ಅಸ್ಯ ಶ್ರೀಬಾಲಾದೇವ್ಯಾ ಹೃದಯಮಹಾಮಂತ್ರಸ್ಯ, ಸದಾಶಿವಃ ಋಷಿಃ, ಅನುಷ್ಟುಪ್ಛಂದಃ, ಬಾಲಾತ್ರಿಪುರಸುಂದರೀ ದೇವತಾ, ಮಮ ಬಾಲಾತ್ರಿಪುರಸುಂದರೀ ದೇವತಾ ಪ್ರೀತ್ಯರ್ಥೇ ಜಪೇ ವಿನಿಯೋಗಃ । ಧ್ಯಾನಂ – ವಂದೇ ದೇವೀಂ ಶಿವಾಂ ಬಾಲಾಂ ಭಾಸ್ವನ್ಮಂಡಲಮಧ್ಯಗಾಂ । ಚಂಚಚ್ಚಂದ್ರಾನನಾಂ ತಪ್ತಚಾಮೀಕರಸಮಪ್ರಭಾಂ ॥ 1 ॥ ನೃತ್ಯತ್ಖಂಜನನೇತ್ರಸ್ಯ ಲೋಚನಾತ್ಯಂತವಲ್ಲಭಾಂ । ಮಧ್ಯಭಾಗೇ ಲಸತ್ಕಾಂಚೀ ಮಣಿಮುಕ್ತಾವಿನಿರ್ಮಿತಾಂ ॥ 2 ॥ ಪದವಿನ್ಯಸ್ತಹಂಸಾಲೀಂ ಶುಕನಾಸಾವಿರಾಜಿತಾಂ । ಕರಿಶುಂಡೋರುಯುಗಲಾಂ ಮತ್ತಕೋಕಿಲನಿಃಸ್ವನಾಂ ॥ 3 ॥ ಪುಸ್ತಕಂ ಜಪಮಾಲಾಂ ಚ ವರದಾಽಭಯಪಾಣಿನೀಂ । ಕುಮಾರೀವೇಶಶೋಭಾಢ್ಯಾಂ ಕುಮಾರೀವೃಂದಮಂಡಿತಾಂ ॥ 4 ॥ ವಿದ್ರುಮಾಧರಶೋಭಾಢ್ಯಾಂ ವಿದ್ರುಮಾಲಿನಖಾಲಿಕಾಂ । ಕ್ವಣತ್ಕಾಂಚೀಂ ಕಲಾನಾಥಸಮಾನರುಚಿರಾನನಾಂ ॥ 5 ॥ ಮೃಣಾಲಬಾಹುಲತಿಕಾಂ ನಾನಾರತ್ನವಿರಾಜಿತಾಂ । ಕರಪದ್ಮಸಮಾನಾಭಾಂ ಪಾದಪದ್ಮವಿರಾಜಿತಾಂ ॥ 6 ॥ ಚಾರುಚಾಂಪೇಯವಸನಾಂ ದೇವದೇವನಮಸ್ಕೃತಾಂ । ಚಂದನೇಂದುವಿಲಿಪ್ತಾಂಗೀಂ ರೋಮರಾಜೀವಿಚಿತ್ರಿತಾಂ ॥ 7 ॥ ತಿಲಪುಷ್ಪಸಮಾನಾಭಾಂ ನಾಸಾರತ್ನಸಮನ್ವಿತಾಂ । ಗಜಗಂಡನಿತಂಬಾಭಾಂ ರಂಭಾಜಂಘಾವಿರಾಜಿತಾಂ ॥ 8 ॥ ಹರವಿಷ್ಣುಮಹೇಂದ್ರಾದ್ಯೈಃ ಪೂಜ್ಯಶ್ರೀಪಾದಪಂಕಜಾಂ । ಕಲ್ಯಾಣೀಂ ಕಮಲಾಂ ಕಾಲೀಂ ಕುಂಚಿಕಾಂ ಕಮಲೇಶ್ವರೀಂ ॥ 9 ॥ ಪಾವನೀಂ ಪರಮಾಂ ಶಕ್ತಿಂ ಪವಿತ್ರಾಂ ಪಾವನೀಂ ಶಿವಾಂ । ಭವಾನೀಂ ಭವಪಾಶಘ್ನೀಂ ಭೀತಿಹಾಂ ಭುವನೇಶ್ವರೀಂ ॥ 10 ॥ ಭವಾನೀಂ ಭವಶಕ್ತಿಂ ಚ ಭೇರುಂಡಾಂ ಮುಂಡಮಾಲಿನೀಂ । ಜಲಂಧರಗಿರ್ಯುತ್ಸಂಗಾಂ ಪೂರ್ಣಗಿರ್ಯನುರಾಗಿಣೀಂ ॥ 