हैंహైHaindavamஹிહિં
📍
Font Size:
ശ്യാമലാ ദണ്ഡകം
ധ്യാനം –
മാണിക്യവീണാമുപലാലയന്തീം
മദാലസാം മഞ്ജുലവാഗ്വിലാസാം ।
മാഹേന്ദ്രനീലദ്യുതികോമലാംഗീം
മാതംഗകന്യാം മനസാ സ്മരാമി ॥ 1 ॥
ചതുർഭുജേ ചന്ദ്രകലാവതംസേ
കുചോന്നതേ കുങ്കുമരാഗ ശോണേ ।
പുണ്ഡ്രേക്ഷുപാശാങ്കുശപുഷ്പബാണ-
-ഹസ്തേ നമസ്തേ ജഗദേകമാതഃ ॥ 2 ॥
മാതാ മരകതശ്യാമാ മാതംഗീ മദശാലിനീ ।
കുര്യാത്കടാക്ഷം കല്യാണീ കദംബവനവാസിനീ ॥ 3 ॥
ജയ മാതംഗതനയേ ജയ നീലോത്പലദ്യുതേ ।
ജയ സംഗീതരസികേ ജയ ലീലാശുകപ്രിയേ ॥ 4 ॥
ദണ്ഡകം –
ജയ ജനനി സുധാ സമുദ്രാന്തരുദ്യൻ മണിദ്വീപ സംരൂഢ ബില്വാടവീമധ്യകല്പദ്രുമാകല്പ കാദംബകാന്താര വാസപ്രിയേ കൃത്തിവാസഃപ്രിയേ സർവലോകപ്രിയേ ।
സാദരാരബ്ധ സംഗീത സംഭാവനാ സംഭ്രമാലോല നീപസ്രഗാബദ്ധചൂലീ സനാഥത്രികേ സാനുമത്പുത്രികേ । ശേഖരീഭൂത ശീതാംശുരേഖാ മയൂഖാവലീ ബദ്ധ സുസ്നിഗ്ധ നീലാലകശ്രേണിശൃംഗാരിതേ ലോകസംഭാവിതേ । കാമലീലാ ധനുഃസന്നിഭ ഭ്രൂലതാപുഷ്പ സന്ദോഹ സന്ദേഹ കൃല്ലോചനേ വാക്സുധാസേചനേ । ചാരു ഗോരോചനാ പങ്ക കേലീ ലലാമാഭിരാമേ സുരാമേ രമേ । പ്രോല്ലസദ്വാലികാ മൗക്തികശ്രേണികാ ചന്ദ്രികാ മണ്ഡലോദ്ഭാസി ലാവണ്യഗണ്ഡസ്ഥല ന്യസ്തകസ്തൂരികാപത്രരേഖാ സമുദ്ഭൂത സൗരഭ്യ സംഭ്രാന്ത ഭൃംഗാംഗനാ ഗീതസാന്ദ്രീഭവന്മന്ദ്ര തന്ത്രീസ്വരേ സുസ്വരേ ഭാസ്വരേ । വല്ലകീ വാദന പ്രക്രിയാ ലോല താലീദലാബദ്ധതാടങ്ക ഭൂഷാവിശേഷാന്വിതേ സിദ്ധസമ്മാനിതേ । ദിവ്യ ഹാലാമദോദ്വേല ഹേലാലസച്ചക്ഷുരാന്ദോലന ശ്രീസമാക്ഷിപ്ത കർണൈക നീലോത്പലേ പൂരിതാശേഷ ലോകാഭിവാഞ്ഛാ ഫലേ ശ്രീഫലേ । സ്വേദ ബിന്ദൂല്ലസത്ഫാല ലാവണ്യ നിഷ്യന്ദ സന്ദോഹ സന്ദേഹകൃന്നാസികാ മൗക്തികേ സർവവിശ്വാത്മികേ കാലികേ । മുഗ്ധ മന്ദസ്മിതോദാര വക്ത്രസ്ഫുരത്പൂഗ താംബൂലകർപൂര ഖണ്ഡോത്കരേ ജ്ഞാനമുദ്രാകരേ സർവസമ്പത്കരേ പദ്മഭാസ്വത്കരേ । കുന്ദപുഷ്പദ്യുതി സ്നിഗ്ധ ദന്താവലീ നിർമലാലോല കല്ലോല സമ്മേലന സ്മേരശോണാധരേ ചാരുവീണാധരേ പക്വബിംബാധരേ ।
