हैंహైHaindavamஹிહિં
📍
Font Size:
ബടുകഭൈരവ കവചം
ശ്രീഭൈരവ ഉവാച –
ദേവേശി ദേഹരക്ഷാർഥം കാരണം കഥ്യതാം ധ്രുവം ।
മ്രിയന്തേ സാധകാ യേന വിനാ ശ്മശാനഭൂമിഷു ॥
രണേഷു ചാതിഘോരേഷു മഹാവായുജലേഷു ച ।
ശൃംഗിമകരവജ്രേഷു ജ്വരാദിവ്യാധിവഹ്നിഷു ॥
ശ്രീദേവ്യുവാച –
കഥയാമി ശൃണു പ്രാജ്ഞ ബടോസ്തു കവചം ശുഭം ।
ഗോപനീയം പ്രയത്നേന മാതൃജാരോപമം യഥാ ॥
തസ്യ ധ്യാനം ത്രിധാ പ്രോക്തം സാത്ത്വികാദിപ്രഭേദതഃ ।
സാത്ത്വികം രാജസം ചൈവ താമസം ദേവ തത് ശൃണു ॥
ധ്യാനം –
വന്ദേ ബാലം സ്ഫടികസദൃശം കുണ്ഡലോദ്ഭാസിവക്ത്രം
ദിവ്യാകല്പൈർനവമണിമയൈഃ കിങ്കിണീനൂപുരാദ്യൈഃ ।
ദീപ്താകാരം വിശദവദനം സുപ്രസന്നം ത്രിനേത്രം
ഹസ്താബ്ജാഭ്യാം ബടുകമനിശം ശൂലഖഡ്ഗൗദധാനം ॥ 1 ॥
ഉദ്യദ്ഭാസ്കരസന്നിഭം ത്രിനയനം രക്താംഗരാഗസ്രജം
സ്മേരാസ്യം വരദം കപാലമഭയം ശൂലം ദധാനം കരൈഃ ।
നീലഗ്രീവമുദാരഭൂഷണശതം ശീതാംശുചൂഡോജ്ജ്വലം
ബന്ധൂകാരുണവാസസം ഭയഹരം ദേവം സദാ ഭാവയേ ॥ 2 ॥
ധ്യായേന്നീലാദ്രികാന്തം ശശിശകലധരം മുണ്ഡമാലം മഹേശം
ദിഗ്വസ്ത്രം പിംഗകേശം ഡമരുമഥ സൃണിം ഖഡ്ഗശൂലാഭയാനി ।
നാഗം ഘണ്ടാം കപാലം കരസരസിരുഹൈർവിഭ്രതം ഭീമദംഷ്ട്രം
സർപാകല്പം ത്രിനേത്രം മണിമയവിലസത്കിങ്കിണീ നൂപുരാഢ്യം ॥ 3 ॥
അസ്യ വടുകഭൈരവകവചസ്യ മഹാകാല ഋഷിരനുഷ്ടുപ്ഛന്ദഃ ശ്രീവടുകഭൈരവോ ദേവതാ ബം ബീജം ഹ്രീം ശക്തിരാപദുദ്ധാരണായേതി കീലകം മമ സർവാഭീഷ്ടസിദ്ധ്യർഥേ വിനിയോഗഃ ।
കവചം –
ഓം ശിരോ മേ ഭൈരവഃ പാതു ലലാടം ഭീഷണസ്തഥാ ।
നേത്രേ ച ഭൂതഹനനഃ സാരമേയാനുഗോ ഭ്രുവൗ ॥ 1
ഭൂതനാഥശ്ച മേ കർണൗ കപോലൗ പ്രേതവാഹനഃ ।
നാസാപുടൗ തഥോഷ്ഠൗ ച ഭസ്മാംഗഃ സർവഭൂഷണഃ ॥ 2
ഭീഷണാസ്യോ മമാസ്യം ച ശക്തിഹസ്തോ ഗലം മമ ।
സ്കന്ധൗ ദൈത്യരിപുഃ പാതു ബാഹൂ അതുലവിക്രമഃ ॥ 3
പാണീ കപാലീ മേ പാതു മുണ്ഡമാലാധരോ ഹൃദം ।
വക്ഷഃസ്ഥലം തഥാ ശാന്തഃ കാമചാരീ സ്തനം മമ ॥ 4
ഉദരം ച സ മേ തുഷ്ടഃ ക്ഷേത്രേശഃ പാർശ്വതസ്തഥാ ।
ക്ഷേത്രപാലഃ പൃഷ്ഠദേശം ക്ഷേത്രാഖ്യോ നാഭിതസ്തഥാ ॥ 5
കടിം പാപൗഘനാശശ്ച ബടുകോ ലിംഗദേശകം ।
ഗുദം രക്ഷാകരഃ പാതു ഊരൂ രക്ഷാകരഃ സദാ ॥ 6
