हैंహైHaindavamஹிહિં
📍
Font Size:
കൂർമ സ്തോത്രം
മുനയഃ ഊചുഃ ।
നമസ്തേ കൂർമരൂപായ വിഷ്ണവേ പരമാത്മനേ ।
നാരായണായ വിശ്വായ വാസുദേവായ തേ നമഃ ॥ 1 ॥
നമോ നമസ്തേ കൃഷ്ണായ ഗോവിന്ദായ നമോ നമഃ ।
മാധവായ നമസ്തുഭ്യം നമോ യജ്ഞേശ്വരായ ച ॥ 2 ॥
സഹസ്രശിരസേ തുഭ്യം സഹസ്രാക്ഷായ തേ നമഃ ।
നമഃ സഹസ്രഹസ്തായ സഹസ്രചരണായ ച ॥ 3 ॥
ഓം നമോ ജ്ഞാനരൂപായ പരമാത്മസ്വരൂപിണേ ।
ആനന്ദായ നമസ്തുഭ്യം മായാതീതായ തേ നമഃ ॥ 4 ॥
നമോ ഗൂഢശരീരായ നിർഗുണായ നമോഽസ്തു തേ ।
പുരുഷായ പുരാണായ സത്താമാത്രസ്വരൂപിണേ ॥ 5 ॥
നമഃ സാംഖ്യായ യോഗായ കേവലായ നമോഽസ്തു തേ ।
ധർമജ്ഞാനാധിഗമ്യായ നിഷ്കലായ നമോഽസ്തു തേ ॥ 6 ॥
നമസ്തേ വ്യോമരൂപായ മഹായോഗേശ്വരായ ച ।
പരാവരാണാം പ്രഭവേ വേദവേദ്യായ തേ നമഃ ॥ 7 ॥
നമോ ബുദ്ധായ ശുദ്ധായ നമോ യുക്തായ ഹേതവേ ।
നമോ നമോ നമസ്തുഭ്യം മായിനേ വേധസേ നമഃ ॥ 8 ॥
നമോഽസ്തു തേ വരാഹായ നാരസിംഹായ തേ നമഃ ।
വാമനായ നമസ്തുഭ്യം ഹൃഷീകേശായ തേ നമഃ ॥ 9 ॥
സ്വർഗാപവർഗദാത്രേ ച നമോഽപ്രതിഹതാത്മനേ ।
നമോ യോഗാധിഗമ്യായ യോഗിനേ യോഗദായിനേ ॥ 10 ॥
ദേവാനാം പതയേ തുഭ്യം ദേവാർതിശമനായ തേ ।
ഭഗവംസ്ത്വത്പ്രസാദേന സർവസംസാരനാശനം ॥ 11 ॥
അസ്മാഭിർവിദിതം ജ്ഞാനം യജ്ജ്ഞാത്വാമൃതമശ്നുതേ ।
ശ്രുതാസ്തു വിവിധാ ധർമാ വംശാ മന്വന്തരാണി ച ॥ 12 ॥
സർഗശ്ച പ്രതിസർഗശ്ച ബ്രഹ്മാണ്ഡസ്യാസ്യ വിസ്തരഃ ।
ത്വം ഹി സർവജഗത്സാക്ഷീ വിശ്വോ നാരായണഃ പരഃ ।
ത്രാതുമർഹസ്യനന്താത്മാ ത്വാമേവ ശരണം ഗതാഃ ॥ 13 ॥
ഇതി കൂർമപുരാണേ ഉത്തരഭാഗേ ഷട്ചത്വാരിംശോഽധ്യായേ മുനിഭിഃ കൃതം ശ്രീ കൂർമ സ്തോത്രം ।
Recite with devotion and pure heart
Regular practice brings spiritual benefits