സുലലിത നവയൗവനാരംഭ ചന്ദ്രോദയോദ്വേല ലാവണ്യ ദുഗ്ധാർണവാവിർഭവത്കംബുബിബ്ബോക ഭൃത്കന്ധരേ സത്കലാമന്ദിരേ മന്ഥരേ । ദിവ്യരത്നപ്രഭാ ബന്ധുരച്ഛന്ന ഹാരാദിഭൂഷാ സമുദ്യോതമാനാനവദ്യാംശു ശോഭേ ശുഭേ । രത്നകേയൂര രശ്മിച്ഛടാ പല്ലവപ്രോല്ലസദ്ദോർലതാ രാജിതേ യോഗിഭിഃ പൂജിതേ । വിശ്വദിങ്മണ്ഡലവ്യാപി മാണിക്യതേജഃ സ്ഫുരത്കങ്കണാലങ്കൃതേ വിഭ്രമാലങ്കൃതേ സാധകൈഃ സത്കൃതേ । വാസരാരംഭ വേലാ സമുജ്ജൃംഭമാണാരവിന്ദ പ്രതിദ്വന്ദ്വിപാണിദ്വയേ സന്തതോദ്യദ്ദയേ അദ്വയേ । ദിവ്യ രത്നോർമികാദീധിതി സ്തോമസന്ധ്യായമാനാംഗുലീ പല്ലവോദ്യന്നഖേന്ദു പ്രഭാമണ്ഡലേ സന്നതാഖണ്ഡലേ ചിത്പ്രഭാമണ്ഡലേ പ്രോല്ലസത്കുണ്ഡലേ । താരകാരാജിനീകാശ ഹാരാവലിസ്മേര ചാരുസ്തനാഭോഗ ഭാരാനമന്മധ്യവല്ലീവലിച്ഛേദ വീചീസമുല്ലാസ സന്ദർശിതാകാര സൗന്ദര്യ രത്നാകരേ വല്ലകീഭൃത്കരേ കിങ്കര ശ്രീകരേ । ഹേമകുംഭോപമോത്തുംഗ വക്ഷോജ ഭാരാവനമ്രേ ത്രിലോകാവനമ്രേ । ലസദ്വൃത്ത ഗംഭീര നാഭീ സരസ്തീര ശൈവാല ശങ്കാകര ശ്യാമ രോമാവലീഭൂഷണേ മഞ്ജു സംഭാഷണേ । ചാരു ശിഞ്ജത്കടീ സൂത്ര നിർഭർത്സിതാനംഗ ലീലാ ധനുഃ ശിഞ്ജിനീഡംബരേ ദിവ്യരത്നാംബരേ ।
പദ്മരാഗോല്ലസന്മേഖലാ ഭാസ്വര ശ്രോണി ശോഭാ ജിത സ്വർണഭൂഭൃത്തലേ ചന്ദ്രികാശീതലേ ।
വികസിത നവ കിംശുകാതാമ്ര ദിവ്യാംശുകച്ഛന്ന ചാരൂരുശോഭാ പരാഭൂതസിന്ദൂര ശോണായമാനേന്ദ്ര മാതംഗ ഹസ്താർഗലേ വൈഭവാനർഗലേ ശ്യാമലേ । കോമല സ്നിഗ്ധ നീലോപലോത്പാദിതാനംഗ തൂണീര ശങ്കാകരോദാര ജംഘാലതേ ചാരുലീലാഗതേ । നമ്ര ദിക്പാല സീമന്തിനീ കുന്തല സ്നിഗ്ധ നീല പ്രഭാ പുഞ്ജ സഞ്ജാത ദൂർവാങ്കുരാശങ്ക സാരംഗ സമ്യോഗ രിംഖന്നഖേന്ദൂജ്ജ്വലേ പ്രോജ്ജ്വലേ നിർമലേ । പ്രഹ്വ ദേവേശ ലക്ഷ്മീശ ഭൂതേശ തോയേശ വാണീശ കീനാശ ദൈത്യേശ യക്ഷേശ വായ്വഗ്നികോടീര മാണിക്യ സംഘൃഷ്ട ബാലാതപോദ്ദാമ ലാക്ഷാരസാരുണ്യ താരുണ്യ ലക്ഷ്മീഗൃഹീതാംഘ്രി പദ്മേ സുപദ്മേ ഉമേ ।
