Dattatreya Vajra Kavacham

ṛṣaya ūcuḥ । kathaṃ saṅkalpasiddhiḥ syādvedavyāsa kalauyuge । dharmārthakāmamokṣāṇāṃ sādhanaṃ kimudāhṛtam ॥ 1 ॥ vyāsa uvāca । śṛṇvantu ṛṣayassarve śīghraṃ saṅkalpasādhanam । sakṛduccāramātreṇa bhogamokṣapradāyakam ॥ 2 ॥ gaurīśṛṅge himavataḥ kalpavṛkṣopaśobhitam । dīpte divyamahāratna hemamaṇḍapamadhyagam ॥ 3 ॥ ratnasiṃhāsanāsīnaṃ prasannaṃ parameśvaram । mandasmitamukhāmbhojaṃ śaṅkaraṃ prāha pārvatī ॥ 4 ॥ śrīdevī uvāca । devadeva mahādeva lokaśaṅkara śaṅkara । mantrajālāni sarvāṇi yantrajālāni kṛtsnaśaḥ ॥ 5 ॥ tantrajālānyanekāni mayā tvattaḥ śrutāni vai । idānīṃ draṣṭumicchāmi viśeṣeṇa mahītalam ॥ 6 ॥ ityudīritamākarṇya pārvatyā parameśvaraḥ । kareṇāmṛjya santoṣāt pārvatīṃ pratyabhāṣata ॥ 7 ॥ mayedānīṃ tvayā sārdhaṃ vṛṣamāruhya gamyate । ityuktvā vṛṣamāruhya pārvatyā saha śaṅkaraḥ ॥ 8 ॥ yayau bhūmaṇḍalaṃ draṣṭuṃ gauryāścitrāṇi darśayan । kvacit vindhyācalaprānte mahāraṇye sudurgame ॥ 9 ॥ tatra vyāhartumāyāntaṃ bhillaṃ paraśudhāriṇam । vadhyamānaṃ mahāvyāghraṃ nakhadaṃṣṭrābhirāvṛtam ॥ 10 ॥ atīva citracāritryaṃ vajrakāyasamāyutam । aprayatnamanāyāsamakhinnaṃ sukhamāsthitam ॥ 11 ॥ palāyantaṃ mṛgaṃ paścādvyāghro bhītyā palāyataḥ । etadāścaryamālokya pārvatī prāha śaṅkaram ॥ 12 ॥ śrī pārvatyuvāca । kimāścaryaṃ kimāścaryamagre śambho nirīkṣyatām । ityuktaḥ sa tataḥ śambhurdṛṣṭvā prāha purāṇavit ॥ 13 ॥ śrī śaṅkara uvāca । gauri vakṣyāmi te citramavāṅmānasagocaram । adṛṣṭapūrvamasmābhirnāsti kiñcinna kutracit ॥ 14 ॥ mayā samyak samāsena vakṣyate śṛṇu pārvati । ayaṃ dūraśravā nāma bhillaḥ paramadhārmikaḥ ॥ 15 ॥ samitkuśaprasūnāni kandamūlaphalādikam । pratyahaṃ vipinaṃ gatvā samādāya prayāsataḥ ॥ 16 ॥ priye pūrvaṃ munīndrebhyaḥ prayacchati na vāñchati । te'pi tasminnapi dayāṃ kurvate sarvamauninaḥ ॥ 17 ॥ dalādano mahāyogī vasanneva nijāśrame । kadācidasmarat siddhaṃ dattātreyaṃ digambaram ॥ 18 ॥ dattātreyaḥ smartṛgāmī cetihāsaṃ parīkṣitum । tatkṣaṇāt so'pi yogīndro dattātreyaḥ samutthitaḥ ॥ 19 ॥ taṃ dṛṣṭvāścaryatoṣābhyāṃ dalādanamahāmuniḥ । sampūjyāgre viṣīdantaṃ dattātreyamuvāca tam ॥ 20 ॥ mayopahūtaḥ samprāpto dattātreya mahāmune । smartṛgāmī tvamityetat kiṃ vadantī parīkṣitum ॥ 21 ॥ mayādya saṃsmṛto'si tvamaparādhaṃ kṣamasva me । dattātreyo muniṃ prāha mama prakṛtirīdṛśī ॥ 