ഓം ശുക്ലാംബരധരം വിഷ്ണും ശശിവർണം ചതുർഭുജം । പ്രസന്നവദനം ധ്യായേത് സർവവിഘ്നോപശാന്തയേ ॥ 1 ॥ യസ്യദ്വിരദവക്ത്രാദ്യാഃ പാരിഷദ്യാഃ പരഃ ശതം । വിഘ്നം നിഘ്നന്തി സതതം വിഷ്വക്സേനം തമാശ്രയേ ॥ 2 ॥ പൂർവ പീഠികാ ॥ വ്യാസം വസിഷ്ഠ നപ്താരം ശക്തേഃ പൗത്രമകല്മഷം । പരാശരാത്മജം വന്ദേ ശുകതാതം തപോനിധിം ॥ 3 ॥ വ്യാസായ വിഷ്ണു രൂപായ വ്യാസരൂപായ വിഷ്ണവേ । നമോ വൈ ബ്രഹ്മനിധയേ വാസിഷ്ഠായ നമോ നമഃ ॥ 4 ॥ അവികാരായ ശുദ്ധായ നിത്യായ പരമാത്മനേ । സദൈക രൂപ രൂപായ വിഷ്ണവേ സർവജിഷ്ണവേ ॥ 5 ॥ യസ്യ സ്മരണമാത്രേണ ജന്മസംസാരബന്ധനാത് । വിമുച്യതേ നമസ്തസ്മൈ വിഷ്ണവേ പ്രഭവിഷ്ണവേ ॥ 6 ॥ ഓം നമോ വിഷ്ണവേ പ്രഭവിഷ്ണവേ । ശ്രീ വൈശമ്പായന ഉവാച – ശ്രുത്വാ ധർമാ നശേഷേണ പാവനാനി ച സർവശഃ । യുധിഷ്ഠിരഃ ശാന്തനവം പുനരേവാഭ്യ ഭാഷത ॥ 7 ॥ യുധിഷ്ഠിര ഉവാച – കിമേകം ദൈവതം ലോകേ കിം വാഽപ്യേകം പരായണം സ്തുവന്തഃ കം കമർചന്തഃ പ്രാപ്നുയുർമാനവാഃ ശുഭം ॥ 8 ॥ കോ ധർമഃ സർവധർമാണാം ഭവതഃ പരമോ മതഃ । കിം ജപന്മുച്യതേ ജന്തുർജന്മസംസാര ബന്ധനാത് ॥ 9 ॥ ശ്രീ ഭീഷ്മ ഉവാച – ജഗത്പ്രഭും ദേവദേവ മനന്തം പുരുഷോത്തമം । സ്തുവന്നാമ സഹസ്രേണ പുരുഷഃ സതതോത്ഥിതഃ ॥ 10 ॥ തമേവ ചാർചയന്നിത്യം ഭക്ത്യാ പുരുഷമവ്യയം । ധ്യായൻ സ്തുവന്നമസ്യംശ്ച യജമാനസ്തമേവ ച ॥ 11 ॥ അനാദി നിധനം വിഷ്ണും സർവലോക മഹേശ്വരം । ലോകാധ്യക്ഷം സ്തുവന്നിത്യം സർവ ദുഃഖാതിഗോ ഭവേത് ॥ 12 ॥ ബ്രഹ്മണ്യം സർവ ധർമജ്ഞം ലോകാനാം കീർതി വർധനം । ലോകനാഥം മഹദ്ഭൂതം സർവഭൂത ഭവോദ്ഭവം॥ 13 ॥ ഏഷ മേ സർവ ധർമാണാം ധർമോഽധിക തമോമതഃ । യദ്ഭക്ത്യാ പുണ്ഡരീകാക്ഷം സ്തവൈരർചേന്നരഃ സദാ ॥ 14 ॥ പരമം യോ മഹത്തേജഃ പരമം യോ മഹത്തപഃ । പരമം യോ മഹദ്ബ്രഹ്മ പരമം യഃ പരായണം । 15 ॥ പവിത്രാണാം പവിത്രം യോ മംഗലാനാം ച മംഗലം । ദൈവതം ദേവതാനാം ച ഭൂതാനാം യോഽവ്യയഃ പിതാ ॥ 16 ॥ യതഃ സർവാണി ഭൂതാനി ഭവന്ത്യാദി യുഗാഗമേ । യസ്മിംശ്ച പ്രലയം യാന്തി പുനരേവ യുഗക്ഷയേ ॥ 17 ॥ തസ്യ ലോക പ്രധാനസ്യ ജഗന്നാഥസ്യ ഭൂപതേ । വിഷ്ണോർനാമ സഹസ്രം മേ ശ്രുണു പാപ ഭയാപഹം ॥ 18 ॥ യാനി നാമാനി ഗൗണാനി വിഖ്യാതാനി മഹാത്മനഃ । ഋഷിഭിഃ പരിഗീതാനി താനി വക്ഷ്യാമി ഭൂതയേ ॥ 19 ॥ ഋഷിർനാമ്നാം സഹസ്രസ്യ വേദവ്യാസോ മഹാമുനിഃ ॥ ഛന്ദോഽനുഷ്ടുപ് തഥാ ദേവോ ഭഗവാൻ ദേവകീസുതഃ ॥ 20 ॥ അമൃതാം ശൂദ്ഭവോ ബീജം ശക്തിർദേവകിനന്ദനഃ । ത്രിസാമാ ഹൃദയം തസ്യ ശാന്ത്യർഥേ വിനിയുജ്യതേ ॥ 21 ॥ വിഷ്ണും ജിഷ്ണും മഹാവിഷ്ണും പ്രഭവിഷ്ണും മഹേശ്വരം ॥ അനേകരൂപ ദൈത്യാന്തം നമാമി പുരുഷോത്തമം ॥ 22 ॥ പൂർവന്യാസഃ – അസ്യ ശ്രീ വിഷ്ണോർദിവ്യ സഹസ്രനാമ സ്തോത്ര മഹാമന്ത്രസ്യ ॥ ശ്രീ വേദവ്യാസോ ഭഗവാൻ ഋഷിഃ । അനുഷ്ടുപ് ഛന്ദഃ । ശ്രീമഹാവിഷ്ണുഃ പരമാത്മാ ശ്രീമന്നാരായണോ ദേവതാ । അമൃതാംശൂദ്ഭവോ ഭാനുരിതി ബീജം । ദേവകീനന്ദനഃ സ്രഷ്ടേതി ശക്തിഃ । ഉദ്ഭവഃ, ക്ഷോഭണോ ദേവ ഇതി പരമോമന്ത്രഃ । ശംഖഭൃന്നന്ദകീ ചക്രീതി കീലകം । ശാർ​ങ്ഗധന്വാ ഗദാധര ഇത്യസ്ത്രം । രഥാംഗപാണി രക്ഷോഭ്യ ഇതി നേത്രം । ത്രിസാമാസാമഗഃ സാമേതി കവചം । ആനന്ദം പരബ്രഹ്മേതി യോനിഃ । ഋതുസ്സുദർശനഃ കാല ഇതി ദിഗ്ബന്ധഃ ॥ ശ്രീവിശ്വരൂപ ഇതി ധ്യാനം । ശ്രീ മഹാവിഷ്ണു പ്രീത്യർഥേ സഹസ്രനാമ ജപേ പാരായണേ വിനിയോഗഃ । കരന്യാസഃ – വിശ്വം വിഷ്ണുർവഷട്കാര ഇത്യംഗുഷ്ഠാഭ്യാം നമഃ അമൃതാം ശൂദ്ഭവോ ഭാനുരിതി തർജനീഭ്യാം നമഃ ബ്രഹ്മണ്യോ ബ്രഹ്മകൃത് ബ്രഹ്മേതി മധ്യമാഭ്യാം നമഃ സുവർണബിന്ദു രക്ഷോഭ്യ ഇതി അനാമികാഭ്യാം നമഃ നിമിഷോഽനിമിഷഃ സ്രഗ്വീതി കനിഷ്ഠികാഭ്യാം നമഃ രഥാംഗപാണി രക്ഷോഭ്യ ഇതി കരതല കരപൃഷ്ഠാഭ്യാം നമഃ അംഗന്യാസഃ – സുവ്രതഃ സുമുഖഃ സൂക്ഷ്മ ഇതി ജ്ഞാനായ ഹൃദയായ നമഃ സഹസ്രമൂർതിഃ വിശ്വാത്മാ ഇതി ഐശ്വര്യായ ശിരസേ സ്വാഹാ സഹസ്രാർചിഃ സപ്തജിഹ്വ ഇതി ശക്ത്യൈ ശിഖായൈ വഷട് ത്രിസാമാ സാമഗസ്സാമേതി ബലായ കവചായ ഹും രഥാംഗപാണി രക്ഷോഭ്യ ഇതി നേത്രാഭ്യാം വൗഷട് ശാംഗധന്വാ ഗദാധര ഇതി വീര്യായ അസ്ത്രായഫട് ഋതുഃ സുദർശനഃ കാല ഇതി ദിഗ്ഭന്ധഃ ധ്യാനം – ക്ഷീരോധന്വത്പ്രദേശേ ശുചിമണി-വിലസ-ത്സൈകതേ-മൗക്തികാനാം മാലാ-കൢപ്താസനസ്ഥഃ സ്ഫടിക-മണിനിഭൈ-ര്മൗക്തികൈ-ര്മണ്ഡിതാംഗഃ । ശുഭ്രൈ-രഭ്രൈ-രദഭ്രൈ-രുപരിവിരചിതൈ-ര്മുക്ത പീയൂഷ വർഷൈഃ ആനന്ദീ നഃ പുനീയാ-ദരിനലിനഗദാ ശംഖപാണി-ര്മുകുന്ദഃ ॥ 1 ॥ ഭൂഃ പാദൗ യസ്യ നാഭിർവിയ-ദസുര നിലശ്ചന്ദ്ര സൂര്യൗ ച നേത്രേ കർണാവാശാഃ ശിരോദ്യൗർമുഖമപി ദഹനോ യസ്യ വാസ്തേയമബ്ധിഃ । അന്തഃസ്ഥം യസ്യ വിശ്വം സുര നരഖഗഗോഭോഗി ഗന്ധർവദൈത്യൈഃ ചിത്രം രം രമ്യതേ തം ത്രിഭുവന വപുശം വിഷ്ണുമീശം നമാമി ॥ 2 ॥ ഓം നമോ ഭഗവതേ വാസുദേവായ ! ശാന്താകാരം ഭുജഗശയനം പദ്മനാഭം സുരേശം വിശ്വാധാരം ഗഗനസദൃശം മേഘവർണം ശുഭാംഗം । ലക്ഷ്മീകാന്തം കമലനയനം യോഗിഹൃർധ്യാനഗമ്യം വന്ദേ വിഷ്ണും ഭവഭയഹരം സർവലോകൈകനാഥം ॥ 3 ॥ മേഘശ്യാമം പീതകൗശേയവാസം ശ്രീവത്സാകം കൗസ്തുഭോദ്ഭാസിതാംഗം । പുണ്യോപേതം പുണ്ഡരീകായതാക്ഷം വിഷ്ണും വന്ദേ സർവലോകൈകനാഥം ॥ 4 ॥ നമഃ സമസ്ത ഭൂതാനാം ആദി ഭൂതായ ഭൂഭൃതേ । അനേകരൂപ രൂപായ വിഷ്ണവേ പ്രഭവിഷ്ണവേ ॥ 5॥ സശംഖചക്രം സകിരീടകുണ്ഡലം സപീതവസ്ത്രം സരസീരുഹേക്ഷണം । സഹാര വക്ഷഃസ്ഥല ശോഭി കൗസ്തുഭം നമാമി വിഷ്ണും ശിരസാ ചതുർഭുജം । 6॥ ഛായായാം പാരിജാതസ്യ ഹേമസിംഹാസനോപരി ആസീനമംബുദശ്യാമമായതാക്ഷമലങ്കൃതം ॥ 7 ॥ ചന്ദ്രാനനം ചതുർബാഹും ശ്രീവത്സാങ്കിത വക്ഷസം രുക്മിണീ സത്യഭാമാഭ്യാം സഹിതം കൃഷ്ണമാശ്രയേ ॥ 8 ॥ പഞ്ചപൂജ – ലം - പൃഥിവ്യാത്മനേ ഗന്ഥം സമർപയാമി ഹം - ആകാശാത്മനേ പുഷ്പൈഃ പൂജയാമി യം - വായ്വാത്മനേ ധൂപമാഘ്രാപയാമി രം - അഗ്ന്യാത്മനേ ദീപം ദർശയാമി വം - അമൃതാത്മനേ നൈവേദ്യം നിവേദയാമി സം - സർവാത്മനേ സർവോപചാര പൂജാ നമസ്കാരാൻ സമർപയാമി സ്തോത്രം ॥ ഹരിഃ ഓം വിശ്വം വിഷ്ണുർവഷട്കാരോ ഭൂതഭവ്യഭവത്പ്രഭുഃ । ഭൂതകൃദ്ഭൂതഭൃദ്ഭാവോ ഭൂതാത്മാ ഭൂതഭാവനഃ ॥ 1 ॥ പൂതാത്മാ പരമാത്മാ ച മുക്താനാം പരമാഗതിഃ । അവ്യയഃ പുരുഷഃ സാക്ഷീ ക്ഷേത്രജ്ഞോഽക്ഷര ഏവ ച ॥ 2 ॥ യോഗോ യോഗവിദാം നേതാ പ്രധാന പുരുഷേശ്വരഃ । നാരസിംഹവപുഃ ശ്രീമാൻ കേശവഃ പുരുഷോത്തമഃ ॥ 3 ॥ സർവഃ ശർവഃ ശിവഃ സ്ഥാണുർഭൂതാദിർനിധിരവ്യയഃ । സംഭവോ ഭാവനോ ഭർതാ പ്രഭവഃ പ്രഭുരീശ്വരഃ ॥ 4 ॥ സ്വയംഭൂഃ ശംഭുരാദിത്യഃ പുഷ്കരാക്ഷോ മഹാസ്വനഃ । അനാദിനിധനോ ധാതാ വിധാതാ ധാതുരുത്തമഃ ॥ 5 ॥ അപ്രമേയോ ഹൃഷീകേശഃ പദ്മനാഭോഽമരപ്രഭുഃ । വിശ്വകർമാ മനുസ്ത്വഷ്ടാ സ്ഥവിഷ്ഠഃ സ്ഥവിരോ ധ്രുവഃ ॥ 6 ॥ അഗ്രാഹ്യഃ ശാശ്വതോ കൃഷ്ണോ ലോഹിതാക്ഷഃ പ്രതർദനഃ । പ്രഭൂതസ്ത്രികകുബ്ധാമ പവിത്രം മംഗലം പരം ॥ 7 ॥ ഈശാനഃ പ്രാണദഃ പ്രാണോ ജ്യേഷ്ഠഃ ശ്രേഷ്ഠഃ പ്രജാപതിഃ । ഹിരണ്യഗർഭോ ഭൂഗർഭോ മാധവോ മധുസൂദനഃ ॥ 8 ॥ ഈശ്വരോ വിക്രമീധന്വീ മേധാവീ വിക്രമഃ ക്രമഃ । അനുത്തമോ ദുരാധർഷഃ കൃതജ്ഞഃ കൃതിരാത്മവാൻ॥ 9 ॥ സുരേശഃ ശരണം ശർമ വിശ്വരേതാഃ പ്രജാഭവഃ । അഹസ്സംവത്സരോ വ്യാലഃ പ്രത്യയഃ സർവദർശനഃ ॥ 10 ॥ അജസ്സർവേശ്വരഃ സിദ്ധഃ സിദ്ധിഃ സർവാദിരച്യുതഃ । വൃഷാകപിരമേയാത്മാ സർവയോഗവിനിസ്സൃതഃ ॥ 11 ॥ വസുർവസുമനാഃ സത്യഃ സമാത്മാ സമ്മിതസ്സമഃ । അമോഘഃ പുണ്ഡരീകാക്ഷോ വൃഷകർമാ വൃഷാകൃതിഃ ॥ 12 ॥ രുദ്രോ ബഹുശിരാ ബഭ്രുർവിശ്വയോനിഃ ശുചിശ്രവാഃ । അമൃതഃ ശാശ്വതസ്ഥാണുർവരാരോഹോ മഹാതപാഃ ॥ 13 ॥ സർവഗഃ സർവ വിദ്ഭാനുർവിഷ്വക്സേനോ ജനാർദനഃ । വേദോ വേദവിദവ്യംഗോ വേദാംഗോ വേദവിത്കവിഃ ॥ 14 ॥ ലോകാധ്യക്ഷഃ സുരാധ്യക്ഷോ ധർമാധ്യക്ഷഃ കൃതാകൃതഃ । ചതുരാത്മാ ചതുർവ്യൂഹശ്ചതുർദംഷ്ട്രശ്ചതുർഭുജഃ ॥ 15 ॥ ഭ്രാജിഷ്ണുർഭോജനം ഭോക്താ സഹിഷ്ണുർജഗദാദിജഃ । അനഘോ വിജയോ ജേതാ വിശ്വയോനിഃ പുനർവസുഃ ॥ 16 ॥ ഉപേന്ദ്രോ വാമനഃ പ്രാംശുരമോഘഃ ശുചിരൂർജിതഃ । അതീന്ദ്രഃ സംഗ്രഹഃ സർഗോ ധൃതാത്മാ നിയമോ യമഃ ॥ 17 ॥ വേദ്യോ വൈദ്യഃ സദായോഗീ വീരഹാ മാധവോ മധുഃ । അതീന്ദ്രിയോ മഹാമായോ മഹോത്സാഹോ മഹാബലഃ ॥ 18 ॥ മഹാബുദ്ധിർമഹാവീര്യോ മഹാശക്തിർമഹാദ്യുതിഃ । അനിർദേശ്യവപുഃ ശ്രീമാനമേയാത്മാ മഹാദ്രിധൃക് ॥ 19 ॥ മഹേശ്വാസോ മഹീഭർതാ ശ്രീനിവാസഃ സതാംഗതിഃ । അനിരുദ്ധഃ സുരാനന്ദോ ഗോവിന്ദോ ഗോവിദാം പതിഃ ॥ 20 ॥ മരീചിർദമനോ ഹംസഃ സുപർണോ ഭുജഗോത്തമഃ । ഹിരണ്യനാഭഃ സുതപാഃ പദ്മനാഭഃ പ്രജാപതിഃ ॥ 21 ॥ അമൃത്യുഃ സർവദൃക് സിംഹഃ സന്ധാതാ സന്ധിമാൻ സ്ഥിരഃ । അജോ ദുർമർഷണഃ ശാസ്താ വിശ്രുതാത്മാ സുരാരിഹാ ॥ 22 ॥ ഗുരുർഗുരുതമോ ധാമ സത്യഃ സത്യപരാക്രമഃ । നിമിഷോഽനിമിഷഃ സ്രഗ്വീ വാചസ്പതിരുദാരധീഃ ॥ 23 ॥ അഗ്രണീഗ്രാമണീഃ ശ്രീമാൻ ന്യായോ നേതാ സമീരണഃ സഹസ്രമൂർധാ വിശ്വാത്മാ സഹസ്രാക്ഷഃ സഹസ്രപാത് ॥ 24 ॥ ആവർതനോ നിവൃത്താത്മാ സംവൃതഃ സമ്പ്രമർദനഃ । അഹഃ സംവർതകോ വഹ്നിരനിലോ ധരണീധരഃ ॥ 25 ॥ സുപ്രസാദഃ പ്രസന്നാത്മാ വിശ്വധൃഗ്വിശ്വഭുഗ്വിഭുഃ । സത്കർതാ സത്കൃതഃ സാധുർജഹ്നുർനാരായണോ നരഃ ॥ 26 ॥ അസംഖ്യേയോഽപ്രമേയാത്മാ വിശിഷ്ടഃ ശിഷ്ടകൃച്ഛുചിഃ । സിദ്ധാർഥഃ സിദ്ധസങ്കല്പഃ സിദ്ധിദഃ സിദ്ധി സാധനഃ ॥ 27 ॥ വൃഷാഹീ വൃഷഭോ വിഷ്ണുർവൃഷപർവാ വൃഷോദരഃ । വർധനോ വർധമാനശ്ച വിവിക്തഃ ശ്രുതിസാഗരഃ ॥ 28 ॥ സുഭുജോ ദുർധരോ വാഗ്മീ മഹേന്ദ്രോ വസുദോ വസുഃ । നൈകരൂപോ ബൃഹദ്രൂപഃ ശിപിവിഷ്ടഃ പ്രകാശനഃ ॥ 29 ॥ ഓജസ്തേജോദ്യുതിധരഃ പ്രകാശാത്മാ പ്രതാപനഃ । ഋദ്ദഃ സ്പഷ്ടാക്ഷരോ മന്ത്രശ്ചന്ദ്രാംശുർഭാസ്കരദ്യുതിഃ ॥ 30 ॥ അമൃതാംശൂദ്ഭവോ ഭാനുഃ ശശബിന്ദുഃ സുരേശ്വരഃ । ഔഷധം ജഗതഃ സേതുഃ സത്യധർമപരാക്രമഃ ॥ 31 ॥ ഭൂതഭവ്യഭവന്നാഥഃ പവനഃ പാവനോഽനലഃ । കാമഹാ കാമകൃത്കാന്തഃ കാമഃ കാമപ്രദഃ പ്രഭുഃ ॥ 32 ॥ യുഗാദി കൃദ്യുഗാവർതോ നൈകമായോ മഹാശനഃ । അദൃശ്യോ വ്യക്തരൂപശ്ച സഹസ്രജിദനന്തജിത് ॥ 33 ॥ ഇഷ്ടോഽവിശിഷ്ടഃ ശിഷ്ടേഷ്ടഃ ശിഖണ്ഡീ നഹുഷോ വൃഷഃ । ക്രോധഹാ ക്രോധകൃത്കർതാ വിശ്വബാഹുർമഹീധരഃ ॥ 34 ॥ അച്യുതഃ പ്രഥിതഃ പ്രാണഃ പ്രാണദോ വാസവാനുജഃ । അപാംനിധിരധിഷ്ഠാനമപ്രമത്തഃ പ്രതിഷ്ഠിതഃ ॥ 35 ॥ സ്കന്ദഃ സ്കന്ദധരോ ധുര്യോ വരദോ വായുവാഹനഃ । വാസുദേവോ ബൃഹദ്ഭാനുരാദിദേവഃ പുരന്ധരഃ ॥ 36 ॥ അശോകസ്താരണസ്താരഃ ശൂരഃ ശൗരിർജനേശ്വരഃ । അനുകൂലഃ ശതാവർതഃ പദ്മീ പദ്മനിഭേക്ഷണഃ ॥ 37 ॥ പദ്മനാഭോഽരവിന്ദാക്ഷഃ പദ്മഗർഭഃ ശരീരഭൃത് । മഹർധിരൃദ്ധോ വൃദ്ധാത്മാ മഹാക്ഷോ ഗരുഡധ്വജഃ ॥ 38 ॥ അതുലഃ ശരഭോ ഭീമഃ സമയജ്ഞോ ഹവിർഹരിഃ । സർവലക്ഷണലക്ഷണ്യോ ലക്ഷ്മീവാൻ സമിതിഞ്ജയഃ ॥ 39 ॥ വിക്ഷരോ രോഹിതോ മാർഗോ ഹേതുർദാമോദരഃ സഹഃ । മഹീധരോ മഹാഭാഗോ വേഗവാനമിതാശനഃ ॥ 40 ॥ ഉദ്ഭവഃ, ക്ഷോഭണോ ദേവഃ ശ്രീഗർഭഃ പരമേശ്വരഃ । കരണം കാരണം കർതാ വികർതാ ഗഹനോ ഗുഹഃ ॥ 41 ॥ വ്യവസായോ വ്യവസ്ഥാനഃ സംസ്ഥാനഃ സ്ഥാനദോ ധ്രുവഃ । പരർധിഃ പരമസ്പഷ്ടഃ തുഷ്ടഃ പുഷ്ടഃ ശുഭേക്ഷണഃ ॥ 42 ॥ രാമോ വിരാമോ വിരജോ മാർഗോനേയോ നയോഽനയഃ । വീരഃ ശക്തിമതാം ശ്രേഷ്ഠോ ധർമോധർമ വിദുത്തമഃ ॥ 43 ॥ വൈകുണ്ഠഃ പുരുഷഃ പ്രാണഃ പ്രാണദഃ പ്രണവഃ പൃഥുഃ । ഹിരണ്യഗർഭഃ ശത്രുഘ്നോ വ്യാപ്തോ വായുരധോക്ഷജഃ ॥ 44 ॥ ഋതുഃ സുദർശനഃ കാലഃ പരമേഷ്ഠീ പരിഗ്രഹഃ । ഉഗ്രഃ സംവത്സരോ ദക്ഷോ വിശ്രാമോ വിശ്വദക്ഷിണഃ ॥ 45 ॥ വിസ്താരഃ സ്ഥാവര സ്ഥാണുഃ പ്രമാണം ബീജമവ്യയം । അർഥോഽനർഥോ മഹാകോശോ മഹാഭോഗോ മഹാധനഃ ॥ 46 ॥ അനിർവിണ്ണഃ സ്ഥവിഷ്ഠോ ഭൂർധർമയൂപോ മഹാമഖഃ । നക്ഷത്രനേമിർനക്ഷത്രീ ക്ഷമഃ, ക്ഷാമഃ സമീഹനഃ ॥ 47 ॥ യജ്ഞ ഇജ്യോ മഹേജ്യശ്ച ക്രതുഃ സത്രം സതാംഗതിഃ । സർവദർശീ വിമുക്താത്മാ സർവജ്ഞോ ജ്ഞാനമുത്തമം ॥ 48 ॥ സുവ്രതഃ സുമുഖഃ സൂക്ഷ്മഃ സുഘോഷഃ സുഖദഃ സുഹൃത് । മനോഹരോ ജിതക്രോധോ വീര ബാഹുർവിദാരണഃ ॥ 49 ॥ സ്വാപനഃ സ്വവശോ വ്യാപീ നൈകാത്മാ നൈകകർമകൃത്। । വത്സരോ വത്സലോ വത്സീ രത്നഗർഭോ ധനേശ്വരഃ ॥ 50 ॥ ധർമഗുബ്ധർമകൃദ്ധർമീ സദസത്ക്ഷരമക്ഷരം॥ അവിജ്ഞാതാ സഹസ്ത്രാംശുർവിധാതാ കൃതലക്ഷണഃ ॥ 51 ॥ ഗഭസ്തിനേമിഃ സത്ത്വസ്ഥഃ സിംഹോ ഭൂത മഹേശ്വരഃ । ആദിദേവോ മഹാദേവോ ദേവേശോ ദേവഭൃദ്ഗുരുഃ ॥ 52 ॥ ഉത്തരോ ഗോപതിർഗോപ്താ ജ്ഞാനഗമ്യഃ പുരാതനഃ । ശരീര ഭൂതഭൃദ് ഭോക്താ കപീന്ദ്രോ ഭൂരിദക്ഷിണഃ ॥ 53 ॥ സോമപോഽമൃതപഃ സോമഃ പുരുജിത് പുരുസത്തമഃ । വിനയോ ജയഃ സത്യസന്ധോ ദാശാർഹഃ സാത്വതാം പതിഃ ॥ 54 ॥ ജീവോ വിനയിതാ സാക്ഷീ മുകുന്ദോഽമിത വിക്രമഃ । അംഭോനിധിരനന്താത്മാ മഹോദധി ശയോന്തകഃ ॥ 55 ॥ അജോ മഹാർഹഃ സ്വാഭാവ്യോ ജിതാമിത്രഃ പ്രമോദനഃ । ആനന്ദോഽനന്ദനോനന്ദഃ സത്യധർമാ ത്രിവിക്രമഃ ॥ 56 ॥ മഹർഷിഃ കപിലാചാര്യഃ കൃതജ്ഞോ മേദിനീപതിഃ । ത്രിപദസ്ത്രിദശാധ്യക്ഷോ മഹാശൃംഗഃ കൃതാന്തകൃത് ॥ 57 ॥ മഹാവരാഹോ ഗോവിന്ദഃ സുഷേണഃ കനകാംഗദീ । ഗുഹ്യോ ഗഭീരോ ഗഹനോ ഗുപ്തശ്ചക്ര ഗദാധരഃ ॥ 58 ॥ വേധാഃ സ്വാംഗോഽജിതഃ കൃഷ്ണോ ദൃഢഃ സങ്കർഷണോഽച്യുതഃ । വരുണോ വാരുണോ വൃക്ഷഃ പുഷ്കരാക്ഷോ മഹാമനാഃ ॥ 59 ॥ ഭഗവാൻ ഭഗഹാഽഽനന്ദീ വനമാലീ ഹലായുധഃ । ആദിത്യോ ജ്യോതിരാദിത്യഃ സഹിഷ്ണുർഗതിസത്തമഃ ॥ 60 ॥ സുധന്വാ ഖണ്ഡപരശുർദാരുണോ ദ്രവിണപ്രദഃ । ദിവഃസ്പൃക് സർവദൃഗ്വ്യാസോ വാചസ്പതിരയോനിജഃ ॥ 61 ॥ ത്രിസാമാ സാമഗഃ സാമ നിർവാണം ഭേഷജം ഭിഷക് । സന്യാസകൃച്ഛമഃ ശാന്തോ നിഷ്ഠാ ശാന്തിഃ പരായണം। 62 ॥ ശുഭാംഗഃ ശാന്തിദഃ സ്രഷ്ടാ കുമുദഃ കുവലേശയഃ । ഗോഹിതോ ഗോപതിർഗോപ്താ വൃഷഭാക്ഷോ വൃഷപ്രിയഃ ॥ 63 ॥ അനിവർതീ നിവൃത്താത്മാ സങ്ക്ഷേപ്താ ക്ഷേമകൃച്ഛിവഃ । ശ്രീവത്സവക്ഷാഃ ശ്രീവാസഃ ശ്രീപതിഃ ശ്രീമതാംവരഃ ॥ 64 ॥ ശ്രീദഃ ശ്രീശഃ ശ്രീനിവാസഃ ശ്രീനിധിഃ ശ്രീവിഭാവനഃ । ശ്രീധരഃ ശ്രീകരഃ ശ്രേയഃ ശ്രീമാഁല്ലോകത്രയാശ്രയഃ ॥ 65 ॥ സ്വക്ഷഃ സ്വംഗഃ ശതാനന്ദോ നന്ദിർജ്യോതിർഗണേശ്വരഃ । വിജിതാത്മാഽവിധേയാത്മാ സത്കീർതിച്ഛിന്നസംശയഃ ॥ 66 ॥ ഉദീർണഃ സർവതശ്ചക്ഷുരനീശഃ ശാശ്വതസ്ഥിരഃ । ഭൂശയോ ഭൂഷണോ ഭൂതിർവിശോകഃ ശോകനാശനഃ ॥ 67 ॥ അർചിഷ്മാനർചിതഃ കുംഭോ വിശുദ്ധാത്മാ വിശോധനഃ । അനിരുദ്ധോഽപ്രതിരഥഃ പ്രദ്യുമ്നോഽമിതവിക്രമഃ ॥ 68 ॥ കാലനേമിനിഹാ വീരഃ ശൗരിഃ ശൂരജനേശ്വരഃ । ത്രിലോകാത്മാ ത്രിലോകേശഃ കേശവഃ കേശിഹാ ഹരിഃ ॥ 69 ॥ കാമദേവഃ കാമപാലഃ കാമീ കാന്തഃ കൃതാഗമഃ । അനിർദേശ്യവപുർവിഷ്ണുർവീരോഽനന്തോ ധനഞ്ജയഃ ॥ 70 ॥ ബ്രഹ്മണ്യോ ബ്രഹ്മകൃദ് ബ്രഹ്മാ ബ്രഹ്മ ബ്രഹ്മവിവർധനഃ । ബ്രഹ്മവിദ് ബ്രാഹ്മണോ ബ്രഹ്മീ ബ്രഹ്മജ്ഞോ ബ്രാഹ്മണപ്രിയഃ ॥ 71 ॥ മഹാക്രമോ മഹാകർമാ മഹാതേജാ മഹോരഗഃ । മഹാക്രതുർമഹായജ്വാ മഹായജ്ഞോ മഹാഹവിഃ ॥ 72 ॥ സ്തവ്യഃ സ്തവപ്രിയഃ സ്തോത്രം സ്തുതിഃ സ്തോതാ രണപ്രിയഃ । പൂർണഃ പൂരയിതാ പുണ്യഃ പുണ്യകീർതിരനാമയഃ ॥ 73 ॥ മനോജവസ്തീർഥകരോ വസുരേതാ വസുപ്രദഃ । വസുപ്രദോ വാസുദേവോ വസുർവസുമനാ ഹവിഃ ॥ 74 ॥ സദ്ഗതിഃ സത്കൃതിഃ സത്താ സദ്ഭൂതിഃ സത്പരായണഃ । ശൂരസേനോ യദുശ്രേഷ്ഠഃ സന്നിവാസഃ സുയാമുനഃ ॥ 75 ॥ ഭൂതാവാസോ വാസുദേവഃ സർവാസുനിലയോഽനലഃ । ദർപഹാ ദർപദോ ദൃപ്തോ ദുർധരോഽഥാപരാജിതഃ ॥ 76 ॥ വിശ്വമൂർതിർമഹാമൂർതിർദീപ്തമൂർതിരമൂർതിമാൻ । അനേകമൂർതിരവ്യക്തഃ ശതമൂർതിഃ ശതാനനഃ ॥ 77 ॥ ഏകോ നൈകഃ സ്തവഃ കഃ കിം യത്തത് പദമനുത്തമം । ലോകബന്ധുർലോകനാഥോ മാധവോ ഭക്തവത്സലഃ ॥ 78 ॥ സുവർണവർണോ ഹേമാംഗോ വരാംഗശ്ചന്ദനാംഗദീ । വീരഹാ വിഷമഃ ശൂന്യോ ഘൃതാശീരചലശ്ചലഃ ॥ 79 ॥ അമാനീ മാനദോ മാന്യോ ലോകസ്വാമീ ത്രിലോകധൃത് । സുമേധാ മേധജോ ധന്യഃ സത്യമേധാ ധരാധരഃ ॥ 80 ॥ തേജോഽവൃഷോ ദ്യുതിധരഃ സർവശസ്ത്രഭൃതാംവരഃ । പ്രഗ്രഹോ നിഗ്രഹോ വ്യഗ്രോ നൈകശൃംഗോ ഗദാഗ്രജഃ ॥ 81 ॥ ചതുർമൂർതി ശ്ചതുർബാഹു ശ്ചതുർവ്യൂഹ ശ്ചതുർഗതിഃ । ചതുരാത്മാ ചതുർഭാവശ്ചതുർവേദവിദേകപാത് ॥ 82 ॥ സമാവർതോഽനിവൃത്താത്മാ ദുർജയോ ദുരതിക്രമഃ । ദുർലഭോ ദുർഗമോ ദുർഗോ ദുരാവാസോ ദുരാരിഹാ ॥ 83 ॥ ശുഭാംഗോ ലോകസാരംഗഃ സുതന്തുസ്തന്തുവർധനഃ । ഇന്ദ്രകർമാ മഹാകർമാ കൃതകർമാ കൃതാഗമഃ ॥ 84 ॥ ഉദ്ഭവഃ സുന്ദരഃ സുന്ദോ രത്നനാഭഃ സുലോചനഃ । അർകോ വാജസനഃ ശൃംഗീ ജയന്തഃ സർവവിജ്ജയീ ॥ 85 ॥ സുവർണബിന്ദുരക്ഷോഭ്യഃ സർവവാഗീശ്വരേശ്വരഃ । മഹാഹൃദോ മഹാഗർതോ മഹാഭൂതോ മഹാനിധിഃ ॥ 86 ॥ കുമുദഃ കുന്ദരഃ കുന്ദഃ പർജന്യഃ പാവനോഽനിലഃ । അമൃതാശോഽമൃതവപുഃ സർവജ്ഞഃ സർവതോമുഖഃ ॥ 87 ॥ സുലഭഃ സുവ്രതഃ സിദ്ധഃ ശത്രുജിച്ഛത്രുതാപനഃ । ന്യഗ്രോധോഽദുംബരോഽശ്വത്ഥശ്ചാണൂരാന്ധ്ര നിഷൂദനഃ ॥ 88 ॥ സഹസ്രാർചിഃ സപ്തജിഹ്വഃ സപ്തൈധാഃ സപ്തവാഹനഃ । അമൂർതിരനഘോഽചിന്ത്യോ ഭയകൃദ്ഭയനാശനഃ ॥ 89 ॥ അണുർബൃഹത്കൃശഃ സ്ഥൂലോ ഗുണഭൃന്നിർഗുണോ മഹാൻ । അധൃതഃ സ്വധൃതഃ സ്വാസ്യഃ പ്രാഗ്വംശോ വംശവർധനഃ ॥ 90 ॥ ഭാരഭൃത് കഥിതോ യോഗീ യോഗീശഃ സർവകാമദഃ । ആശ്രമഃ ശ്രമണഃ, ക്ഷാമഃ സുപർണോ വായുവാഹനഃ ॥ 91 ॥ ധനുർധരോ ധനുർവേദോ ദണ്ഡോ ദമയിതാ ദമഃ । അപരാജിതഃ സർവസഹോ നിയന്താഽനിയമോഽയമഃ ॥ 92 ॥ സത്ത്വവാൻ സാത്ത്വികഃ സത്യഃ സത്യധർമപരായണഃ । അഭിപ്രായഃ പ്രിയാർഹോഽർഹഃ പ്രിയകൃത് പ്രീതിവർധനഃ ॥ 93 ॥ വിഹായസഗതിർജ്യോതിഃ സുരുചിർഹുതഭുഗ്വിഭുഃ । രവിർവിരോചനഃ സൂര്യഃ സവിതാ രവിലോചനഃ ॥ 94 ॥ അനന്തോ ഹുതഭുഗ്ഭോക്താ സുഖദോ നൈകജോഽഗ്രജഃ । അനിർവിണ്ണഃ സദാമർഷീ ലോകധിഷ്ഠാനമദ്ഭുതഃ ॥ 95 ॥ സനാത്സനാതനതമഃ കപിലഃ കപിരവ്യയഃ । സ്വസ്തിദഃ സ്വസ്തികൃത്സ്വസ്തിഃ സ്വസ്തിഭുക് സ്വസ്തിദക്ഷിണഃ ॥ 96 ॥ അരൗദ്രഃ കുണ്ഡലീ ചക്രീ വിക്രമ്യൂർജിതശാസനഃ । ശബ്ദാതിഗഃ ശബ്ദസഹഃ ശിശിരഃ ശർവരീകരഃ ॥ 97 ॥ അക്രൂരഃ പേശലോ ദക്ഷോ ദക്ഷിണഃ, ക്ഷമിണാംവരഃ । വിദ്വത്തമോ വീതഭയഃ പുണ്യശ്രവണകീർതനഃ ॥ 98 ॥ ഉത്താരണോ ദുഷ്കൃതിഹാ പുണ്യോ ദുഃസ്വപ്നനാശനഃ । വീരഹാ രക്ഷണഃ സന്തോ ജീവനഃ പര്യവസ്ഥിതഃ ॥ 99 ॥ അനന്തരൂപോഽനന്ത ശ്രീർജിതമന്യുർഭയാപഹഃ । ചതുരശ്രോ ഗഭീരാത്മാ വിദിശോ വ്യാദിശോ ദിശഃ ॥ 100 ॥ അനാദിർഭൂർഭുവോ ലക്ഷ്മീഃ സുവീരോ രുചിരാംഗദഃ । ജനനോ ജനജന്മാദിർഭീമോ ഭീമപരാക്രമഃ ॥ 101 ॥ ആധാരനിലയോഽധാതാ പുഷ്പഹാസഃ പ്രജാഗരഃ । ഊർധ്വഗഃ സത്പഥാചാരഃ പ്രാണദഃ പ്രണവഃ പണഃ ॥ 102 ॥ പ്രമാണം പ്രാണനിലയഃ പ്രാണഭൃത് പ്രാണജീവനഃ । തത്ത്വം തത്ത്വവിദേകാത്മാ ജന്മമൃത്യുജരാതിഗഃ ॥ 103 ॥ ഭൂർഭുവഃ സ്വസ്തരുസ്താരഃ സവിതാ പ്രപിതാമഹഃ । യജ്ഞോ യജ്ഞപതിര്യജ്വാ യജ്ഞാംഗോ യജ്ഞവാഹനഃ ॥ 104 ॥ യജ്ഞഭൃദ് യജ്ഞകൃദ് യജ്ഞീ യജ്ഞഭുക് യജ്ഞസാധനഃ । യജ്ഞാന്തകൃദ് യജ്ഞഗുഹ്യമന്നമന്നാദ ഏവ ച ॥ 105 ॥ ആത്മയോനിഃ സ്വയഞ്ജാതോ വൈഖാനഃ സാമഗായനഃ । ദേവകീനന്ദനഃ സ്രഷ്ടാ ക്ഷിതീശഃ പാപനാശനഃ ॥ 106 ॥ ശംഖഭൃന്നന്ദകീ ചക്രീ ശാർ​ങ്ഗധന്വാ ഗദാധരഃ । രഥാംഗപാണിരക്ഷോഭ്യഃ സർവപ്രഹരണായുധഃ ॥ 107 ॥ ശ്രീ സർവപ്രഹരണായുധ ഓം നമ ഇതി । വനമാലീ ഗദീ ശാർ​ങ്ഗീ ശംഖീ ചക്രീ ച നന്ദകീ । ശ്രീമാന്നാരായണോ വിഷ്ണുർവാസുദേവോഽഭിരക്ഷതു ॥ 108 ॥ ശ്രീ വാസുദേവോഽഭിരക്ഷതു ഓം നമ ഇതി । ഉത്തര പീഠികാ ॥ ഇതീദം കീർതനീയസ്യ കേശവസ്യ മഹാത്മനഃ । നാമ്നാം സഹസ്രം ദിവ്യാനാമശേഷേണ പ്രകീർതിതം। ॥ 1 ॥ യ ഇദം ശൃണുയാന്നിത്യം യശ്ചാപി പരികീർതയേത്॥ നാശുഭം പ്രാപ്നുയാത് കിഞ്ചിത്സോഽമുത്രേഹ ച മാനവഃ ॥ 2 ॥ വേദാന്തഗോ ബ്രാഹ്മണഃ സ്യാത് ക്ഷത്രിയോ വിജയീ ഭവേത് । വൈശ്യോ ധനസമൃദ്ധഃ സ്യാത് ശൂദ്രഃ സുഖമവാപ്നുയാത് ॥ 3 ॥ ധർമാർഥീ പ്രാപ്നുയാദ്ധർമമർഥാർഥീ ചാർഥമാപ്നുയാത് । കാമാനവാപ്നുയാത് കാമീ പ്രജാർഥീ പ്രാപ്നുയാത്പ്രജാം। ॥ 4 ॥ ഭക്തിമാൻ യഃ സദോത്ഥായ ശുചിസ്തദ്ഗതമാനസഃ । സഹസ്രം വാസുദേവസ്യ നാമ്നാമേതത് പ്രകീർതയേത് ॥ 5 ॥ യശഃ പ്രാപ്നോതി വിപുലം യാതിപ്രാധാന്യമേവ ച । അചലാം ശ്രിയമാപ്നോതി ശ്രേയഃ പ്രാപ്നോത്യനുത്തമം। ॥ 6 ॥ ന ഭയം ക്വചിദാപ്നോതി വീര്യം തേജശ്ച വിന്ദതി । ഭവത്യരോഗോ ദ്യുതിമാൻ ബലരൂപ ഗുണാന്വിതഃ ॥ 7 ॥ രോഗാർതോ മുച്യതേ രോഗാദ്ബദ്ധോ മുച്യേത ബന്ധനാത് । ഭയാന്മുച്യേത ഭീതസ്തു മുച്യേതാപന്ന ആപദഃ ॥ 8 ॥ ദുർഗാണ്യതിതരത്യാശു പുരുഷഃ പുരുഷോത്തമം । സ്തുവന്നാമസഹസ്രേണ നിത്യം ഭക്തിസമന്വിതഃ ॥ 9 ॥ വാസുദേവാശ്രയോ മർത്യോ വാസുദേവപരായണഃ । സർവപാപവിശുദ്ധാത്മാ യാതി ബ്രഹ്മ സനാതനം। ॥ 10 ॥ ന വാസുദേവ ഭക്താനാമശുഭം വിദ്യതേ ക്വചിത് । ജന്മമൃത്യുജരാവ്യാധിഭയം നൈവോപജായതേ ॥ 11 ॥ ഇമം സ്തവമധീയാനഃ ശ്രദ്ധാഭക്തിസമന്വിതഃ । യുജ്യേതാത്മ സുഖക്ഷാന്തി ശ്രീധൃതി സ്മൃതി കീർതിഭിഃ ॥ 12 ॥ ന ക്രോധോ ന ച മാത്സര്യം ന ലോഭോ നാശുഭാമതിഃ । ഭവന്തി കൃതപുണ്യാനാം ഭക്താനാം പുരുഷോത്തമേ ॥ 13 ॥ ദ്യൗഃ സചന്ദ്രാർകനക്ഷത്രാ ഖം ദിശോ ഭൂർമഹോദധിഃ । വാസുദേവസ്യ വീര്യേണ വിധൃതാനി മഹാത്മനഃ ॥ 14 ॥ സസുരാസുരഗന്ധർവം സയക്ഷോരഗരാക്ഷസം । ജഗദ്വശേ വർതതേദം കൃഷ്ണസ്യ സ ചരാചരം। ॥ 15 ॥ ഇന്ദ്രിയാണി മനോബുദ്ധിഃ സത്ത്വം തേജോ ബലം ധൃതിഃ । വാസുദേവാത്മകാന്യാഹുഃ, ക്ഷേത്രം ക്ഷേത്രജ്ഞ ഏവ ച ॥ 16 ॥ സർവാഗമാനാമാചാരഃ പ്രഥമം പരികല്പതേ । ആചാരപ്രഭവോ ധർമോ ധർമസ്യ പ്രഭുരച്യുതഃ ॥ 17 ॥ ഋഷയഃ പിതരോ ദേവാ മഹാഭൂതാനി ധാതവഃ । ജംഗമാജംഗമം ചേദം ജഗന്നാരായണോദ്ഭവം ॥ 18 ॥ യോഗോജ്ഞാനം തഥാ സാംഖ്യം വിദ്യാഃ ശില്പാദികർമ ച । വേദാഃ ശാസ്ത്രാണി വിജ്ഞാനമേതത്സർവം ജനാർദനാത് ॥ 19 ॥ ഏകോ വിഷ്ണുർമഹദ്ഭൂതം പൃഥഗ്ഭൂതാന്യനേകശഃ । ത്രീംലോകാന്വ്യാപ്യ ഭൂതാത്മാ ഭുങ്ക്തേ വിശ്വഭുഗവ്യയഃ ॥ 20 ॥ ഇമം സ്തവം ഭഗവതോ വിഷ്ണോർവ്യാസേന കീർതിതം । പഠേദ്യ ഇച്ചേത്പുരുഷഃ ശ്രേയഃ പ്രാപ്തും സുഖാനി ച ॥ 21 ॥ വിശ്വേശ്വരമജം ദേവം ജഗതഃ പ്രഭുമവ്യയം। ഭജന്തി യേ പുഷ്കരാക്ഷം ന തേ യാന്തി പരാഭവം ॥ 22 ॥ ന തേ യാന്തി പരാഭവം ഓം നമ ഇതി । അർജുന ഉവാച – പദ്മപത്ര വിശാലാക്ഷ പദ്മനാഭ സുരോത്തമ । ഭക്താനാ മനുരക്താനാം ത്രാതാ ഭവ ജനാർദന ॥ 23 ॥ ശ്രീഭഗവാനുവാച – യോ മാം നാമസഹസ്രേണ സ്തോതുമിച്ഛതി പാണ്ഡവ । സോഽഹമേകേന ശ്ലോകേന സ്തുത ഏവ ന സംശയഃ ॥ 24 ॥ സ്തുത ഏവ ന സംശയ ഓം നമ ഇതി । വ്യാസ ഉവാച – വാസനാദ്വാസുദേവസ്യ വാസിതം ഭുവനത്രയം । സർവഭൂതനിവാസോഽസി വാസുദേവ നമോഽസ്തു തേ ॥ 25 ॥ ശ്രീവാസുദേവ നമോസ്തുത ഓം നമ ഇതി । പാർവത്യുവാച – കേനോപായേന ലഘുനാ വിഷ്ണോർനാമസഹസ്രകം । പഠ്യതേ പണ്ഡിതൈർനിത്യം ശ്രോതുമിച്ഛാമ്യഹം പ്രഭോ ॥ 26 ॥ ഈശ്വര ഉവാച – ശ്രീരാമ രാമ രാമേതി രമേ രാമേ മനോരമേ । സഹസ്രനാമ തത്തുല്യം രാമനാമ വരാനനേ ॥ 27 ॥ ശ്രീരാമ നാമ വരാനന ഓം നമ ഇതി । ബ്രഹ്മോവാച – നമോഽസ്ത്വനന്തായ സഹസ്രമൂർതയേ സഹസ്രപാദാക്ഷിശിരോരുബാഹവേ । സഹസ്രനാമ്നേ പുരുഷായ ശാശ്വതേ സഹസ്രകോടീ യുഗധാരിണേ നമഃ ॥ 28 ॥ ശ്രീ സഹസ്രകോടീ യുഗധാരിണേ നമ ഓം നമ ഇതി । സഞ്ജയ ഉവാച – യത്ര യോഗേശ്വരഃ കൃഷ്ണോ യത്ര പാർഥോ ധനുർധരഃ । തത്ര ശ്രീർവിജയോ ഭൂതിർധ്രുവാ നീതിർമതിർമമ ॥ 29 ॥ ശ്രീ ഭഗവാൻ ഉവാച – അനന്യാശ്ചിന്തയന്തോ മാം യേ ജനാഃ പര്യുപാസതേ । തേഷാം നിത്യാഭിയുക്താനാം യോഗക്ഷേമം വഹാമ്യഹം। ॥ 30 ॥ പരിത്രാണായ സാധൂനാം വിനാശായ ച ദുഷ്കൃതാം। । ധർമസംസ്ഥാപനാർഥായ സംഭവാമി യുഗേ യുഗേ ॥ 31 ॥ ആർതാഃ വിഷണ്ണാഃ ശിഥിലാശ്ച ഭീതാഃ ഘോരേഷു ച വ്യാധിഷു വർതമാനാഃ । സങ്കീർത്യ നാരായണശബ്ദമാത്രം വിമുക്തദുഃഖാഃ സുഖിനോ ഭവന്തി ॥ 32 ॥ കായേന വാചാ മനസേന്ദ്രിയൈർവാ ബുദ്ധ്യാത്മനാ വാ പ്രകൃതേഃ സ്വഭാവാത് । കരോമി യദ്യത്സകലം പരസ്മൈ നാരായണായേതി സമർപയാമി ॥ 33 ॥ യദക്ഷര പദഭ്രഷ്ടം മാത്രാഹീനം തു യദ്ഭവേത് തഥ്സർവം ക്ഷമ്യതാം ദേവ നാരായണ നമോഽസ്തു തേ । വിസർഗ ബിന്ദു മാത്രാണി പദപാദാക്ഷരാണി ച ന്യൂനാനി ചാതിരിക്താനി ക്ഷമസ്വ പുരുഷോത്തമഃ ॥ ഇതി ശ്രീ മഹാഭാരതേ ശതസാഹസ്രികായാം സംഹിതായാം വൈയാസിക്യാമനുശാസന പർവാന്തർഗത ആനുശാസനിക പർവണി, മോക്ഷധർമേ ഭീഷ്മ യുധിഷ്ഠിര സംവാദേ ശ്രീ വിഷ്ണോർദിവ്യ സഹസ്രനാമ സ്തോത്രം നാമൈകോന പഞ്ച ശതാധിക ശതതമോധ്യായഃ ॥ ശ്രീ വിഷ്ണു സഹസ്രനാമ സ്തോത്രം സമാപ്തം ॥ ഓം തത്സത് സർവം ശ്രീ കൃഷ്ണാർപണമസ്തു ॥