asya śrīśāktānandapīyūṣasya nāma śrīkālabhairavāṣṭottaraśatanāma stotra mahāmantrasya śrī ānandabhairava ṛṣiḥ anuṣṭup chandaḥ śrī kālabhairavo devatā hrīṃ bījaṃ hsauḥ śaktiḥ kṣphrauṃ kīlakaṃ śrīkālabhairavaprasādasiddhyarthe jape viniyogaḥ ॥ ṛṣyādinyāsāḥ – śrīānandabhairava ṛṣaye namaḥ śirasi । anuṣṭup chandase namo mukhe । śrīkālabhairava devatāyai namo hṛdaye । hrīṃ bījāya namo guhye । hsauḥ śaktaye namaḥ pādayoḥ । kṣphrauṃ kīlakāya namo nābhau । viniyogāya namaḥ sarvāṅge ॥ karanyāsāḥ – kṣphrāṃ aṅguṣṭhābhyāṃ namaḥ । kṣphrīṃ tarjanībhyāṃ namaḥ । kṣphrūṃ madhyamābhyāṃ namaḥ । kṣphraiṃ anāmikābhyāṃ namaḥ । kṣphrauṃ kaniṣṭhikābhyāṃ namaḥ । kṣphraḥ karatalakarapṛṣṭhābhyāṃ namaḥ ॥ hṛdayādinyāsāḥ – kṣphrāṃ hṛdayāya namaḥ । kṣphrīṃ śirase svāhā । kṣphrūṃ śikhāyai vaṣaṭ । kṣphraiṃ kavacāya hum । kṣphrauṃ netratrayāya vauṣaṭ । kṣphraḥ astrāya phaṭ ॥ dhyānam – śvasthaṃ trīkṣaṇaśobhitaṃ śritajanoddhāraṃ kṛpāsāgaraṃ āmnāyāsyakaroṭikharpakaraṃ daṇḍaṃ dharantaṃ sadā । śrīkāśīpuranāyakaṃ sakalamantrarṣīśvaraṃ mokṣadaṃ dhyāyettaṃ hṛdi kālabhairavaguruṃ kāntāsametaṃ param ॥ stotram – kālabhairavadevaḥ kālakālaḥ kāladaṇḍadhṛk । kālātmā kāmamantrātmā kāśikāpuranāyakaḥ ॥ 1 ॥ karuṇāvāridhiḥ kāntāmilitaḥ kālikātanuḥ । kālajaḥ kukkurārūḍhaḥ kapālī kālanemihā ॥ 2 ॥ kālakaṇṭhaḥ kaṭākṣānugṛhītākhilasevakaḥ । kapālakharparotkṛṣṭabhikṣāpātradharaḥ kaviḥ ॥ 3 ॥ kalpāntadahanākāraḥ kalānidhikalādharaḥ । kapālamālikābhūṣaḥ kālīkulavarapradaḥ ॥ 4 ॥ kālīkalāvatīdīkṣāsaṃskāropāsanapriyaḥ । kālikādakṣapārśvasthaḥ kālīvidyāsvarūpavān ॥ 5 ॥ kālīkūrcasamāyuktabhuvanākūṭabhāsuraḥ । kālīdhyānajapāsaktahṛdagāranivāsakaḥ ॥ 6 ॥ kālikāvarivasyādipradānakalpapādapaḥ । kālyugrāvāsavabrāhmīpramukhācāryanāyakaḥ ॥ 7 ॥ kaṅkālamālikādhārī kamanīyajaṭādharaḥ । koṇarekhāṣṭapatrasthapradeśabindupīṭhagaḥ ॥ 8 ॥ kadalīkaravīrārkakañjahomārcanapriyaḥ । kūrmapīṭhādiśaktīśaḥ kalākāṣṭhādipālakaḥ ॥ 9 ॥ kaṭaprūḥ kāmasañcārī kāmāriḥ kāmarūpavān । kaṇṭhādisarvacakrasthaḥ kriyādikoṭidīpakaḥ ॥ 10 ॥ karṇahīnopavītābhaḥ kanakācaladehavān । kandarākāradaharākāśabhāsuramūrtimān ॥ 11 ॥ kapālamocanānandaḥ kālarājaḥ kriyāpradaḥ । karaṇādhipatiḥ karmakārakaḥ kartṛnāyakaḥ ॥ 12 ॥ kaṇṭhādyakhiladeśāhibhūṣaṇāḍhyaḥ kalātmakaḥ । karmakāṇḍādhipaḥ kilbiṣamocī kāmakoṣṭhakaḥ ॥ 13 ॥ kalakaṇṭhāravānandī karmaśraddhavarapradaḥ । kuṇapākīrṇakāntārasañcārī kaumudīsmitaḥ ॥ 14 ॥ kiṅkiṇīmañjunikvāṇakaṭīsūtravirājitaḥ । kalyāṇakṛtkalidhvaṃsī karmasākṣī kṛtajñapaḥ ॥ 15 ॥ karāladaṃṣṭraḥ kandarpadarpaghnaḥ kāmabhedanaḥ । kālāguruviliptāṅgaḥ kātarārtābhayapradaḥ ॥ 16 ॥ kalandikāpradaḥ kālībhaktalokavarapradaḥ । kāminīkāñcanābaddhamocakaḥ kamalekṣaṇaḥ ॥ 17 ॥ kādambarīrasāsvādalolupaḥ kāṅkṣitārthadaḥ । kabandhanāvaḥ kāmākhyākāñcyādikṣetrapālakaḥ ॥ 18 ॥ kaivalyapradamandāraḥ koṭisūryasamaprabhaḥ । kriyecchājñānaśaktipradīpakānalalocanaḥ ॥ 19 ॥ kāmyādikarmasarvasvaphaladaḥ karmapoṣakaḥ । kāryakāraṇanirmātā kārāgṛhavimocakaḥ ॥ 20 ॥ kālaparyāyamūlasthaḥ kāryasiddhipradāyakaḥ । kālānurūpakarmāṅgamoṣaṇabhrāntināśanaḥ ॥ 21 ॥ kālacakraprabhedī kālimmanyayoginīpriyaḥ । kāhalādimahāvādyatālatāṃḍavalālasaḥ ॥ 22 ॥ kulakuṇḍalinīśāktayogasiddhipradāyakaḥ । kālarātrimahārātriśivārātryādikārakaḥ ॥ 23 ॥ kolāhaladhvaniḥ kopī kaulamārgapravartakaḥ । karmakauśalyasantoṣī kelibhāṣaṇalālasaḥ ॥ 24 ॥ kṛtsnapravṛttiviśvāṇḍapañcakṛtyavidhāyakaḥ । kālanāthaparaḥ kāraḥ kāladharmapravartakaḥ ॥ 25 ॥ kulācāryaḥ kulācārarataḥ kuhvaṣṭamīpriyaḥ । karmabandhākhilacchedī koṣṭhasthabhairavāgraṇīḥ ॥ 26 ॥ kaṭhoraujasyabhīṣmājñāpālakiṅkarasevitaḥ । kālarudraḥ kālavelāhorāṃśamūrtimān karaḥ ॥ 27 ॥ ityuktaṃ gurunāthasya nāmnāmaṣṭottaraṃ śatam । śrīkālabhairavasyedaṃ rahasyamatipāvanam ॥ 28 ॥ śrīśāktānandapīyuṣaṃ mokṣasādhanamuttamam । vidyāsarvasvasārāḍhyaṃ yoginīhṛdayaṅgamam ॥ 29 ॥ puṇyaṃ sudurlabhaṃ gopyaṃ śamathapradamauṣadham । kakāramātṛkābṛṃhaṃ gurvanugrahasiddhidam ॥ 30 ॥ yo japetparayā bhaktyā premadhyānaparaḥ sadā । guruprasādāllabhate varaṃ sarvamabhīpsitam ॥ 31 ॥ iti śrī kālabhairava kakāra aṣṭottaraśatanāma stotram ।