ಅಸ್ಯ ಶ್ರೀರಾಮಚಂದ್ರ ಸ್ತವರಾಜಸ್ತೋತ್ರಮಂತ್ರಸ್ಯ ಸನತ್ಕುಮಾರಋಷಿಃ । ಶ್ರೀರಾಮೋ ದೇವತಾ । ಅನುಷ್ಟುಪ್ ಛಂದಃ । ಸೀತಾ ಬೀಜಂ । ಹನುಮಾನ್ ಶಕ್ತಿಃ । ಶ್ರೀರಾಮಪ್ರೀತ್ಯರ್ಥೇ ಜಪೇ ವಿನಿಯೋಗಃ ॥ ಸೂತ ಉವಾಚ । ಸರ್ವಶಾಸ್ತ್ರಾರ್ಥತತ್ತ್ವಜ್ಞಂ ವ್ಯಾಸಂ ಸತ್ಯವತೀಸುತಂ । ಧರ್ಮಪುತ್ರಃ ಪ್ರಹೃಷ್ಟಾತ್ಮಾ ಪ್ರತ್ಯುವಾಚ ಮುನೀಶ್ವರಂ ॥ 1 ॥ ಯುಧಿಷ್ಠಿರ ಉವಾಚ । ಭಗವನ್ಯೋಗಿನಾಂ ಶ್ರೇಷ್ಠ ಸರ್ವಶಾಸ್ತ್ರವಿಶಾರದ । ಕಿಂ ತತ್ತ್ವಂ ಕಿಂ ಪರಂ ಜಾಪ್ಯಂ ಕಿಂ ಧ್ಯಾನಂ ಮುಕ್ತಿಸಾಧನಂ ॥ 2 ॥ ಶ್ರೋತುಮಿಚ್ಛಾಮಿ ತತ್ಸರ್ವಂ ಬ್ರೂಹಿ ಮೇ ಮುನಿಸತ್ತಮ ॥ 3 ॥ ವೇದವ್ಯಾಸ ಉವಾಚ । ಧರ್ಮರಾಜ ಮಹಾಭಾಗ ಶೃಣು ವಕ್ಷ್ಯಾಮಿ ತತ್ತ್ವತಃ ॥ 4 ॥ ಯತ್ಪರಂ ಯದ್ಗುಣಾತೀತಂ ಯಜ್ಜ್ಯೋತಿರಮಲಂ ಶಿವಂ । ತದೇವ ಪರಮಂ ತತ್ತ್ವಂ ಕೈವಲ್ಯಪದಕಾರಣಂ ॥ 5 ॥ ಶ್ರೀರಾಮೇತಿ ಪರಂ ಜಾಪ್ಯಂ ತಾರಕಂ ಬ್ರಹ್ಮಸಂಜ್ಞಕಂ । ಬ್ರಹ್ಮಹತ್ಯಾದಿಪಾಪಘ್ನಮಿತಿ ವೇದವಿದೋ ವಿದುಃ ॥ 6 ॥ ಶ್ರೀರಾಮ ರಾಮೇತಿ ಜನಾ ಯೇ ಜಪಂತಿ ಚ ಸರ್ವದಾ । ತೇಷಾಂ ಭುಕ್ತಿಶ್ಚ ಮುಕ್ತಿಶ್ಚ ಭವಿಷ್ಯತಿ ನ ಸಂಶಯಃ ॥ 7 ॥ ಸ್ತವರಾಜಂ ಪುರಾ ಪ್ರೋಕ್ತಂ ನಾರದೇನ ಚ ಧೀಮತಾ । ತತ್ಸರ್ವಂ ಸಂಪ್ರವಕ್ಷ್ಯಾಮಿ ಹರಿಧ್ಯಾನಪುರಃಸರಂ ॥ 8 ॥ ತಾಪತ್ರಯಾಗ್ನಿಶಮನಂ ಸರ್ವಾಘೌಘನಿಕೃಂತನಂ । ದಾರಿದ್ರ್ಯದುಃಖಶಮನಂ ಸರ್ವಸಂಪತ್ಕರಂ ಶಿವಂ ॥ 9 ॥ ವಿಜ್ಞಾನಫಲದಂ ದಿವ್ಯಂ ಮೋಕ್ಷೈಕಫಲಸಾಧನಂ । ನಮಸ್ಕೃತ್ಯ ಪ್ರವಕ್ಷ್ಯಾಮಿ ರಾಮಂ ಕೃಷ್ಣಂ ಜಗನ್ಮಯಂ ॥ 10 ॥ ಅಯೋಧ್ಯಾನಗರೇ ರಮ್ಯೇ ರತ್ನಮಂಡಪಮಧ್ಯಗೇ । ಸ್ಮರೇತ್ಕಲ್ಪತರೋರ್ಮೂಲೇ ರತ್ನಸಿಂಹಾಸನಂ ಶುಭಂ ॥ 11 ॥ ತನ್ಮಧ್ಯೇಽಷ್ಟದಲಂ ಪದ್ಮಂ ನಾನಾರತ್ನೈಶ್ಚ ವೇಷ್ಟಿತಂ । ಸ್ಮರೇನ್ಮಧ್ಯೇ ದಾಶರಥಿಂ ಸಹಸ್ರಾದಿತ್ಯತೇಜಸಂ ॥ 12 ॥ ಪಿತುರಂಕಗತಂ ರಾಮಮಿಂದ್ರನೀಲಮಣಿಪ್ರಭಂ । ಕೋಮಲಾಂಗಂ ವಿಶಾಲಾಕ್ಷಂ ವಿದ್ಯುದ್ವರ್ಣಾಂಬರಾವೃತಂ ॥ 13 ॥ ಭಾನುಕೋಟಿಪ್ರತೀಕಾಶ ಕಿರೀಟೇನ ವಿರಾಜಿತಂ । ರತ್ನಗ್ರೈವೇಯಕೇಯೂರರತ್ನಕುಂಡಲಮಂಡಿತಂ ॥ 14 ॥ ರತ್ನಕಂಕಣಮಂಜೀರಕಟಿಸೂತ್ರೈರಲಂಕೃತಂ । ಶ್ರೀವತ್ಸಕೌಸ್ತುಭೋರಸ್ಕಂ ಮುಕ್ತಾಹಾರೋಪಶೋಭಿತಂ ॥ 15 ॥ ದಿವ್ಯರತ್ನಸಮಾಯುಕ್ತಮುದ್ರಿಕಾಭಿರಲಂಕೃತಂ । ರಾಘವಂ ದ್ವಿಭುಜಂ ಬಾಲಂ ರಾಮಮೀಷತ್ಸ್ಮಿತಾನನಂ ॥ 16 ॥ ತುಲಸೀಕುಂದಮಂದಾರಪುಷ್ಪಮಾಲ್ಯೈರಲಂಕೃತಂ । ಕರ್ಪೂರಾಗುರುಕಸ್ತೂರೀದಿವ್ಯಗಂಧಾನುಲೇಪನಂ ॥ 17 ॥ ಯೋಗಶಾಸ್ತ್ರೇಷ್ವಭಿರತಂ ಯೋಗೇಶಂ ಯೋಗದಾಯಕಂ । ಸದಾ ಭರತಸೌಮಿತ್ರಿಶತ್ರುಘ್ನೈರುಪಶೋಭಿತಂ ॥ 18 ॥ ವಿದ್ಯಾಧರಸುರಾಧೀಶಸಿದ್ಧಗಂಧರ್ವಕಿನ್ನರೈಃ । ಯೋಗೀಂದ್ರೈರ್ನಾರದಾದ್ಯೈಶ್ಚ ಸ್ತೂಯಮಾನಮಹರ್ನಿಶಂ ॥ 19 ॥ ವಿಶ್ವಾಮಿತ್ರವಸಿಷ್ಠಾದಿಮುನಿಭಿಃ ಪರಿಸೇವಿತಂ । ಸನಕಾದಿಮುನಿಶ್ರೇಷ್ಠೈರ್ಯೋಗಿವೃಂದೈಶ್ಚ ಸೇವಿತಂ ॥ 20 ॥ ರಾಮಂ ರಘುವರಂ ವೀರಂ ಧನುರ್ವೇದವಿಶಾರದಂ । ಮಂಗಲಾಯತನಂ ದೇವಂ ರಾಮಂ ರಾಜೀವಲೋಚನಂ ॥ 21 ॥ ಸರ್ವಶಾಸ್ತ್ರಾರ್ಥತತ್ತ್ವಜ್ಞಮಾನಂದಕರಸುಂದರಂ । ಕೌಸಲ್ಯಾನಂದನಂ ರಾಮಂ ಧನುರ್ಬಾಣಧರಂ ಹರಿಂ ॥ 22 ॥ ಏವಂ ಸಂಚಿಂತಯನ್ವಿಷ್ಣುಂ ಯಜ್ಜ್ಯೋತಿರಮಲಂ ವಿಭುಂ । ಪ್ರಹೃಷ್ಟಮಾನಸೋ ಭೂತ್ವಾ ಮುನಿವರ್ಯಃ ಸ ನಾರದಃ ॥ 23 ॥ ಸರ್ವಲೋಕಹಿತಾರ್ಥಾಯ ತುಷ್ಟಾವ ರಘುನಂದನಂ । ಕೃತಾಂಜಲಿಪುಟೋ ಭೂತ್ವಾ ಚಿಂತಯನ್ನದ್ಭುತಂ ಹರಿಂ ॥ 24 ॥ ಯದೇಕಂ ಯತ್ಪರಂ ನಿತ್ಯಂ ಯದನಂತಂ ಚಿದಾತ್ಮಕಂ । ಯದೇಕಂ ವ್ಯಾಪಕಂ ಲೋಕೇ ತದ್ರೂಪಂ ಚಿಂತಯಾಮ್ಯಹಂ ॥ 25 ॥ ವಿಜ್ಞಾನಹೇತುಂ ವಿಮಲಾಯತಾಕ್ಷಂ ಪ್ರಜ್ಞಾನರೂಪಂ ಸ್ವಸುಖೈಕಹೇತುಂ । ಶ್ರೀರಾಮಚಂದ್ರಂ ಹರಿಮಾದಿದೇವಂ ಪರಾತ್ಪರಂ ರಾಮಮಹಂ ಭಜಾಮಿ ॥ 26 ॥ ಕವಿಂ ಪುರಾಣಂ ಪುರುಷಂ ಪುರಸ್ತಾ- -ತ್ಸನಾತನಂ ಯೋಗಿನಮೀಶಿತಾರಂ । ಅಣೋರಣೀಯಾಂಸಮನಂತವೀರ್ಯಂ ಪ್ರಾಣೇಶ್ವರಂ ರಾಮಮಸೌ ದದರ್ಶ ॥ 27 ॥ ನಾರದ ಉವಾಚ । ನಾರಾಯಣಂ ಜಗನ್ನಾಥಮಭಿರಾಮಂ ಜಗತ್ಪತಿಂ । ಕವಿಂ ಪುರಾಣಂ ವಾಗೀಶಂ ರಾಮಂ ದಶರಥಾತ್ಮಜಂ ॥ 28 ॥ ರಾಜರಾಜಂ ರಘುವರಂ ಕೌಸಲ್ಯಾನಂದವರ್ಧನಂ । ಭರ್ಗಂ ವರೇಣ್ಯಂ ವಿಶ್ವೇಶಂ ರಘುನಾಥಂ ಜಗದ್ಗುರುಂ ॥ 29 ॥ ಸತ್ಯಂ ಸತ್ಯಪ್ರಿಯಂ ಶ್ರೇಷ್ಠಂ ಜಾನಕೀವಲ್ಲಭಂ ವಿಭುಂ । ಸೌಮಿತ್ರಿಪೂರ್ವಜಂ ಶಾಂತಂ ಕಾಮದಂ ಕಮಲೇಕ್ಷಣಂ ॥ 30 ॥ ಆದಿತ್ಯಂ ರವಿಮೀಶಾನಂ ಘೃಣಿಂ ಸೂರ್ಯಮನಾಮಯಂ । ಆನಂದರೂಪಿಣಂ ಸೌಮ್ಯಂ ರಾಘವಂ ಕರುಣಾಮಯಂ ॥ 31 ॥ ಜಾಮದಗ್ನಿಂ ತಪೋಮೂರ್ತಿಂ ರಾಮಂ ಪರಶುಧಾರಿಣಂ । ವಾಕ್ಪತಿಂ ವರದಂ ವಾಚ್ಯಂ ಶ್ರೀಪತಿಂ ಪಕ್ಷಿವಾಹನಂ ॥ 32 ॥ ಶ್ರೀಶಾರ್ಙ್ಗಧಾರಿಣಂ ರಾಮಂ ಚಿನ್ಮಯಾನಂದವಿಗ್ರಹಂ । ಹಲಧೃಗ್ವಿಷ್ಣುಮೀಶಾನಂ ಬಲರಾಮಂ ಕೃಪಾನಿಧಿಂ ॥ 33 ॥ ಶ್ರೀವಲ್ಲಭಂ ಕೃಪಾನಾಥಂ ಜಗನ್ಮೋಹನಮಚ್ಯುತಂ । ಮತ್ಸ್ಯಕೂರ್ಮವರಾಹಾದಿರೂಪಧಾರಿಣಮವ್ಯಯಂ ॥ 34 ॥ ವಾಸುದೇವಂ ಜಗದ್ಯೋನಿಮನಾದಿನಿಧನಂ ಹರಿಂ । ಗೋವಿಂದಂ ಗೋಪತಿಂ ವಿಷ್ಣುಂ ಗೋಪೀಜನಮನೋಹರಂ ॥ 35 ॥ ಗೋಗೋಪಾಲಪರೀವಾರಂ ಗೋಪಕನ್ಯಾಸಮಾವೃತಂ । ವಿದ್ಯುತ್ಪುಂಜಪ್ರತೀಕಾಶಂ ರಾಮಂ ಕೃಷ್ಣಂ ಜಗನ್ಮಯಂ ॥ 36 ॥ ಗೋಗೋಪಿಕಾಸಮಾಕೀರ್ಣಂ ವೇಣುವಾದನತತ್ಪರಂ । ಕಾಮರೂಪಂ ಕಲಾವಂತಂ ಕಾಮಿನೀಕಾಮದಂ ವಿಭುಂ ॥ 37 ॥ ಮನ್ಮಥಂ ಮಥುರಾನಾಥಂ ಮಾಧವಂ ಮಕರಧ್ವಜಂ । ಶ್ರೀಧರಂ ಶ್ರೀಕರಂ ಶ್ರೀಶಂ ಶ್ರೀನಿವಾಸಂ ಪರಾತ್ಪರಂ ॥ 38 ॥ ಭೂತೇಶಂ ಭೂಪತಿಂ ಭದ್ರಂ ವಿಭೂತಿಂ ಭೂಮಿಭೂಷಣಂ । ಸರ್ವದುಃಖಹರಂ ವೀರಂ ದುಷ್ಟದಾನವವೈರಿಣಂ ॥ 39 ॥ ಶ್ರೀನೃಸಿಂಹಂ ಮಹಾಬಾಹುಂ ಮಹಾಂತಂ ದೀಪ್ತತೇಜಸಂ । ಚಿದಾನಂದಮಯಂ ನಿತ್ಯಂ ಪ್ರಣವಂ ಜ್ಯೋತಿರೂಪಿಣಂ ॥ 40 ॥ ಆದಿತ್ಯಮಂಡಲಗತಂ ನಿಶ್ಚಿತಾರ್ಥಸ್ವರೂಪಿಣಂ । ಭಕ್ತಿಪ್ರಿಯಂ ಪದ್ಮನೇತ್ರಂ ಭಕ್ತಾನಾಮೀಪ್ಸಿತಪ್ರದಂ ॥ 