giritanayāsuta gāṅgapayōdita gandhasuvāsita bālatanō guṇagaṇabhūṣaṇa kōmalabhāṣaṇa krauñchavidāraṇa kundatanō । gajamukhasōdara durjayadānavasaṅghavināśaka divyatanō jaya jaya hē guha ṣaṇmukha sundara dēhi ratiṃ tava pādayugē ॥ 1 ॥ pratigirisaṃsthita bhaktahṛdisthita putradhanaprada ramyatanō bhavabhayamōchaka bhāgyavidhāyaka bhūsutavāra supūjyatanō । bahubhujaśōbhita bandhavimōchaka bōdhaphalaprada bōdhatanō jaya jaya hē guha ṣaṇmukha sundara dēhi ratiṃ tava pādayugē ॥ 2 ॥ śamadhanamānita maunihṛdālaya mōkṣakṛdālaya mugdhatanō śatamakhapālaka śaṅkaratōṣaka śaṅkhasuvādaka śaktitanō । daśaśatamanmatha sannibhasundara kuṇḍalamaṇḍita karṇavibhō jaya jaya hē guha ṣaṇmukha sundara dēhi ratiṃ tava pādayugē ॥ 3 ॥ guha taruṇāruṇachēlapariṣkṛta tārakamāraka māratanō jalanidhitīrasuśōbhivarālaya śaṅkarasannuta dēvagurō । vihitamahādhvarasāmanimantrita saumyahṛdantara sōmatanō jaya jaya hē guha ṣaṇmukha sundara dēhi ratiṃ tava pādayugē ॥ 4 ॥ lavalikayā saha kēlikalāpara dēvasutārpita mālyatanō gurupadasaṃsthita śaṅkaradarśita tattvamayapraṇavārthavibhō । vidhiharipūjita brahmasutārpita bhāgyasupūraka yōgitanō jaya jaya hē guha ṣaṇmukha sundara dēhi ratiṃ tava pādayugē ॥ 5 ॥ kalijanapālana kañjasulōchana kukkuṭakētana kēlitanō kṛtabalipālana barhiṇavāhana phālavilōchanaśambhutanō । śaravaṇasambhava śatrunibarhaṇa chandrasamānana śarmatanō jaya jaya hē guha ṣaṇmukha sundara dēhi ratiṃ tava pādayugē ॥ 6 ॥ sukhadamanantapadānvita rāmasudīkṣita satkavipadyamidaṃ śaravaṇa sambhava tōṣadamiṣṭadamaṣṭasusiddhidamārtiharam । paṭhati śṛṇōti cha bhaktiyutō yadi bhāgyasamṛddhimathō labhatē jaya jaya hē guha ṣaṇmukha sundara dēhi ratiṃ tava pādayugē ॥ 7 ॥ iti śrīanantarāmadīkṣita kṛtaṃ ṣaṇmukha ṣaṭkam ॥