Batuka Bhairava Stavaraja

kailāsaśikharāsīnaṃ devadevaṃ jagadgurum । śaṅkaraṃ paripapraccha pārvatī parameśvaram ॥ 1 śrīpārvatyuvāca – bhagavan sarvadharmajña sarvaśāstrāgamādiṣu । āpaduddhāraṇaṃ mantraṃ sarvasiddhipradaṃ nṛṇām ॥ 2 sarveṣāṃ caiva bhūtānāṃ hitārthaṃ vāñchitaṃ mayā । viśeṣatastu rājñāṃ vai śāntipuṣṭiprasādhanam ॥ 3 aṅganyāsa karanyāsa bījanyāsa samanvitam । vaktumarhasi deveśa mama harṣavivardhanam ॥ 4 śrībhagavānuvāca – śṛṇu devi mahāmantramāpaduddhārahetukam । sarvaduḥkhapraśamanaṃ sarvaśatrunibarhaṇam ॥ 5 apasmārādirogāṇāṃ jvarādīnāṃ viśeṣataḥ । nāśanaṃ smṛtimātreṇa mantrarājamimaṃ priye ॥ 6 graharājabhayānāṃ ca nāśanaṃ sukhavardhanam । snehādvakṣyāmi te mantraṃ sarvasāramimaṃ priye ॥ 7 sarvakāmārthadaṃ mantraṃ rājyabhogapradaṃ nṛṇām । praṇavaṃ pūrvamuccārya devī praṇavamuddharet ॥ 8 baṭukāyeti vai paścādāpaduddhāraṇāya ca । kuru dvayaṃ tataḥ paścādbaṭukāya punaḥ kṣipet ॥ 9 devī praṇavamuddhṛtya mantrarājamimaṃ priye । mantroddhāramimaṃ devi trailokyasyāpi durlabham ॥ 10 aprakāśyamimaṃ mantraṃ sarvaśaktisamanvitam । smaraṇādeva mantrasya bhūtapretapiśācakāḥ ॥ 11 vidravanti bhayārtā vai kālarudrādiva prajāḥ । paṭhedvā pāṭhayedvāpi pūjayedvāpi pustakam ॥ 12 nāgnicaurabhayaṃ vāpi graharājabhayaṃ tathā । na ca mārībhayaṃ tasya sarvatra sukhavān bhavet ॥ 13 āyurārogyamaiśvaryaṃ putrapautrādisampadaḥ । bhavanti satataṃ tasya pustakasyāpi pūjanāt ॥ 14 śrīpārvatyuvāca – ya eṣa bhairavo nāma āpaduddhārako mataḥ । tvayā ca kathito deva bhairavaḥ kalpa uttamaḥ ॥ 15 tasya nāmasahasrāṇi ayutānyarbudāni ca । sāramuddhṛtya teṣāṃ vai nāmāṣṭaśatakaṃ vada ॥ 16 śrībhagavānuvāca – yastu saṅkīrtayedetat sarvaduṣṭanibarhaṇam । sarvān kāmānavāpnoti sādhakaḥ siddhimeva ca ॥ 17 śṛṇu devi pravakṣyāmi bhairavasya mahātmanaḥ । āpaduddhārakasyeha nāmāṣṭaśatamuttamam ॥ 18 sarvapāpaharaṃ puṇyaṃ sarvāpadvinivārakam । sarvakāmārthadaṃ devi sādhakānāṃ sukhāvaham ॥ 19 dehāṅganyasanaṃ caiva pūrvaṃ kuryāt samāhitaḥ । bhairavaṃ mūrdhni vinyasya lalāṭe bhīmadarśanam ॥ 20 akṣṇorbhūtāśrayaṃ nyasya vadane tīkṣṇadarśanam । kṣetrapaṃ karṇayormadhye kṣetrapālaṃ hṛdi nyaset ॥ 21 kṣetrākhyaṃ nābhideśe ca kaṭyāṃ sarvāghanāśanam । trinetramūrvorvinyasya jaṅghayo raktapāṇikam ॥ 22 pādayordevadeveśaṃ sarvāṅge vaṭukaṃ nyaset । evaṃ nyāsavidhiṃ kṛtvā tadanantaramuttamam ॥ 23 nāmāṣṭaśatakasyāpi chando'nuṣṭubudāhṛtam । bṛhadāraṇyako nāma ṛṣiśca parikīrtitaḥ ॥ 24 devatā kathitā ceha sadbhirvaṭukabhairavaḥ । dharmārthakāmamokṣeṣu viniyogaḥ prakīrtitaḥ ॥ 25 aṣṭottaraśatanāma stotram – oṃ bhairavo bhūtanāthaśca bhūtātmā bhūtabhāvanaḥ । kṣetradaḥ kṣetrapālaśca kṣetrajñaḥ kṣatriyo virāṭ ॥ 26 śmaśānavāsī māṃsāśī kharparāśī makhāntakṛt । raktapaḥ prāṇapaḥ siddhaḥ siddhidaḥ siddhasevitaḥ ॥ 27 karālaḥ kālaśamanaḥ kalākāṣṭhātanuḥ kaviḥ । trinetro bahunetraśca tathā piṅgalalocanaḥ ॥ 28 śūlapāṇiḥ khaḍgapāṇiḥ kaṅkālī dhūmralocanaḥ । abhīrurbhairavo bhīrurbhūtapo yoginīpatiḥ ॥ 29 dhanado dhanahārī ca dhanapaḥ pratibhāvavān । nāgahāro nāgakeśo vyomakeśaḥ kapālabhṛt ॥ 