ഋഷയ ഊചുഃ । കഥം സങ്കല്പസിദ്ധിഃ സ്യാദ്വേദവ്യാസ കലൗയുഗേ । ധർമാർഥകാമമോക്ഷാണാം സാധനം കിമുദാഹൃതം ॥ 1 ॥ വ്യാസ ഉവാച । ശൃണ്വന്തു ഋഷയസ്സർവേ ശീഘ്രം സങ്കല്പസാധനം । സകൃദുച്ചാരമാത്രേണ ഭോഗമോക്ഷപ്രദായകം ॥ 2 ॥ ഗൗരീശൃംഗേ ഹിമവതഃ കല്പവൃക്ഷോപശോഭിതം । ദീപ്തേ ദിവ്യമഹാരത്ന ഹേമമണ്ഡപമധ്യഗം ॥ 3 ॥ രത്നസിംഹാസനാസീനം പ്രസന്നം പരമേശ്വരം । മന്ദസ്മിതമുഖാംഭോജം ശങ്കരം പ്രാഹ പാർവതീ ॥ 4 ॥ ശ്രീദേവീ ഉവാച । ദേവദേവ മഹാദേവ ലോകശങ്കര ശങ്കര । മന്ത്രജാലാനി സർവാണി യന്ത്രജാലാനി കൃത്സ്നശഃ ॥ 5 ॥ തന്ത്രജാലാന്യനേകാനി മയാ ത്വത്തഃ ശ്രുതാനി വൈ । ഇദാനീം ദ്രഷ്ടുമിച്ഛാമി വിശേഷേണ മഹീതലം ॥ 6 ॥ ഇത്യുദീരിതമാകർണ്യ പാർവത്യാ പരമേശ്വരഃ । കരേണാമൃജ്യ സന്തോഷാത് പാർവതീം പ്രത്യഭാഷത ॥ 7 ॥ മയേദാനീം ത്വയാ സാർധം വൃഷമാരുഹ്യ ഗമ്യതേ । ഇത്യുക്ത്വാ വൃഷമാരുഹ്യ പാർവത്യാ സഹ ശങ്കരഃ ॥ 8 ॥ യയൗ ഭൂമണ്ഡലം ദ്രഷ്ടും ഗൗര്യാശ്ചിത്രാണി ദർശയൻ । ക്വചിത് വിന്ധ്യാചലപ്രാന്തേ മഹാരണ്യേ സുദുർഗമേ ॥ 9 ॥ തത്ര വ്യാഹർതുമായാന്തം ഭില്ലം പരശുധാരിണം । വധ്യമാനം മഹാവ്യാഘ്രം നഖദംഷ്ട്രാഭിരാവൃതം ॥ 10 ॥ അതീവ ചിത്രചാരിത്ര്യം വജ്രകായസമായുതം । അപ്രയത്നമനായാസമഖിന്നം സുഖമാസ്ഥിതം ॥ 11 ॥ പലായന്തം മൃഗം പശ്ചാദ്വ്യാഘ്രോ ഭീത്യാ പലായതഃ । ഏതദാശ്ചര്യമാലോക്യ പാർവതീ പ്രാഹ ശങ്കരം ॥ 12 ॥ ശ്രീ പാർവത്യുവാച । കിമാശ്ചര്യം കിമാശ്ചര്യമഗ്രേ ശംഭോ നിരീക്ഷ്യതാം । ഇത്യുക്തഃ സ തതഃ ശംഭുർദൃഷ്ട്വാ പ്രാഹ പുരാണവിത് ॥ 13 ॥ ശ്രീ ശങ്കര ഉവാച । ഗൗരി വക്ഷ്യാമി തേ ചിത്രമവാങ്മാനസഗോചരം । അദൃഷ്ടപൂർവമസ്മാഭിർനാസ്തി കിഞ്ചിന്ന കുത്രചിത് ॥ 14 ॥ മയാ സമ്യക് സമാസേന വക്ഷ്യതേ ശൃണു പാർവതി । അയം ദൂരശ്രവാ നാമ ഭില്ലഃ പരമധാർമികഃ ॥ 15 ॥ സമിത്കുശപ്രസൂനാനി കന്ദമൂലഫലാദികം । പ്രത്യഹം വിപിനം ഗത്വാ സമാദായ പ്രയാസതഃ ॥ 16 ॥ പ്രിയേ പൂർവം മുനീന്ദ്രേഭ്യഃ പ്രയച്ഛതി ന വാഞ്ഛതി । തേഽപി തസ്മിന്നപി ദയാം കുർവതേ സർവമൗനിനഃ ॥ 17 ॥ ദലാദനോ മഹായോഗീ വസന്നേവ നിജാശ്രമേ । കദാചിദസ്മരത് സിദ്ധം ദത്താത്രേയം ദിഗംബരം ॥ 18 ॥ ദത്താത്രേയഃ സ്മർതൃഗാമീ ചേതിഹാസം പരീക്ഷിതും । തത്ക്ഷണാത് സോഽപി യോഗീന്ദ്രോ ദത്താത്രേയഃ സമുത്ഥിതഃ ॥ 19 ॥ തം ദൃഷ്ട്വാശ്ചര്യതോഷാഭ്യാം ദലാദനമഹാമുനിഃ । സമ്പൂജ്യാഗ്രേ വിഷീദന്തം ദത്താത്രേയമുവാച തം ॥ 20 ॥ മയോപഹൂതഃ സമ്പ്രാപ്തോ ദത്താത്രേയ മഹാമുനേ । സ്മർതൃഗാമീ ത്വമിത്യേതത് കിം വദന്തീ പരീക്ഷിതും ॥ 21 ॥ മയാദ്യ സംസ്മൃതോഽസി ത്വമപരാധം ക്ഷമസ്വ മേ । ദത്താത്രേയോ മുനിം പ്രാഹ മമ പ്രകൃതിരീദൃശീ ॥ 22 ॥ അഭക്ത്യാ വാ സുഭക്ത്യാ വാ യഃ സ്മരേന്നാമനന്യധീഃ । തദാനീം തമുപാഗമ്യ ദദാമി തദഭീപ്സിതം ॥ 23 ॥ ദത്താത്രേയോ മുനിം പ്രാഹ ദലാദനമുനീശ്വരം । യദിഷ്ടം തദ്വൃണീഷ്വ ത്വം യത് പ്രാപ്തോഽഹം ത്വയാ സ്മൃതഃ ॥ 24 ॥ ദത്താത്രേയം മുനിം പ്രാഹ മയാ കിമപി നോച്യതേ । ത്വച്ചിത്തേ യത് സ്ഥിതം തന്മേ പ്രയച്ഛ മുനിപുംഗവ ॥ 25 ॥ ശ്രീ ദത്താത്രേയ ഉവാച । മമാസ്തി വജ്രകവചം ഗൃഹാണേത്യവദന്മുനിം । തഥേത്യംഗീകൃതവതേ ദലാദമുനയേ മുനിഃ ॥ 26 ॥ സ്വവജ്രകവചം പ്രാഹ ഋഷിച്ഛന്ദഃ പുരസ്സരം । ന്യാസം ധ്യാനം ഫലം തത്ര പ്രയോജനമശേഷതഃ ॥ 27 ॥ അസ്യ ശ്രീദത്താത്രേയ വജ്രകവച സ്തോത്രമന്ത്രസ്യ, കിരാതരൂപീ മഹാരുദ്രൃഷിഃ, അനുഷ്ടുപ് ഛന്ദഃ, ശ്രീദത്താത്രേയോ ദേവതാ, ദ്രാം ബീജം, ആം ശക്തിഃ, ക്രൗം കീലകം. ഓം ആത്മനേ നമഃ ഓം ദ്രീം മനസേ നമഃ ഓം ആം ദ്രീം ശ്രീം സൗഃ ഓം ക്ലാം ക്ലീം ക്ലൂം ക്ലൈം ക്ലൗം ക്ലഃ ശ്രീ ദത്താത്രേയ പ്രസാദ സിദ്ധ്യർഥേ ജപേ വിനിയോഗഃ കരന്യാസഃ । ഓം ദ്രാം അംഗുഷ്ഠാഭ്യാം നമഃ । ഓം ദ്രീം