kṛṣṇāveṇīpañcagaṅgāyutisthaṃ śrīpādaṃ śrīvallabhaṃ bhaktahṛtstham । dattātreyaṃ pādukārūpiṇaṃ taṃ vande vidyāṃ śālinīṃ saṅgṛṇantam ॥ 1 ॥ upendravajrāyudhapūrvadevaiḥ sapūrvadevairmunibhiśca gītam । nṛsiṃhasañjñaṃ nigamāgamādyaṃ gamāgamādyantakaraṃ prapadye ॥ 2 ॥ parihṛtanatajūrtiḥ svīyakāmaprapūrti- -rhṛtanijabhajakārtiḥ saccidānandamūrtiḥ । sadayahṛdayavartī yogaviccakravartī sa jayati yatirāṭ diṅmālinī yasya kīrtiḥ ॥ 3 ॥ drutavilambitakarmavicāraṇā phalasusiddhirato'marabhāgjanaḥ । anubhavatyakameva taduddhṛtau haririhāvirabhūtpadarūpyasau ॥ 4 ॥ vidyunmālātulyā sampatprāṅmadhyānte'pyasyā āpat । tatte dhāryaṃ jyotirnityaṃ dhyāne me'stu brahman satyam ॥ 5 ॥ tridvāraṃ tava bhavanaṃ bahupradīpaṃ vighneśāmarapatiyoginīmarujjaiḥ । jāhnavyāvṛtamabhito'nnapūrṇayā ca smṛtvā me bhavati matiḥ praharṣiṇīyam ॥ 6 ॥ tatiṃ dvijānāṃ śivasopajātiṃ puṣṇāti kṛṣṇā'tra vinaṣṭatṛṣṇā । avākpravāhā'numatāśivāhā yā sā'ṣṭatīrthā smṛtimetu sārthā ॥ 7 ॥ kalau malaughāntakaraṃ karañja- -pure vare jātamakāmakāmam । carācarādyaṃ bhuvanāvanārthaṃ kṣaṇe kṣaṇe sajjanatānatāṅghrim ॥ 8 ॥ bhujaṅgaprayātādguṇotthādivāsmā- -dbhavādbhīta āgatya na tyaktumicchet । nṛsiṃhasya vāṭyāṃ prabho rājadhānyāṃ sa yāyātsudhanyāṃ gatiṃ lokamānyām ॥ 9 ॥ iti śrīvāsudevānandasarasvatī viracitaṃ datta pādukāṣṭakam ।