हैंహైHaindavamஹிહિં
📍
Font Size:
ദത്ത നക്ഷത്രമാലികാ
ഗോദാവര്യാ മഹാനദ്യാ ഉത്തരേ സിംഹപർവതേ ।
സുപുണ്യേ മാഹുരപുരേ സർവതീർഥസമന്വിതേ ॥ 1 ॥
ജജ്ഞേഽത്രേരനസൂയായാം പ്രദോഷേ ബുധവാസരേ ।
മാർഗശീർഷ്യാം മഹായോഗീ ദത്താത്രേയോ ദിഗംബരഃ ॥ 2 ॥
മാലാം കുണ്ഡീം ച ഡമരും ശൂലം ശംഖം സുദർശനം ।
ദധാനഃ ഷഡ്ഭുജൈസ്ത്ര്യാത്മാ യോഗമാർഗപ്രവർതകഃ ॥ 3 ॥
ഭസ്മോദ്ധൂലിതസർവാംഗോ ജടാജൂടവിരാജിതഃ ।
രുദ്രാക്ഷഭൂഷിതതനുഃ ശാംഭവീമുദ്രയാ യുതഃ ॥ 4 ॥
ഭക്താനുഗ്രഹകൃന്നിത്യം പാപതാപാർതിഭഞ്ജനഃ ।
ബാലോന്മത്തപിശാചാഭഃ സ്മർതൃഗാമീ ദയാനിധിഃ ॥ 5 ॥
യസ്യാസ്തി മാഹുരേ നിദ്രാ നിവാസഃ സിംഹപർവതേ ।
പ്രാതഃ സ്നാനം ച ഗംഗായാം ധ്യാനം ഗന്ധർവപത്തനേ ॥ 6 ॥
കുരുക്ഷേത്രേ ചാചമനം ധൂതപാപേശ്വരേ തഥാ ।
വിഭൂതിധാരണം പ്രാതഃസന്ധ്യാ ച കരഹാടകേ ॥ 7 ॥
കോലാപുരേഽസ്യ ഭിക്ഷാ ച പാഞ്ചാലേഽപി ച ഭോജനം ।
ദിനഗോ വിഠ്ഠലപുരേ തുംഗാപാനം ദിനേ ദിനേ ॥ 8 ॥ [തിലകോ]
പുരാണശ്രവണം യസ്യ നരനാരായണാശ്രമേ ।
വിശ്രാമോ സരദേ സായംസന്ധ്യാ പശ്ചിമസാഗരേ ॥ 9 ॥ [രൈവതേ]
കാർതവീര്യാർജുനായാദാദ്യോഗർധിമുഭയീം പ്രഭുഃ ।
സ്വാത്മതത്ത്വം ച യദവേ ബഹുഗുർവാപ്തമുത്തമം ॥ 10 ॥
ആന്വീക്ഷികീമലർകായ പ്രഹ്ലാദായ തഗീയതേ । [ച ധീമതേ]
ആയൂരാജായ ച വരാൻ സാധ്യേഭ്യോ മോക്ഷസാധനം ॥ 11 ॥
മന്ത്രാംശ്ച വിഷ്ണുദത്തായ സോമകാന്തായ കർമ ച ।
സ ഏവാവിരഭൂദ്ഭൂയഃ പൂർവാർണവസമീപതഃ ॥ 12 ॥
ഭാദ്രേ മാസി സിതേ പക്ഷേ ചതുർഥ്യാം രാജവിപ്രതഃ ।
സുമത്യാം പ്രാക്സിന്ധുതീരേ രമ്യേ പീഠാപുരേ വരേ ॥ 13 ॥
യ ആചാരവ്യവഹൃതിപ്രായശ്ചിത്തോപദേശകൃത് ।
നിജാഗ്രജാവന്ധപംഗൂ വിലോക്യ പ്രവ്രജൻ സുധീഃ ॥ 14 ॥
മാതാപിത്രോർമുദേ ദൃഷ്ടിം ഗതിം താഭ്യാമുപാനയത് ।
മഹീം പ്രദക്ഷിണീകൃത്യ ഗോകർണേ ത്ര്യബ്ദമാവസൻ ॥ 15 ॥
തതഃ കൃഷ്ണാതടം പ്രാപ്യ മർതുകാമാം സപുത്രകാം ।
നിവർത്യ ബ്രാഹ്മണീം മന്ദം പ്രദോഷം വ്രതമാദിശത് ॥ 16 ॥
തത്പുത്രം വിബുധം കൃത്വാ തസ്യാ ജന്മാന്തരേ പ്രഭുഃ ।
പുത്രോ ഭൂത്വാ നരഹരിനാമകോ ദേശ ഉത്തരേ ॥ 17 ॥
കാഞ്ചനേ നഗരേഽപ്യംബാമാനയദ്വിപദോ വിഭുഃ ।
മാസി പൗഷേ സിതേ പക്ഷേ ദ്വിതീയായാം ശനേർദിനേ ॥ 18 ॥
ജാതമാത്രോഽപി ചോങ്കാരം പപാഠാഥാപി മൂകവത് ।
സപ്താബ്ദാൻ ലീലയാ സ്ഥിത്വാ നാനാകൗതുകകൃത് പ്രഭുഃ ॥ 19 ॥
ഉപനീതോഽപഠദ്വേദാൻ സപ്തമേ വത്സരേ സ്വയം ।
ആശ്വാസ്യ ജനനീം പുത്രദ്വയദാനേന ബോധതഃ ॥ 20 ॥
കാശീം ഗത്വാഽഷ്ടാംഗയോഗാഭ്യാസീ കൃഷ്ണസരസ്വതീം ।
കൃത്വാ ഗുരും യതിർഭൂത്വാ വേദാർഥാൻ സമ്പ്രകാശ്യ ച ॥ 21 ॥
ലുപ്തസന്ന്യാസിധർമം ച തേനേ തുര്യാശ്രമം ഭുവി ।
മേരും പ്രദക്ഷിണീകൃത്യ ശിഷ്യാൻ കൃത്വാഽപി ഭൂരിശഃ ॥ 22 ॥
പിതൃഭ്യാം ദർശനം ദത്വാ ദ്വിജം ശൂലരുജാർദിതം ।
കൃത്വാഽനാമയമാശ്വാസ്യ സായൻ ദേവം മഹാമതിം ॥ 23 ॥
അബ്ദം സ്ഥിത്വാ വൈദ്യനാഥക്ഷേത്രേ കൃഷ്ണാതടേ തതഃ ।
ഭില്ലവാട്യാം ചതുർമാസാൻ വിഭുർഗത്വാ തതോഽഗ്രതഃ ॥ 24 ॥
നൃസിംഹവാടികാക്ഷേത്രേ ദ്വാദശാബ്ദാൻ വസൻ സുധീഃ ।
തത്ര സ്ഥിത്വാഽപി ഗന്ധർവപുരമേത്യാവസൻ മഠേ ॥ 25 ॥
ജീവയിത്വാ മൃതാൻ ദുഗ്ധ്വാ വന്ധ്യാം ച മഹിഷീം ഹരിഃ ।
വിശ്വരൂപം ദർശയിത്വാ യതയേ വിശ്വനാടകഃ ॥ 26 ॥
ബഹ്വീരമാനുഷീർലീലാഃ കൃത്വാ ഗുപ്തോഽപി തത്ര ച ।
യ ആസ്തേ ഭഗവാൻ ദത്തഃ സോഽസ്മാൻ രക്ഷതു സർവദാ ॥ 27 ॥
യാ സപ്തവിംശതിശ്ലോകൈഃ കൃതാ നക്ഷത്രമാലികാ ।
തദ്ഭക്തേഭ്യോഽർപിതാ ഭക്താഭിന്നശ്രീദത്തതുഷ്ടയേ ॥ 28 ॥
ദ്വാദശ്യാമാശ്വിനേ കൃഷ്ണേ ശ്രീപാദസ്യോത്സവോ മഹാൻ ।
മാഘേ കൃഷ്ണേ പ്രതിപദി നരസിംഹപ്രഭോസ്തഥാ ॥ 29 ॥
ഇതി ശ്രീ വാസുദേവാനന്ദസരസ്വതീവിരചിതാ നക്ഷത്ര മാലികാ സമ്പൂർണാ ।
Recite with devotion and pure heart
Regular practice brings spiritual benefits