തർജനീഭ്യാം നമഃ । ഓം ദ്രൂം മധ്യമാഭ്യാം നമഃ । ഓം ദ്രൈം അനാമികാഭ്യാം നമഃ । ഓം ദ്രൗം കനിഷ്ഠികാഭ്യാം നമഃ । ഓം ദ്രഃ കരതലകരപൃഷ്ഠാഭ്യാം നമഃ । ഹൃദയാദിന്യാസഃ । ഓം ദ്രാം ഹൃദയായ നമഃ । ഓം ദ്രീം ശിരസേ സ്വാഹാ । ഓം ദ്രൂം ശിഖായൈ വഷട് । ഓം ദ്രൈം കവചായ ഹും । ഓം ദ്രൗം നേത്രത്രയായ വൗഷട് । ഓം ദ്രഃ അസ്ത്രായ ഫട് । ഓം ഭൂർഭുവസ്സുവരോമിതി ദിഗ്ബന്ധഃ । ധ്യാനം । ജഗദങ്കുരകന്ദായ സച്ചിദാനന്ദമൂർതയേ । ദത്താത്രേയായ യോഗീന്ദ്രചന്ദ്രായ പരമാത്മനേ ॥ 1 ॥ കദാ യോഗീ കദാ ഭോഗീ കദാ നഗ്നഃ പിശാചവത് । ദത്താത്രേയോ ഹരിഃ സാക്ഷാത് ഭുക്തിമുക്തിപ്രദായകഃ ॥ 2 ॥ വാരാണസീപുരസ്നായീ കൊൽഹാപുരജപാദരഃ । മാഹുരീപുരഭീക്ഷാശീ സഹ്യശായീ ദിഗംബരഃ ॥ 3 ॥ ഇന്ദ്രനീല സമാകാരഃ ചന്ദ്രകാന്തിസമദ്യുതിഃ । വൈഢൂര്യ സദൃശസ്ഫൂർതിഃ ചലത്കിഞ്ചിജ്ജടാധരഃ ॥ 4 ॥ സ്നിഗ്ധധാവല്യ യുക്താക്ഷോഽത്യന്തനീല കനീനികഃ । ഭ്രൂവക്ഷഃശ്മശ്രുനീലാങ്കഃ ശശാങ്കസദൃശാനനഃ ॥ 5 ॥ ഹാസനിർജിത നിഹാരഃ കണ്ഠനിർജിത കംബുകഃ । മാംസലാംസോ ദീർഘബാഹുഃ പാണിനിർജിതപല്ലവഃ ॥ 6 ॥ വിശാലപീനവക്ഷാശ്ച താമ്രപാണിർദലോദരഃ । പൃഥുലശ്രോണിലലിതോ വിശാലജഘനസ്ഥലഃ ॥ 7 ॥ രംഭാസ്തംഭോപമാനോരുഃ ജാനുപൂർവൈകജംഘകഃ । ഗൂഢഗുൽഫഃ കൂർമപൃഷ്ഠോ ലസത്വാദോപരിസ്ഥലഃ ॥ 8 ॥ രക്താരവിന്ദസദൃശ രമണീയ പദാധരഃ । ചർമാംബരധരോ യോഗീ സ്മർതൃഗാമീ ക്ഷണേക്ഷണേ ॥ 9 ॥ ജ്ഞാനോപദേശനിരതോ വിപദ്ധരണദീക്ഷിതഃ । സിദ്ധാസനസമാസീന ഋജുകായോ ഹസന്മുഖഃ ॥ 10 ॥ വാമഹസ്തേന വരദോ ദക്ഷിണേനാഭയങ്കരഃ । ബാലോന്മത്ത പിശാചീഭിഃ ക്വചിദ് യുക്തഃ പരീക്ഷിതഃ ॥ 11 ॥ ത്യാഗീ ഭോഗീ മഹായോഗീ നിത്യാനന്ദോ നിരഞ്ജനഃ । സർവരൂപീ സർവദാതാ സർവഗഃ സർവകാമദഃ ॥ 12 ॥ ഭസ്മോദ്ധൂലിത സർവാംഗോ മഹാപാതകനാശനഃ । ഭുക്തിപ്രദോ മുക്തിദാതാ ജീവന്മുക്തോ ന സംശയഃ ॥ 13 ॥ ഏവം ധ്യാത്വാഽനന്യചിത്തോ മദ്വജ്രകവചം പഠേത് । മാമേവ പശ്യൻസർവത്ര സ മയാ സഹ സഞ്ചരേത് ॥ 14 ॥ ദിഗംബരം ഭസ്മസുഗന്ധ ലേപനം ചക്രം ത്രിശൂലം ഢമരും ഗദായുധം । പദ്മാസനം യോഗിമുനീന്ദ്രവന്ദിതം ദത്തേതിനാമസ്മരണേന നിത്യം ॥ 15 ॥ പഞ്ചോപചാരപൂജാ । ഓം ലം പൃഥിവീതത്ത്വാത്മനേ ശ്രീദത്താത്രേയായ നമഃ । ഗന്ധം പരികല്പയാമി। ഓം ഹം ആകാശതത്ത്വാത്മനേ ശ്രീദത്താത്രേയായ നമഃ । പുഷ്പം പരികല്പയാമി । ഓം യം വായുതത്ത്വാത്മനേ ശ്രീദത്താത്രേയായ നമഃ । ധൂപം പരികല്പയാമി । ഓം രം വഹ്നിതത്ത്വാത്മനേ ശ്രീദത്താത്രേയായ നമഃ । ദീപം പരികല്പയാമി । ഓം വം അമൃത തത്ത്വാത്മനേ ശ്രീദത്താത്രേയായ നമഃ । അമൃതനൈവേദ്യം പരികല്പയാമി । ഓം സം സർവതത്ത്വാത്മനേ ശ്രീദത്താത്രേയായ നമഃ । താംബൂലാദിസർവോപചാരാൻ പരികല്പയാമി । (അനന്തരം ‘ഓം ദ്രാം…’ ഇതി മൂലമന്ത്രം അഷ്ടോത്തരശതവാരം (108) ജപേത്) അഥ വജ്രകവചം । ഓം ദത്താത്രേയായ ശിരഃപാതു സഹസ്രാബ്ജേഷു സംസ്ഥിതഃ । ഫാലം പാത്വാനസൂയേയഃ ചന്ദ്രമണ്ഡലമധ്യഗഃ ॥ 1 ॥ കൂർചം മനോമയഃ പാതു ഹം ക്ഷം ദ്വിദലപദ്മഭൂഃ । ജ്യോതിരൂപോഽക്ഷിണീപാതു പാതു ശബ്ദാത്മകഃ ശ്രുതീ ॥ 2 ॥ നാസികാം പാതു ഗന്ധാത്മാ മുഖം പാതു രസാത്മകഃ । ജിഹ്വാം വേദാത്മകഃ പാതു ദന്തോഷ്ഠൗ പാതു ധാർമികഃ ॥ 3 ॥ കപോലാവത്രിഭൂഃ പാതു പാത്വശേഷം മമാത്മവിത് । സർവാത്മാ ഷോഡശാരാബ്ജസ്ഥിതഃ സ്വാത്മാഽവതാദ് ഗലം ॥ 4 ॥ സ്കന്ധൗ ചന്ദ്രാനുജഃ പാതു ഭുജൗ പാതു കൃതാദിഭൂഃ । ജത്രുണീ ശത്രുജിത് പാതു പാതു വക്ഷസ്ഥലം ഹരിഃ ॥ 5 ॥ കാദിഠാന്തദ്വാദശാരപദ്മഗോ മരുദാത്മകഃ । യോഗീശ്വരേശ്വരഃ പാതു ഹൃദയം ഹൃദയസ്ഥിതഃ ॥ 6 ॥ പാർശ്വേ ഹരിഃ പാർശ്വവർതീ പാതു പാർശ്വസ്ഥിതഃ സ്മൃതഃ । ഹഠയോഗാദിയോഗജ്ഞഃ കുക്ഷിം പാതു കൃപാനിധിഃ ॥ 7 ॥ ഡകാരാദി ഫകാരാന്ത ദശാരസരസീരുഹേ । നാഭിസ്ഥലേ വർതമാനോ നാഭിം വഹ്ന്യാത്മകോഽവതു ॥ 