शक्तिहस्तं विरूपाक्षं शिखिवाहं षडाननम् । दारुणं रिपुरोगघ्नं भावये कुक्कुटध्वजम् ॥ इति ध्यानम् स्कन्दो गुहः षण्मुखश्च फालनेत्रसुतः प्रभुः । पिङ्गलः कृत्तिकासूनुः शिखिवाहो द्विषड्भुजः ॥ 1 ॥ द्विषण्णेत्र-श्शक्तिधरः पिशिताश प्रभञ्जनः । तारकासुरसंहारी रक्षोबलविमर्दनः ॥ 2 ॥ मत्तः प्रमत्त उन्मत्तः सुरसैन्यसुरक्षकः । देवसेनापतिः प्राज्ञः कृपालु र्भक्तवत्सलः ॥ 3 ॥ उमासुत-श्शक्तिधरः कुमारः क्रौञ्चधारणः । सेनानी-रग्निजन्मा च विशाखः शङ्करात्मजः ॥ 4 ॥ शिवस्वामी गणस्वामी सर्वस्वामी सनातनः । अनन्तमूर्ति रक्षोभ्यः पार्वतीप्रियनन्दनः ॥ 5 ॥ गङ्गासुत-श्शरोद्भूत आहूतः पावकात्मजः । जृम्भः प्रजृम्भ उज्जृम्भः कमलासनसंस्तुतः ॥ 6 ॥ एकवर्णो द्विवर्णश्च त्रिवर्णः सुमनोहरः । चतुर्वर्णः पञ्चवर्णः प्रजापति-रहस्पतिः ॥ 7 ॥ अग्निगर्भ-श्शमीगर्भो विश्वरेता-स्सुरारिहा । हरिद्वर्ण-श्शुभकरो पटुश्च वटुवेषभृत् ॥ 8 ॥ पूषा गभस्ति-र्गहन श्चन्द्रवर्णः कलाधरः । मायाधरो महामायी कैवल्य-श्शङ्करात्मजः ॥ 9 ॥ विश्वयोनि-रमेयात्मा तेजोनिधि-रनामयः । परमेष्ठी परम्ब्रह्म वेदगर्भो विराट्सुतः ॥ 10 ॥ पुलिन्दकन्याभर्ता च महासारस्वतावृतः । अश्रितोखिलदाता च चोरघ्नो रोगनाशनः ॥ 11 ॥ अनन्तमूर्ति-रानन्द-श्शिखण्डीकृतकेतनः । डम्भः परमडम्भश्च महाडम्भो वृषाकपिः ॥ 12 ॥ कारणोपात्तदेहश्च कारणातीतविग्रहः । अनीश्वरोऽमृतः प्राणः प्राणायामपरायणः ॥ 13 ॥ विरुद्धहन्ता वीरघ्नो रक्तश्यामगलोऽपि च । सुब्रह्मण्यो गुहः प्रीतो ब्रह्मण्यो ब्राह्मणप्रियः ॥ 14 ॥ वंशवृद्धिकरो वेदो वेद्योऽक्षयफलप्रदः ॥ 15 ॥ इति श्री सुब्रह्मण्याष्टोत्तर शतनामस्तोत्रं सम्पूर्णम् ।