हैंహైHaindavamஹிહિં
📍
Font Size:
ಮಹಾ ತ್ರಿಪುರ ಸುಂದರೀ ಹೃದಯಂ
ವಂದೇ ಸಿಂದೂರವರ್ಣಾಭಂ ವಾಮೋರುನ್ಯಸ್ತವಲ್ಲಭಂ ।
ಇಕ್ಷುವಾರಿಧಿಮಧ್ಯಸ್ಥಮಿಭರಾಜಮುಖಂ ಮಹಃ ॥ 1 ॥
ಗಂಭೀರಲಹರೀಜಾಲಗಂಡೂಷಿತದಿಗಂತರಃ ।
ಅವ್ಯಾನ್ಮಾಮಮೃತಾಂಭೋಧಿರನರ್ಘಮಣಿಸಮ್ಯುತಃ ॥ 2 ॥
ಮಧ್ಯೇ ತಸ್ಯ ಮನೋಹಾರಿ ಮಧುಪಾರವಮೇದುರಂ ।
ಪ್ರಸೂನವಿಗಲನ್ಮಾಧ್ವೀಪ್ರವಾಹಪರಿಪೂರಿತಂ ॥ 3 ॥
ಕಿನ್ನರೀಗಾನಮೇದಸ್ವಿ ಕ್ರೀಡಾಕಂದರದಂತುರಂ ।
ಕಾಂಚನದ್ರುಮಧೂಲೀಭಿಃ ಕಲ್ಪಿತಾವಾಲವದ್ದ್ರುಮಂ ॥ 4 ॥
ಮುಗ್ಧಕೋಕಿಲನಿಕ್ವಾಣಮುಖರೀಕೃತದಿಙ್ಮುಖಂ ।
ಮಂದಾರತರುಸಂತಾನಮಂಜರೀಪುಂಜಪಿಂಜರಂ ॥ 5 ॥
ನಾಸಾನಾಡಿಂಧಮಸ್ಮೇರನಮೇರುಸುಮಸೌರಭಂ ।
ಆವೃಂತಹಸಿತಾಂಭೋಜದೀವ್ಯದ್ವಿಭ್ರಮದೀರ್ಘಿಕಂ ॥ 6 ॥
ಮಂದರಕ್ತಶುಕೀದಷ್ಟಮಾತುಲುಂಗಫಲಾನ್ವಿತಂ ।
ಸವಿಧಸ್ಯಂದಮಾನಾಭ್ರಸರಿತ್ಕಲ್ಲೋಲವೇಲ್ಲಿತಂ ॥ 7 ॥
ಪ್ರಸೂನಪಾಂಸುಸೌರಭ್ಯಪಶ್ಯತೋಹರಮಾರುತಂ ।
ವಕುಲಪ್ರಸವಾಕೀರ್ಣಂ ವಂದೇ ನಂದನಕಾನನಂ ॥ 8 ॥
ತನ್ಮಧ್ಯೇ ನೀಪಕಾಂತಾರಂ ತರಣಿಸ್ತಂಭಕಾರಣಂ ।
ಮಧುಪಾಲಿವಿಮರ್ದಾಲಿಕಲಕ್ವಾಣಕರಂಬಿತಂ ॥ 9 ॥
ಕೋಮಲಶ್ವಶನಾಧೂತಕೋರಕೋದ್ಗತಧೂಲಿಭಿಃ ।
ಸಿಂದೂರಿತನಭೋಮಾರ್ಗಂ ಚಿಂತಿತಂ ಸಿದ್ಧವಂದಿಭಿಃ ॥ 10 ॥
ಮಧ್ಯೇ ತಸ್ಯ ಮರುನ್ಮಾರ್ಗಲಂಬಿಮಾಣಿಕ್ಯತೋರಣಂ ।
ಶಾಣೋಲ್ಲಿಖಿತವೈದೂರ್ಯಕ್ಲುಪ್ತಸಾಲಸಮಾಕುಲಂ ॥ 11 ॥
ಮಾಣಿಕ್ಯಸ್ತಂಭಪಟಲೀಮಯೂಖವ್ಯಾಪ್ತದಿಕ್ತಟಂ ।
