हैंహైHaindavamஹிહિં
📍
Font Size:
താരാ കവചം
ഈശ്വര ഉവാച ।
കോടിതന്ത്രേഷു ഗോപ്യാ ഹി വിദ്യാതിഭയമോചിനീ ।
ദിവ്യം ഹി കവചം തസ്യാഃ ശൃണുഷ്വ സർവകാമദം ॥ 1 ॥
അസ്യ ശ്രീതാരാകവചസ്യ അക്ഷോഭ്യ ഋഷിഃ ത്രിഷ്ടുപ് ഛന്ദഃ ഭഗവതീ താരാ ദേവതാ സർവമന്ത്രസിദ്ധി സമൃദ്ധയേ ജപേ വിനിയോഗഃ ।
കവചം ।
പ്രണവോ മേ ശിരഃ പാതു ബ്രഹ്മരൂപാ മഹേശ്വരീ ।
ലലാടേ പാതു ഹ്രീങ്കാരോ ബീജരൂപാ മഹേശ്വരീ ॥ 2 ॥
സ്ത്രീങ്കാരോ വദനേ നിത്യം ലജ്ജാരൂപാ മഹേശ്വരീ ।
ഹൂങ്കാരഃ പാതു ഹൃദയേ ഭവാനീരൂപശക്തിധൃക് ॥ 3 ॥
ഫട്കാരഃ പാതു സർവാംഗേ സർവസിദ്ധിഫലപ്രദാ ।
ഖർവാ മാം പാതു ദേവേശീ ഗണ്ഡയുഗ്മേ ഭയാപഹാ ॥ 4 ॥
നിമ്നോദരീ സദാ സ്കന്ധയുഗ്മേ പാതു മഹേശ്വരീ ।
വ്യാഘ്രചർമാവൃതാ കട്യാം പാതു ദേവീ ശിവപ്രിയാ ॥ 5 ॥
പീനോന്നതസ്തനീ പാതു പാർശ്വയുഗ്മേ മഹേശ്വരീ ।
രക്തവർതുലനേത്രാ ച കടിദേശേ സദാഽവതു ॥ 6 ॥
ലലജ്ജിഹ്വാ സദാ പാതു നാഭൗ മാം ഭുവനേശ്വരീ ।
കരാലാസ്യാ സദാ പാതു ലിംഗേ ദേവീ ഹരപ്രിയാ ॥ 7 ॥
പിംഗോഗ്രൈകജടാ പാതു ജംഘായാം വിഘ്നനാശിനീ ।
പ്രേതഖർപരഭൃദ്ദേവീ ജാനുചക്രേ മഹേശ്വരീ ॥ 8 ॥
നീലവർണാ സദാ പാതു ജാനുനീ സർവദാ മമ ।
നാഗകുണ്ഡലധർത്രീ ച പാതു പാദയുഗേ തതഃ ॥ 9 ॥
നാഗഹാരധരാ ദേവീ സർവാംഗം പാതു സർവദാ ।
നാഗകങ്കധരാ ദേവീ പാതു പ്രാന്തരദേശതഃ ॥ 10 ॥
ചതുർഭുജാ സദാ പാതു ഗമനേ ശത്രുനാശിനീ ।
ഖഡ്ഗഹസ്താ മഹാദേവീ ശ്രവണേ പാതു സർവദാ ॥ 11 ॥
നീലാംബരധരാ ദേവീ പാതു മാം വിഘ്നനാശിനീ ।
കർത്രിഹസ്താ സദാ പാതു വിവാദേ ശത്രുമധ്യതഃ ॥ 12 ॥
ബ്രഹ്മരൂപധരാ ദേവീ സംഗ്രാമേ പാതു സർവദാ ।
നാഗകങ്കണധർത്രീ ച ഭോജനേ പാതു സർവദാ ॥ 13 ॥
ശവകർണാ മഹാദേവീ ശയനേ പാതു സർവദാ ।
വീരാസനധരാ ദേവീ നിദ്രായാം പാതു സർവദാ ॥ 14 ॥
ധനുർബാണധരാ ദേവീ പാതു മാം വിഘ്നസങ്കുലേ ।
