जय राम सदाराम सच्चिदानन्दविग्रह । अविद्यापङ्कगलितनिर्मलाकार ते नमः ॥ 1 ॥ जयाऽखिलजगद्भारधारण श्रमवर्जित । तापत्रयविकर्षाय हलं कलयते सदा ॥ 2 ॥ प्रपन्नदीनत्राणाय बलरामाय ते नमः । त्वमेवेश पराशेषकलुषक्षालनप्रभुः ॥ 3 ॥ प्रपन्नकरुणासिन्धो भक्तप्रिय नमोऽस्तु ते । चराचरफणाग्रेण धृता येन वसुन्धरा ॥ 4 ॥ मामुद्धरास्मद्दुष्पाराद्भवाम्भोधेरपारतः । परापराणां परमं परमेश नमोऽस्तु ते ॥ 5 ॥ इमं स्तवं यः पठति बलरामाधिदैवतम् । बलिष्ठः सर्वकार्येषु गरिष्ठः सोऽभिजायते ॥ 6 ॥ इति श्री बलराम स्तोत्रम् ।