ಪಂಚವಿಂಶತಿಸಾಲಾಢ್ಯಾಂ ನಮಾಮಿ ನಗರೋತ್ತಮಂ ॥ 12 ॥
ತತ್ರ ಚಿಂತಾಮಣಿಗೃಹಂ ತಡಿತ್ಕೋಟಿಸಮುಜ್ಜ್ವಲಂ ।
ನೀಲೋತ್ಪಲಸಮಾಕೀರ್ಣನಿರ್ಯೂಹಶತಸಂಕುಲಂ ॥ 13 ॥
ಸೋಮಕಾಂತಮಣಿಕ್ಲುಪ್ತಸೋಪಾನೋದ್ಭಾಸಿವೇದಿಕಂ ।
ಚಂದ್ರಶಾಲಾಚರತ್ಕೇತುಸಮಾಲೀಢನಭೋಂತರಂ ॥ 14 ॥
ಗಾರುತ್ಮತಮಣೀಕ್ಲುಪ್ತಮಂಡಪವ್ಯೂಹಮಂಡಿತಂ ।
ನಿತ್ಯಸೇವಾಪರಾಮರ್ತ್ಯನಿಬಿಡದ್ವಾರಶೋಭಿತಂ ॥ 15 ॥
ಅಧಿಷ್ಠಿತಂ ದ್ವಾರಪಾಲೈರಸಿತೋಮರಪಾಣಿಭಿಃ ।
ನಮಾಮಿ ನಾಕನಾರೀಣಾಂ ಸಾಂದ್ರಸಂಗೀತಮೇದುರಂ ॥ 16 ॥
ತನ್ಮಧ್ಯೇ ತರುಣಾರ್ಕಾಭಂ ತಪ್ತಕಾಂಚನನಿರ್ಮಿತಂ ।
ಶಕ್ರಾದಿಮದ್ದ್ವಾರಪಾಲೈಃ ಸಂತತಂ ಪರಿವೇಷ್ಟಿತಂ ॥ 17 ॥
ಚತುಷ್ಷಷ್ಟಿಮಹಾವಿದ್ಯಾಕಲಾಭಿರಭಿಸಂವೃತಂ ।
ರಕ್ಷಿತಂ ಯೋಗಿನೀಬೃಂದೈ ರತ್ನಸಿಂಹಾಸನಂ ಭಜೇ ॥ 18 ॥
ಮಧ್ಯೇ ತಸ್ಯ ಮರುತ್ಸೇವ್ಯಂ ಚತುರ್ದ್ವಾರಸಮುಜ್ಜ್ವಲಂ ।
ಚತುರಸ್ರತ್ರಿರೇಖಾಢ್ಯಾಂ ಚಾರುತ್ರಿವಲಯಾನ್ವಿತಂ ॥ 19 ॥
ಕಲಾದಲಸಮಾಯುಕ್ತಂ ಕನದಷ್ಟದಲಾನ್ವಿತಂ ।
ಚತುರ್ದಶಾರಸಹಿತಂ ದಶಾರದ್ವಿತಯಾನ್ವಿತಂ ॥ 20 ॥
ಅಷ್ಟಕೋಣಯುತಂ ದಿವ್ಯಮಗ್ನಿಕೋಣವಿರಾಜಿತಂ ।
ಯೋಗಿಭಿಃ ಪೂಜಿತಂ ಯೋಗಿಯೋಗಿನೀಗಣಸೇವಿತಂ ॥ 21 ॥
ಸರ್ವದುಃಖಪ್ರಶಮನಂ ಸರ್ವವ್ಯಾಧಿವಿನಾಶನಂ ।
ವಿಷಜ್ವರಹರಂ ಪುಣ್ಯಂ ವಿವಿಧಾಪದ್ವಿದಾರಣಂ ॥ 22 ॥
ಸರ್ವದಾರಿದ್ರ್ಯಶಮನಂ ಸರ್ವಭೂಪಾಲಮೋಹನಂ ।
ಆಶಾಭಿಪೂರಕಂ ದಿವ್ಯಮರ್ಚಕಾನಾಮಹರ್ನಿಶಂ ॥ 23 ॥
ಅಷ್ಟಾದಶಸುಮರ್ಮಾಢ್ಯಂ ಚತುರ್ವಿಂಶತಿಸಂಧಿನಂ ।