നാഗാഞ്ചിതകടീ പാതു ദേവീ മാം സർവകർമസു ॥ 15 ॥
ഛിന്നമുണ്ഡധരാ ദേവീ കാനനേ പാതു സർവദാ ।
ചിതാമധ്യസ്ഥിതാ ദേവീ മാരണേ പാതു സർവദാ ॥ 16 ॥
ദ്വീപിചർമധരാ ദേവീ പുത്രദാരധനാദിഷു ।
അലങ്കാരാന്വിതാ ദേവീ പാതു മാം ഹരവല്ലഭാ ॥ 17 ॥
രക്ഷ രക്ഷ നദീകുഞ്ജേ ഹൂം ഹൂം ഫട് സുസമന്വിതേ ।
ബീജരൂപാ മഹാദേവീ പർവതേ പാതു സർവദാ ॥ 18 ॥
മണിഭൃദ്വജ്രിണീ ദേവീ മഹാപ്രതിസരേ തഥാ ।
രക്ഷ രക്ഷ സദാ ഹൂം ഹൂം ഓം ഹ്രീം സ്വാഹാ മഹേശ്വരീ ॥ 19 ॥
പുഷ്പകേതുരജാർഹേതി കാനനേ പാതു സർവദാ ।
ഓം ഹ്രീം വജ്രപുഷ്പം ഹും ഫട് പ്രാന്തരേ സർവകാമദാ ॥ 20 ॥
ഓം പുഷ്പേ പുഷ്പേ മഹാപുഷ്പേ പാതു പുത്രാന്മഹേശ്വരീ ।
ഹൂം സ്വാഹാ ശക്തിസമ്യുക്താ ദാരാൻ രക്ഷതു സർവദാ ॥ 21 ॥
ഓം ആം ഹൂം സ്വാഹാ മഹേശാനീ പാതു ദ്യൂതേ ഹരപ്രിയാ ।
ഓം ഹ്രീം സർവവിഘ്നോത്സാരിണീ ദേവീ വിഘ്നാന്മാം സദാഽവതു ॥ 22 ॥
ഓം പവിത്രവജ്രഭൂമേ ഹും ഫട് സ്വാഹാ സമന്വിതാ ।
പൂരികാ പാതു മാം ദേവീ സർവവിഘ്നവിനാശിനീ ॥ 23 ॥
ഓം ആഃ സുരേഖേ വജ്രരേഖേ ഹും ഫട് സ്വാഹാ സമന്വിതാ ।
പാതാലേ പാതു സാ ദേവീ ലാകിനീ നാമസഞ്ജ്ഞികാ ॥ 24 ॥
ഹ്രീങ്കാരീ പാതു മാം പൂർവേ ശക്തിരൂപാ മഹേശ്വരീ ।
സ്ത്രീങ്കാരീ പാതു ദേവേശീ വധൂരൂപാ മഹേശ്വരീ ॥ 25 ॥
ഹൂംസ്വരൂപാ മഹാദേവീ പാതു മാം ക്രോധരൂപിണീ ।
ഫട് സ്വരൂപാ മഹാമായാ ഉത്തരേ പാതു സർവദാ ॥ 26 ॥
പശ്ചിമേ പാതു മാം ദേവീ ഫട് സ്വരൂപാ ഹരപ്രിയാ ।
മധ്യേ മാം പാതു ദേവേശീ ഹൂം സ്വരൂപാ നഗാത്മജാ ॥ 27 ॥
നീലവർണാ സദാ പാതു സർവതോ വാഗ്ഭവാ സദാ ।
ഭവാനീ പാതു ഭവനേ സർവൈശ്വര്യപ്രദായിനീ ॥ 28 ॥
വിദ്യാദാനരതാ ദേവീ വക്ത്രേ നീലസരസ്വതീ ।
ശാസ്ത്രേ വാദേ ച സംഗ്രാമേ ജലേ ച വിഷമേ ഗിരൗ ॥ 29 ॥
ഭീമരൂപാ സദാ പാതു ശ്മശാനേ ഭയനാശിനീ ।
ഭൂതപ്രേതാലയേ ഘോരേ ദുർഗമാ ശ്രീഘനാഽവതു ॥ 30 ॥