41 ॥ ಕೌಸಲ್ಯೇಯಂ ಕಲಾಮೂರ್ತಿಂ ಕಾಕುತ್ಸ್ಥಂ ಕಮಲಾಪ್ರಿಯಂ । ಸಿಂಹಾಸನೇ ಸಮಾಸೀನಂ ನಿತ್ಯವ್ರತಮಕಲ್ಮಷಂ ॥ 42 ॥ ವಿಶ್ವಾಮಿತ್ರಪ್ರಿಯಂ ದಾಂತಂ ಸ್ವದಾರನಿಯತವ್ರತಂ । ಯಜ್ಞೇಶಂ ಯಜ್ಞಪುರುಷಂ ಯಜ್ಞಪಾಲನತತ್ಪರಂ ॥ 43 ॥ ಸತ್ಯಸಂಧಂ ಜಿತಕ್ರೋಧಂ ಶರಣಾಗತವತ್ಸಲಂ । ಸರ್ವಕ್ಲೇಶಾಪಹರಣಂ ವಿಭೀಷಣವರಪ್ರದಂ ॥ 44 ॥ ದಶಗ್ರೀವಹರಂ ರೌದ್ರಂ ಕೇಶವಂ ಕೇಶಿಮರ್ದನಂ । ವಾಲಿಪ್ರಮಥನಂ ವೀರಂ ಸುಗ್ರೀವೇಪ್ಸಿತರಾಜ್ಯದಂ ॥ 45 ॥ ನರವಾನರದೇವೈಶ್ಚಸೇವಿತಂ ಹನುಮತ್ಪ್ರಿಯಂ । ಶುದ್ಧಂ ಸೂಕ್ಷ್ಮಂ ಪರಂ ಶಾಂತಂ ತಾರಕಂ ಬ್ರಹ್ಮರೂಪಿಣಂ ॥ 46 ॥ ಸರ್ವಭೂತಾತ್ಮಭೂತಸ್ಥಂ ಸರ್ವಾಧಾರಂ ಸನಾತನಂ । ಸರ್ವಕಾರಣಕರ್ತಾರಂ ನಿದಾನಂ ಪ್ರಕೃತೇಃ ಪರಂ ॥ 47 ॥ ನಿರಾಮಯಂ ನಿರಾಭಾಸಂ ನಿರವದ್ಯಂ ನಿರಂಜನಂ । ನಿತ್ಯಾನಂದಂ ನಿರಾಕಾರಮದ್ವೈತಂ ತಮಸಃ ಪರಂ ॥ 48 ॥ ಪರಾತ್ಪರತರಂ ತತ್ತ್ವಂ ಸತ್ಯಾನಂದಂ ಚಿದಾತ್ಮಕಂ । ಮನಸಾ ಶಿರಸಾ ನಿತ್ಯಂ ಪ್ರಣಮಾಮಿ ರಘೂತ್ತಮಂ ॥ 49 ॥ ಸೂರ್ಯಮಂಡಲಮಧ್ಯಸ್ಥಂ ರಾಮಂ ಸೀತಾಸಮನ್ವಿತಂ । ನಮಾಮಿ ಪುಂಡರೀಕಾಕ್ಷಮಮೇಯಂ ಗುರುತತ್ಪರಂ ॥ 50 ॥ ನಮೋಽಸ್ತು ವಾಸುದೇವಾಯ ಜ್ಯೋತಿಷಾಂ ಪತಯೇ ನಮಃ । ನಮೋಽಸ್ತು ರಾಮದೇವಾಯ ಜಗದಾನಂದರೂಪಿಣೇ ॥ 51 ॥ ನಮೋ ವೇದಾಂತನಿಷ್ಠಾಯ ಯೋಗಿನೇ ಬ್ರಹ್ಮವಾದಿನೇ । ಮಾಯಾಮಯನಿರಾಸಾಯ ಪ್ರಪನ್ನಜನಸೇವಿನೇ ॥ 52 ॥ ವಂದಾಮಹೇ ಮಹೇಶಾನಚಂಡಕೋದಂಡಖಂಡನಂ । ಜಾನಕೀಹೃದಯಾನಂದವರ್ಧನಂ ರಘುನಂದನಂ ॥ 53 ॥ ಉತ್ಫುಲ್ಲಾಮಲಕೋಮಲೋತ್ಪಲದಲಶ್ಯಾಮಾಯ ರಾಮಾಯ ತೇ- -ಽಕಾಮಾಯ ಪ್ರಮದಾಮನೋಹರಗುಣಗ್ರಾಮಾಯ ರಾಮಾತ್ಮನೇ । ಯೋಗಾರೂಢಮುನೀಂದ್ರಮಾನಸಸರೋಹಂಸಾಯ ಸಂಸಾರವಿ- -ಧ್ವಂಸಾಯ ಸ್ಫುರದೋಜಸೇ ರಘುಕುಲೋತ್ತಂಸಾಯ ಪುಂಸೇ ನಮಃ ॥ 54 ॥ ಭವೋದ್ಭವಂ ವೇದವಿದಾಂ ವರಿಷ್ಠ- -ಮಾದಿತ್ಯಚಂದ್ರಾನಲಸುಪ್ರಭಾವಂ । ಸರ್ವಾತ್ಮಕಂ ಸರ್ವಗತಸ್ವರೂಪಂ ನಮಾಮಿ ರಾಮಂ ತಮಸಃ ಪರಸ್ತಾತ್ ॥ 55 ॥ ನಿರಂಜನಂ ನಿಷ್ಪ್ರತಿಮಂ ನಿರೀಹಂ ನಿರಾಶ್ರಯಂ ನಿಷ್ಕಲಮಪ್ರಪಂಚಂ । ನಿತ್ಯಂ ಧ್ರುವಂ ನಿರ್ವಿಷಯಸ್ವರೂಪಂ ನಿರಂತರಂ ರಾಮಮಹಂ ಭಜಾಮಿ ॥ 56 ॥ ಭವಾಬ್ಧಿಪೋತಂ ಭರತಾಗ್ರಜಂ ತಂ ಭಕ್ತಿಪ್ರಿಯಂ ಭಾನುಕುಲಪ್ರದೀಪಂ । ಭೂತತ್ರಿನಾಥಂ ಭುವನಾಧಿಪಂ ತಂ ಭಜಾಮಿ ರಾಮಂ ಭವರೋಗವೈದ್ಯಂ ॥ 57 ॥ ಸರ್ವಾಧಿಪತ್ಯಂ ಸಮರಾಂಗಧೀರಂ ಸತ್ಯಂ ಚಿದಾನಂದಮಯಸ್ವರೂಪಂ । ಸತ್ಯಂ ಶಿವಂ ಶಾಂತಿಮಯಂ ಶರಣ್ಯಂ ಸನಾತನಂ ರಾಮಮಹಂ ಭಜಾಮಿ ॥ 58 ॥ ಕಾರ್ಯಕ್ರಿಯಾಕಾರಣಮಪ್ರಮೇಯಂ ಕವಿಂ ಪುರಾಣಂ ಕಮಲಾಯತಾಕ್ಷಂ । ಕುಮಾರವೇದ್ಯಂ ಕರುಣಾಮಯಂ ತಂ ಕಲ್ಪದ್ರುಮಂ ರಾಮಮಹಂ ಭಜಾಮಿ ॥ 59 ॥ ತ್ರೈಲೋಕ್ಯನಾಥಂ ಸರಸೀರುಹಾಕ್ಷಂ ದಯಾನಿಧಿಂ ದ್ವಂದ್ವವಿನಾಶಹೇತುಂ । ಮಹಾಬಲಂ ವೇದನಿಧಿಂ ಸುರೇಶಂ ಸನಾತನಂ ರಾಮಮಹಂ ಭಜಾಮಿ ॥ 60 ॥ ವೇದಾಂತವೇದ್ಯಂ ಕವಿಮೀಶಿತಾರ- -ಮನಾದಿಮಧ್ಯಾಂತಮಚಿಂತ್ಯಮಾದ್ಯಂ । ಅಗೋಚರಂ ನಿರ್ಮಲಮೇಕರೂಪಂ ನಮಾಮಿ ರಾಮಂ ತಮಸಃ ಪರಸ್ತಾತ್ ॥ 61 ॥ ಅಶೇಷವೇದಾತ್ಮಕಮಾದಿಸಂಜ್ಞ- -ಮಜಂ ಹರಿಂ ವಿಷ್ಣುಮನಂತಮಾದ್ಯಂ । ಅಪಾರಸಂವಿತ್ಸುಖಮೇಕರೂಪಂ ಪರಾತ್ಪರಂ ರಾಮಮಹಂ ಭಜಾಮಿ ॥ 62 ॥ ತತ್ತ್ವಸ್ವರೂಪಂ ಪುರುಷಂ ಪುರಾಣಂ ಸ್ವತೇಜಸಾ ಪೂರಿತವಿಶ್ವಮೇಕಂ । ರಾಜಾಧಿರಾಜಂ ರವಿಮಂಡಲಸ್ಥಂ ವಿಶ್ವೇಶ್ವರಂ ರಾಮಮಹಂ ಭಜಾಮಿ ॥ 63 ॥ ಲೋಕಾಭಿರಾಮಂ ರಘುವಂಶನಾಥಂ ಹರಿಂ ಚಿದಾನಂದಮಯಂ ಮುಕುಂದಂ । ಅಶೇಷವಿದ್ಯಾಧಿಪತಿಂ ಕವೀಂದ್ರಂ ನಮಾಮಿ ರಾಮಂ ತಮಸಃ ಪರಸ್ತಾತ್ ॥ 64 ॥ ಯೋಗೀಂದ್ರಸಂಘೈಶ್ಚ ಸುಸೇವ್ಯಮಾನಂ ನಾರಾಯಣಂ ನಿರ್ಮಲಮಾದಿದೇವಂ । ನತೋಽಸ್ಮಿ ನಿತ್ಯಂ ಜಗದೇಕನಾಥ- -ಮಾದಿತ್ಯವರ್ಣಂ ತಮಸಃ ಪರಸ್ತಾತ್ ॥ 65 ॥ ವಿಭೂತಿದಂ ವಿಶ್ವಸೃಜಂ ವಿರಾಮಂ ರಾಜೇಂದ್ರಮೀಶಂ ರಘುವಂಶನಾಥಂ । ಅಚಿಂತ್ಯಮವ್ಯಕ್ತಮನಂತಮೂರ್ತಿಂ ಜ್ಯೋತಿರ್ಮಯಂ ರಾಮಮಹಂ ಭಜಾಮಿ ॥ 66 ॥ ಅಶೇಷಸಂಸಾರವಿಹಾರಹೀನ- -ಮಾದಿತ್ಯಗಂ ಪೂರ್ಣಸುಖಾಭಿರಾಮಂ । ಸಮಸ್ತಸಾಕ್ಷಿಂ ತಮಸಃ ಪರಸ್ತಾ- -ನ್ನಾರಾಯಣಂ ವಿಷ್ಣುಮಹಂ ಭಜಾಮಿ ॥ 67 ॥ ಮುನೀಂದ್ರಗುಹ್ಯಂ ಪರಿಪೂರ್ಣಕಾಮಂ ಕಲಾನಿಧಿಂ ಕಲ್ಮಷನಾಶಹೇತುಂ । ಪರಾತ್ಪರಂ ಯತ್ಪರಮಂ ಪವಿತ್ರಂ ನಮಾಮಿ ರಾಮಂ ಮಹತೋ ಮಹಾಂತಂ ॥ 68 ॥ ಬ್ರಹ್ಮಾ ವಿಷ್ಣುಶ್ಚ ರುದ್ರಶ್ಚ ದೇವೇಂದ್ರೋ ದೇವತಾಸ್ತಥಾ । ಆದಿತ್ಯಾದಿಗ್ರಹಾಶ್ಚೈವ ತ್ವಮೇವ ರಘುನಂದನ ॥ 69 ॥ ತಾಪಸಾ ಋಷಯಃ ಸಿದ್ಧಾಃ ಸಾಧ್ಯಾಶ್ಚ ಮರುತಸ್ತಥಾ । ವಿಪ್ರಾ ವೇದಾಸ್ತಥಾ ಯಜ್ಞಾಃ ಪುರಾಣಂ ಧರ್ಮಸಂಹಿತಾಃ ॥ 70 ॥ ವರ್ಣಾಶ್ರಮಾಸ್ತಥಾ ಧರ್ಮಾ ವರ್ಣಧರ್ಮಾಸ್ತಥೈವ ಚ । ಯಕ್ಷರಾಕ್ಷಸಗಂಧರ್ವಾದಿಕ್ಪಾಲಾ ದಿಗ್ಗಜಾದಯಃ ॥ 71 ॥ ಸನಕಾದಿಮುನಿಶ್ರೇಷ್ಠಾಸ್ತ್ವಮೇವ ರಘುಪುಂಗವ । ವಸವೋಽಷ್ಟೌ ತ್ರಯಃ ಕಾಲಾ ರುದ್ರಾ ಏಕಾದಶ ಸ್ಮೃತಾಃ ॥ 72 ॥ ತಾರಕಾಃ ದಶ ದಿಕ್ ಚೈವ ತ್ವಮೇವ ರಘುನಂದನ । ಸಪ್ತದ್ವೀಪಾಃ ಸಮುದ್ರಾಶ್ಚ ನಗಾಃ ನದ್ಯಸ್ತಥಾ ದ್ರುಮಾಃ ॥ 73 ॥ ಸ್ಥಾವರಾಃ ಜಂಗಮಾಶ್ಚೈವ ತ್ವಮೇವ ರಘುನಾಯಕ । ದೇವತಿರ್ಯಙ್ಮನುಷ್ಯಾಣಾಂ ದಾನವಾನಾಂ ತಥೈವ ಚ ॥ 74 ॥ ಮಾತಾ ಪಿತಾ ತಥಾ ಭ್ರಾತಾ ತ್ವಮೇವ ರಘುವಲ್ಲಭ । ಸರ್ವೇಷಾಂ ತ್ವಂ ಪರಂ ಬ್ರಹ್ಮ ತ್ವನ್ಮಯಂ ಸರ್ವಮೇವ ಹಿ ॥ 75 ॥ ತ್ವಮಕ್ಷರಂ ಪರಂ ಜ್ಯೋತಿಸ್ತ್ವಮೇವ ಪುರುಷೋತ್ತಮ । ತ್ವಮೇವ ತಾರಕಂ ಬ್ರಹ್ಮ ತ್ವತ್ತೋಽನ್ಯನ್ನೈವ ಕಿಂಚನ ॥ 76 ॥ ಶಾಂತಂ ಸರ್ವಗತಂ ಸೂಕ್ಷ್ಮಂ ಪರಂ ಬ್ರಹ್ಮ ಸನಾತನಂ । ರಾಜೀವಲೋಚನಂ ರಾಮಂ ಪ್ರಣಮಾಮಿ ಜಗತ್ಪತಿಂ ॥ 77 ॥ ವ್ಯಾಸ ಉವಾಚ । ತತಃ ಪ್ರಸನ್ನಃ ಶ್ರೀರಾಮಃ ಪ್ರೋವಾಚ ಮುನಿಪುಂಗವಂ । ತುಷ್ಟೋಽಸ್ಮಿ ಮುನಿಶಾರ್ದೂಲ ವೃಣೀಷ್ವ ವರಮುತ್ತಮಂ ॥ 