22 ॥ abhaktyā vā subhaktyā vā yaḥ smarennāmananyadhīḥ । tadānīṃ tamupāgamya dadāmi tadabhīpsitam ॥ 23 ॥ dattātreyo muniṃ prāha dalādanamunīśvaram । yadiṣṭaṃ tadvṛṇīṣva tvaṃ yat prāpto'haṃ tvayā smṛtaḥ ॥ 24 ॥ dattātreyaṃ muniṃ prāha mayā kimapi nocyate । tvaccitte yat sthitaṃ tanme prayaccha munipuṅgava ॥ 25 ॥ śrī dattātreya uvāca । mamāsti vajrakavacaṃ gṛhāṇetyavadanmunim । tathetyaṅgīkṛtavate dalādamunaye muniḥ ॥ 26 ॥ svavajrakavacaṃ prāha ṛṣicchandaḥ purassaram । nyāsaṃ dhyānaṃ phalaṃ tatra prayojanamaśeṣataḥ ॥ 27 ॥ asya śrīdattātreya vajrakavaca stotramantrasya, kirātarūpī mahārudrṛṣiḥ, anuṣṭup chandaḥ, śrīdattātreyo devatā, drāṃ bījam, āṃ śaktiḥ, krauṃ kīlakam. oṃ ātmane namaḥ oṃ drīṃ manase namaḥ oṃ āṃ drīṃ śrīṃ sauḥ oṃ klāṃ klīṃ klūṃ klaiṃ klauṃ klaḥ śrī dattātreya prasāda siddhyarthe jape viniyogaḥ karanyāsaḥ । oṃ drāṃ aṅguṣṭhābhyāṃ namaḥ । oṃ drīṃ tarjanībhyāṃ namaḥ । oṃ drūṃ madhyamābhyāṃ namaḥ । oṃ draiṃ anāmikābhyāṃ namaḥ । oṃ drauṃ kaniṣṭhikābhyāṃ namaḥ । oṃ draḥ karatalakarapṛṣṭhābhyāṃ namaḥ । hṛdayādinyāsaḥ । oṃ drāṃ hṛdayāya namaḥ । oṃ drīṃ śirase svāhā । oṃ drūṃ śikhāyai vaṣaṭ । oṃ draiṃ kavacāya hum । oṃ drauṃ netratrayāya vauṣaṭ । oṃ draḥ astrāya phaṭ । oṃ bhūrbhuvassuvaromiti digbandhaḥ । dhyānam । jagadaṅkurakandāya saccidānandamūrtaye । dattātreyāya yogīndracandrāya paramātmane ॥ 1 ॥ kadā yogī kadā bhogī kadā nagnaḥ piśācavat । dattātreyo hariḥ sākṣāt bhuktimuktipradāyakaḥ ॥ 2 ॥ vārāṇasīpurasnāyī kŏlhāpurajapādaraḥ । māhurīpurabhīkṣāśī sahyaśāyī digambaraḥ ॥ 3 ॥ indranīla samākāraḥ candrakāntisamadyutiḥ । vaiḍhūrya sadṛśasphūrtiḥ calatkiñcijjaṭādharaḥ ॥ 4 ॥ snigdhadhāvalya yuktākṣo'tyantanīla kanīnikaḥ । bhrūvakṣaḥśmaśrunīlāṅkaḥ śaśāṅkasadṛśānanaḥ ॥ 5 ॥ hāsanirjita nihāraḥ kaṇṭhanirjita kambukaḥ । māṃsalāṃso dīrghabāhuḥ pāṇinirjitapallavaḥ ॥ 6 ॥ viśālapīnavakṣāśca tāmrapāṇirdalodaraḥ । pṛthulaśroṇilalito viśālajaghanasthalaḥ ॥ 7 ॥ rambhāstambhopamānoruḥ jānupūrvaikajaṅghakaḥ । gūḍhagulphaḥ kūrmapṛṣṭho lasatvādoparisthalaḥ ॥ 8 ॥ raktāravindasadṛśa ramaṇīya padādharaḥ । carmāmbaradharo yogī smartṛgāmī kṣaṇekṣaṇe ॥ 9 ॥ jñānopadeśanirato vipaddharaṇadīkṣitaḥ । siddhāsanasamāsīna ṛjukāyo hasanmukhaḥ ॥ 10 ॥ vāmahastena varado dakṣiṇenābhayaṅkaraḥ । bālonmatta piśācībhiḥ kvacid yuktaḥ parīkṣitaḥ ॥ 11 ॥ tyāgī bhogī mahāyogī nityānando nirañjanaḥ । sarvarūpī sarvadātā sarvagaḥ sarvakāmadaḥ ॥ 12 ॥ bhasmoddhūlita sarvāṅgo mahāpātakanāśanaḥ । bhuktiprado muktidātā jīvanmukto na saṃśayaḥ ॥ 13 ॥ evaṃ dhyātvā'nanyacitto madvajrakavacaṃ paṭhet । māmeva paśyansarvatra sa mayā saha sañcaret ॥ 14 ॥ digambaraṃ bhasmasugandha lepanaṃ cakraṃ triśūlaṃ ḍhamaruṃ gadāyudham । padmāsanaṃ yogimunīndravanditaṃ dattetināmasmaraṇena nityam ॥ 15 ॥ pañcopacārapūjā । oṃ laṃ pṛthivītattvātmane śrīdattātreyāya namaḥ । gandhaṃ parikalpayāmi। oṃ haṃ ākāśatattvātmane śrīdattātreyāya namaḥ । puṣpaṃ parikalpayāmi । oṃ yaṃ vāyutattvātmane śrīdattātreyāya namaḥ । dhūpaṃ parikalpayāmi । oṃ raṃ vahnitattvātmane śrīdattātreyāya namaḥ । dīpaṃ parikalpayāmi । oṃ vaṃ amṛta tattvātmane śrīdattātreyāya namaḥ । amṛtanaivedyaṃ parikalpayāmi । oṃ saṃ sarvatattvātmane śrīdattātreyāya namaḥ । tāmbūlādisarvopacārān parikalpayāmi । (anantaraṃ ‘oṃ drāṃ…’ iti mūlamantraṃ aṣṭottaraśatavāraṃ (108) japet) atha vajrakavacam । oṃ dattātreyāya śiraḥpātu sahasrābjeṣu saṃsthitaḥ । phālaṃ pātvānasūyeyaḥ candramaṇḍalamadhyagaḥ ॥ 1 ॥ kūrcaṃ manomayaḥ pātu haṃ kṣaṃ dvidalapadmabhūḥ । jyotirūpo'kṣiṇīpātu pātu śabdātmakaḥ śrutī ॥ 2 ॥ nāsikāṃ pātu gandhātmā mukhaṃ pātu rasātmakaḥ । jihvāṃ vedātmakaḥ pātu dantoṣṭhau pātu dhārmikaḥ ॥ 3 ॥ kapolāvatribhūḥ pātu pātvaśeṣaṃ mamātmavit । sarvātmā ṣoḍaśārābjasthitaḥ svātmā'vatād galam ॥ 4 ॥ skandhau candrānujaḥ pātu bhujau pātu kṛtādibhūḥ । jatruṇī śatrujit pātu pātu vakṣasthalaṃ hariḥ ॥ 5 ॥ kādiṭhāntadvādaśārapadmago marudātmakaḥ । yogīśvareśvaraḥ pātu hṛdayaṃ hṛdayasthitaḥ ॥ 6 ॥ pārśve hariḥ pārśvavartī pātu pārśvasthitaḥ smṛtaḥ । haṭhayogādiyogajñaḥ kukṣiṃ pātu kṛpānidhiḥ ॥ 7 ॥ ḍakārādi phakārānta daśārasarasīruhe । nābhisthale vartamāno nābhiṃ vahnyātmako'vatu ॥ 8 ॥ vahnitattvamayo yogī rakṣatānmaṇipūrakam । kaṭiṃ kaṭisthabrahmāṇḍavāsudevātmako'vatu ॥ 9 ॥ vakārādi lakārānta ṣaṭpatrāmbujabodhakaḥ । jalatattvamayo yogī svādhiṣṭhānaṃ mamāvatu ॥ 10 ॥ siddhāsana samāsīna ūrū siddheśvaro'vatu । vādisānta catuṣpatrasaroruha nibodhakaḥ ॥ 11 ॥ mūlādhāraṃ mahīrūpo rakṣatād vīryanigrahī । pṛṣṭhaṃ ca sarvataḥ pātu jānunyastakarāmbujaḥ ॥ 12 ॥ jaṅghe pātvavadhūtendraḥ pātvaṅghrī tīrthapāvanaḥ । sarvāṅgaṃ pātu sarvātmā romāṇyavatu keśavaḥ ॥ 13 ॥ carma carmāmbaraḥ pātu raktaṃ bhaktipriyo'vatu । māṃsaṃ māṃsakaraḥ pātu majjāṃ majjātmako'vatu ॥ 14 ॥ asthīni sthiradhīḥ pāyānmedhāṃ vedhāḥ prapālayet । śukraṃ sukhakaraḥ pātu cittaṃ pātu dṛḍhākṛtiḥ ॥ 15 ॥ manobuddhimahaṅkāraṃ hṛṣīkeśātmako'vatu । karmendriyāṇi pātvīśaḥ pātu jñānendriyāṇyajaḥ ॥ 16 ॥ bandhūn bandhūttamaḥ pāyācchatrubhyaḥ pātu śatrujit । gṛhārāmadhanakṣetraputrādīn śaṅkaro'vatu ॥ 17 ॥ bhāryāṃ prakṛtivit pātu paśvādīn pātu śārṅgabhṛt । prāṇān pātu pradhānajño bhakṣyādīn pātu bhāskaraḥ ॥ 18 ॥ sukhaṃ candrātmakaḥ pātu duḥkhāt pātu purāntakaḥ । paśūn paśupatiḥ pātu bhūtiṃ bhūteśvaro mama ॥ 19 ॥ prācyāṃ viṣaharaḥ pātu pātvāgneyyāṃ makhātmakaḥ । yāmyāṃ dharmātmakaḥ pātu nairṛtyāṃ sarvavairihṛt ॥ 20 ॥ varāhaḥ pātu vāruṇyāṃ vāyavyāṃ prāṇado'vatu । kauberyāṃ dhanadaḥ pātu pātvaiśānyāṃ mahāguruḥ ॥ 21 ॥ ūrdhvaṃ pātu mahāsiddhaḥ pātvadhastājjaṭādharaḥ । rakṣāhīnaṃ tu yat sthānaṃ rakṣatvādimunīśvaraḥ ॥ 22 ॥ karanyāsaḥ । oṃ drāṃ aṅguṣṭhābhyāṃ namaḥ । oṃ drīṃ tarjanībhyāṃ namaḥ । oṃ drūṃ madhyamābhyāṃ namaḥ । oṃ draiṃ anāmikābhyāṃ namaḥ । oṃ drauṃ kaniṣṭhikābhyāṃ namaḥ । oṃ draḥ karatalakarapṛṣṭhābhyāṃ namaḥ । hṛdayādinyāsaḥ । oṃ drāṃ hṛdayāya namaḥ । oṃ drīṃ śirase svāhā । oṃ drūṃ śikhāyai vaṣaṭ । oṃ draiṃ kavacāya hum । oṃ drauṃ netratrayāya vauṣaṭ । oṃ draḥ astrāya phaṭ । oṃ bhūrbhuvassuvaromiti digvimokaḥ । phalaśṛti ॥ etanme vajrakavacaṃ yaḥ paṭhet śṛṇuyādapi । vajrakāyaścirañjīvī dattātreyo'hamabruvam ॥ 23 ॥ tyāgī bhogī mahāyogī sukhaduḥkhavivarjitaḥ । sarvatra siddhasaṅkalpo jīvanmukto'dyavartate ॥ 24 ॥ ityuktvāntardadhe yogī dattātreyo digambaraḥ । dalādano'pi tajjaptvā jīvanmuktaḥ sa vartate ॥ 25 ॥ bhillo dūraśravā nāma tadānīṃ śrutavānidam । sakṛcchravaṇamātreṇa vajrāṅgo'bhavadapyasau ॥ 26 ॥ ityetad vajrakavacaṃ dattātreyasya yoginaḥ । śrutvā śeṣaṃ śambhumukhāt punarapyāha pārvatī ॥ 27 ॥ śrī pārvatyuvāca । etat kavaca māhātmyaṃ vada vistarato mama । kutra kena kadā jāpyaṃ kiyajjāpyaṃ kathaṃ katham ॥ 28 ॥ uvāca śambhustat sarvaṃ pārvatyā vinayoditam । śrīparameśvara uvāca । śṛṇu pārvati vakṣyāmi samāhitamanāvilam ॥ 29 ॥ dharmārthakāmamokṣāṇāmidameva parāyaṇam । hastyaśvarathapādāti sarvaiśvarya pradāyakam ॥ 30 ॥ putramitrakalatrādi sarvasantoṣasādhanam । vedaśāstrādividyānāṃ vidhānaṃ paramaṃ hi tat ॥ 31 ॥ saṅgīta śāstra sāhitya satkavitva vidhāyakam । buddhi vidyā smṛti prajñā mati prauḍhipradāyakam ॥ 32 ॥ sarvasantoṣakaraṇaṃ sarvaduḥkhanivāraṇam । śatrusaṃhārakaṃ śīghraṃ yaśaḥkīrtivivardhanam ॥ 33 ॥ aṣṭasaṅkhyā mahārogāḥ sannipātāstrayodaśa । ṣaṇṇavatyakṣirogāśca viṃśatirmeharogakāḥ ॥ 34 ॥ aṣṭādaśatu kuṣṭhāni gulmānyaṣṭavidhānyapi । aśītirvātarogāśca catvāriṃśattu paittikāḥ ॥ 35 ॥ viṃśatiḥ śleṣmarogāśca kṣayacāturthikādayaḥ । mantrayantrakuyogādyāḥ kalpatantrādinirmitāḥ ॥ 36 ॥ brahmarākṣasa vetālakūṣmāṇḍādi grahodbhavāḥ । saṅgajā deśakālasthāstāpatrayasamutthitāḥ ॥ 37 ॥ navagrahasamudbhūtā mahāpātaka sambhavāḥ । sarve rogāḥ praṇaśyanti sahasrāvartanād dhruvam ॥ 38 ॥ ayutāvṛttimātreṇa vandhyā putravatī bhavet । ayutadvitayāvṛttyā hyapamṛtyujayo bhavet ॥ 39 ॥ ayutatritayāccaiva khecaratvaṃ prajāyate । sahasrāyutadarvāk sarvakāryāṇi sādhayet ॥ 40 ॥ lakṣāvṛttyā sarvasiddhirbhavatyeva na saṃśayaḥ ॥ 41 ॥ viṣavṛkṣasya mūleṣu tiṣṭhan vai dakṣiṇāmukhaḥ । kurute māsamātreṇa vairiṇaṃ vikalendriyam ॥ 42 ॥ audumbaratarormūle vṛddhikāmena jāpyate । śrīvṛkṣamūle śrīkāmī tintriṇī śāntikarmaṇi ॥ 43 ॥ ojaskāmo'śvatthamūle strīkāmaiḥ sahakārake । jñānārthī tulasīmūle garbhagehe sutārthibhiḥ ॥ 44 ॥ dhanārthibhistu sukṣetre paśukāmaistu goṣṭhake । devālaye sarvakāmaistatkāle sarvadarśitam ॥ 45 ॥ nābhimātrajale sthitvā bhānumālokya yo japet । yuddhe vā śāstravāde vā sahasreṇa jayo bhavet ॥ 46 ॥ kaṇṭhamātre jale sthitvā yo rātrau kavacaṃ paṭhet । jvarāpasmārakuṣṭhādi tāpajvaranivāraṇam ॥ 47 ॥ yatra yat syāt sthiraṃ yadyat prasaktaṃ tannivartate । tena tatra hi japtavyaṃ tataḥ siddhirbhaveddhruvam ॥ 48 ॥ ityuktavān śivo gaurvai rahasyaṃ paramaṃ śubham । yaḥ paṭhet vajrakavacaṃ dattātreya samo bhavet ॥ 49 ॥ evaṃ śivena kathitaṃ himavatsutāyai proktaṃ dalādamunaye'trisutena pūrvam । yaḥ ko'pi vajrakavacaṃ paṭhatīha loke dattopamaścarati yogivaraścirāyuḥ ॥ 50 ॥ iti śrī dattātreya vajrakavacastotraṃ sampūrṇam ॥

Recite with devotion and pure heart

Regular practice brings spiritual benefits

More stotras of Dattatreya: