ವಿತ್ತತರ್ಷರಹಿತೈರ್ಮನುಜಾನಾಂ ಸತ್ತಮೈರನಿಶಸೇವ್ಯಪದಾಬ್ಜಂ । ಚಿತ್ತಶುದ್ಧಿಮಭಿಲಿಪ್ಸುರಹಂ ದ್ರಾಕ್ ದತ್ತದೇವಮನಿಶಂ ಕಲಯಾಮಿ ॥ 1 ॥ ಕಾರ್ತವೀರ್ಯಗುರುಮತ್ರಿತನೂಜಂ ಪಾದನಮ್ರಶಿರ ಆಹಿತಹಸ್ತಂ । ಶ್ರೀದಮುಖ್ಯಹರಿದೀಶ್ವರಪೂಜ್ಯಂ ದತ್ತದೇವಮನಿಶಂ ಕಲಯಾಮಿ ॥ 2 ॥ ನಾಕನಾಯಕಸಮರ್ಚಿತಪಾದಂ ಪಾಕಚಂದ್ರಧರ ಮೌಲ್ಯವತಾರಂ । ಕೋಕಬಂಧುಸಮವೇಕ್ಷ್ಯಮಹಸ್ಕಂ ದತ್ತದೇವಮನಿಶಂ ಕಲಯಾಮಿ ॥ 3 ॥ ಮೂಕಪಂಗು ಬಧಿರಾದಿಮಲೋಕಾನ್ ಲೋಕತಸ್ತದಿತರಾನ್ವಿದಧಾನಂ । ಏಕವಸ್ತುಪರಿಬೋಧಯಿತಾರಂ ದತ್ತದೇವಮನಿಶಂ ಕಲಯಾಮಿ ॥ 4 ॥ ಯೋಗದಾನತ ಇಹೈವ ಹರಂತಂ ರೋಗಮಾಶು ನಮತಾಂ ಭವಸಂಜ್ಞಂ । ರಾಗಮೋಹಮುಖ ವೈರಿನಿವೃತ್ತ್ಯೈ ದತ್ತದೇವಮನಿಶಂ ಕಲಯಾಮಿ ॥ 5 ॥ ಜಾಮದಗ್ನ್ಯಮುನಯೇ ತ್ರಿಪುರಾಯಾಃ ಜ್ಞಾನಖಂಡಮವಬೋಧಿತವಂತಂ । ಜಾಮಿತಾವಿದಲನಂ ನತಪಂಕ್ತೇಃ ದತ್ತದೇವಮನಿಶಂ ಕಲಯಾಮಿ ॥ 6 ॥ ತಾರಕಂ ಭವಮಹಾಜಲರಾಶೇಃ ಪೂರಕಂ ಪದನತೇಪ್ಸಿತರಾಶೇಃ । ವಾರಕಂ ಕಲಿಮುಖೋತ್ಥಭಯಾನಾಂ ದತ್ತದೇವಮನಿಶಂ ಕಲಯಾಮಿ ॥ 7 ॥ ಸತ್ಯವಿತ್ಸುಖನಿರಂತರಸಕ್ತಂ ಸ್ವಾಂತಮಾನತಜನಂ ವಿದಧಾನಂ । ಶ್ರಾಂತಲೋಕತತಿತೋಷಣಚಂದ್ರಂ ದತ್ತದೇವಮನಿಶಂ ಕಲಯಾಮಿ ॥ 8 ॥ ರಕ್ಷಣಾಯ ಜಗತೋ ಧೃತದೇಹಂ ಶಿಕ್ಷಣಾಯ ಚ ದುರಧ್ವಗತಾನಾಂ । ಋಕ್ಷರಾಜಪರಿಭಾವಿನಿಟಾಲಂ ದತ್ತದೇವಮನಿಶಂ ಕಲಯಾಮಿ ॥ 9 ॥ ನವರತ್ನಮಾಲಿಕೇಯಂ ಗ್ರಥಿತಾ ಭಕ್ತೇನ ಕೇನಚಿದ್ಯತಿನಾ । ಗುರುವರಚರಣಾಬ್ಜಯುಗೇ ತನ್ಮೋದಾಯಾರ್ಪಿತಾ ಚಿರಂ ಜೀಯಾತ್ ॥ 10 ॥ ಇತಿ ಶ್ರೀ ಜಗದ್ಗುರು ಶ್ರೀ ಚಂದ್ರಶೇಖರಭಾರತೀಸ್ವಾಮಿಪಾದೈಃ ವಿರಚಿತಾ ಶ್ರೀ ದತ್ತ ನವರತ್ನ ಮಾಲಿಕಾ ।