8 ॥ വഹ്നിതത്ത്വമയോ യോഗീ രക്ഷതാന്മണിപൂരകം । കടിം കടിസ്ഥബ്രഹ്മാണ്ഡവാസുദേവാത്മകോഽവതു ॥ 9 ॥ വകാരാദി ലകാരാന്ത ഷട്പത്രാംബുജബോധകഃ । ജലതത്ത്വമയോ യോഗീ സ്വാധിഷ്ഠാനം മമാവതു ॥ 10 ॥ സിദ്ധാസന സമാസീന ഊരൂ സിദ്ധേശ്വരോഽവതു । വാദിസാന്ത ചതുഷ്പത്രസരോരുഹ നിബോധകഃ ॥ 11 ॥ മൂലാധാരം മഹീരൂപോ രക്ഷതാദ് വീര്യനിഗ്രഹീ । പൃഷ്ഠം ച സർവതഃ പാതു ജാനുന്യസ്തകരാംബുജഃ ॥ 12 ॥ ജംഘേ പാത്വവധൂതേന്ദ്രഃ പാത്വംഘ്രീ തീർഥപാവനഃ । സർവാംഗം പാതു സർവാത്മാ രോമാണ്യവതു കേശവഃ ॥ 13 ॥ ചർമ ചർമാംബരഃ പാതു രക്തം ഭക്തിപ്രിയോഽവതു । മാംസം മാംസകരഃ പാതു മജ്ജാം മജ്ജാത്മകോഽവതു ॥ 14 ॥ അസ്ഥീനി സ്ഥിരധീഃ പായാന്മേധാം വേധാഃ പ്രപാലയേത് । ശുക്രം സുഖകരഃ പാതു ചിത്തം പാതു ദൃഢാകൃതിഃ ॥ 15 ॥ മനോബുദ്ധിമഹങ്കാരം ഹൃഷീകേശാത്മകോഽവതു । കർമേന്ദ്രിയാണി പാത്വീശഃ പാതു ജ്ഞാനേന്ദ്രിയാണ്യജഃ ॥ 16 ॥ ബന്ധൂൻ ബന്ധൂത്തമഃ പായാച്ഛത്രുഭ്യഃ പാതു ശത്രുജിത് । ഗൃഹാരാമധനക്ഷേത്രപുത്രാദീൻ ശങ്കരോഽവതു ॥ 17 ॥ ഭാര്യാം പ്രകൃതിവിത് പാതു പശ്വാദീൻ പാതു ശാർങ്ഗഭൃത് । പ്രാണാൻ പാതു പ്രധാനജ്ഞോ ഭക്ഷ്യാദീൻ പാതു ഭാസ്കരഃ ॥ 18 ॥ സുഖം ചന്ദ്രാത്മകഃ പാതു ദുഃഖാത് പാതു പുരാന്തകഃ । പശൂൻ പശുപതിഃ പാതു ഭൂതിം ഭൂതേശ്വരോ മമ ॥ 19 ॥ പ്രാച്യാം വിഷഹരഃ പാതു പാത്വാഗ്നേയ്യാം മഖാത്മകഃ । യാമ്യാം ധർമാത്മകഃ പാതു നൈരൃത്യാം സർവവൈരിഹൃത് ॥ 20 ॥ വരാഹഃ പാതു വാരുണ്യാം വായവ്യാം പ്രാണദോഽവതു । കൗബേര്യാം ധനദഃ പാതു പാത്വൈശാന്യാം മഹാഗുരുഃ ॥ 21 ॥ ഊർധ്വം പാതു മഹാസിദ്ധഃ പാത്വധസ്താജ്ജടാധരഃ । രക്ഷാഹീനം തു യത് സ്ഥാനം രക്ഷത്വാദിമുനീശ്വരഃ ॥ 22 ॥ കരന്യാസഃ । ഓം ദ്രാം അംഗുഷ്ഠാഭ്യാം നമഃ । ഓം ദ്രീം തർജനീഭ്യാം നമഃ । ഓം ദ്രൂം മധ്യമാഭ്യാം നമഃ । ഓം ദ്രൈം അനാമികാഭ്യാം നമഃ । ഓം ദ്രൗം കനിഷ്ഠികാഭ്യാം നമഃ । ഓം ദ്രഃ കരതലകരപൃഷ്ഠാഭ്യാം നമഃ । ഹൃദയാദിന്യാസഃ । ഓം ദ്രാം ഹൃദയായ നമഃ । ഓം ദ്രീം ശിരസേ സ്വാഹാ । ഓം ദ്രൂം ശിഖായൈ വഷട് । ഓം ദ്രൈം കവചായ ഹും । ഓം ദ്രൗം നേത്രത്രയായ വൗഷട് । ഓം ദ്രഃ അസ്ത്രായ ഫട് । ഓം ഭൂർഭുവസ്സുവരോമിതി ദിഗ്വിമോകഃ । ഫലശൃതി ॥ ഏതന്മേ വജ്രകവചം യഃ പഠേത് ശൃണുയാദപി । വജ്രകായശ്ചിരഞ്ജീവീ ദത്താത്രേയോഽഹമബ്രുവം ॥ 23 ॥ ത്യാഗീ ഭോഗീ മഹായോഗീ സുഖദുഃഖവിവർജിതഃ । സർവത്ര സിദ്ധസങ്കല്പോ ജീവന്മുക്തോഽദ്യവർതതേ ॥ 24 ॥ ഇത്യുക്ത്വാന്തർദധേ യോഗീ ദത്താത്രേയോ ദിഗംബരഃ । ദലാദനോഽപി തജ്ജപ്ത്വാ ജീവന്മുക്തഃ സ വർതതേ ॥ 25 ॥ ഭില്ലോ ദൂരശ്രവാ നാമ തദാനീം ശ്രുതവാനിദം । സകൃച്ഛ്രവണമാത്രേണ വജ്രാംഗോഽഭവദപ്യസൗ ॥ 26 ॥ ഇത്യേതദ് വജ്രകവചം ദത്താത്രേയസ്യ യോഗിനഃ । ശ്രുത്വാ ശേഷം ശംഭുമുഖാത് പുനരപ്യാഹ പാർവതീ ॥ 27 ॥ ശ്രീ പാർവത്യുവാച । ഏതത് കവച മാഹാത്മ്യം വദ വിസ്തരതോ മമ । കുത്ര കേന കദാ ജാപ്യം കിയജ്ജാപ്യം കഥം കഥം ॥ 28 ॥ ഉവാച ശംഭുസ്തത് സർവം പാർവത്യാ വിനയോദിതം । ശ്രീപരമേശ്വര ഉവാച । ശൃണു പാർവതി വക്ഷ്യാമി സമാഹിതമനാവിലം ॥ 29 ॥ ധർമാർഥകാമമോക്ഷാണാമിദമേവ പരായണം । ഹസ്ത്യശ്വരഥപാദാതി സർവൈശ്വര്യ പ്രദായകം ॥ 30 ॥ പുത്രമിത്രകലത്രാദി സർവസന്തോഷസാധനം । വേദശാസ്ത്രാദിവിദ്യാനാം വിധാനം പരമം ഹി തത് ॥ 31 ॥ സംഗീത ശാസ്ത്ര സാഹിത്യ സത്കവിത്വ വിധായകം । ബുദ്ധി വിദ്യാ സ്മൃതി പ്രജ്ഞാ മതി പ്രൗഢിപ്രദായകം ॥ 32 ॥ സർവസന്തോഷകരണം സർവദുഃഖനിവാരണം । ശത്രുസംഹാരകം ശീഘ്രം യശഃകീർതിവിവർധനം ॥ 33 ॥ അഷ്ടസംഖ്യാ മഹാരോഗാഃ സന്നിപാതാസ്ത്രയോദശ । ഷണ്ണവത്യക്ഷിരോഗാശ്ച വിംശതിർമേഹരോഗകാഃ ॥ 34 ॥ അഷ്ടാദശതു കുഷ്ഠാനി ഗുല്മാന്യഷ്ടവിധാന്യപി । അശീതിർവാതരോഗാശ്ച ചത്വാരിംശത്തു പൈത്തികാഃ ॥ 