vittatarṣarahitairmanujānāṃ sattamairaniśasevyapadābjam । cittaśuddhimabhilipsurahaṃ drāk dattadevamaniśaṃ kalayāmi ॥ 1 ॥ kārtavīryagurumatritanūjaṃ pādanamraśira āhitahastam । śrīdamukhyaharidīśvarapūjyaṃ dattadevamaniśaṃ kalayāmi ॥ 2 ॥ nākanāyakasamarcitapādaṃ pākacandradhara maulyavatāram । kokabandhusamavekṣyamahaskaṃ dattadevamaniśaṃ kalayāmi ॥ 3 ॥ mūkapaṅgu badhirādimalokān lokatastaditarānvidadhānam । ekavastuparibodhayitāraṃ dattadevamaniśaṃ kalayāmi ॥ 4 ॥ yogadānata ihaiva harantaṃ rogamāśu namatāṃ bhavasañjñam । rāgamohamukha vairinivṛttyai dattadevamaniśaṃ kalayāmi ॥ 5 ॥ jāmadagnyamunaye tripurāyāḥ jñānakhaṇḍamavabodhitavantam । jāmitāvidalanaṃ natapaṅkteḥ dattadevamaniśaṃ kalayāmi ॥ 6 ॥ tārakaṃ bhavamahājalarāśeḥ pūrakaṃ padanatepsitarāśeḥ । vārakaṃ kalimukhotthabhayānāṃ dattadevamaniśaṃ kalayāmi ॥ 7 ॥ satyavitsukhanirantarasaktaṃ svāntamānatajanaṃ vidadhānam । śrāntalokatatitoṣaṇacandraṃ dattadevamaniśaṃ kalayāmi ॥ 8 ॥ rakṣaṇāya jagato dhṛtadehaṃ śikṣaṇāya ca duradhvagatānām । ṛkṣarājaparibhāviniṭālaṃ dattadevamaniśaṃ kalayāmi ॥ 9 ॥ navaratnamālikeyaṃ grathitā bhaktena kenacidyatinā । guruvaracaraṇābjayuge tanmodāyārpitā ciraṃ jīyāt ॥ 10 ॥ iti śrī jagadguru śrī candraśekharabhāratīsvāmipādaiḥ viracitā śrī datta navaratna mālikā ।