ధ్యానం – శాంతాకారం భుజగశయనం పద్మనాభం సురేశం విశ్వాకారం గగనసదృశం మేఘవర్ణం శుభాంగం । లక్ష్మీకాంతం కమలనయనం యోగిహృద్ధ్యానగమ్యం వందే విష్ణుం భవభయహరం సర్వలోకైకనాథం ॥ కవచం – ఓం । పూర్వతో మాం హరిః పాతు పశ్చాచ్చక్రీ చ దక్షిణే । కృష్ణ ఉత్తరతః పాతు శ్రీశో విష్ణుశ్చ సర్వతః ॥ 1 ॥ ఊర్ధ్వమానందకృత్ పాతు అధస్తాచ్ఛార్ఙ్గభృత్ సదా । పాదౌ పాతు సరోజాంఘ్రిః జంఘే పాతు జనార్దనః ॥ 2 ॥ జానునీ మే జగన్నాథః ఊరూ పాతు త్రివిక్రమః । గుహ్యం పాతు హృషీకేశః పృష్ఠం పాతు మమావ్యయః ॥ 3 ॥ పాతు నాభిం మమానంతః కుక్షిం రాక్షసమర్దనః । దామోదరో మే హృదయం వక్షః పాతు నృకేసరీ ॥ 4 ॥ కరౌ మే కాలియారాతిః భుజౌ భక్తార్తిభంజనః । కంఠం కాలాంబుదశ్యామః స్కంధౌ మే కంసమర్దనః ॥ 5 ॥ నారాయణోఽవ్యాన్నాసాం మే కర్ణౌ కేశిప్రభంజనః । కపోలే పాతు వైకుంఠో జిహ్వాం పాతు దయానిధిః ॥ 6 ॥ ఆస్యం దశాస్యహంతాఽవ్యాన్నేత్రే మే హరిలోచనః । భ్రువౌ మే పాతు భూమీశో లలాటం మే సదాఽచ్యుతః ॥ 7 ॥ ముఖం మే పాతు గోవిందః శిరో గరుడవాహనః । మాం శేషశాయీ సర్వేభ్యో వ్యాధిభ్యో భక్తవత్సలః ॥ 8 ॥ పిశాచాగ్ని జలేభ్యో మామాపద్భ్యో పాతు వామనః । సర్వేభ్యో దురితేభ్యశ్చ పాతు మాం పురుషోత్తమః ॥ 9 ॥ ఇదం శ్రీవిష్ణుకవచం సర్వమంగలదాయకం । సర్వరోగప్రశమనం సర్వశత్రువినాశనం ॥ 10 ॥ ఇతి శ్రీ విష్ణు కవచం ।