ഛിന്നമസ്താ സ്തോത്രം

ഈശ്വര ഉവാച ।

സ്തവരാജമഹം വന്ദേ വൈ രോചന്യാശ്ശുഭപ്രദം ।

നാഭൗ ശുഭ്രാരവിന്ദം തദുപരി വിലസന്മണ്ഡലം ചണ്ഡരശ്മേഃ

സംസാരസ്യൈകസാരാം ത്രിഭുവനജനനീം ധർമകാമാർഥദാത്രീം ।

തസ്മിന്നധ്യേ ത്രിഭാഗേ ത്രിതയതനുധരാം ഛിന്നമസ്താം പ്രശസ്താം

താം വന്ദേ ഛിന്നമസ്താം ശമനഭയഹരാം യോഗിനീം യോഗമുദ്രാം ॥ 1 ॥

നാഭൗ ശുദ്ധസരോജവക്ത്രവിലസദ്ബന്ധൂകപുഷ്പാരുണം

ഭാസ്വദ്ഭാസ്കരമണ്ഡലം തദുദരേ തദ്യോനിചക്രം മഹത് ।

തന്മധ്യേ വിപരീതമൈഥുനരത പ്രദ്യുമ്നസത്കാമിനീ

പൃഷ്ഠംസ്യാത്തരുണാര്യ കോടിവിലസത്തേജസ്സ്വരൂപാം ഭജേ ॥ 2 ॥

വാമേ ഛിന്നശിരോധരാം തദിതരേ പാണൗ മഹത്കർതൃകാം

പ്രത്യാലീഢപദാം ദിഗന്തവസനാമുന്മുക്ത കേശവ്രജാം ।

ഛിന്നാത്മീയ ശിരസ്സമച്ചല ദമൃദ്ധാരാം പിബന്തീം പരാം

ബാലാദിത്യ സമപ്രകാശ വിലസന്നേത്രത്രയോദ്ഭാസിനീം ॥ 3 ॥

വാമാദന്യത്ര നാലം ബഹുഗഹനഗലദ്രക്തധാരാഭിരുച്ചൈ-

ര്ഗായന്തീമസ്ഥിഭൂഷാം കരകമലലസത്കർതൃകാമുഗ്രരൂപാം ।

രക്താമാരക്തകേശീമവഗതവസനാവർണനീമാത്മശക്തിം

പ്രത്യാലീഢോരുപാദാമരുണി തനയനാം യോഗിനീം യോഗനിദ്രാം ॥ 4 ॥

ദിഗ്വസ്ത്രാം മുക്തകേശീം പ്രലയഘനഘടാ ഘോരരൂപാം

പ്രചണ്ഡാം ദമ്ഷ്ട്രാദുഃപ്രേക്ഷ്യവക്ത്രോദരവിവരലസല്ലോലജിഹ്വാഗ്രഭാസാം ।

വിദ്യുല്ലോലാക്ഷിയുഗ്മാം ഹൃദയതടലസദ്ഭോഗിനീം ഭീമമൂർതിം

സദ്യഃ ഛിന്നാത്മകണ്ഠപ്രഗലിതരുധിരൈർഡാകിനീ വർധയന്തീം ॥ 5 ॥

ബ്രഹ്മേശാനാച്യുതാദ്യൈശ്ശിരസി വിനിഹിതാ മന്ദപാദാരവിന്ദൈ

രാജ്ഞൈര്യോഗീന്ദ്രമുഖ്യൈഃ പ്രതിപദമനിശം ചിന്തിതാം ചിന്ത്യരൂപാം ।

സംസാരേ സാരഭൂതാം ത്രിഭുവനജനനീം ഛിന്നമസ്താം പ്രശസ്താം

ഇഷ്ടാം താമിഷ്ടദാത്രീം കലികലുഷഹരാം ചേതസാ ചിന്തയാമി ॥ 6 ॥

ഉത്പത്തി സ്ഥിതിസംഹൃതീർഘടയിതും ധത്തേ ത്രിരൂപാം തനും

ത്രൈഗുണ്യാജ്ജഗതോയദീയവികൃതി ബ്രഹ്മാച്യുതശ്ശൂലഭൃത് ।

താമാദ്യാം പ്രകൃതിം സ്മരാമി മനസാ സർവാർഥസംസിദ്ധയേ

യസ്മാത്മ്സേരപദാരവിന്ദയുഗലേ ലാഭം ഭജന്തേ നരാഃ ॥ 7 ॥

അഭിലഷിത പരസ്ത്രീ യോഗപൂജാപരോഽഹം

ബഹുവിധജന ഭാവാരംഭസംഭാവിതോഽഹം ।

പശുജനവിരതോഽഹം ഭൈരവീ സംസ്ഥിതോഽഹം

ഗുരുചരണപരോഽഹം ഭൈരവോഹം ശിവോഽഹം ॥ 8 ॥

ഇദം സ്തോത്രം മഹാപുണ്യം ബ്രഹ്മണാ ഭാഷിതം പുരാ ।

സർവസിദ്ധിപ്രദം സാക്ഷാന്മഹാപാതകനാശനം ॥ 9 ॥

യഃപഠേത്പ്രാതരുത്ഥായ ദേവ്യാസ്സന്നിഹിതോപി വാ ।

തസ്യ സിദ്ധിർഭവേദ്ദേവീ വാഞ്ഛിതാർഥ പ്രദായിനീ ॥ 10 ॥

ധനം ധാന്യം സുതം ജായാം ഹയം ഹസ്തിനമേവ ച ।

വസുന്ധരാം മഹാവിദ്യാമഷ്ടസിദ്ധിം ലഭേദ്ധൃവം ॥ 11 ॥

വൈയാഘ്രാജിനരഞ്ജിതസ്വജഘനേഽരണ്യേ പ്രലംബോദരേ

ഖർവേ നിർവചനീയപർവസുഭഗേ മുണ്ഡാവലീമണ്ഡിതേ ।

കർതീം കുന്ദരുചിം വിചിത്രവനിതാം ജ്ഞാനേ ദധാനേ പദേ

മാതർഭക്തജനാനുകമ്പിനി മഹാമായേസ്തു തുഭ്യം നമഃ ॥ 12 ॥

ഇതി ശ്രീ ഛിന്നമസ്താ സ്തോത്രം ।

Recite with devotion and pure heart

Regular practice brings spiritual benefits