ಶ್ರೀಮದ್ಬಿಂದುಗೃಹೋಪೇತಂ ಶ್ರೀಚಕ್ರಂ ಪ್ರಣಮಾಮ್ಯಹಂ ॥ 24 ॥
ತತ್ರೈವ ಬೈಂದವಸ್ಥಾನೇ ತರುಣಾದಿತ್ಯಸನ್ನಿಭಂ ।
ಪಾಶಾಂಕುಶಧನುರ್ಬಾಣಪರಿಷ್ಕೃತಕರಾಂಬುಜಂ ॥ 25 ॥
ಪೂರ್ಣೇಂದುಬಿಂಬವದನಂ ಫುಲ್ಲಪಂಕಜಲೋಚನಂ ।
ಕುಸುಮಾಯುಧಶೃಂಗಾರಕೋದಂಡಕುಟಿಲಭ್ರುವಂ ॥ 26 ॥
ಚಾರುಚಂದ್ರಕಲೋಪೇತಂ ಚಂದನಾಗುರುರೂಷಿತಂ ।
ಮಂದಸ್ಮಿತಮಧೂಕಾಲಿಕಿಂಜಲ್ಕಿತಮುಖಾಂಬುಜಂ ॥ 27 ॥
ಪಾಟೀರತಿಲಕೋದ್ಭಾಸಿಫಾಲಸ್ಥಲಮನೋಹರಂ ।
ಅನೇಕಕೋಟಿಕಂದರ್ಪಲಾವಣ್ಯಮರುಣಾಧರಂ ॥ 28 ॥
ತಪನೀಯಾಂಶುಕಧರಂ ತಾರುಣ್ಯಶ್ರೀನಿಷೇವಿತಂ ।
ಕಾಮೇಶ್ವರಮಹಂ ವಂದೇ ಕಾಮಿತಾರ್ಥಪ್ರದಂ ನೃಣಾಂ ॥ 29 ॥
ತಸ್ಯಾಂಕಮಧ್ಯಮಾಸೀನಾಂ ತಪ್ತಹಾಟಕಸನ್ನಿಭಾಂ ।
ಮಾಣಿಕ್ಯಮುಕುಟಚ್ಛಾಯಾಮಂಡಲಾರುಣದಿಙ್ಮುಖಾಂ ॥ 30 ॥
ಕಲವೇಣೀಕನತ್ಫುಲ್ಲಕಹ್ಲಾರಕುಸುಮೋಜ್ಜ್ವಲಾಂ ।
ಉಡುರಾಜಕೃತೋತ್ತಂಸಾಮುತ್ಪಲಶ್ಯಾಮಲಾಲಕಾಂ ॥ 31 ॥
ಚತುರ್ಥೀಚಂದ್ರಸಚ್ಛಾತ್ರಫಾಲರೇಖಾಪರಿಷ್ಕೃತಾಂ ।
ಕಸ್ತೂರೀತಿಲಕಾರೂಢಕಮನೀಯಲಲಂತಿಕಾಂ ॥ 32 ॥
ಭ್ರೂಲತಾಶ್ರೀಪರಾಭೂತಪುಷ್ಪಾಯುಧಶರಾಸನಾಂ ।
ನಾಲೀಕದಲದಾಯಾದನಯನತ್ರಯಶೋಭಿತಾಂ ॥ 33 ॥
ಕರುಣಾರಸಸಂಪೂರ್ಣಕಟಾಕ್ಷಹಸಿತೋಜ್ಜ್ವಲಾಂ ।
ಭವ್ಯಮುಕ್ತಾಮಣಿಚಾರುನಾಸಾಮೌಕ್ತಿಕವೇಷ್ಟಿತಾಂ ॥ 34 ॥
ಕಪೋಲಯುಗಲೀನೃತ್ಯಕರ್ಣತಾಟಂಕಶೋಭಿತಾಂ ।
ಮಾಣಿಕ್ಯವಾಲೀಯುಗಲೀಮಯೂಖಾರುಣದಿಙ್ಮುಖಾಂ ॥ 35 ॥
ಪರಿಪಕ್ವಸುಬಿಂಬಾಭಾಪಾಟಲಾಧರಪಲ್ಲವಾಂ ।
ಮಂಜುಲಾಧರಪರ್ವಸ್ಥಮಂದಸ್ಮಿತಮನೋಹರಾಂ ॥ 36 ॥
ದ್ವಿಖಂಡದ್ವಿಜರಾಜಾಭಗಂಡದ್ವಿತಯಮಂಡಿತಾಂ ।
ದರಫುಲ್ಲಲಸದ್ಗಂಡಧವಲಾಪೂರಿತಾನನಾಂ ॥ 37 ॥
ಪಚೇಲಿಮೇಂದುಸುಷಮಾಪಾಟಚ್ಚರಮುಖಪ್ರಭಾಂ ।
ಕಂಧರಾಕಾಂತಿಹಸಿತಕಂಬುಬಿಂಬೋಕಡಂಬರಾಂ ॥ 38 ॥
ಕಸ್ತೂರೀಕರ್ದಮಾಶ್ಯಾಮಕಂಧರಾಮೂಲಕಂದರಾಂ ।
ವಾಮಾಂಸಶಿಖರೋಪಾಂತವ್ಯಾಲಂಬಿಘನವೇಣಿಕಾಂ ॥ 39 ॥
ಮೃಣಾಲಕಾಂಡದಾಯಾದಮೃದುಬಾಹುಚತುಷ್ಟಯಾಂ ।
ಮಣಿಕೇಯೂರಯುಗಲೀಮಯೂಖಾರುಣವಿಗ್ರಹಾಂ ॥ 40 ॥
ಕರಮೂಲಲಸದ್ರತ್ನಕಂಕಣಕ್ವಾಣಪೇಶಲಾಂ ।
ಕರಕಾಂತಿಸಮಾಧೂತಕಲ್ಪಾನೋಕಹಪಲ್ಲವಾಂ ॥ 41 ॥
ಪದ್ಮರಾಗೋರ್ಮಿಕಾಶ್ರೇಣಿಭಾಸುರಾಂಗುಲಿಪಾಲಿಕಾಂ ।
ಪುಂಡ್ರಕೋದಂಡಪುಷ್ಪಾಸ್ತ್ರಪಾಶಾಂಕುಶಲಸತ್ಕರಾಂ ॥ 42 ॥
ತಪ್ತಕಾಂಚನಕುಂಭಾಭಸ್ತನಮಂಡಲಮಂಡಿತಾಂ ।
ಘನಸ್ತನತಟೀಕ್ಲುಪ್ತಕಾಶ್ಮೀರಕ್ಷೋದಪಾಟಲಾಂ ॥ 43 ॥
ಕೂಲಂಕಷಕುಚಸ್ಫಾರತಾರಹಾರವಿರಾಜಿತಾಂ ।
ಚಾರುಕೌಸುಂಭಕೂರ್ಪಾಸಚ್ಛನ್ನವಕ್ಷೋಜಮಂಡಲಾಂ ॥ 44 ॥
ನವನೀಲಘನಶ್ಯಾಮರೋಮರಾಜಿವಿರಾಜಿತಾಂ ।
ಲಾವಣ್ಯಸಾಗರಾವರ್ತನಿಭನಾಭಿವಿಭೂಷಿತಾಂ ॥ 45 ॥
ಡಿಂಭಮುಷ್ಟಿತಲಗ್ರಾಹ್ಯಮಧ್ಯಯಷ್ಟಿಮನೋಹರಾಂ ।
ನಿತಂಬಮಂಡಲಾಭೋಗನಿಕ್ವಣನ್ಮಣಿಮೇಖಲಾಂ ॥ 46 ॥
ಸಂಧ್ಯಾರುಣಕ್ಷೌಮಪಟೀಸಂಛನ್ನಜಘನಸ್ಥಲಾಂ ।
ಘನೋರುಕಾಂತಿಹಸಿತಕದಲೀಕಾಂಡವಿಭ್ರಮಾಂ ॥ 47 ॥
ಜಾನುಸಂಪುಟಕದ್ವಂದ್ವಜಿತಮಾಣಿಕ್ಯದರ್ಪಣಾಂ ।
ಜಂಘಾಯುಗಲಸೌಂದರ್ಯವಿಜಿತಾನಂಗಕಾಹಲಾಂ ॥ 48 ॥
ಪ್ರಪದಚ್ಛಾಯಸಂತಾನಜಿತಪ್ರಾಚೀನಕಚ್ಛಪಾಂ ।
