ശിവ ഹരേ ശിവരാമസഖേ പ്രഭോ ത്രിവിധതാപനിവാരണ ഹേ വിഭോ । അജജനേശ്വരയാദവ പാഹി മാം ശിവ ഹരേ വിജയം കുരു മേ വരം ॥ 1 ॥ കമലലോചന രാമ ദയാനിധേ ഹര ഗുരോ ഗജരക്ഷക ഗോപതേ । ശിവതനോ ഭവശങ്കര പാഹി മാം ശിവ ഹരേ വിജയം കുരു മേ വരം ॥ 2 ॥ സുജനരഞ്ജനമംഗലമന്ദിരം ഭജതി തേ പുരുഷഃ പരമം പദം । ഭവതി തസ്യ സുഖം പരമാദ്ഭുതം ശിവ ഹരേ വിജയം കുരു മേ വരം ॥ 3 ॥ ജയ യുധിഷ്ഠിരവല്ലഭ ഭൂപതേ ജയ ജയാർജിത പുണ്യപയോനിധേ । ജയ കൃപാമയ കൃഷ്ണ നമോഽസ്തു തേ ശിവ ഹരേ വിജയം കുരു മേ വരം ॥ 4 ॥ ഭവവിമോചന മാധവ മാപതേ സുകവിമാനസഹംസ ശിവാരതേ । ജനകജാരത രാഘവ രക്ഷ മാം ശിവ ഹരേ വിജയം കുരു മേ വരം ॥ 5 ॥ അവനിമണ്ഡലമംഗല മാപതേ ജലദസുന്ദര രാമ രമാപതേ । നിഗമകീർതിഗുണാർണവ ഗോപതേ ശിവ ഹരേ വിജയം കുരു മേ വരം ॥ 6 ॥ പതിതപാവന നാമമയീ ലതാ തവ യശോ വിമലം പരിഗീയതേ । തദപി മാധവ മാം കിമുപേക്ഷസേ ശിവ ഹരേ വിജയം കുരു മേ വരം ॥ 7 ॥ അമരതാപരദേവ രമാപതേ വിജയതസ്തവ നാമധനോപമാ । മയി കഥം കരുണാർണവ ജായതേ ശിവ ഹരേ വിജയം കുരു മേ വരം ॥ 8 ॥ ഹനുമതഃ പ്രിയചാപകര പ്രഭോ സുരസരിദ്ധൃതശേഖര ഹേ ഗുരോ । മമ വിഭോ കിമു വിസ്മരണം കൃതം ശിവ ഹരേ വിജയം കുരു മേ വരം ॥ 9 ॥ അഹരഹർജന രഞ്ജനസുന്ദരം പഠതി യഃ ശിവരാമകൃതസ്തവം । വിശതി രാമരമാചരണാംബുജേ ശിവ ഹരേ വിജയം കുരു മേ വരം ॥ 10 ॥ പ്രാതരുത്ഥായ യോ ഭക്ത്യാ പഠേദേകാഗ്രമാനസഃ । വിജയോ ജായതേ തസ്യ വിഷ്ണുമാരാധ്യമാപ്നുയാത് ॥ 11 ॥ ഇതി ശ്രീരാമാനന്ദവിരചിതം ശ്രീശിവരാമസ്തോത്രം ।