గజేంద్ర మోక్ష స్తోత్ర

శ్రీశుక ఉవాచ ఏవం వ్యవసితో బుద్ధ్యా సమాధాయ మనోహృది । జజాప పరమం జాప్యం ప్రాగ్జన్మన్యనుశిక్షితం ॥ 1॥ గజేంద్ర ఉవాచ నమో భగవతే తస్మై యత ఏతచ్చిదాత్మకం । పురుషాయాదిబీజాయ పరేశాయాభిధీమహి ॥ 2॥ యస్మిన్నిదం యతశ్చేదం యేనేదం య ఇదం స్వయం । యోఽస్మాత్పరస్మాచ్చ పరస్తం ప్రపద్యే స్వయంభువం ॥ 3॥ యః స్వాత్మనీదం నిజమాయయార్పితం క్వచిద్విభాతం క్వ చ తత్తిరోహితం । అవిద్ధదృక్ సాక్ష్యుభయం తదీక్షతే స ఆత్మమూలోఽవతు మాం పరాత్పరః ॥ 4॥ కాలేన పంచత్వమితేషు కృత్స్నశో లోకేషు పాలేషు చ సర్వహేతుషు । తమస్తదాఽఽసీద్గహనం గభీరం యస్తస్య పారేఽభివిరాజతే విభుః ॥ 5॥ న యస్యదేవా ఋషయఃపదం విదు- ర్జంతుః పునః కోఽర్హతి గంతుమీరితుం । యథా నటస్యాకృతిభిర్విచేష్టతో దురత్యయానుక్రమణః స మావతు ॥ 6॥ దిదృక్షవో యస్య పదం సుమంగలం విముక్త సంగా మునయః సుసాధవః । చరంత్యలోకవ్రతమవ్రణం వనే భూతాత్మభూతాః సుహృదః స మే గతిః ॥ 7॥ న విద్యతే యస్య చ జన్మ కర్మ వా న నామరూపే గుణదోష ఏవ వా । తథాపి లోకాప్యయసంభవాయ యః స్వమాయయా తాన్యనుకాలమృచ్ఛతి ॥ 8॥ తస్మై నమః పరేశాయ బ్రహ్మణేఽనంతశక్తయే । అరూపాయోరురూపాయ నమ ఆశ్చర్యకర్మణే ॥ 9॥ నమ ఆత్మప్రదీపాయ సాక్షిణే పరమాత్మనే । నమో గిరాం విదూరాయ మనసశ్చేతసామపి ॥ 10॥ సత్త్వేన ప్రతిలభ్యాయ నైష్కర్మ్యేణ విపశ్చితా । నమః కైవల్యనాథాయ నిర్వాణసుఖసంవిదే ॥ 11॥ నమః శాంతాయ ఘోరాయ మూఢాయ గుణధర్మిణే । నిర్విశేషాయ సామ్యాయ నమో జ్ఞానఘనాయ చ ॥ 12॥ క్షేత్రజ్ఞాయ నమస్తుభ్యం సర్వాధ్యక్షాయ సాక్షిణే । పురుషాయాత్మమూలాయ మూలప్రకృతయే నమః ॥ 13॥ సర్వేంద్రియగుణదృష్టే సర్వ ప్రత్యయ హేతవే । అసతాచ్ఛాయయోక్తాయ సదాభాసాయ తే నమః ॥ 14॥ నమో నమస్తేఽఖిలకారణాయ నిష్కారణాయాద్భుతకారణాయ । సర్వాగమామ్నాయమహార్ణవాయ నమోఽపవర్గాయ పరాయణాయ ॥ 15॥ గుణారణిచ్ఛన్నచిదూష్మపాయ తత్క్షోభవిస్ఫూర్జితమానసాయ । నైష్కర్మ్యభావేన వివర్జితాగమ- స్వయంప్రకాశాయ నమస్కరోమి ॥ 16॥ మాదృక్ప్రపన్నపశుపాశవిమోక్షణాయ ముక్తాయ భూరికరుణాయ నమోఽలయాయ ॥ స్వాంశేన సర్వతనుభృన్మనసి ప్రతీత- ప్రత్యగ్దృశే భగవతే బృహతే నమస్తే ॥ 17॥ ఆత్మాఽఽత్మజాప్తగృహవిత్తజనేషు సక్తై- ర్దుష్ప్రాపణాయ గుణసంగవివర్జితాయ । ముక్తాత్మభిః స్వహృదయే పరిభావితాయ జ్ఞానాత్మనే భగవతే నమ ఈశ్వరాయ ॥ 18॥ యం ధర్మకామార్థవిముక్తికామా భజంత ఇష్టాం గతిమాప్నువంతి । కిం త్వాశిషో రాత్యపి దేహమవ్యయం కరోతు మేఽదభ్రదయో విమోక్షణం ॥ 19॥ ఏకాంతినో యస్య న కంచనార్థం వాంఛంతి యే వై భగవత్ప్రపన్నాః । అత్యద్భుతం తచ్చరితం సుమంగలం గాయంత ఆనందసముద్రమగ్నాః ॥ 20॥ తమక్షరంబ్రహ్మ పరం పరేశ- మవ్యక్తమాధ్యాత్మికయోగగమ్యం । అతీంద్రియం సూక్ష్మమివాతిదూర- మనంతమాద్యం పరిపూర్ణమీడే ॥ 21॥ యస్య బ్రహ్మాదయో దేవా వేదా లోకాశ్చరాచరాః । నామరూపవిభేదేన ఫల్గ్వ్యా చ కలయా కృతాః ॥ 22॥ యథార్చిషోఽగ్నేః సవితుర్గభస్తయో నిర్యాంతి సంయాంత్యసకృత్స్వరోచిషః । తథా యతోఽయం గుణసంప్రవాహో బుద్ధిర్మనః ఖాని శరీరసర్గాః ॥ 23॥ స వై న దేవాసురమర్త్యతిర్యఙ్ న స్త్రీ న షండో న పుమాన్న జంతుః । నాయం గుణః కర్మ న సన్న చాసన్ నిషేధశేషో జయతాదశేషః ॥ 24॥ జిజీవిషే నాహమిహాముయా కి- మంతర్బహిశ్చావృతయేభయోన్యా । ఇచ్ఛామి కాలేన న యస్య విప్లవ- స్తస్యాత్మలోకావరణస్య మోక్షం ॥ 25॥ సోఽహం విశ్వసృజం విశ్వమవిశ్వం విశ్వవేదసం । విశ్వాత్మానమజం బ్రహ్మ ప్రణతోఽస్మి పరం పదం ॥ 26॥ యోగరంధితకర్మాణో హృది యోగవిభావితే । యోగినో యం ప్రపశ్యంతి యోగేశం తం నతోఽస్మ్యహం ॥ 27॥ నమో నమస్తుభ్యమసహ్య వేగ- శక్తిత్రయాయాఖిలధీగుణాయ । ప్రపన్నపాలాయ దురంతశక్తయే కదింద్రియాణామనవాప్యవర్త్మనే ॥ 28॥ నాయం వేద స్వమాత్మానం యచ్ఛక్త్యాహంధియా హతం । తం దురత్యయమాహాత్మ్యం భగవంతమితోఽస్మ్యహం ॥ 29॥ శ్రీశుక ఉవాచ ఏవం గజేంద్రముపవర్ణితనిర్విశేషం బ్రహ్మాదయో వివిధలింగభిదాభిమానాః । నైతే యదోపససృపుర్నిఖిలాత్మకత్వాత్ తత్రాఖిలామరమయో హరిరావిరాసీత్ ॥ 30॥ తం తద్వదార్త్తముపలభ్య జగన్నివాసః స్తోత్రం నిశమ్య దివిజైః సహ సంస్తువభిః । ఛందోమయేన గరుడేన సముహ్యమాన- శ్చక్రాయుధోఽభ్యగమదాశు యతో గజేంద్రః ॥ 31॥ సోఽన్తస్సరస్యురుబలేన గృహీత ఆర్త్తో దృష్ట్వా గరుత్మతి హరిం ఖ ఉపాత్తచక్రం । ఉత్క్షిప్య సాంబుజకరం గిరమాహ కృచ్ఛ్రా- న్నారాయణాఖిలగురో భగవన్ నమస్తే ॥ 32॥ తం వీక్ష్య పీడితమజః సహసావతీర్య సగ్రాహమాశు సరసః కృపయోజ్జహార । గ్రాహాద్విపాటితముఖాదరిణా గజేంద్రం సంపశ్యతాం హరిరమూముచదుస్త్రియాణాం ॥ 33॥ ఇతి శ్రీమద్భాగవతే మహాపురరాణే సంహితాయామష్టస్కంధే శ్రీగజేంద్రమోక్షణం నామ తృతీయోఽధ్యాయః ॥

Recite with devotion and pure heart

Regular practice brings spiritual benefits