Haindavam

📍

Font Size:

Datta Manasa Puja

parānandamayo viṣṇurhṛtstho vedyopyatīndriyaḥ । sadā sampūjyate bhaktairbhagavān bhaktibhāvanaḥ ॥ 1 ॥ acintyasya kuto dhyānam kūṭasthāvāhanaṃ kutaḥ । kvāsanaṃ viśvasaṃsthasya pādyaṃ pūtātmanaḥ kutaḥ ॥ 2 ॥ kvānarghorukramasyārghyaṃ viṣṇorācamanaṃ kutaḥ । nirmalasya kutaḥ snānaṃ kva nirāvaraṇembaram ॥ 3 ॥ svasūtrasya kutaḥ sūtraṃ nirmalasya ca lepanam । nistṛṣaḥ sumanobhiḥ kiṃ kimakledyasya dhūpataḥ ॥ 4 ॥ svaprakāśasya dīpaiḥ kiṃ kiṃ bhakṣyādyairjagadbhṛtaḥ । kiṃ deyaṃ paritṛptasya virājaḥ kva pradakṣiṇāḥ ॥ 5 ॥ kimanantasya natibhiḥ stauti ko vāgagocaram । antarbahiḥ prapūrṇasya kathamudvāsanaṃ bhavet ॥ 6 ॥ sarvato'pītyasambhāvyo bhāvyate bhaktibhāvanaḥ । sevyasevakabhāvena bhaktairlīlānṛvigrahaḥ ॥ 7 ॥ taveśātīndriyasyāpi pāramparyāśrutāṃ tanum । prakalpyāśmādāvarcanti prārcaye'rcāṃ manomayīm ॥ 8 ॥ kalasuślokagītena bhagavan datta jāgṛhi । bhaktavatsala sāmīpyaṃ kuru me mānasārcane ॥ 9 ॥ śrīdattaṃ khecarīmudrāmudritaṃ yogisadgurum । siddhāsanasthaṃ dhyāye'bhīvarapradakaraṃ harim ॥ 10 ॥ dattātreyāhvayāmyatra parivāraiḥ sahārcane । śraddhābhaktyeśvarāgaccha dhyātadhāmnāñjasā vibho ॥ 11 ॥ sauvarṇaṃ ratnajaḍitaṃ kalpitaṃ devatāmayam । ramyaṃ siṃhāsanaṃ datta tatropaviśa yantrite ॥ 12 ॥ pādyaṃ candanakarpūrasurabhi svādu vāri te । gṛhāṇa kalpitaṃ tena dattāṅghrī kṣālayāmi te ॥ 13 ॥ gandhābjatulasībilvaśamīpatrākṣatānvitam । sāmbvarghyaṃ svarṇapātreṇa kalpitaṃ datta gṛhyatām ॥ 14 ॥ susvādvācamanīyāmbu haimapātreṇa kalpitam । tubhyamācamyatāṃ datta madhuparkaṃ gṛhāṇa ca ॥ 15 ॥ puṣpavāsitasattailamaṅgeṣvālipya datta bhoḥ । pañcāmṛtaiśca gāṅgādbhiḥ snānaṃ te kalpayāmyaham ॥ 16 ॥ bhaktyā digambarācānta jaledaṃ datta kalpitam । kāṣāyaparidhānaṃ tadgṛhāṇaiṇeyacarma ca ॥ 17 ॥ nānāsūtradharaite te brahmasūtre prakalpite । gṛhāṇa daivatamaye śrīdatta navatantuke ॥ 18 ॥ bhūtimṛtsnāsukastūrīkeśarānvitacandanam । ratnākṣatāḥ kalpitāstvāmalaṅkurve'tha datta taiḥ ॥ 19 ॥ sacchamībilvatulasīpatraiḥ saugandhikaiḥ sumaiḥ । manasā kalpitairnānāvidhairdattārcayāmyaham ॥ 20 ॥ lākṣāsitābhraśrīvāsaśrīkhaṇḍāgaruguggulaiḥ । yukto'gniyojito dhūpo hṛdā svīkuru datta tam ॥ 21 ॥ svarṇapātre goghṛtāktavartiprajvālitaṃ hṛdā । dīpaṃ datta sakarpūraṃ gṛhāṇa svaprakāśaka ॥ 22 ॥ saṣaḍrasaṃ ṣaḍvidhānnaṃ naivedyaṃ gavyasamyutam । kalpitaṃ haimapātre te bhuṅkṣva dattāmbvadaḥ piba ॥ 23 ॥ prakṣālyāsyaṃ karau cādbhirdattācamya pragṛhyatām । tāmbūlaṃ dakṣiṇāṃ haimīṃ kalpitāni phalāni ca ॥ 24 ॥ nīrājya ratnadīpaistvāṃ praṇamya manasā ca te । paritastvatkathodghātaiḥ kurve datta pradakṣiṇāḥ ॥ 25 ॥ mantravannihito mūrdhni datta te kusumāñjaliḥ । kalpyante manasā gītavādyanṛtyopacārakāḥ ॥ 26 ॥ preryamāṇaprerakeṇa tvayā datteritena te । kṛteyaṃ manasā pūjā śrīmaṃstuṣṭo bhavānayā ॥ 27 ॥ datta mānasatalpe me sukhanidrāṃ rahaḥ kuru । ramye vyāyatabhaktyāmatūlikāḍhye suvījite ॥ 28 ॥ iti śrīvāsudevānandasarasvatī viracitaṃ śrī datta mānasapūjā ।

Recite with devotion and pure heart

Regular practice brings spiritual benefits