిరితటే సంగతైః సంస్తుతా యా సంఖ్యాహీనైః సమేతం త్రిదశరిపుగణైః స్యందనేభాశ్వయుక్తైః । యుద్ధే శుంభం నిశుంభం త్రిభువనవిపదం నాశయంతీ చ జఘ్నే సాస్మాకం వైరివర్గం శమయతు తరసా భద్రదా భద్రకాలీ ॥ 6 ॥ శంభోర్నేత్రానలే యా జననమపి జగత్త్రాణహేతోరయాసీత్ భూయస్తీక్ష్ణాతిధారావిదలితదనుజా దారుకం చాపి హత్వా । తస్యాసృక్పానతుష్టా ముహురపి కృతవత్యట్టహాసం కఠోరం సాస్మాకం వైరివర్గం శమయతు తరసా భద్రదా భద్రకాలీ ॥ 7 ॥ యా దేవీ కాలరాత్రీ తుహినగిరసుతా లోకమాతా ధరిత్రీ వాణీ నిద్రా చ మాయా మనసిజదయితా ఘోరరూపాతిసౌమ్యా । చాముండా ఖడ్గహస్తా రిపుహననపరా శోణితాస్వాదకామా సా హన్యాద్విశ్వవంద్యా మమ రిపునివహా భద్రదా భద్రకాలీ ॥ 8 ॥ భద్రకాల్యష్టకం జప్యం శత్రుసంక్షయకాంక్షిణా । స్వర్గాపవర్గదం పుణ్యం దుష్టగ్రహనివారణం ॥ 9 ॥ ఇతి శ్రీ భద్రకాల్యష్టకం ।