35 ॥ വിംശതിഃ ശ്ലേഷ്മരോഗാശ്ച ക്ഷയചാതുർഥികാദയഃ । മന്ത്രയന്ത്രകുയോഗാദ്യാഃ കല്പതന്ത്രാദിനിർമിതാഃ ॥ 36 ॥ ബ്രഹ്മരാക്ഷസ വേതാലകൂഷ്മാണ്ഡാദി ഗ്രഹോദ്ഭവാഃ । സംഗജാ ദേശകാലസ്ഥാസ്താപത്രയസമുത്ഥിതാഃ ॥ 37 ॥ നവഗ്രഹസമുദ്ഭൂതാ മഹാപാതക സംഭവാഃ । സർവേ രോഗാഃ പ്രണശ്യന്തി സഹസ്രാവർതനാദ് ധ്രുവം ॥ 38 ॥ അയുതാവൃത്തിമാത്രേണ വന്ധ്യാ പുത്രവതീ ഭവേത് । അയുതദ്വിതയാവൃത്ത്യാ ഹ്യപമൃത്യുജയോ ഭവേത് ॥ 39 ॥ അയുതത്രിതയാച്ചൈവ ഖേചരത്വം പ്രജായതേ । സഹസ്രായുതദർവാക് സർവകാര്യാണി സാധയേത് ॥ 40 ॥ ലക്ഷാവൃത്ത്യാ സർവസിദ്ധിർഭവത്യേവ ന സംശയഃ ॥ 41 ॥ വിഷവൃക്ഷസ്യ മൂലേഷു തിഷ്ഠൻ വൈ ദക്ഷിണാമുഖഃ । കുരുതേ മാസമാത്രേണ വൈരിണം വികലേന്ദ്രിയം ॥ 42 ॥ ഔദുംബരതരോർമൂലേ വൃദ്ധികാമേന ജാപ്യതേ । ശ്രീവൃക്ഷമൂലേ ശ്രീകാമീ തിന്ത്രിണീ ശാന്തികർമണി ॥ 43 ॥ ഓജസ്കാമോഽശ്വത്ഥമൂലേ സ്ത്രീകാമൈഃ സഹകാരകേ । ജ്ഞാനാർഥീ തുലസീമൂലേ ഗർഭഗേഹേ സുതാർഥിഭിഃ ॥ 44 ॥ ധനാർഥിഭിസ്തു സുക്ഷേത്രേ പശുകാമൈസ്തു ഗോഷ്ഠകേ । ദേവാലയേ സർവകാമൈസ്തത്കാലേ സർവദർശിതം ॥ 45 ॥ നാഭിമാത്രജലേ സ്ഥിത്വാ ഭാനുമാലോക്യ യോ ജപേത് । യുദ്ധേ വാ ശാസ്ത്രവാദേ വാ സഹസ്രേണ ജയോ ഭവേത് ॥ 46 ॥ കണ്ഠമാത്രേ ജലേ സ്ഥിത്വാ യോ രാത്രൗ കവചം പഠേത് । ജ്വരാപസ്മാരകുഷ്ഠാദി താപജ്വരനിവാരണം ॥ 47 ॥ യത്ര യത് സ്യാത് സ്ഥിരം യദ്യത് പ്രസക്തം തന്നിവർതതേ । തേന തത്ര ഹി ജപ്തവ്യം തതഃ സിദ്ധിർഭവേദ്ധ്രുവം ॥ 48 ॥ ഇത്യുക്തവാൻ ശിവോ ഗൗർവൈ രഹസ്യം പരമം ശുഭം । യഃ പഠേത് വജ്രകവചം ദത്താത്രേയ സമോ ഭവേത് ॥ 49 ॥ ഏവം ശിവേന കഥിതം ഹിമവത്സുതായൈ പ്രോക്തം ദലാദമുനയേഽത്രിസുതേന പൂർവം । യഃ കോഽപി വജ്രകവചം പഠതീഹ ലോകേ ദത്തോപമശ്ചരതി യോഗിവരശ്ചിരായുഃ ॥ 50 ॥ ഇതി ശ്രീ ദത്താത്രേയ വജ്രകവചസ്തോത്രം സമ്പൂർണം ॥