പാതു നിത്യം മഹേശാനീ സർവത്ര ശിവദൂതികാ ।
കവചസ്യ മാഹാത്മ്യം നാഹം വർഷശതൈരപി ॥ 31 ॥
ശക്നോമി ഗദിതും ദേവി ഭവേത്തസ്യ ഫലം ച യത് ।
പുത്രദാരേഷു ബന്ധൂനാം സർവദേശേ ച സർവദാ ॥ 32 ॥
ന വിദ്യതേ ഭയം തസ്യ നൃപപൂജ്യോ ഭവേച്ച സഃ ।
ശുചിർഭൂത്വാഽശുചിർവാപി കവചം സർവകാമദം ॥ 33 ॥
പ്രപഠൻ വാ സ്മരന്മർത്യോ ദുഃഖശോകവിവർജിതഃ ।
സർവശാസ്ത്രേ മഹേശാനി കവിരാഡ്ഭവതി ധ്രുവം ॥ 34 ॥
സർവവാഗീശ്വരോ മർത്യോ ലോകവശ്യോ ധനേശ്വരഃ ।
രണേ ദ്യൂതേ വിവാദേ ച ജയസ്തത്ര ഭവേദ്ധ്രുവം ॥ 35 ॥
പുത്രപൗത്രാന്വിതോ മർത്യോ വിലാസീ സർവയോഷിതാം ।
ശത്രവോ ദാസതാം യാന്തി സർവേഷാം വല്ലഭഃ സദാ ॥ 36 ॥
ഗർവീ ഖർവീ ഭവത്യേവ വാദീ സ്ഖലതി ദർശനാത് ।
മൃത്യുശ്ച വശ്യതാം യാതി ദാസാസ്തസ്യാവനീഭുജഃ ॥ 37 ॥
പ്രസംഗാത്കഥിതം സർവം കവചം സർവകാമദം ।
പ്രപഠന്വാ സ്മരന്മർത്യഃ ശാപാനുഗ്രഹണേ ക്ഷമഃ ॥ 38 ॥
ആനന്ദവൃന്ദസിന്ധൂനാമധിപഃ കവിരാഡ്ഭവേത് ।
സർവവാഗീശ്വരോ മർത്യോ ലോകവശ്യഃ സദാ സുഖീ ॥ 39 ॥
ഗുരോഃ പ്രസാദമാസാദ്യ വിദ്യാം പ്രാപ്യ സുഗോപിതാം ।
തത്രാപി കവചം ദേവി ദുർലഭം ഭുവനത്രയേ ॥ 40 ॥
ഗുരുർദേവോ ഹരഃ സാക്ഷാത്തത്പത്നീ തു ഹരപ്രിയാ ।
അഭേദേന ഭജേദ്യസ്തു തസ്യ സിദ്ധിരദൂരതഃ ॥ 41 ॥
മന്ത്രാചാരാ മഹേശാനി കഥിതാഃ പൂർവവത്പ്രിയേ ।
നാഭൗ ജ്യോതിസ്തഥാ രക്തം ഹൃദയോപരി ചിന്തയേത് ॥ 42 ॥
ഐശ്വര്യം സുകവിത്വം ച മഹാവാഗീശ്വരോ നൃപഃ ।
നിത്യം തസ്യ മഹേശാനി മഹിലാസംഗമം ചരേത് ॥ 43 ॥
പഞ്ചാചാരരതോ മർത്യഃ സിദ്ധോ ഭവതി നാന്യഥാ ।
ശക്തിയുക്തോ ഭവേന്മർത്യഃ സിദ്ധോ ഭവതി നാന്യഥാ ॥ 44 ॥
ബ്രഹ്മാ വിഷ്ണുശ്ച രുദ്രശ്ച യേ ദേവാസുരമാനുഷാഃ ।
തം ദൃഷ്ട്വാ സാധകം ദേവി ലജ്ജായുക്താ ഭവന്തി തേ ॥ 45 ॥
സ്വർഗേ മർത്യേ ച പാതാലേ യേ ദേവാഃ സിദ്ധിദായകാഃ ।
പ്രശംസന്തി സദാ ദേവി തം ദൃഷ്ട്വാ സാധകോത്തമം ॥ 46 ॥