78 ॥ ನಾರದ ಉವಾಚ । ಯದಿ ತುಷ್ಟೋಽಸಿ ಸರ್ವಜ್ಞ ಶ್ರೀರಾಮ ಕರುಣಾನಿಧೇ । ತ್ವನ್ಮೂರ್ತಿದರ್ಶನೇನೈವ ಕೃತಾರ್ಥೋಽಹಂ ಚ ಸರ್ವದಾ ॥ 79 ॥ ಧನ್ಯೋಽಹಂ ಕೃತಕೃತ್ಯೋಽಹಂ ಪುಣ್ಯೋಽಹಂ ಪುರುಷೋತ್ತಮ । ಅದ್ಯ ಮೇ ಸಫಲಂ ಜನ್ಮ ಜೀವಿತಂ ಸಫಲಂ ಚ ಮೇ ॥ 80 ॥ ಅದ್ಯ ಮೇ ಸಫಲಂ ಜ್ಞಾನಮದ್ಯ ಮೇ ಸಫಲಂ ತಪಃ । ಅದ್ಯ ಮೇ ಸಫಲಂ ಕರ್ಮ ತ್ವತ್ಪಾದಾಂಭೋಜದರ್ಶನಾತ್ ॥ 81 ॥ ಅದ್ಯ ಮೇ ಸಫಲಂ ಸರ್ವಂ ತ್ವನ್ನಾಮಸ್ಮರಣಂ ತಥಾ । ತ್ವತ್ಪಾದಾಂಭೋರುಹದ್ವಂದ್ವಸದ್ಭಕ್ತಿಂ ದೇಹಿ ರಾಘವ ॥ 82 ತತಃ ಪರಮಸಂಪ್ರೀತಃ ಸ ರಾಮಃ ಪ್ರಾಹ ನಾರದಂ । ಮೇಘಗಂಭೀರಯಾ ವಾಚಾ ಧನ್ವೀ ವೀಜಿತಮನ್ಮಥಃ ॥ 83 ॥ ಶ್ರೀರಾಮ ಉವಾಚ । ಮುನಿವರ್ಯ ಮಹಾಭಾಗ ಮುನೇ ತ್ವಿಷ್ಟಂ ದದಾಮಿ ತೇ । ಯತ್ತ್ವಯಾ ಚೇಪ್ಸಿತಂ ಸರ್ವಂ ಮನಸಾ ತದ್ಭವಿಷ್ಯತಿ ॥ 84 ॥ ನಾರದ ಉವಾಚ । ವರಂ ನ ಯಾಚೇ ರಘುನಾಥ ಯುಷ್ಮ- -ತ್ಪದಾಬ್ಜಭಕ್ತಿಃ ಸತತಂ ಮಮಾಸ್ತು । ಇದಂ ಪ್ರಿಯಂ ನಾಥ ವರಂ ಪ್ರಯಾಚ್ಛ ಪುನಃ ಪುನಸ್ತ್ವಾಮಿದಮೇವ ಯಾಚೇ ॥ 85 ॥ ವ್ಯಾಸ ಉವಾಚ । ಇತ್ಯೇವಮೀಡಿತೋ ರಾಮಃ ಪ್ರಾದಾತ್ತಸ್ಮೈ ವರಾಂತರಂ । ವೀರೋ ರಾಮೋ ಮಹಾತೇಜಾಃ ಸಚ್ಚಿದಾನಂದವಿಗ್ರಹಃ ॥ 86 ॥ ಅದ್ವೈತಮಮಲಂ ಜ್ಞಾನಂ ಸ್ವನಾಮಸ್ಮರಣಂ ತಥಾ । ಅಂತರ್ದಧೌ ಜಗನ್ನಾಥಃ ಪುರತಸ್ತಸ್ಯ ರಾಘವಃ ॥ 87 ॥ ಇತಿ ಶ್ರೀರಘುನಾಥಸ್ಯ ಸ್ತವರಾಜಮನುತ್ತಮಂ । ಸರ್ವಸೌಭಾಗ್ಯಸಂಪತ್ತಿದಾಯಕಂ ಮುಕ್ತಿದಂ ಶುಭಂ ॥ 88 ॥ ಕಥಿತಂ ಬ್ರಹ್ಮಪುತ್ರೇಣ ವೇದಾನಾಂ ಸಾರಮುತ್ತಮಂ । ಗುಹ್ಯಾದ್ಗುಹ್ಯತಮಂ ದಿವ್ಯಂ ತವ ಸ್ನೇಹಾತ್ಪ್ರಕೀರ್ತಿತಂ ॥ 89 ॥ ಯಃ ಪಠೇಚ್ಛೃಣುಯಾದ್ವಾಪಿ ತ್ರಿಸಂಧ್ಯಂ ಶ್ರದ್ಧಯಾನ್ವಿತಃ । ಬ್ರಹ್ಮಹತ್ಯಾದಿಪಾಪಾನಿ ತತ್ಸಮಾನಿ ಬಹೂನಿ ಚ ॥ 90 ॥ ಸ್ವರ್ಣಸ್ತೇಯಂ ಸುರಾಪಾನಂ ಗುರುತಲ್ಪಗತಿಸ್ತಥಾ । ಗೋವಧಾದ್ಯುಪಪಾಪಾನಿ ಅನೃತಾತ್ಸಂಭವಾನಿ ಚ ॥ 