ഘോര കഷ്ടോദ്ധാരണ ദത്ത സ്തോത്രം

ശ്രീപാദ ശ്രീവല്ലഭ ത്വം സദൈവ

ശ്രീദത്താസ്മാൻപാഹി ദേവാധിദേവ ।

ഭാവഗ്രാഹ്യ ക്ലേശഹാരിൻ സുകീർതേ

ഘോരാത്കഷ്ടാദുദ്ധരാസ്മാന്നമസ്തേ ॥ 1 ॥

ത്വം നോ മാതാ ത്വം പിതാഽഽപ്തോഽധിപസ്ത്വം

ത്രാതാ യോഗക്ഷേമകൃത്സദ്ഗുരുസ്ത്വം ।

ത്വം സർവസ്വം നോ പ്രഭോ വിശ്വമൂർതേ

ഘോരാത്കഷ്ടാദുദ്ധരാസ്മാന്നമസ്തേ ॥ 2 ॥

പാപം താപം വ്യാധിമാധിം ച ദൈന്യം

ഭീതിം ക്ലേശം ത്വം ഹരാശു ത്വദന്യം ।

ത്രാതാരം നോ വീക്ഷ്യ ഈശാസ്തജൂർതേ

ഘോരാത്കഷ്ടാദുദ്ധരാസ്മാന്നമസ്തേ ॥ 3 ॥

നാന്യസ്ത്രാതാ നാഽപി ദാതാ ന ഭർതാ

ത്വത്തോ ദേവ ത്വം ശരണ്യോഽകഹർതാ ।

കുർവാത്രേയാനുഗ്രഹം പൂർണരാതേ

ഘോരാത്കഷ്ടാദുദ്ധരാസ്മാന്നമസ്തേ ॥ 4 ॥

ധർമേ പ്രീതിം സന്മതിം ദേവഭക്തിം

സത്സംഗാപ്തിം ദേഹി ഭുക്തിം ച മുക്തിം ।

ഭാവാസക്തിം ചാഖിലാനന്ദമൂർതേ

ഘോരാത്കഷ്ടാദുദ്ധരാസ്മാന്നമസ്തേ ॥ 5 ॥

ശ്ലോകപഞ്ചകമേതദ്യോ ലോകമംഗലവർധനം ।

പ്രപഠേന്നിയതോ ഭക്ത്യാ സ ശ്രീദത്തപ്രിയോ ഭവേത് ॥ 6 ॥

ഇതി ശ്രീ മത്പരമഹംസ പരിവ്രാജകാചാര്യ ശ്രീമദ്വാസുദേവാനന്ദസരസ്വതി യതി വിരചിതം ഘോര കഷ്ടോദ്ധാരണ സ്തോത്രം ।

Recite with devotion and pure heart

Regular practice brings spiritual benefits