സുരുചിര നവരത്ന പീഠസ്ഥിതേ സുസ്ഥിതേ । രത്നപദ്മാസനേ രത്നസിംഹാസനേ ശംഖപദ്മദ്വയോപാശ്രിതേ । തത്ര വിഘ്നേശ ദുർഗാ വടു ക്ഷേത്രപാലൈര്യുതേ । മത്തമാതംഗ കന്യാസമൂഹാന്വിതേ മഞ്ജുലാ മേനകാദ്യംഗനാ മാനിതേ ഭൈരവൈരഷ്ടഭിർവേഷ്ടിതേ । ദേവി വാമാദിഭിഃ ശക്തിഭിഃ സേവിതേ । ധാത്രിലക്ഷ്മ്യാദി ശക്ത്യഷ്ടകൈഃ സമ്യുതേ । മാതൃകാമണ്ഡലൈർമണ്ഡിതേ । യക്ഷ ഗന്ധർവ സിദ്ധാംഗനാ മണ്ഡലൈരർചിതേ । പഞ്ചബാണാത്മികേ । പഞ്ചബാണേന രത്യാ ച സംഭാവിതേ । പ്രീതിഭാജാ വസന്തേന ചാനന്ദിതേ । ഭക്തിഭാജാം പരം ശ്രേയസേ കല്പസേ । യോഗിനാം മാനസേ ദ്യോതസേ । ഛന്ദസാമോജസാ ഭ്രാജസേ । ഗീതവിദ്യാ വിനോദാതിതൃഷ്ണേന കൃഷ്ണേന സമ്പൂജ്യസേ । ഭക്തിമച്ചേതസാ വേധസാ സ്തൂയസേ । വിശ്വഹൃദ്യേന വാദ്യേന വിദ്യാധരൈർഗീയസേ ।
ശ്രവണഹരണ ദക്ഷിണക്വാണയാ വീണയാ കിന്നരൈർഗീയസേ । യക്ഷ ഗന്ധർവ സിദ്ധാംഗനാ മണ്ഡലൈരർച്യസേ । സർവസൗഭാഗ്യവാഞ്ഛാവതീഭിർവധൂഭിഃ സുരാണാം സമാരാധ്യസേ । സർവവിദ്യാവിശേഷാത്മകം ചാടുഗാഥാസമുച്ചാരണം കണ്ഠമൂലോല്ലസദ്വർണരാജിത്രയം കോമലശ്യാമലോദാരപക്ഷദ്വയം തുണ്ഡശോഭാതിദൂരീഭവത്കിംശുകം തം ശുകം ലാലയന്തീ പരിക്രീഡസേ । പാണിപദ്മദ്വയേനാക്ഷമാലാമപി സ്ഫാടികീം ജ്ഞാനസാരാത്മകം പുസ്തകം ചാങ്കുശം പാശമാബിഭ്രതീ യേന സഞ്ചിന്ത്യസേ തസ്യ വക്ത്രാന്തരാത് ഗദ്യപദ്യാത്മികാ ഭാരതീ നിസ്സരേത് । യേന വാ യാവകാഭാകൃതിർഭാവ്യസേ തസ്യ വശ്യാ ഭവന്തി സ്ത്രിയഃ പൂരുഷാഃ । യേന വാ ശാതകുംഭദ്യുതിർഭാവ്യസേ സോഽപി ലക്ഷ്മീസഹസ്രൈഃ പരിക്രീഡതേ । കിം ന സിദ്ധ്യേദ്വപുഃ ശ്യാമലം കോമലം ചന്ദ്രചൂഡാന്വിതം താവകം ധ്യായതഃ । തസ്യ ലീലാസരോ വാരിധിഃ, തസ്യ കേലീവനം നന്ദനം, തസ്യ ഭദ്രാസനം ഭൂതലം, തസ്യ ഗീർദേവതാ കിങ്കരീ, തസ്യ ചാജ്ഞാകരീ ശ്രീഃ സ്വയം । സർവതീർഥാത്മികേ, സർവമന്ത്രാത്മികേ, സർവതന്ത്രാത്മികേ, സർവയന്ത്രാത്മികേ, സർവപീഠാത്മികേ, സർവതത്ത്വാത്മികേ, സർവശക്ത്യാത്മികേ, സർവവിദ്യാത്മികേ, സർവയോഗാത്മികേ, സർവനാദാത്മികേ, സർവശബ്ദാത്മികേ, സർവവിശ്വാത്മികേ, സർവദീക്ഷാത്മികേ, സർവസർവാത്മികേ, സർവഗേ, പാഹി മാം പാഹി മാം പാഹി മാം, ദേവി തുഭ്യം നമോ, ദേവി തുഭ്യം നമോ, ദേവി തുഭ്യം നമഃ ॥
ഇതി ശ്രീ കാലിദാസ കൃത ശ്രീ ശ്യാമലാ ദണ്ഡകം ।
Recite with devotion and pure heart
Regular practice brings spiritual benefits