91 ॥ ಸರ್ವೈಃ ಪ್ರಮುಚ್ಯತೇ ಪಾಪೈಃ ಕಲ್ಪಾಯುತಶತೋದ್ಭವೈಃ । ಮಾನಸಂ ವಾಚಿಕಂ ಪಾಪಂ ಕರ್ಮಣಾ ಸಮುಪಾರ್ಜಿತಂ ॥ 92 ॥ ಶ್ರೀರಾಮಸ್ಮರಣೇನೈವ ತತ್ಕ್ಷಣಾನ್ನಶ್ಯತಿ ಧ್ರುವಂ । ಇದಂ ಸತ್ಯಮಿದಂ ಸತ್ಯಂ ಸತ್ಯಮೇತದಿಹೋಚ್ಯತೇ ॥ 93 ॥ ರಾಮಂ ಸತ್ಯಂ ಪರಂ ಬ್ರಹ್ಮ ರಾಮಾತ್ಕಿಂಚಿನ್ನ ವಿದ್ಯತೇ । ತಸ್ಮಾದ್ರಾಮಸ್ವರೂಪಂ ಹಿ ಸತ್ಯಂ ಸತ್ಯಮಿದಂ ಜಗತ್ ॥ 94 ॥ ಶ್ರೀರಾಮಚಂದ್ರ ರಘುಪುಂಗವ ರಾಜವರ್ಯ ರಜೇಂದ್ರ ರಾಮ ರಘುನಾಯಕ ರಾಘವೇಶ । ರಾಜಾಧಿರಾಜ ರಘುನಂದನ ರಾಮಚಂದ್ರ ದಾಸೋಽಹಮದ್ಯ ಭವತಃ ಶರಣಾಗತೋಽಸ್ಮಿ ॥ 95 ॥ ವೈದೇಹೀಸಹಿತಂ ಸುರದ್ರುಮತಲೇ ಹೈಮೇ ಮಹಾಮಂಡಪೇ ಮಧ್ಯೇ ಪುಷ್ಪಕಮಾಸನೇ ಮಣಿಮಯೇ ವೀರಾಸನೇ ಸಂಸ್ಥಿತಂ । ಅಗ್ರೇ ವಾಚಯತಿ ಪ್ರಭಂಜನಸುತೇ ತತ್ತ್ವಂ ಮುನಿಭ್ಯಃ ಪರಂ ವ್ಯಾಖ್ಯಾತಂ ಭರತಾದಿಭಿಃ ಪರಿವೃತಂ ರಾಮಂ ಭಜೇ ಶ್ಯಾಮಲಂ ॥ 96 ॥ ರಾಮಂ ರತ್ನಕಿರೀಟಕುಂಡಲಯುತಂ ಕೇಯೂರಹಾರಾನ್ವಿತಂ ಸೀತಾಲಂಕೃತವಾಮಭಾಗಮಮಲಂ ಸಿಂಹಾಸನಸ್ಥಂ ವಿಭುಂ । ಸುಗ್ರೀವಾದಿಹರೀಶ್ವರೈಃ ಸುರಗಣೈಃ ಸಂಸೇವ್ಯಮಾನಂ ಸದಾ ವಿಶ್ವಾಮಿತ್ರಪರಾಶರಾದಿಮುನಿಭಿಃ ಸಂಸ್ತೂಯಮಾನಂ ಪ್ರಭುಂ ॥ 97 ॥ ಸಕಲಗುಣನಿಧಾನಂ ಯೋಗಿಭಿಃ ಸ್ತೂಯಮಾನಂ ಭುಜವಿಜಿತಸಮಾನಂ ರಾಕ್ಷಸೇಂದ್ರಾದಿಮಾನಂ । ಮಹಿತನೃಪಭಯಾನಂ ಸೀತಯಾ ಶೋಭಮಾನಂ ಸ್ಮರ ಹೃದಯ ವಿಮಾನಂ ಬ್ರಹ್ಮ ರಾಮಾಭಿಧಾನಂ ॥ 98 ॥ ರಘುವರ ತವ ಮೂರ್ತಿರ್ಮಾಮಕೇ ಮಾನಸಾಬ್ಜೇ ನರಕಗತಿಹರಂ ತೇ ನಾಮಧೇಯಂ ಮುಖೇ ಮೇ । ಅನಿಶಮತುಲಭಕ್ತ್ಯಾ ಮಸ್ತಕಂ ತ್ವತ್ಪದಾಬ್ಜೇ ಭವಜಲನಿಧಿಮಗ್ನಂ ರಕ್ಷ ಮಾಮಾರ್ತಬಂಧೋ ॥ 99 ॥ ರಾಮರತ್ನಮಹಂ ವಂದೇ ಚಿತ್ರಕೂಟಪತಿಂ ಹರಿಂ । ಕೌಸಲ್ಯಾಭಕ್ತಿಸಂಭೂತಂ ಜಾನಕೀಕಂಠಭೂಷಣಂ ॥ 100 ॥ ಇತಿ ಶ್ರೀಸನತ್ಕುಮಾರಸಂಹಿತಾಯಾಂ ನಾರದೋಕ್ತಂ ಶ್ರೀರಾಮಸ್ತವರಾಜಸ್ತೋತ್ರಂ ಸಂಪೂರ್ಣಂ ।