ജാനൂ ച ഘുർഘുരാരാവോ ജംഘേ രക്ഷതു രക്തപഃ ।
ഗുൽഫൗ ച പാദുകാസിദ്ധഃ പാദപൃഷ്ഠം സുരേശ്വരഃ ॥ 7
ആപാദമസ്തകം ചൈവ ആപദുദ്ധാരണസ്തഥാ ।
സഹസ്രാരേ മഹാപദ്മേ കർപൂരധവലോ ഗുരുഃ ॥ 8
പാതു മാം വടുകോ ദേവോ ഭൈരവഃ സർവകർമസു ।
പൂർവ സ്യാമസിതാംഗോ മേ ദിശി രക്ഷതു സർവദാ ॥ 9
ആഗ്നേയ്യാം ച രുരുഃ പാതു ദക്ഷിണേ ചണ്ഡഭൈരവഃ ।
നൈരൃത്യാം ക്രോധനഃ പാതു മാമുന്മത്തസ്തു പശ്ചിമേ ॥ 10
വായവ്യാം മേ കപാലീ ച നിത്യം പായാത് സുരേശ്വരഃ ।
ഭീഷണോ ഭൈരവഃ പാതൂത്തരസ്യാം ദിശി സർവദാ ॥ 11
സംഹാരഭൈരവഃ പാതു ദിശ്യൈശാന്യാം മഹേശ്വരഃ ।
ഊർധ്വേ പാതു വിധാതാ വൈ പാതാലേ നന്ദികോ വിഭുഃ ॥ 12
സദ്യോജാതസ്തു മാം പായാത് സർവതോ ദേവസേവിതഃ ।
വാമദേവോഽവതു പ്രീതോ രണേ ഘോരേ തഥാവതു ॥ 13
ജലേ തത്പുരുഷഃ പാതു സ്ഥലേ പാതു ഗുരുഃ സദാ ।
ഡാകിനീപുത്രകഃ പാതു ദാരാംസ്തു ലാകിനീസുതഃ ॥ 14
പാതു സാകലകോ ഭ്രാതൄൻ ശ്രിയം മേ സതതം ഗിരഃ ।
ലാകിനീപുത്രകഃ പാതു പശൂനശ്വാനജാംസ്തഥാ ॥ 15
മഹാകാലോഽവതു ച്ഛത്രം സൈന്യം വൈ കാലഭൈരവഃ ।
രാജ്യം രാജ്യശ്രിയം പായാത് ഭൈരവോ ഭീതിഹാരകഃ ॥ 16
രക്ഷാഹീനന്തു യത് സ്ഥാനം വർജിതം കവചേന ച ।
തത് സർവം രക്ഷ മേ ദേവ ത്വം യതഃ സർവരക്ഷകഃ ॥ 17
ഏതത് കവചമീശാന തവ സ്നേഹാത് പ്രകാശിതം ।
നാഖ്യേയം നരലോകേഷു സാരഭൂതം ച സുശ്രിയം ॥ 18
യസ്മൈ കസ്മൈ ന ദാതവ്യം കവചേശം സുദുർലഭം ।
ന ദേയം പരശിഷ്യേഭ്യഃ കൃപണേഭ്യശ്ച ശങ്കര ॥ 19
യോ ദദാതി നിഷിദ്ധേഭ്യഃ സ വൈ ഭ്രഷ്ടോ ഭവേദ്ധ്രുവം ।
അനേന കവചേശേന രക്ഷാം കൃത്വാ ദ്വിജോത്തമഃ ॥ 20
വിചരൻ യത്ര കുത്രാപി വിഘ്നൗഘൈഃ പ്രാപ്യതേ ന സഃ ।
മന്ത്രേണ മ്രിയതേ യോഗീ കവചം യന്ന രക്ഷിതഃ ॥ 21
തസ്മാത് സർവപ്രയത്നേന ദുർലഭം പാപചേതസാം ।
ഭൂർജേ രംഭാത്വചേ വാപി ലിഖിത്വാ വിധിവത് പ്രഭോ ॥ 22
ധാരയേത് പാഠയേദ്വാപി സമ്പഠേദ്വാപി നിത്യശഃ ।
സമ്പ്രാപ്നോതി പ്രഭാവം വൈ കവചസ്യാസ്യ വർണിതം ॥ 23
നമോ ഭൈരവദേവായ സാരഭൂതായ വൈ നമഃ ।
നമസ്ത്രൈലോക്യനാഥായ നാഥനാഥായ വൈ നമഃ ॥ 24
Recite with devotion and pure heart
Regular practice brings spiritual benefits