सुग्रीवमित्रं परमं पवित्रं सीताकलत्रं नवमेघगात्रम् । कारुण्यपात्रं शतपत्रनेत्रं श्रीरामचन्द्रं सततं नमामि ॥ 1 ॥ संसारसारं निगमप्रचारं धर्मावतारं हृतभूमिभारम् । सदाऽविकारं सुखसिन्धुसारं श्रीरामचन्द्रं सततं नमामि ॥ 2 ॥ लक्ष्मीविलासं जगतां निवासं लङ्काविनाशं भुवनप्रकाशम् । भूदेववासं शरदिन्दुहासं श्रीरामचन्द्रं सततं नमामि ॥ 3 ॥ मन्दारमालं वचने रसालं गुणैर्विशालं हतसप्ततालम् । क्रव्यादकालं सुरलोकपालं श्रीरामचन्द्रं सततं नमामि ॥ 4 ॥ वेदान्तगानं सकलैस्समानं हृतारिमानं त्रिदशप्रधानम् । गजेन्द्रयानं विगतावसानं श्रीरामचन्द्रं सततं नमामि ॥ 5 ॥ श्यामाभिरामं नयनाभिरामं गुणाभिरामं वचनाभिरामम् । विश्वप्रणामं कृतभक्तकामं श्रीरामचन्द्रं सततं नमामि ॥ 6 ॥ लीलाशरीरं रणरङ्गधीरं विश्वैकसारं रघुवंशहारम् । गम्भीरवादं जितसर्ववादं श्रीरामचन्द्रं सततं नमामि ॥ 7 ॥ खले कृतान्तं स्वजने विनीतं सामोपगीतं मनसा प्रतीतम् । रागेण गीतं वचनादतीतं श्रीरामचन्द्रं सततं नमामि ॥ 8 ॥ श्रीरामचन्द्रस्य वराष्टकं त्वां मयेरितं देवि मनोहरं ये । पठन्ति शृण्वन्ति गृणन्ति भक्त्या ते स्वीयकामान् प्रलभन्ति नित्यम् ॥ 9 ॥ इति श्रीरामचन्द्राष्टकम् ।