हैंహైHaindavamஹிહિં
📍
Font Size:
ഹേരംബോപനിഷത്
ഓം സഹ നാവവതു । സഹ നൗ ഭുനക്തു । സഹ വീര്യം കരവാവഹൈ ।
തേജസ്വിനാവധീതമസ്തു മാ വിദ്വിഷാവഹൈ । ഓം ശാന്തിഃ ശാന്തിഃ ശാന്തിഃ ॥
അഥാതോ ഹേരംബോപനിഷദം വ്യാഖ്യാസ്യാമഃ । ഗൗരീ സാ സർവമംഗലാ സർവജ്ഞം പരിസമേത്യോവാച ।
അധീഹി ഭഗവന്നാത്മവിദ്യാം പ്രശസ്താം യയാ ജന്തുർമുച്യതേ മായയാ ച ।
യതോ ദുഃഖാദ്വിമുക്തോ യാതി ലോകം പരം ശുഭ്രം കേവലം സാത്ത്വികം ച ॥ 1 ॥
താം വൈ സ ഹോവാച മഹാനുകമ്പാസിന്ധുർബന്ധുഭുവനസ്യ ഗോപ്താ ।
ശ്രദ്ധസ്വൈതദ്ഗൗരീ സർവാത്മനാ ത്വം മാ തേ ഭൂയഃ സംശയോഽസ്മിൻ കദാചിത് ॥ 2 ॥
ഹേരംബതത്ത്വേ പരമാത്മസാരേ നോ വൈ യോഗാന്നൈവ തപോബലേന ।
നൈവായുധപ്രഭാവതോ മഹേശി ദഗ്ധം പുരാ ത്രിപുരം ദൈവയോഗാത് ॥ 3 ॥
തസ്യാപി ഹേരംബഗുരോഃ പ്രസാദാദ്യഥാ വിരിഞ്ചിർഗരുഡോ മുകുന്ദഃ ।
ദേവസ്യ യസ്യൈവ ബലേന ഭൂയഃ സ്വം സ്വം ഹിതം പ്രാപ്യ സുഖേന സർവം ॥ 4 ॥
മോദന്തേ സ്വേ സ്വേ പദേ പുണ്യലബ്ധേ സവൈർദേവൈഃ പൂജനീയോ ഗണേശഃ ।
പ്രഭുഃ പ്രഭൂണാമപി വിഘ്നരാജഃ സിന്ദൂരവർണഃ പുരുഷഃ പുരാണഃ ॥ 5 ॥
ലക്ഷ്മീസഹായോഽദ്വയകുഞ്ജരാകൃതിശ്ചതുർഭുജശ്ചന്ദ്രകലാകലാപഃ ।
മായാശരീരോ മധുരസ്വഭാവസ്തസ്യ ധ്യാനാത് പൂജനാത്തത്സ്വഭാവാഃ ॥ 6 ॥
സംസാരപാരം മുനയോഽപി യാന്തി സ വാ ബ്രഹ്മാ സ പ്രജേശോ ഹരിഃ സഃ ।
ഇന്ദ്രഃ സ ചന്ദ്രഃ പരമഃ പരാത്മാ സ ഏവ സർവോ ഭുവനസ്യ സാക്ഷീ ॥ 7 ॥
സ സർവലോകസ്യ ശുഭാശുഭസ്യ തം വൈ ജ്ഞാത്വാ മൃത്യുമത്യേതി ജന്തുഃ ।
നാന്യഃ പന്ഥാ ദുഃഖവിമുക്തിഹേതുഃ സർവേഷു ഭൂതേഷു ഗണേശമേകം ॥ 8 ॥
വിജ്ഞായ തം മൃത്യുമുഖാത് പ്രമുച്യതേ സ ഏവമാസ്ഥായ ശരീരമേകം ।
മായാമയം മോഹയതീവ സർവം സ പ്രത്യഹം കുരുതേ കർമകാലേ ॥ 9 ॥
സ ഏവ കർമാണി കരോതി ദേവോ ഹ്യേകോ ഗണേശോ ബഹുധാ നിവിഷ്ടഃ ।
സ പൂജിതഃ സൻ സുമുഖോഽഭിഭൂത്വാ ദന്തീമുഖോഽഭീഷ്ടമനന്തശക്തിഃ ॥ 10 ॥
സ വൈ ബലം ബലിനാമഗ്രഗണ്യഃ പുണ്യഃ ശരണ്യഃ സകലസ്യ ജന്തോഃ ।
തമേകദന്തം ഗജവക്ത്രമീശം വിജ്ഞായ ദുഃഖാന്തമുപൈതി സദ്യഃ ॥ 11 ॥
ലംബോദരോഽഹം പുരുഷോത്തമോഽഹം വിഘ്നാന്തകോഽഹം വിജയാത്മകോഽഹം ।
നാഗാനനോഽഹം നമതാം സുസിദ്ധഃ സ്കന്ദാഗ്രഗണ്യോ നിഖിലോഽഹമസ്മി ॥ 12 ॥
ന മേഽന്തരായോ ന ച കർമലോപോ ന പുണ്യപാപേ മമ തന്മയസ്യ ।
ഏവം വിദിത്വാ ഗണനാഥതത്ത്വം നിരന്തരായം നിജബോധബീജം ॥ 13 ॥
ക്ഷേമങ്കരം സന്തതസൗഖ്യഹേതും പ്രയാന്തി ശുദ്ധം ഗണനാഥതത്ത്വം ।
വിദ്യാമിമാം പ്രാപ്യ ഗൗരീ മഹേശാദഭീഷ്ടസിദ്ധിം സമവാപ സദ്യഃ ।
പൂജ്യാ പരാ സാ ച ജജാപ മന്ത്രം ശംഭും പതിം പ്രാപ്യ മുദം ഹ്യവാപ ॥ 14 ॥
യ ഇമാം ഹേരംബോപനിഷദമധീതേ സ സർവാൻ കാമാൻ ലഭതേ । സ സർവപാപൈർമുക്തോ ഭവതി । സ സർവൈർവേദൈർജ്ഞാതോ ഭവതി । സ സർവൈർദേവൈഃ പൂജിതോ ഭവതി । സ സർവവേദപാരായണഫലം ലഭതേ । സ ഗണേശസായുജ്യമവാപ്നോതി യ ഏവം വേദ । ഇത്യുപനിഷത് ।
ഓം സഹ നാവവതു । സഹ നൗ ഭുനക്തു । സഹ വീര്യം കരവാവഹൈ ।
തേജസ്വിനാവധീതമസ്തു മാ വിദ്വിഷാവഹൈ । ഓം ശാന്തിഃ ശാന്തിഃ ശാന്തിഃ ॥
Recite with devotion and pure heart
Regular practice brings spiritual benefits