വാരാഹീ നിഗ്രഹാഷ്ടകം

ദേവി ക്രോഡമുഖി ത്വദംഘ്രികമലദ്വന്ദ്വാനുരക്താത്മനേ

മഹ്യം ദ്രുഹ്യതി യോ മഹേശി മനസാ കായേന വാചാ നരഃ ।

തസ്യാശു ത്വദയോഗ്രനിഷ്ഠുരഹലാഘാതപ്രഭൂതവ്യഥാ-

-പര്യസ്യന്മനസോ ഭവന്തു വപുഷഃ പ്രാണാഃ പ്രയാണോന്മുഖാഃ ॥ 1 ॥

ദേവി ത്വത്പദപദ്മഭക്തിവിഭവപ്രക്ഷീണദുഷ്കർമണി

പ്രാദുർഭൂതനൃശംസഭാവമലിനാം വൃത്തിം വിധത്തേ മയി ।

യോ ദേഹീ ഭുവനേ തദീയഹൃദയാന്നിർഗത്വരൈർലോഹിതൈഃ

സദ്യഃ പൂരയസേ കരാബ്ജചഷകം വാഞ്ഛാഫലൈർമാമപി ॥ 2 ॥

ചണ്ഡോത്തുണ്ഡവിദീർണദംഷ്ട്രഹൃദയപ്രോദ്ഭിന്നരക്തച്ഛടാ

ഹാലാപാനമദാട്ടഹാസനിനദാടോപപ്രതാപോത്കടം ।

മാതർമത്പരിപന്ഥിനാമപഹൃതൈഃ പ്രാണൈസ്ത്വദംഘ്രിദ്വയം

ധ്യാനോദ്ദാമരവൈർഭവോദയവശാത്സന്തർപയാമി ക്ഷണാത് ॥ 3 ॥

ശ്യാമാം താമരസാനനാംഘ്രിനയനാം സോമാർധചൂഡാം ജഗ-

-ത്ത്രാണവ്യഗ്രഹലായുധാഗ്രമുസലാം സന്ത്രാസമുദ്രാവതീം ।

യേ ത്വാം രക്തകപാലിനീം ഹരവരാരോഹേ വരാഹാനനാം

ഭാവൈഃ സന്ദധതേ കഥം ക്ഷണമപി പ്രാണന്തി തേഷാം ദ്വിഷഃ ॥ 4 ॥

വിശ്വാധീശ്വരവല്ലഭേ വിജയസേ യാ ത്വം നിയന്ത്ര്യാത്മികാ

ഭൂതാന്താ പുരുഷായുഷാവധികരീ പാകപ്രദാകർമണാം ।

ത്വാം യാചേ ഭവതീം കിമപ്യവിതഥം യോ മദ്വിരോധീജന-

-സ്തസ്യായുർമമ വാഞ്ഛിതാവധിഭവേന്മാതസ്തവൈവാജ്ഞയാ ॥ 5 ॥

മാതഃ സമ്യഗുപാസിതും ജഡമതിസ്ത്വാം നൈവ ശക്നോമ്യഹം

യദ്യപ്യന്വിതദൈശികാംഘ്രികമലാനുക്രോശപാത്രസ്യ മേ ।

ജന്തുഃ കശ്ചന ചിന്തയത്യകുശലം യസ്തസ്യ തദ്വൈശസം

ഭൂയാദ്ദേവി വിരോധിനോ മമ ച തേ ശ്രേയഃ പദാസംഗിനഃ ॥ 6 ॥

വാരാഹീ വ്യഥമാനമാനസഗലത്സൗഖ്യം തദാശാബലിം

സീദന്തം യമപാകൃതാധ്യവസിതം പ്രാപ്താഖിലോത്പാദിതം ।

ക്രന്ദദ്ബന്ധുജനൈഃ കലങ്കിതതുലം കണ്ഠവ്രണോദ്യത്കൃമി

പശ്യാമി പ്രതിപക്ഷമാശു പതിതം ഭ്രാന്തം ലുഠന്തം മുഹുഃ ॥ 7 ॥

വാരാഹീ ത്വമശേഷജന്തുഷു പുനഃ പ്രാണാത്മികാ സ്പന്ദസേ

ശക്തിവ്യാപ്തചരാചരാ ഖലു യതസ്ത്വാമേതദഭ്യർഥയേ ।

ത്വത്പാദാംബുജസംഗിനോ മമ സകൃത്പാപം ചികീർഷന്തി യേ

തേഷാം മാ കുരു ശങ്കരപ്രിയതമേ ദേഹാന്തരാവസ്ഥിതിം ॥ 8 ॥

ഇതി ശ്രീവാരാഹീനിഗ്രഹാഷ്ടകം ।

Recite with devotion and pure heart

Regular practice brings spiritual benefits