11 ॥ ಕಾಮರೂಪಾಂ ಚ ಕಾಮಾಖ್ಯಾಂ ದೇವೀಕೋಟಕೃತಾಲಯಾಂ । ಓಂಕಾರಪೀಠನಿಲಯಾಂ ಮಹಾಮಾಯಾಂ ಮಹೇಶ್ವರೀಂ ॥ 12 ॥ ವಿಶ್ವೇಶ್ವರೀಂ ಚ ಮಧುರಾಂ ನಾನಾರೂಪಾಕೃತಾಪುರೀಂ । ಐಂ ಕ್ಲೀಂ ಸೌಃ ತ್ರ್ಯಕ್ಷರಾಂ ಬಾಲಾಂ ತದ್ವಿಲೋಮಾಂ ಕುಮಾರಿಕಾಂ ॥ 13 ॥ ಹೌಃ ಐಂ ಹಂಸಃ ನಮೋ ದೇವಿ ತ್ರಿಪುರಾಂ ಜೀವಭೈರವೀಂ । ನಾರದೋ ಯಸ್ಯ ದೇವರ್ಷಿಃ ಮಹಾಶಾಂತಿಫಲಪ್ರದಾಂ ॥ 14 ॥ ಓಂ ನಮೋ ಶ್ರೀಮಹಾಲಕ್ಷ್ಮ್ಯೈ ಲಕ್ಷ್ಮೀಂ ತ್ರಿಪುರಭೈರವೀಂ । ಓಂ ಹ್ರೀಂ ಜೂಂ ಸಃ ಪ್ರಾಣಗ್ರಂಥಿಃ ದ್ವಿಧಾರ್ಗಕವಚದ್ವಯಂ ॥ 15 ॥ ಇಯಂ ಸಂಜೀವಿನೀ ದೇವೀ ಮೃತಾನ್ ಜೀವತ್ವದಾಯಿನೀ । ಫ್ರೇಃ ಫ್ರಂ ನ ಫ ಲ ವ ರ ಯೂಂ ಶ್ರೋಂ ಶ್ರೋಂ ಅಮೃತಮಾವದೇತ್ ॥ 16 ॥ ಸ್ರಾವಯ ಸ್ರಾವಯ ತಥಾ ವ್ರೀಂ ವ್ರೀಂ ಮೃತ್ಯುಂಜಯಾಭಿಧಾ । ಓಂ ನಮೋ ಪ್ರಥಮಾಭಾಷ್ಯ ಕಾಲೀಬೀಜಂ ದ್ವಿಧಾ ಪಠೇತ್ ॥ 17 ॥ ಕೂರ್ಚದ್ವಯಂ ತಥಾ ಮಾಯಾ ಆಗಾಮಿಪದಮಾವದೇತ್ । ಮೃತ್ಯುಂ ಛಿಂದಿ ತಥಾ ಭಿಂದಿ ಮಹಾಮೃತ್ಯುಂಜಯೋ ಭವೇತ್ ॥ 18 ॥ ತವ ಶಬ್ದಂ ಮಮಾಭಾಷ್ಯ ಖಡ್ಗೇನ ಚ ವಿದಾರಯ । ದ್ವಿಧಾ ಭಾಷ್ಯ ಮಹೇಶಾನಿ ತದಂತೇ ವಹ್ನಿಸುಂದರೀ ॥ 19 ॥ ಇಯಂ ದೇವೀ ಮಹಾವಿದ್ಯಾ ಆಗಾಮಿ ಕಾಲವಂಚಿನೀ । ಪ್ರಾತರ್ದೀಪದಲಾಕಾರಂ ವಾಗ್ಭವಂ ರಸನಾತಲೇ ॥ 20 ॥ ವಿಚಿಂತ್ಯ ಪ್ರಜಪೇತ್ತಚ್ಚ ಮಹಾಕವಿರ್ಭವೇದ್ಧ್ರುವಂ । ಮಧ್ಯಾಹ್ನೇ ಕಾಮರಾಜಾಖ್ಯಂ ಜಪಾಕುಸುಮಸನ್ನಿಭಂ ॥ 21 ॥ ವಿಚಿಂತ್ಯ ಹೃದಿ ಮಧ್ಯೇ ತು ತಚ್ಚ ಮಂತ್ರಂ ಜಪೇತ್ಪ್ರಿಯೇ । ಧರ್ಮಾರ್ಥಕಾಮಮೋಕ್ಷಾಣಾಂ ಭಾಜನೋ ಜಾಯತೇ ಧ್ರುವಂ ॥ 22 ॥ ತಾರ್ತೀಯಂ ಚಂದ್ರಸಂಕಾಶಂ ಸಾಯಂಕಾಲೇ ವಿಚಿಂತ್ಯ ಚ । ಪ್ರಜಪೇತ್ತತ್ರ ದೇವೇಶಿ ಜಾಯತೇ ಮದನೋಪಮಃ ॥ 23 ॥ ವಾಗ್ಭವಂ ಕಾಮರಾಜಂ ತು ತಾರ್ತೀಯಂ ವಹ್ನಿವಲ್ಲಭಾಂ । ಅಯುತಂ ಪ್ರಜಪೇನ್ನಿತ್ಯಂ ಆಗಾಮೀ ಕಾಲೋ ವಂಚ್ಯತೇ ॥ 24 ॥ ತ್ರಿಕೋಣಂ ಚಕ್ರಮಾಲಿಖ್ಯ ಮಾಯಾಯುಕ್ತಂ ಮಹೇಶ್ವರಿ । ತಸ್ಯೋಪರಿ ಲಿಖೇತ್ಪದ್ಮಂ ಮಾತೃಕಾ ಮಂತ್ರಗರ್ಭಿತಂ ॥ 25 ॥ ತಸ್ಯೋಪರಿ ಸಮಾಸ್ತೀರ್ಯ ಚಾಸನಂ ರಕ್ತವರ್ಣಕಂ । ತಸ್ಯೋಪರಿ ವಿಶೇದ್ದೇವಿ ಸಾಧಕಃ ಪ್ರಾಙ್ಮುಖೋ ನಿಶಿ ॥ 26 ॥ ಕ್ರಮೇಣ ಪ್ರಜಪೇದ್ವರ್ಣಾನ್ ವಾಗಾದಿ ನಿಯತಃ ಶುಚಿಃ । ಮಂಡಲತ್ರಿತಯೇ ದೇವಿ ಪ್ರಾಪ್ಯತೇ ಸಿದ್ಧಿರುತ್ತಮಾ ॥ 27 ॥ ನವಯೋನ್ಯಾತ್ಮಕಂ ಚಕ್ರಂ ಪೂಜಯೇಚ್ಛಾಸ್ತ್ರವರ್ತ್ಮನಾ । ಪ್ರಜಪೇದ್ದ್ವ್ಯಕ್ಷರೀಂ ಬಾಲಾಂ ಸರ್ವಸಿದ್ಧೀಶ್ವರೋ ಭವೇತ್ ॥ 28 ॥ ಯಂ ಯಂ ಚಿಂತಯತೇ ಕಾಮಂ ತಂ ತಂ ಪ್ರಾಪ್ನೋತಿ ಸರ್ವಶಃ । ಇದಂ ತು ಹೃದಯಂ ದೇವಿ ತವಾಗ್ರೇ ಕಥಿತಂ ಮಯಾ ॥ 29 ॥ ಮಮ ಭಾಗ್ಯಂ ಚ ಸರ್ವಸ್ವಂ ಬ್ರಹ್ಮಾದೀನಾಂ ಚ ದುರ್ಲಭಂ । ಗೋಪನೀಯಂ ತ್ವಯಾ ಭದ್ರೇ ಸ್ವಯೋನಿರಿವ ಪಾರ್ವತಿ ॥ 30 ॥ ಶತಾವರ್ತೇನ ದೇವೇಶಿ ಮಾನುಷೀ ವಶಮಾಪ್ನುಯಾತ್ । ಸಹಸ್ರಾವರ್ತನಾದ್ದೇವಿ ದೇವಾ ವೈ ವಶಮಾಪ್ನುಯುಃ ॥ 31 ॥ ಲಕ್ಷಮಾವರ್ತನಾದ್ದೇವಿ ಶುನಾಸೀರಃ ಸ್ವಕಾಸನಾತ್ । ಕ್ಷಣಾಚ್ಚ್ಯವತಿ ತತ್ರ ವೈ ಕಿಂ ಪುನಃ ಕ್ಷುದ್ರಜಂತವಃ ॥ 32 ॥ ತಸ್ಮಾತ್ಸರ್ವಪ್ರಯತ್ನೇನ ಜ್ಞಾತ್ವಾ ದೇವಿ ಜಪೇನ್ಮನುಂ । ಸರ್ವಸಿದ್ಧಿಮವಾಪ್ನೋತಿ ಸರ್ವದಾ ಸುಖವಾನ್ಭವೇತ್ ॥ 33 ॥ ಇತಿ ಜಾಲಶಂಬರಮಹಾತಂತ್ರೇ ಶ್ರೀ ಬಾಲಾ ತ್ರಿಪುರ ಸುಂದರೀ ಹೃದಯಂ ।