ശ്രീ രാമചന്ദ്ര സ്തുതിഃ

നമാമി ഭക്തവത്സലം കൃപാലു ശീലകോമലം

ഭജാമി തേ പദാംബുജം ഹ്യകാമിനാം സ്വധാമദം ।

നികാമശ്യാമസുന്ദരം ഭവാംബുവാർധിമന്ദരം

പ്രഫുല്ലകഞ്ജലോചനം മദാദിദോഷമോചനം ॥ 1 ॥

പ്രലംബബാഹുവിക്രമം പ്രഭോഽപ്രമേയവൈഭവം

നിഷംഗചാപസായകം ധരം ത്രിലോകനായകം ।

ദിനേശവംശമണ്ഡനം മഹേശചാപഖണ്ഡനം

മുനീന്ദ്രചിത്തരഞ്ജനം സുരാരിബൃന്ദഭഞ്ജനം ॥ 2 ॥

മനോജവൈരിവന്ദിതം ഹ്യജാദിദേവസേവിതം

വിശുദ്ധബോധവിഗ്രഹം സമസ്തദൂഷണാപഹം ।

നമാമി ജാനകീപതിം സുഖാകരം സതാം ഗതിം

ഭജേ സശക്തിസാനുജം ശചീപതിപ്രിയാനുജം ॥ 3 ॥

ത്വദംഘ്രിസീമ യേ നരാ ഭജന്തി ഹീനമത്സരാഃ

പതന്തി നോ ഭവാർണവേ വിതർകവീചിസങ്കുലേ ।

വിവിക്തവാസിനഃ സദാ ഭജന്തി മുക്തയേ മുദാ

നിരസ്യ ഹീന്ദ്രിയാദികം പ്രയാന്തി തേ ഗതിം സ്വകം ॥ 4 ॥

ത്വമേകമദ്ഭുതം പ്രഭും നിരീഹമീശ്വരം വിഭും

ജഗദ്ഗുരും ച ശാശ്വതം തുരീയമേവ കേവലം ।

ഭജാമി ഭാവവല്ലഭം സുയോഗിനാം സുദുർലഭം

സ്വഭക്തകല്പപാദപം സമസ്തസേവ്യമന്വഹം ॥ 5 ॥

അനൂപരൂപഭൂപതിം നതോഽഹമുർവിജാപതിം

പ്രസീദ മേ നമാമി തേ പദാബ്ജഭക്തി ദേഹി മേ ।

പഠന്തി യേ സ്തവം ത്വിദം സദാദരേണ തേ പദം

വ്രജന്തി നാത്ര സംശയം ത്വദീയ ഭക്തിസമ്യുതാഃ ॥ 6 ॥

ഇതി ശ്രീരാമചന്ദ്ര സ്തുതിഃ ।

Recite with devotion and pure heart

Regular practice brings spiritual benefits