ನೀರಜಾಸನಕೋಟೀರನಿಘೃಷ್ಟಚರಣಾಂಬುಜಾಂ ॥ 49 ॥
ಪಾದಶೋಭಾಪರಾಭೂತಪಾಕಾರಿತರುಪಲ್ಲವಾಂ ।
ಚರಣಾಂಭೋಜಶಿಂಜಾನಮಣಿಮಂಜೀರಮಂಜುಲಾಂ ॥ 50 ॥
ವಿಬುಧೇಂದ್ರವಧೂತ್ಸಂಗವಿನ್ಯಸ್ತಪದಪಲ್ಲವಾಂ ।
ಪಾರ್ಶ್ವಸ್ಥಭಾರತೀಲಕ್ಷ್ಮೀಪಾಣಿಚಾಮರವೀಜಿತಾಂ ॥ 51 ॥
ಪುರತೋ ನಾಕನಾರೀಣಾಂ ಪಶ್ಯಂತೀಂ ನೃತ್ತಮದ್ಭುತಂ ।
ಭ್ರೂಲತಾಂಚಲಸಂಭೂತಪುಷ್ಪಾಯುಧಪರಂಪರಾಂ ॥ 52 ॥
ಪ್ರತ್ಯಗ್ರಯೌವನೋನ್ಮತ್ತಪರಿಫುಲ್ಲವಿಲೋಚನಾಂ ।
ತಾಮ್ರೋಷ್ಠೀಂ ತರಲಾಪಾಂಗೀಂ ಸುನಾಸಾಂ ಸುಂದರಸ್ಮಿತಾಂ ॥ 53 ॥
ಚತುರರ್ಥಧ್ರುವೋದಾರಾಂ ಚಾಂಪೇಯೋದ್ಗಂಧಿಕುಂತಲಾಂ ।
ಮಧುಸ್ನಪಿತಮೃದ್ವೀಕಮಧುರಾಲಾಪಪೇಶಲಾಂ ॥ 54 ॥
ಶಿವಾಂ ಷೋಡಶವಾರ್ಷೀಕಾಂ ಶಿವಾಂಕತಲವಾಸಿನೀಂ ।
ಚಿನ್ಮಯೀಂ ಹೃದಯಾಂಭೋಜೇ ಚಿಂತಯೇಜ್ಜಾಪಕೋತ್ತಮಃ ॥ 55 ॥
ಇತಿ ತ್ರಿಪುರಸುಂದರ್ಯಾ ಹೃದಯಂ ಸರ್ವಕಾಮದಂ ।
ಸರ್ವದಾರಿದ್ರ್ಯಶಮನಂ ಸರ್ವಸಂಪತ್ಪ್ರದಂ ನೃಣಾಂ ॥ 56 ॥
ತಾಪಜ್ವರಾರ್ತಿಶಮನಂ ತರುಣೀಜನಮೋಹನಂ ।
ಮಹಾವಿಷಹರಂ ಪುಣ್ಯಂ ಮಾಂಗಲ್ಯಕರಮದ್ಭುತಂ ॥ 57 ॥
ಅಪಮೃತ್ಯುಹರಂ ದಿವ್ಯಮಾಯುಷ್ಯಶ್ರೀಕರಂ ಪರಂ ।
ಅಪವರ್ಗೈಕನಿಲಯಮವನೀಪಾಲವಶ್ಯದಂ ॥ 58 ॥
ಪಠತಿ ಧ್ಯಾನರತ್ನಂ ಯಃ ಪ್ರಾತಃ ಸಾಯಮತಂದ್ರಿತಃ ।
ನ ವಿಷಾದೈಃ ಸ ಚ ಪುಮಾನ್ ಪ್ರಾಪ್ನೋತಿ ಭುವನತ್ರಯಂ ॥ 59 ॥
ಇತಿ ಶ್ರೀಮಹಾತ್ರಿಪುರಸುಂದರೀಹೃದಯಂ ಸಂಪೂರ್ಣಂ ।
Recite with devotion and pure heart
Regular practice brings spiritual benefits