വിഘ്നാത്മകാശ്ച യേ ദേവാഃ സ്വർഗേ മർത്യേ രസാതലേ ।
പ്രശംസന്തി സദാ സർവേ തം ദൃഷ്ട്വാ സാധകോത്തമം ॥ 47 ॥
ഇതി തേ കഥിതം ദേവി മയാ സമ്യക്പ്രകീർതിതം ।
ഭുക്തിമുക്തികരം സാക്ഷാത്കല്പവൃക്ഷസ്വരൂപകം ॥ 48 ॥
ആസാദ്യാദ്യഗുരും പ്രസാദ്യ യ ഇദം കല്പദ്രുമാലംബനം
മോഹേനാപി മദേന ചാപി രഹിതോ ജാഡ്യേന വാ യുജ്യതേ ।
സിദ്ധോഽസൗ ഭുവി സർവദുഃഖവിപദാം പാരം പ്രയാത്യന്തകേ
മിത്രം തസ്യ നൃപാശ്ച ദേവി വിപദോ നശ്യന്തി തസ്യാശു ച ॥ 49 ॥
തദ്ഗാത്രം പ്രാപ്യ ശസ്ത്രാണി ബ്രഹ്മാസ്ത്രാദീനി വൈ ഭുവി ।
തസ്യ ഗേഹേ സ്ഥിരാ ലക്ഷ്മീർവാണീ വക്ത്രേ വസേദ്ധ്രുവം ॥ 50 ॥
ഇദം കവചമജ്ഞാത്വാ താരാം യോ ഭജതേ നരഃ ।
അല്പായുർനിർധനോ മൂർഖോ ഭവത്യേവ ന സംശയഃ ॥ 51 ॥
ലിഖിത്വാ ധാരയേദ്യസ്തു കണ്ഠേ വാ മസ്തകേ ഭുജേ ।
തസ്യ സർവാർഥസിദ്ധിഃ സ്യാദ്യദ്യന്മനസി വർതതേ ॥ 52 ॥
ഗോരോചനാ കുങ്കുമേന രക്തചന്ദനകേന വാ ।
യാവകൈർവാ മഹേശാനി ലിഖേന്മന്ത്രം സമാഹിതഃ ॥ 53 ॥
അഷ്ടമ്യാം മംഗലദിനേ ചതുർദശ്യാമഥാപി വാ ।
സന്ധ്യായാം ദേവദേവേശി ലിഖേദ്യന്ത്രം സമാഹിതഃ ॥ 54 ॥
മഘായാം ശ്രവണേ വാപി രേവത്യാം വാ വിശേഷതഃ ।
സിംഹരാശൗ ഗതേ ചന്ദ്രേ കർകടസ്ഥേ ദിവാകരേ ॥ 55 ॥
മീനരാശൗ ഗുരൗ യാതേ വൃശ്ചികസ്ഥേ ശനൈശ്ചരേ ।
ലിഖിത്വാ ധാരയേദ്യസ്തു ഉത്തരാഭിമുഖോ ഭവേത് ॥ 56 ॥
ശ്മശാനേ പ്രാന്തരേ വാപി ശൂന്യാഗാരേ വിശേഷതഃ ।
നിശായാം വാ ലിഖേന്മന്ത്രം തസ്യ സിദ്ധിരചഞ്ചലാ ॥ 57 ॥
ഭൂർജപത്രേ ലിഖേന്മന്ത്രം ഗുരുണാ ച മഹേശ്വരി ।
ധ്യാന ധാരണ യോഗേന ധാരയേദ്യസ്തു ഭക്തിതഃ ।
അചിരാത്തസ്യ സിദ്ധിഃ സ്യാന്നാത്ര കാര്യാ വിചാരണാ ॥ 58 ॥
ഇതി ശ്രീ രുദ്രയാമലേ തന്ത്രേ ഉഗ്രതാരാകവചം സമ്പൂർണം ।
Recite with devotion and pure heart
Regular practice brings spiritual benefits