30 kālaḥ kapālamālī ca kamanīyaḥ kalānidhiḥ । trilocano jvalannetrastriśikhī ca trilokapāt ॥ 31 trivṛttanayano ḍimbhaḥ śāntaḥ śāntajanapriyaḥ । vaṭuko vaṭukeśaśca khaṭvāṅgavaradhārakaḥ ॥ 32 bhūtādhyakṣaḥ paśupatirbhikṣukaḥ paricārakaḥ । dhūrto digambaraḥ saurirhariṇaḥ pāṇḍulocanaḥ ॥ 33 praśāntaḥ śāntidaḥ śuddhaḥ śaṅkarapriyabāndhavaḥ । aṣṭamūrtirnidhīśaśca jñānacakṣustamomayaḥ ॥ 34 aṣṭādhāraḥ kalādhāraḥ sarpayuktaḥ śaśīśikhaḥ । bhūdharo bhūdharādhīśo bhūpatirbhūdharātmakaḥ ॥ 35 kaṅkāladhārī muṇḍī ca vyālayajñopavītavān । jṛmbhaṇo mohanaḥ stambhī māraṇaḥ kṣobhaṇastathā ॥ 36 śuddhanīlāñjanaprakhyadeho muṇḍavibhūṣitaḥ । balibhuk balibhūtātmā kāmī kāmaparākramaḥ ॥ 37 sarvāpattārako durgo duṣṭabhūtaniṣevitaḥ । kāmī kalānidhiḥ kāntaḥ kāminīvaśakṛdvaśī । sarvasiddhiprado vaidyaḥ prabhaviṣṇuḥ prabhāvavān ॥ 38 phalaśrutiḥ – aṣṭottaraśataṃ nāma bhairavasya mahātmanaḥ । mayā te kathitaṃ devi rahasyaṃ sarvakāmikam ॥ 39 ya idaṃ paṭhati stotram nāmāṣṭaśatamuttamam । na tasya duritaṃ kiñcanna rogebhyo bhayaṃ tathā । na śatrubhyo bhayaṃ kiñcit prāpnoti mānavaḥ kvacit ॥ 40 pātakānāṃ bhayaṃ naiva paṭhet stotramananyadhīḥ । mārībhaye rājabhaye tathā caurāgnije bhaye ॥ 41 autpātike mahāghore yathā duḥsvapnadarśane । bandhane ca tathā ghore paṭhet stotram samāhitaḥ ॥ 42 sarve praśamanaṃ yānti bhayādbhairavakīrtanāt । ekādaśasahasraṃ tu puraścaraṇamucyate ॥ 43 trisandhyaṃ yaḥ paṭheddevi saṃvatsaramatandritaḥ । sa siddhiṃ prāpnuyādiṣṭāṃ durlabhamapi mānuṣaḥ ॥ 44 ṣaṇmāsān bhūmikāmastu sa japtvā labhate mahīm । rājā śatruvināśāya japenmāsāṣṭakaṃ punaḥ ॥ 45 rātrau vāratrayaṃ caiva nāśayatyeva śātravān । japenmāsatrayaṃ rātrau rājānaṃ vaśamānayet ॥ 46 dhanārthī ca sutārthī ca dārārthī yastu mānavaḥ । paṭhedvāratrayaṃ yadvā vāramekaṃ tathā niśi ॥ 47 dhanaṃ putrāṃstathā dārān prāpnuyānnātra saṃśayaḥ । rogī rogāt pramucyeta baddho mucyeta bandhanāt ॥ 48 bhīto bhayāt pramucyeta devi satyaṃ na saṃśayaḥ । yān yān samī hate kāmāṃstāṃstānāpnoti niścitam । aprakāśyamidaṃ guhyaṃ na deyaṃ yasya kasyacit ॥ 49 satkulīnāya śāntāya ṛjave dambhavarjite । dadyāt stotramidaṃ puṇyaṃ sarvakāmaphalapradam । dhyānam vakṣyāmi devasya yathā dhyātvā paṭhennaraḥ ॥ 50 oṃ śuddhasphaṭikasaṅkāśaṃ sahasrādityavarcasam । aṣṭabāhuṃ trinayanaṃ caturbāhuṃ dvibāhukam ॥ 51 bhujaṅgamekhalaṃ devamagnivarṇaśiroruham । digambaraṃ kumārīśaṃ vaṭukākhyaṃ mahābalam ॥ 52 khaṭvāṅgamasipāśaṃ ca śūlaṃ caiva tathā punaḥ । ḍamaruṃ ca kapālaṃ ca varadaṃ bhujagaṃ tathā ॥ 53 nīlajīmūtasaṅkāśaṃ nīlāñjanacayaprabham । daṃṣṭrākarālavadanaṃ nūpurāṅgadabhūṣitam ॥ 54 ātmavarṇasamopetasārameyasamanvitam । dhyātvā japet susaṃhṛṣṭaḥ sarvān kāmānavāpnuyāt ॥ 55 etacchrutvā tato devī nāmāṣṭaśatamuttamam । bhairavāya prahṛṣṭābhūt svayaṃ caiva maheśvarī ॥ 56 iti viśvasāroddhāratantre āpaduddhārakalpe bhairava stavarājaḥ samāptaḥ ॥

Recite with devotion and pure heart

Regular practice brings spiritual benefits

More stotras of Bhairava: