ಯಾಮಾಮನಂತಿ ಮುನಯಃ ಪ್ರಕೃತಿಂ ಪುರಾಣೀಂ ವಿದ್ಯೇತಿ ಯಾಂ ಶ್ರುತಿರಹಸ್ಯವಿದೋ ವದಂತಿ । ತಾಮರ್ಧಪಲ್ಲವಿತಶಂಕರರೂಪಮುದ್ರಾಂ ದೇವೀಮನನ್ಯಶರಣಃ ಶರಣಂ ಪ್ರಪದ್ಯೇ ॥ 1 ॥ ಅಂಬ ಸ್ತವೇಷು ತವ ತಾವದಕರ್ತೃಕಾಣಿ ಕುಂಠೀಭವಂತಿ ವಚಸಾಮಪಿ ಗುಂಭನಾನಿ । ಡಿಂಭಸ್ಯ ಮೇ ಸ್ತುತಿರಸಾವಸಮಂಜಸಾಪಿ ವಾತ್ಸಲ್ಯನಿಘ್ನಹೃದಯಾಂ ಭವತೀಂ ಧಿನೋತು ॥ 2 ॥ ವ್ಯೋಮೇತಿ ಬಿಂದುರಿತಿ ನಾದ ಇತೀಂದುಲೇಖಾ- -ರೂಪೇತಿ ವಾಗ್ಭವತನೂರಿತಿ ಮಾತೃಕೇತಿ । ನಿಃಸ್ಯಂದಮಾನಸುಖಬೋಧಸುಧಾಸ್ವರೂಪಾ ವಿದ್ಯೋತಸೇ ಮನಸಿ ಭಾಗ್ಯವತಾಂ ಜನಾನಾಂ ॥ 3 ॥ ಆವಿರ್ಭವತ್ಪುಲಕಸಂತತಿಭಿಃ ಶರೀರೈ- -ರ್ನಿಃಸ್ಯಂದಮಾನಸಲಿಲೈರ್ನಯನೈಶ್ಚ ನಿತ್ಯಂ । ವಾಗ್ಭಿಶ್ಚ ಗದ್ಗದಪದಾಭಿರುಪಾಸತೇ ಯೇ ಪಾದೌ ತವಾಂಬ ಭುವನೇಷು ತ ಏವ ಧನ್ಯಾಃ ॥ 4 ॥ ವಕ್ತ್ರಂ ಯದುದ್ಯತಮಭಿಷ್ಟುತಯೇ ಭವತ್ಯಾ- -ಸ್ತುಭ್ಯಂ ನಮೋ ಯದಪಿ ದೇವಿ ಶಿರಃ ಕರೋತಿ । ಚೇತಶ್ಚ ಯತ್ತ್ವಯಿ ಪರಾಯಣಮಂಬ ತಾನಿ ಕಸ್ಯಾಪಿ ಕೈರಪಿ ಭವಂತಿ ತಪೋವಿಶೇಷೈಃ ॥ 5 ॥ ಮೂಲಾಲವಾಲಕುಹರಾದುದಿತಾ ಭವಾನಿ ನಿರ್ಭಿದ್ಯ ಷಟ್ಸರಸಿಜಾನಿ ತಟಿಲ್ಲತೇವ । ಭೂಯೋಽಪಿ ತತ್ರ ವಿಶಸಿ ಧ್ರುವಮಂಡಲೇಂದು- -ನಿಃಸ್ಯಂದಮಾನಪರಮಾಮೃತತೋಯರೂಪಾ ॥ 6 ॥ ದಗ್ಧಂ ಯದಾ ಮದನಮೇಕಮನೇಕಧಾ ತೇ ಮುಗ್ಧಃ ಕಟಾಕ್ಷವಿಧಿರಂಕುರಯಾಂಚಕಾರ । ಧತ್ತೇ ತದಾಪ್ರಭೃತಿ ದೇವಿ ಲಲಾಟನೇತ್ರಂ ಸತ್ಯಂ ಹ್ರಿಯೈವ ಮುಕುಲೀಕೃತಮಿಂದುಮೌಲೇಃ ॥ 7 ॥ ಅಜ್ಞಾತಸಂಭವಮನಾಕಲಿತಾನ್ವವಾಯಂ ಭಿಕ್ಷುಂ ಕಪಾಲಿನಮವಾಸಸಮದ್ವಿತೀಯಂ । ಪೂರ್ವಂ ಕರಗ್ರಹಣಮಂಗಲತೋ ಭವತ್ಯಾಃ ಶಂಭುಂ ಕ ಏವ ಬುಬುಧೇ ಗಿರಿರಾಜಕನ್ಯೇ ॥ 8 ॥ ಚರ್ಮಾಂಬರಂ ಚ ಶವಭಸ್ಮವಿಲೇಪನಂ ಚ ಭಿಕ್ಷಾಟನಂ ಚ ನಟನಂ ಚ ಪರೇತಭೂಮೌ । ವೇತಾಲಸಂಹತಿಪರಿಗ್ರಹತಾ ಚ ಶಂಭೋಃ ಶೋಭಾಂ ಬಿಭರ್ತಿ ಗಿರಿಜೇ ತವ ಸಾಹಚರ್ಯಾತ್ ॥ 9 ॥ ಕಲ್ಪೋಪಸಂಹರಣಕೇಲಿಷು ಪಂಡಿತಾನಿ ಚಂಡಾನಿ ಖಂಡಪರಶೋರಪಿ ತಾಂಡವಾನಿ । ಆಲೋಕನೇನ ತವ ಕೋಮಲಿತಾನಿ ಮಾತ- -ರ್ಲಾಸ್ಯಾತ್ಮನಾ ಪರಿಣಮಂತಿ ಜಗದ್ವಿಭೂತ್ಯೈ ॥ 10 ॥ ಜಂತೋರಪಶ್ಚಿಮತನೋಃ ಸತಿ ಕರ್ಮಸಾಮ್ಯೇ ನಿಃಶೇಷಪಾಶಪಟಲಚ್ಛಿದುರಾ ನಿಮೇಷಾತ್ । ಕಲ್ಯಾಣಿ ದೇಶಿಕಕಟಾಕ್ಷಸಮಾಶ್ರಯೇಣ ಕಾರುಣ್ಯತೋ ಭವತಿ ಶಾಂಭವವೇದದೀಕ್ಷಾ ॥ 11 ॥ ಮುಕ್ತಾವಿಭೂಷಣವತೀ ನವವಿದ್ರುಮಾಭಾ ಯಚ್ಚೇತಸಿ ಸ್ಫುರಸಿ ತಾರಕಿತೇವ ಸಂಧ್ಯಾ । ಏಕಃ ಸ ಏವ ಭುವನತ್ರಯಸುಂದರೀಣಾಂ ಕಂದರ್ಪತಾಂ ವ್ರಜತಿ ಪಂಚಶರೀಂ ವಿನಾಪಿ ॥ 12 ॥ ಯೇ ಭಾವಯಂತ್ಯಮೃತವಾಹಿಭಿರಂಶುಜಾಲೈ- -ರಾಪ್ಯಾಯಮಾನಭುವನಾಮಮೃತೇಶ್ವರೀಂ ತ್ವಾಂ । ತೇ ಲಂಘಯಂತಿ ನನು ಮಾತರಲಂಘನೀಯಾಂ ಬ್ರಹ್ಮಾದಿಭಿಃ ಸುರವರೈರಪಿ ಕಾಲಕಕ್ಷಾಂ ॥ 13 ॥ ಯಃ ಸ್ಫಾಟಿಕಾಕ್ಷಗುಣಪುಸ್ತಕಕುಂಡಿಕಾಢ್ಯಾಂ ವ್ಯಾಖ್ಯಾಸಮುದ್ಯತಕರಾಂ ಶರದಿಂದುಶುಭ್ರಾಂ । ಪದ್ಮಾಸನಾಂ ಚ ಹೃದಯೇ ಭವತೀಮುಪಾಸ್ತೇ ಮಾತಃ ಸ ವಿಶ್ವಕವಿತಾರ್ಕಿಕಚಕ್ರವರ್ತೀ ॥ 14 ॥ ಬರ್ಹಾವತಂಸಯುತಬರ್ಬರಕೇಶಪಾಶಾಂ ಗುಂಜಾವಲೀಕೃತಘನಸ್ತನಹಾರಶೋಭಾಂ । ಶ್ಯಾಮಾಂ ಪ್ರವಾಲವದನಾಂ ಸುಕುಮಾರಹಸ್ತಾಂ ತ್ವಾಮೇವ ನೌಮಿ ಶಬರೀಂ ಶಬರಸ್ಯ ಜಾಯಾಂ ॥ 15 ॥ ಅರ್ಧೇನ ಕಿಂ ನವಲತಾಲಲಿತೇನ ಮುಗ್ಧೇ ಕ್ರೀತಂ ವಿಭೋಃ ಪರುಷಮರ್ಧಮಿದಂ ತ್ವಯೇತಿ । ಆಲೀಜನಸ್ಯ ಪರಿಹಾಸವಚಾಂಸಿ ಮನ್ಯೇ ಮಂದಸ್ಮಿತೇನ ತವ ದೇವಿ ಜಡೀ ಭವಂತಿ ॥ 16 ॥ ಬ್ರಹ್ಮಾಂಡ ಬುದ್ಬುದಕದಂಬಕಸಂಕುಲೋಽಯಂ ಮಾಯೋದಧಿರ್ವಿವಿಧದುಃಖತರಂಗಮಾಲಃ । ಆಶ್ಚರ್ಯಮಂಬ ಝಟಿತಿ ಪ್ರಲಯಂ ಪ್ರಯಾತಿ ತ್ವದ್ಧ್ಯಾನಸಂತತಿಮಹಾಬಡಬಾಮುಖಾಗ್ನೌ ॥ 17 ॥ ದಾಕ್ಷಾಯಣೀತಿ ಕುಟಿಲೇತಿ ಕುಹಾರಿಣೀತಿ ಕಾತ್ಯಾಯನೀತಿ ಕಮಲೇತಿ ಕಲಾವತೀತಿ । ಏಕಾ ಸತೀ ಭಗವತೀ ಪರಮಾರ್ಥತೋಽಪಿ ಸಂದೃಶ್ಯಸೇ ಬಹುವಿಧಾ ನನು ನರ್ತಕೀವ ॥ 18 ॥ ಆನಂದಲಕ್ಷಣಮನಾಹತನಾಮ್ನಿ ದೇಶೇ ನಾದಾತ್ಮನಾ ಪರಿಣತಂ ತವ ರೂಪಮೀಶೇ । ಪ್ರತ್ಯಙ್ಮುಖೇನ ಮನಸಾ ಪರಿಚೀಯಮಾನಂ ಶಂಸಂತಿ ನೇತ್ರಸಲಿಲೈಃ ಪುಲಕೈಶ್ಚ ಧನ್ಯಾಃ ॥ 19 ॥ ತ್ವಂ ಚಂದ್ರಿಕಾ ಶಶಿನಿ ತಿಗ್ಮರುಚೌ ರುಚಿಸ್ತ್ವಂ ತ್ವಂ ಚೇತನಾಸಿ ಪುರುಷೇ ಪವನೇ ಬಲಂ ತ್ವಂ । ತ್ವಂ ಸ್ವಾದುತಾಸಿ ಸಲಿಲೇ ಶಿಖಿನಿ ತ್ವಮೂಷ್ಮಾ ನಿಃಸಾರಮೇವ ನಿಖಿಲಂ ತ್ವದೃತೇ ಯದಿ ಸ್ಯಾತ್ ॥ 20 ॥ ಜ್ಯೋತೀಂಷಿ ಯದ್ದಿವಿ ಚರಂತಿ ಯದಂತರಿಕ್ಷಂ ಸೂತೇ ಪಯಾಂಸಿ ಯದಹಿರ್ಧರಣೀಂ ಚ ಧತ್ತೇ । ಯದ್ವಾತಿ ವಾಯುರನಲೋ ಯದುದರ್ಚಿರಾಸ್ತೇ ತತ್ಸರ್ವಮಂಬ ತವ ಕೇವಲಮಾಜ್ಞಯೈವ ॥ 21 ॥ ಸಂಕೋಚಮಿಚ್ಛಸಿ ಯದಾ ಗಿರಿಜೇ ತದಾನೀಂ ವಾಕ್ತರ್ಕಯೋಸ್ತ್ವಮಸಿ ಭೂಮಿರನಾಮರೂಪಾ । ಯದ್ವಾ ವಿಕಾಸಮುಪಯಾಸಿ ಯದಾ ತದಾನೀಂ ತ್ವನ್ನಾಮರೂಪಗಣನಾಃ ಸುಕರಾ ಭವಂತಿ ॥ 22 ॥ ಭೋಗಾಯ ದೇವಿ ಭವತೀಂ ಕೃತಿನಃ ಪ್ರಣಮ್ಯ ಭ್ರೂಕಿಂಕರೀಕೃತಸರೋಜಗೃಹಾಃ ಸಹಸ್ರಂ । ಚಿಂತಾಮಣಿಪ್ರಚಯಕಲ್ಪಿತಕೇಲಿಶೈಲೇ ಕಲ್ಪದ್ರುಮೋಪವನ ಏವ ಚಿರಂ ರಮಂತೇ ॥ 23 ॥ ಹರ್ತುಂ ತ್ವಮೇವ ಭವಸಿ ತ್ವದಧೀನಮೀಶೇ ಸಂಸಾರತಾಪಮಖಿಲಂ ದಯಯಾ ಪಶೂನಾಂ । ವೈಕರ್ತನೀ ಕಿರಣಸಂಹತಿರೇವ ಶಕ್ತಾ ಧರ್ಮಂ ನಿಜಂ ಶಮಯಿತುಂ ನಿಜಯೈವ ವೃಷ್ಟ್ಯಾ ॥ 24 ॥ ಶಕ್ತಿಃ ಶರೀರಮಧಿದೈವತಮಂತರಾತ್ಮಾ ಜ್ಞಾನಂ ಕ್ರಿಯಾ ಕರಣಮಾಸನಜಾಲಮಿಚ್ಛಾ । ಐಶ್ವರ್ಯಮಾಯತನಮಾವರಣಾನಿ ಚ ತ್ವಂ ಕಿಂ ತನ್ನ ಯದ್ಭವಸಿ ದೇವಿ ಶಶಾಂಕಮೌಲೇಃ ॥ 25 ॥ ಭೂಮೌ ನಿವೃತ್ತಿರುದಿತಾ ಪಯಸಿ ಪ್ರತಿಷ್ಠಾ ವಿದ್ಯಾಽನಲೇ ಮರುತಿ ಶಾಂತಿರತೀವಕಾಂತಿಃ । ವ್ಯೋಮ್ನೀತಿ ಯಾಃ ಕಿಲ ಕಲಾಃ ಕಲಯಂತಿ ವಿಶ್ವಂ ತಾಸಾಂ ಹಿ ದೂರತರಮಂಬ ಪದಂ ತ್ವದೀಯಂ ॥ 26 ॥ ಯಾವತ್ಪದಂ ಪದಸರೋಜಯುಗಂ ತ್ವದೀಯಂ ನಾಂಗೀಕರೋತಿ ಹೃದಯೇಷು ಜಗಚ್ಛರಣ್ಯೇ । ತಾವದ್ವಿಕಲ್ಪಜಟಿಲಾಃ ಕುಟಿಲಪ್ರಕಾರಾ- -ಸ್ತರ್ಕಗ್ರಹಾಃ ಸಮಯಿನಾಂ ಪ್ರಲಯಂ ನ ಯಾಂತಿ ॥ 27 ॥ ನಿರ್ದೇವಯಾನಪಿತೃಯಾನವಿಹಾರಮೇಕೇ ಕೃತ್ವಾ ಮನಃ ಕರಣಮಂಡಲಸಾರ್ವಭೌಮಂ । ಧ್ಯಾನೇ ನಿವೇಶ್ಯ ತವ ಕಾರಣಪಂಚಕಸ್ಯ ಪರ್ವಾಣಿ ಪಾರ್ವತಿ ನಯಂತಿ ನಿಜಾಸನತ್ವಂ ॥ 28 ॥ ಸ್ಥೂಲಾಸು ಮೂರ್ತಿಷು ಮಹೀಪ್ರಮುಖಾಸು ಮೂರ್ತೇಃ ಕಸ್ಯಾಶ್ಚನಾಪಿ ತವ ವೈಭವಮಂಬ ಯಸ್ಯಾಃ । ಪತ್ಯಾ ಗಿರಾಮಪಿ ನ ಶಕ್ಯತ ಏವ ವಕ್ತುಂ ಸಾಪಿ ಸ್ತುತಾ ಕಿಲ ಮಯೇತಿ ತಿತಿಕ್ಷಿತವ್ಯಂ ॥ 29 ॥ ಕಾಲಾಗ್ನಿಕೋಟಿರುಚಿಮಂಬ ಷಡಧ್ವಶುದ್ಧೌ ಆಪ್ಲಾವನೇಷು ಭವತೀಮಮೃತೌಘವೃಷ್ಟಿಂ । ಶ್ಯಾಮಾಂ ಘನಸ್ತನತಟಾಂ ಶಕಲೀಕೃತಾಘಾಂ ಧ್ಯಾಯಂತ ಏವ ಜಗತಾಂ ಗುರವೋ ಭವಂತಿ ॥ 30 ॥ ವಿದ್ಯಾಂ ಪರಾಂ ಕತಿಚಿದಂಬರಮಂಬ ಕೇಚಿ- -ದಾನಂದಮೇವ ಕತಿಚಿತ್ಕತಿಚಿಚ್ಚ ಮಾಯಾಂ । ತ್ವಾಂ ವಿಶ್ವಮಾಹುರಪರೇ ವಯಮಾಮನಾಮಃ ಸಾಕ್ಷಾದಪಾರಕರುಣಾಂ ಗುರುಮೂರ್ತಿಮೇವ ॥ 31 ॥ ಕುವಲಯದಲನೀಲಂ ಬರ್ಬರಸ್ನಿಗ್ಧಕೇಶಂ ಪೃಥುತರಕುಚಭಾರಾಕ್ರಾಂತಕಾಂತಾವಲಗ್ನಂ । ಕಿಮಿಹ ಬಹುಭಿರುಕ್ತೈಸ್ತ್ವತ್ಸ್ವರೂಪಂ ಪರಂ ನಃ ಸಕಲಜನನಿ ಮಾತಃ ಸಂತತಂ ಸನ್ನಿಧತ್ತಾಂ ॥ 32 ॥ ಇತಿ ಶ್ರೀಕಾಲಿದಾಸ ವಿರಚಿತ ಪಂಚಸ್ತವ್ಯಾಂ ಚತುರ್ಥಃ ಅಂಬಾಸ್ತವಃ ।