ಬ್ರಹ್ಮೋವಾಚ ಶೃಣು ವತ್ಸ ಪ್ರವಕ್ಷ್ಯಾಮಿ ಆದ್ಯಾಸ್ತೋತ್ರಂ ಮಹಾಫಲಂ । ಯಃ ಪಠೇತ್ ಸತತಂ ಭಕ್ತ್ಯಾ ಸ ಏವ ವಿಷ್ಣುವಲ್ಲಭಃ ॥ 1 ॥ ಮೃತ್ಯುರ್ವ್ಯಾಧಿಭಯಂ ತಸ್ಯ ನಾಸ್ತಿ ಕಿಂಚಿತ್ ಕಲೌ ಯುಗೇ । ಅಪುತ್ರಾ ಲಭತೇ ಪುತ್ರಂ ತ್ರಿಪಕ್ಷಂ ಶ್ರವಣಂ ಯದಿ ॥ 2 ॥ ದ್ವೌ ಮಾಸೌ ಬಂಧನಾನ್ಮುಕ್ತಿ ವಿಪ್ರವಕ್ತ್ರಾತ್ ಶ್ರುತಂ ಯದಿ । ಮೃತವತ್ಸಾ ಜೀವವತ್ಸಾ ಷಣ್ಮಾಸಂ ಶ್ರವಣಂ ಯದಿ ॥ 3 ॥ ನೌಕಾಯಾಂ ಸಂಕಟೇ ಯುದ್ಧೇ ಪಠನಾಜ್ಜಯಮಾಪ್ನುಯಾತ್ । ಲಿಖಿತ್ವಾ ಸ್ಥಾಪಯೇದ್ಗೇಹೇ ನಾಗ್ನಿಚೌರಭಯಂ ಕ್ವಚಿತ್ ॥ 4 ॥ ರಾಜಸ್ಥಾನೇ ಜಯೀ ನಿತ್ಯಂ ಪ್ರಸನ್ನಾಃ ಸರ್ವದೇವತಾ । ಓಂ ಹ್ರೀಂ । ಬ್ರಹ್ಮಾಣೀ ಬ್ರಹ್ಮಲೋಕೇ ಚ ವೈಕುಂಠೇ ಸರ್ವಮಂಗಲಾ ॥ 5 ॥ ಇಂದ್ರಾಣೀ ಅಮರಾವತ್ಯಾಮಂಬಿಕಾ ವರುಣಾಲಯೇ । ಯಮಾಲಯೇ ಕಾಲರೂಪಾ ಕುಬೇರಭವನೇ ಶುಭಾ ॥ 6 ॥ ಮಹಾನಂದಾಗ್ನಿಕೋಣೇ ಚ ವಾಯವ್ಯಾಂ ಮೃಗವಾಹಿನೀ । ನೈರೃತ್ಯಾಂ ರಕ್ತದಂತಾ ಚ ಐಶಾನ್ಯಾಂ ಶೂಲಧಾರಿಣೀ ॥ 7 ॥ ಪಾತಾಲೇ ವೈಷ್ಣವೀರೂಪಾ ಸಿಂಹಲೇ ದೇವಮೋಹಿನೀ । ಸುರಸಾ ಚ ಮಣಿದ್ವಿಪೇ ಲಂಕಾಯಾಂ ಭದ್ರಕಾಲಿಕಾ ॥ 8 ॥ ರಾಮೇಶ್ವರೀ ಸೇತುಬಂಧೇ ವಿಮಲಾ ಪುರುಷೋತ್ತಮೇ । ವಿರಜಾ ಔಡ್ರದೇಶೇ ಚ ಕಾಮಾಕ್ಷ್ಯಾ ನೀಲಪರ್ವತೇ ॥ 9 ॥ ಕಾಲಿಕಾ ವಂಗದೇಶೇ ಚ ಅಯೋಧ್ಯಾಯಾಂ ಮಹೇಶ್ವರೀ । ವಾರಾಣಸ್ಯಾಮನ್ನಪೂರ್ಣಾ ಗಯಾಕ್ಷೇತ್ರೇ ಗಯೇಶ್ವರೀ ॥ 10 ॥ ಕುರುಕ್ಷೇತ್ರೇ ಭದ್ರಕಾಲೀ ವ್ರಜೇ ಕಾತ್ಯಾಯನೀ ಪರಾ । ದ್ವಾರಕಾಯಾಂ ಮಹಾಮಾಯಾ ಮಥುರಾಯಾಂ ಮಹೇಶ್ವರೀ ॥ 11 ॥ ಕ್ಷುಧಾ ತ್ವಂ ಸರ್ವಭೂತಾನಾಂ ವೇಲಾ ತ್ವಂ ಸಾಗರಸ್ಯ ಚ । ನವಮೀ ಶುಕ್ಲಪಕ್ಷಸ್ಯ ಕೃಷ್ಣಸ್ಯೈಕಾದಶೀ ಪರಾ ॥ 12 ॥ ದಕ್ಷಸಾ ದುಹಿತಾ ದೇವೀ ದಕ್ಷಯಜ್ಞವಿನಾಶಿನೀ । ರಾಮಸ್ಯ ಜಾನಕೀ ತ್ವಂ ಹಿ ರಾವಣಧ್ವಂಸಕಾರಿಣೀ ॥ 13 ॥ ಚಂಡಮುಂಡವಧೇ ದೇವೀ ರಕ್ತಬೀಜವಿನಾಶಿನೀ । ನಿಶುಂಭಶುಂಭಮಥಿನೀ ಮಧುಕೈಟಭಘಾತಿನೀ ॥ 14 ॥ ವಿಷ್ಣುಭಕ್ತಿಪ್ರದಾ ದುರ್ಗಾ ಸುಖದಾ ಮೋಕ್ಷದಾ ಸದಾ । ಆದ್ಯಾಸ್ತವಮಿಮಂ ಪುಣ್ಯಂ ಯಃ ಪಠೇತ್ ಸತತಂ ನರಃ ॥ 15 ॥ ಸರ್ವಜ್ವರಭಯಂ ನ ಸ್ಯಾತ್ ಸರ್ವವ್ಯಾಧಿವಿನಾಶನಂ । ಕೋಟಿತೀರ್ಥಫಲಂ ತಸ್ಯ ಲಭತೇ ನಾತ್ರ ಸಂಶಯಃ ॥ 16 ॥ ಜಯಾ ಮೇ ಚಾಗ್ರತಃ ಪಾತು ವಿಜಯಾ ಪಾತು ಪೃಷ್ಠತಃ । ನಾರಾಯಣೀ ಶೀರ್ಷದೇಶೇ ಸರ್ವಾಂಗೇ ಸಿಂಹವಾಹಿನೀ ॥ 17 ॥ ಶಿವದೂತೀ ಉಗ್ರಚಂಡಾ ಪ್ರತ್ಯಂಗೇ ಪರಮೇಶ್ವರೀ । ವಿಶಾಲಾಕ್ಷೀ ಮಹಾಮಾಯಾ ಕೌಮಾರೀ ಶಂಖಿನೀ ಶಿವಾ ॥ 18 ॥ ಚಕ್ರಿಣೀ ಜಯದಾತ್ರೀ ಚ ರಣಮತ್ತಾ ರಣಪ್ರಿಯಾ । ದುರ್ಗಾ ಜಯಂತೀ ಕಾಲೀ ಚ ಭದ್ರಕಾಲೀ ಮಹೋದರೀ ॥ 19 ॥ ನಾರಸಿಂಹೀ ಚ ವಾರಾಹೀ ಸಿದ್ಧಿದಾತ್ರೀ ಸುಖಪ್ರದಾ । ಭಯಂಕರೀ ಮಹಾರೌದ್ರೀ ಮಹಾಭಯವಿನಾಶಿನೀ ॥ 20 ॥ ಇತಿ ಶ್ರೀ ಬ್ರಹ್ಮಯಾಮಲೇ ಬ್ರಹ್ಮನಾರದಸಂವಾದೇ ಶ್ರೀ ಆದ್ಯಾ ಸ್ತೋತ್ರಂ ॥